19
1 တချုးလၢအံၣ်စရ့လးအိၣ်ဒီးအစီၤပၤဒံးဘၣ်အမုၢ်နံၤတဖၣ်န့ၣ် ပှၤလ့ၤဝံဖိတဂၤအိၣ်ဝဲလၢတၢ်လီၢ်ဖးယံၤဖဲအ့ဖရဲၣ်အကစၢၢ် ကလိန့ၣ်လီၤ. အဝဲဟံးန့ၢ်ပိာ်မုၣ်ဖိတဂၤလၢဝ့ၢ်ဘ့ၤသလ့ဃ့ၣ်, ကီၢ်ယူဒၤအပူၤဒ်အသံၣ်မါအသိးန့ၣ်လီၤ.
2 ဒီးပိာ်မုၣ်န့ၣ်သးဒိၣ်အီၤဒီးက့ၤကဒါက့ၤဆူအပၢ်အဟံၣ်အိၣ် လၢဝ့ၢ်ဘ့ၤသလ့ဃ့ၣ်ဒီးအိၣ်ဝဲဖဲန့ၣ်လွံၢ်လါလီၤ.
3 တုၤနုၤတစု, ပှၤတဂၤန့ၣ်ပာ်လီၤအသးလၢကလဲၤလူၤက့ၤအီၤဒီး ကျဲးစၢးကွဲက့ၤအီၤလၢအကဟဲက့ၤကဒါက့ၤဆူအအိၣ်လီၤ. အဝဲလဲၤတၢ်ဒီးအခ့အပှၤတဂၤဒီးကသ့ၣ်ယီၤခံဒုန့ၣ်လီၤ. ဒီးပိာ်မုၣ်န့ၣ်ဆှၢပှၤလ့ၤဝံဖိန့ၣ်ဆူအဟံၣ်ပူၤဒီးဖဲအပၢ် ထံၣ်အီၤန့ၣ်တူၢ်လိာ်မုာ်အီၤလီၤ.
4 ပိာ်မုၣ်ဖိအပၢ်န့ၣ်ကွဲအီၤသပှၢ်ပှၢ်လၢကအိၣ်ဖဲန့ၣ်သတးဒီး အိၣ်ဝဲဒၣ်သၢသီန့ၣ်လီၤ. အဝဲသ့ၣ်အိၣ်သကိးတ့ၢ်ဒီးမံလၢမုၢ်နၤဖဲန့ၣ်လီၤ.
5 လၢလွံၢ်သီတသီန့ၣ်, အဝဲသ့ၣ်ပၢၢ်ထီၣ်ဂီၤဂီၤဒီးကတဲာ်ကတီၤအသးလၢကဟးထီၣ်ဝဲဒၣ်လီၤ. ဘၣ်ဆၣ်ဒီးပိာ်မုၣ်ဖိအပၢ်န့ၣ် စံးဘၣ်ပှၤလ့ၤဝံဖိ, “အီၣ်ဆိတၢ်အီၣ်လၢညါဒ်သိးနကန့ၢ်ဂံၢ်န့ၢ်ဘါတက့ၢ်. ဝံၤဒီးနလဲၤတၢ်သ့ဝဲလီၤ.”
6 ဒီးပှၤခံဂၤန့ၣ်ဆ့ၣ်နီၤဒီးအီၣ်သကိးအီသကိးတၢ်လီၤ. တုၤနုၤတစု ပိာ်မုၣ်ဖိအပၢ်န့ၣ်စံးဘၣ်အီၤ, “မံဖဲအံၤတနၤဒီးမၤမုာ်နသးတက့ၢ်.”
7 ပှၤလ့ၤဝံဖိဆၢထၢၣ်ဒ်သိးကလဲၤတၢ်လီၤ. ဘၣ်ဆၣ်ဒီးပိာ်မုၣ်ဖိ အပၢ်န့ၣ်ကိးအီၤသပှၢ်ပှၢ်အဃိမံကဒီးဝဲဖဲန့ၣ်တနၤလီၤ.
8 ဒီးယဲၢ်သီတသီဂီၤဂီၤန့ၣ်အဝဲကတဲာ်ကတီၤထီၣ်အသးလၢကလဲၤတၢ်လီၤ. ဘၣ်ဆၣ်ဒီးပိာ်မုၣ်ဖိအပၢ်န့ၣ်စံးအီၤ, “အီၣ်တၢ်တမံၤမံၤဒီး ခိးတုၤမုၢ်ဃ့ၢ်လီၤတက့ၢ်.” ဒီးပှၤခံဂၤန့ၣ်အီၣ်သကိးတၢ်လီၤ.
9 ဖဲပှၤတဂၤန့ၣ်, ဒီးအသံၣ်မါဒီးအခ့အပှၤကဟးထီၣ်အဆၢန့ၣ်ပိာ် မုၣ်ဖိအပၢ်စံးအီၤ, “ကွၢ်ကွၢ်, ဘူးမုၢ်ကဟါလံ. နကြၢးအိၣ်ကဒီးအသီတနၤလီၤ. တၢ်ကခံးလီၤလီၤ. အိၣ်ဖဲအံၤဒီးမၤမုာ်နသးတက့ၢ်. ခဲမုၢ်ဆ့ၣ်နဂဲၤထၢၣ်ဂီၤဂီၤဒီးက့ၤဆူဟံၣ်သ့ဝဲလီၤ.”
10 ဘၣ်ဆၣ်ဒီးပှၤတဂၤန့ၣ်တအဲၣ်ဒိးအိၣ်လၢၤသီတနၤဘၣ်အဃိ အဝဲဒီးအသံၣ်မါဒီးအခ့အပှၤစးထီၣ်လဲၤတၢ်ဃုာ်ဒီးကသ့ၣ်ယီၤ ခံဒုလၢအအိၣ်ဒီးဂီၤကၢ်တဖၣ်န့ၣ်လီၤ.
11 ဖဲအဝဲသ့ၣ်တုၤလၢဝ့ၢ်ယဘူၣ် (ဒ်ပစံးတၢ်အသိး, ဝ့ၢ်ယရူၤၡလ့ၣ်) န့ၣ်တၢ်လီၤကညီၣ်လံန့ၣ်လီၤ. ဒီးအခ့အပှၤန့ၣ်စံးဘၣ်အကစၢ်, “တကြၢးလၢပအိၣ်ကတီၢ်ဒီးမံဖဲအံၤလၢပှၤယဘူၣ်ဖိအဝ့ၢ်ဘၣ်ဧါ.”
12 ဘၣ်ဆၣ်ဒီးအကစၢ်စံးဘၣ်အီၤ, “ဝ့ၢ်တဝ့ၢ်လၢတမ့ၢ်ပှၤအံၣ်စရ့လး ဖိအဝ့ၢ်န့ၣ်ပတအိၣ်ကတီၢ်ဘၣ်.
13 ပကလဲၤပူၤအီၤဒီးလဲၤယံၤထီၣ်တစဲးဒီးမံဖဲဝ့ၢ်ကံဘဧၤ မ့တမ့ၢ်ဝ့ၢ်ရၤမါန့ၣ်လီၤ.”
14 ဒီးအဝဲသ့ၣ်လဲၤပူၤကွံာ်ဝ့ၢ်ယဘူၣ်ဒီးလဲၤဆူညါလီၤ. ဖဲအဝဲသ့ၣ်တုၤဃီၤလၢဝ့ၢ်ကံဘဧၤအိၣ်လၢပှၤဘံၣ်ယၤမံၣ်ဖိ အကီၢ်ပူၤန့ၣ်မုၢ်လီၤနုာ်လံန့ၣ်လီၤ.
15 ဒီးအဝဲသ့ၣ်ဃၣ်ကွံာ်အသးလၢကျဲမုၢ်ခိၣ်ဒ်သိး အကမံဝဲဖဲန့ၣ်လီၤ. အဝဲသ့ၣ်လဲၤနုာ်ဆူဝ့ၢ်ပူၤဒီးဆ့ၣ်နီၤလၢဝ့ၢ်အကျဲစၢၤန့ၣ်လီၤ. ဘၣ်ဆၣ်ဒီးပှၤလၢအကတူၢ်လိာ်အဝဲသ့ၣ်ဆူအဟံၣ်လၢမုၢ်တနၤန့ၣ် တအိၣ်ဘၣ်နီတဂၤဘၣ်.
16 ဖဲအဝဲသ့ၣ်အိၣ်ဖဲန့ၣ်အဖၢမုၢ်ပှၤသးပှၢ်လၢအမၤတၢ်လၢစံာ်ပျီပူၤတဂၤဟဲက့ၤဖဲမုၢ်ဟါလီၤအကတီၢ်န့ၣ်လီၤ. အဝဲအထံးအခံမ့ၢ်ဝဲလၢအ့ဖရဲၣ်အကစၢၢ်ကလိဘၣ်ဆၣ်ဒီးခဲအံၤ အိၣ်ဝဲဖဲဝ့ၢ်ကံဘဧၤန့ၣ်လီၤ. (ပှၤအဂၤတဖၣ်လၢတၢ်လီၢ်ဖဲန့ၣ်မ့ၢ်ပှၤဘံၣ်ယၤမံၣ်ဖိန့ၣ်လီၤ.)
17 ဒီးပှၤသးပှၢ်န့ၣ်ပာ်သူၣ်ပာ်သးလၢပှၤလဲၤတၢ်ဖိအိၣ်လၢဝ့ၢ် အကျဲစၢၤန့ၣ်ဒီးသံကွၢ်အီၤ, “သုဟဲဖဲလဲၣ်ခီလဲၣ်. သုကလဲၤဆူလဲၣ်.”
18 ပှၤလ့ၤဝံဖိစံးဆၢဝဲ, “ပလဲၤတ့ၢ်လၢဝ့ၢ်ဘ့ၤသလ့ဃ့ၢ်ကီၢ်ယူဒၤ ဒီးခဲအံၤပကက့ၤဆူပဟံၣ်အိၣ်လၢအ့ဖရဲၣ်အကစၢၢ်ကလိအပူၤန့ၣ်လီၤ. ပှၤကတူၢ်လိာ်ပှၤလၢမုၢ်တနၤအံၤအဂီၢ်တအိၣ်နီတဂၤဘၣ်.
19 တၢ်အီၣ်တၢ်အီဒီးဘုလီၢ်အိၣ်လၢပကသ့ၣ်ယီၤတဖၣ်အဂီၢ်, ကိၣ်ဒီးစပံးထံအိၣ်လၢယၤ, ယသံၣ်မါဒီးယကုၢ်အဂီၢ်န့ၣ်လီၤ. ပအိၣ်ဒီးတၢ်ကိးမံၤဒဲးလၢပလိၣ်ဘၣ်အီၤလီၤ.”
20 ပှၤသးပှၢ်န့ၣ်စံး, “ယတူၢ်လိာ်မုာ်သုလၢယဟံၣ်လီၤ. ယကအံးထွဲကွၢ်ထွဲသုလီၤ. တနၤအံၤသုမံလၢဝ့ၢ်ကျဲစၢၤအလီၢ်တအိၣ်ဘၣ်.”
21 ဒီးအဝဲက့ၤကိးအဝဲသ့ၣ်ဆူအဟံၣ် ဒီးဒုးအီၣ်အကသ့ၣ်ယီၤတဖၣ်အဆၣ်လီၤ. အပှၤတမှံၤတဖၣ်သ့အခီၣ်ဒီးအီၣ်တၢ်အီတၢ်လီၤ.
22 ဖဲအဝဲသ့ၣ်သူၣ်ဖှံသးညီအကတီၢ်န့ၣ်သတူၢ်ကလာ်ပှၤအလုၢ် အလၢ်တဂ့ၤလၢဝ့ၢ်ပူၤတနီၤကဝီၤဃာ်ဟံၣ်န့ၣ်ဒီးဒိတကျိာ်တြဲၤလီၤ. အဝဲသ့ၣ်စံးဘၣ်ပှၤသးပှၢ်န့ၣ်, “ဟဲကိးထီၣ်ပှၤတဂၤလၢအဟဲက့ၤပိာ်နခံဆူနဟံၣ်တက့ၢ်. ပအဲၣ်ဒိးမံဃုာ်ဒီးအီၤလီၤ.”
23 ဘၣ်ဆၣ်ဒီးပှၤသးပှၢ်န့ၣ်လဲၤထီၣ်ဆူခိဒီးစံးဘၣ်အဝဲသ့ၣ်, “တံၤသကိးသ့ၣ်ဧၢ, ဝံသးစူၤတဘၣ်မၤတၢ်အၢတၢ်သီဒ်န့ၣ် တမံၤတဂ့ၤ. အဝဲအံၤမ့ၢ်ယပှၤတမှံၤလီၤ.
24 ကွၢ်ကွၢ်, အဝဲအသံၣ်မါဒီးယဖိမုၣ်, မုၣ်ကနီၤဖိအိၣ်ဝဲလီၤ. ယကဟဲကိးထီၣ်အဝဲသ့ၣ်ခဲအံၤဒီးသုဟံးန့ၢ်အီၤသ့လီၤ. ကယဲၢ်တၢ်လၢသုသးအိၣ်မၤအဝဲသ့ၣ်တမံၤလၢ်လၢ်န့ၣ်မၤအီၤတက့ၢ်. မ့မ့ၢ်တၢ်အၢတၢ်သီတမံၤန့ၣ်မၤပှၤတဂၤအံၤတဂ့ၤ”
25 ဘၣ်ဆၣ်ဒီးပှၤတဖၣ်န့ၣ်တဒိကနၣ်အီၤဘၣ်. လၢတၢ်န့ၣ်အဃိ ပှၤလ့ၤဝံဖိဟံးန့ၢ်အသံၣ်မါဒီးပာ်အီၤလၢတၢ်ချၢဃုာ်ဒီးအဝဲသ့ၣ်လီၤ. အဝဲသ့ၣ်မၤတရီတပါပိာ်မုၣ်န့ၣ်ဒီးမၤဟးဂီၤအီၤသီတနၤကျၢၤ တုၤမုၢ်ဆ့ၣ်ဝါထီၣ်ဒၣ်လဲာ်တဆိကတီၢ်ဝဲဘၣ်.
26 ဖဲမုၢ်ဆ့ၣ်ထီၣ်ဂီၤဂီၤန့ၣ်, ပိာ်မုၣ်န့ၣ်ဟဲက့ၤဝဲဒီးလီၤ ဃံၤလၢပှၤသးပှၢ်န့ၣ်အတြဲၤအခီၣ်ထံး, ဖဲအဝၤအိၣ်ဝဲအလီၢ်န့ၣ်လီၤ. ဖဲမုၢ်ဝါထီၣ်န့ၣ်ပိာ်မုၣ်အိၣ်ဒံးဝဲဖဲန့ၣ်လီၤ.
27 လၢမုၢ်တဂီၤန့ၣ်အဝၤပၢၢ်ထီၣ်ဒီးဖဲအအိးထီၣ်တြဲၤလၢကလဲၤတၢ်န့ၣ်, ထံၣ်ဝဲအသံၣ်မါလီၤဃံၤလၢဟံၣ်မဲာ်ညါဒီးအစုယူာ်ဃီၤအသးဆူ တြဲၤအအိၣ်လီၤ.
28 ဒီးအဝဲစံး, “ဂဲၤဆၢထၢၣ်ဒီးမ်ပလဲၤသကိးတက့ၢ်.” ဘၣ်ဆၣ်ဒီးတၢ်စံးဆၢတအိၣ်ဘၣ်နီတမံၤဘၣ်. ဒီးပာ်ထီၣ်အသံၣ်မါ လၢကသ့ၣ်ယီၤအလိၤ ဒီးစးထီၣ်အတၢ်လဲၤဆူဟံၣ်လီၤ.
29 ဖဲအတုၤလၢဟံၣ်န့ၣ်, အဝဲလဲၤနုာ်ဆူဟံၣ်ပူၤဒီးဟံးန့ၢ်နး တဘ့ၣ်လီၤ. အဝဲဟံးထီၣ်အသံၣ်မါအစိၣ်ဒီးကျီတဲာ်အီၤတဆံခံကူာ် ဒီးဆှၢအီၤဆူပှၤအံၣ်စရ့လးအဒူၣ်တဆံခံဒူၣ် အအိၣ်စုာ်စုာ်လီၤ.
30 ဒီးပှၤကိးဂၤဒဲးလၢအထံၣ်တၢ်န့ၣ်စံးဝဲ, “ပတနၢ်ဟူတ့ၢ်တၢ်မၤအသးဒ်အံၤနီတစုဘၣ်. တၢ်မၤအသးဒ်အံၤန့ၣ်စးထီၣ်လၢပှၤအံၣ်စရ့လးဖိဟးထီၣ်လၢကီၢ်အဲၤကူပတူးအပူၤလံၤလံၤ တမၤတ့ၢ်အသးနီတစုဘၣ်. ဘၣ်ဃးဒီးတၢ်ဂ့ၢ်အံၤပကဘၣ်မၤတၢ်တမံၤမံၤ လီၤ. ကမ့ၢ်တၢ်မနုၤတမံၤလဲၣ်.”