13
1 ပှၤအံၣ်စရ့လးဖိသ့ၣ်တဖၣ်မၤကဒီးတၢ်ဒဲးဘးထီဒါယွၤဒီး ယွၤပျဲပှၤဖလ့ၡသးဖိတဖၣ်ပၢအဝဲသ့ၣ်အနံၣ်လွံၢ်ဆံန့ၣ်လီၤ.
2 အကတီၢ်ဖဲန့ၣ်ပှၤအိၣ်ဝဲတဂၤအမံၤလၢစီၤမၤနိလီၤ. အဝဲဒၣ်အိၣ်လၢဝ့ၢ်စိးရၤလီၤ. အဝဲဒၣ်မ့ၢ်ဝဲစီၤဒၣ်အဒူၣ်ဖိထၢဖိအကျါတဂၤလီၤ. အဝဲအမါန့ၣ်အိၣ်ဒံၣ်အိၣ်ဖိတန့ၢ်ဝဲနီတစုဘၣ်.
3 ယွၤအကလူးလီၣ်ဖျါထီၣ်အသးလၢအီၤဒီးစံးဘၣ်အီၤ, “နအိၣ်ဒံၣ်အိၣ်ဖိတန့ၢ်ဝဲနီတစုဘၣ်, ဘၣ်ဆၣ်ဒီးတယံာ်ဘၣ်ဒီး နကဒၢထီၣ်ဒီးမၤန့ၢ်ဖိခွါတဂၤလီၤ.
4 ပလီၢ်နသးဒ်သိးနသုတအီဘၣ်သံးမ့ၢ်ဂ့ၤစပံးထံမ့ၢ်ဂ့ၤ, အီၣ်ဘၣ်တၢ်အီၣ်လၢတၢ်တြီအီၤမ့ၢ်ဂ့ၤနီတမံၤဘၣ်န့ၣ်တက့ၢ်.
5 ဒီးဖဲနဖိခွါအိၣ်ဖျဲၣ်ထီၣ်လံန့ၣ်နတဘၣ်တံာ်တဲာ်အခိၣ်သူနီတစုဘၣ်. အဂ့ၢ်ဒ်အံၤ, စးထီၣ်လၢအအိၣ်ဖျဲၣ်ထီၣ်မုၢ်တနံၤန့ၣ် အဝဲကဘၣ်တၢ်ပာ်စီဆှံအီၤဆူယွၤအအိၣ်ဒ်ပှၤနစၤရံဖိတဂၤအသိးန့ၣ်လီၤ. အဝဲကစးထီၣ်တၢ်ဖံးတၢ်မၤလၢတၢ်အုၣ်က့ၤခီၣ်က့ၤကီၢ်အံၣ်စရ့လးလၢပှၤဖလ့ၡသးဖိ အစုပူၤန့ၣ်လီၤ.
6 အန့ၣ်ဝံၤဒီးပိာ်မုၣ်န့ၣ်လဲၤတဲဘၣ်အဝၤ, “ကစၢ်ယွၤအပှၤကညီတဂၤဟဲဆူယအိၣ်ဒီး ဖျါလီၤပျံၤလီၤဖုးဒ်ကစၢ်ယွၤအမူခိၣ်ကလူးတဂၤအသိးလီၤ. ယတသံကွၢ်တ့ၢ်အီၤလၢမ့ၢ်အဟဲဖဲလဲၣ်ဒီးတစံးဘၣ်စ့ၢ်ကီးယၤလၢအမံၤဘၣ်.
7 ဘၣ်ဆၣ်ဒီးအဝဲဒၣ်စံးဘၣ်ယၤလၢယကဒၢထီၣ်ဒီးန့ၢ်ဘၣ်ဖိခွါတဂၤလီၤ. စံးဘၣ်ယၤလၢယတဘၣ်အီသံးမ့ၢ်ဂ့ၤ, စပံးထံမ့ၢ်ဂ့ၤ, တၢ်အီၣ်လၢဘၣ်တၢ်တြီအီၤမ့ၢ်ဂ့ၤနီတမံၤဘၣ်. အဂ့ၢ်ဒ်အံၤဖိသၣ်န့ၣ်ကဘၣ်တၢ်ပာ်စီဆှံထီၣ်အီၤဆူယွၤအအိၣ်ဒ် ပှၤနစၤရံဖိတဂၤအသိးတစိၤသးလီၤ.”
8 အန့ၣ်ဒီးစီၤမၤနိ ဘါထုကဖၣ်တၢ်ဆူယွၤအအိၣ်, “ယွၤဧၢ, ဝံသးစူၤဆှၢကဒါက့ၤကစၢ်ယွၤအပှၤကညီလၢနဆှၢတ့ၢ်ဆူ ပအိၣ်ဒီးတဲဘၣ်ပှၤတၢ်လၢပကဘၣ်မၤအီၤ ဖဲအဝဲအိၣ်ဖျဲၣ်ထီၣ်အကတီၢ်န့ၣ်တက့ၢ်.”
9 ကစၢ်ယွၤမၤဝဲဒ်စီၤမၤနိဃ့တၢ်အသိးဒီးအကလူးဟဲက့ၤကဒါက့ၤဆူပိာ်မုၣ်န့ၣ်အအိၣ် ဖဲအဆ့ၣ်နီၤဝဲလၢပျီပူၤန့ၣ်လီၤ. အဝၤစီၤမၤနိ တအိၣ်ဒီးအီၤဘၣ်.
10 မၤသးဒ်န့ၣ်ဒီးအဝဲဃ့ၢ်ထီၣ်ဝဲတကီၢ်ခါဆူအဝၤအိၣ်ဒီးစံးဘၣ်အီၤ, “ကွၢ်တက့ၢ်. ပှၤတဂၤလၢအဟဲဆူယအိၣ်လၢအပူၤကွံာ်တနံၤန့ၣ် အိၣ်ဖျါထီၣ်ကဒီးလၢယၤလံ.”
11 ဒီးစီၤမၤနိဂဲၤထၢၣ်ဒီးလဲၤပိာ်အမါအခံန့ၣ်လီၤ. အဝဲလဲၤဆူ ပှၤတဂၤန့ၣ်အအိၣ်ဒီးသံကွၢ်ဝဲ, “ပှၤလၢအကတိၤတ့ၢ်တၢ်ဒီးယမါန့ၣ်မ့ၢ်နၤဧါ.” ဒီးစံးဆၢဝဲဒၣ်, “မ့ၢ်လီၤ.”
12 အန့ၣ်ဒီးစီၤမၤနိစံးဝဲ, “မ့မ့ၢ်ဒ်န့ၣ်ဒီးခဲအံၤ, ဖဲတၢ်လၢနစံးတ့ၢ်တဖၣ်လၢထီၣ်ပှဲၤထီၣ်ဝဲန့ၣ်, ဖိသၣ်အံၤကဘၣ်မၤတၢ်မနုၤလဲၣ်. အဝဲကဘၣ်အိၣ်မူတၢ်အိၣ်မူဒ်လဲၣ်တကလုာ်လဲၣ်.”
13 ယွၤအကလူးစံးဆၢဝဲဒၣ်, “နမါကဘၣ်မၤလီၤတံၢ်ကယဲၢ်တၢ်ကိးမံၤဒဲးလၢယစံးဘၣ်တ့ၢ်အီၤတဖၣ်န့ၣ်လီၤ.
14 အဝဲတဘၣ်အီၣ်တၢ်ဟဲလၢစပံးထူၣ်မ့ၢ်ဂ့ၤ, အဝဲတဘၣ်အီသံးမ့ၢ်ဂ့ၤ, စပံးထံမ့ၢ်ဂ့ၤ, တဘၣ်အီၣ်တၢ်အီၣ်လၢဘၣ်တၢ်တြီအီၤမ့ၢ်ဂ့ၤနီတမံၤဘၣ်. အဝဲကဘၣ်မၤတၢ်ကိးမံၤဒဲးလၢယတဲဘၣ်အီၤတဖၣ်န့ၣ်လီၤ.”
15 တသ့ၣ်ညါတ့ၢ်ဝဲလၢအမ့ၢ်ယွၤအကလူးအဃိ, စီၤမၤနိစံးဘၣ်အီၤ, “ဝံသးစူၤက့ၤဒံးနဲတဂ့ၤ, ပျဲပဖီထီၣ်မဲာ်တဲးလဲးသးစၢ်ဖိတဒုလၢနဂီၢ်တက့ၢ်.”
16 ဘၣ်ဆၣ်ဒီးကလူးန့ၣ်စံးဘၣ်အီၤ, “ယမ့ၢ်အိၣ်ဒံးဒီးယတအီၣ်နတၢ်အီၣ်ဘၣ်. ဘၣ်ဆၣ်ဒီးနမ့ၢ်သးအိၣ်ကတဲာ်ကတီၤအီၤဒီး, ဆူးကဲၤထီၣ်အီၤဒ်တၢ်လုၢ်မၤဘူၣ်တမံၤဆူယွၤအအိၣ်တက့ၢ်.”
17 စီၤမၤနိစံးဆၢဝဲ, “တဲပှၤလၢနမံၤဒ်သိးဖဲနတၢ်ကတိၤလၢထီၣ်ပှဲၤထီၣ်ဝဲန့ၣ် ပမၤလၤကပီၤနၤကသ့အဂ့ၢ်တက့ၢ်.”
18 ကလူးန့ၣ်သံကွၢ်ဝဲဒၣ်, “ဘၣ်မနုၤလၢနအဲၣ်ဒိးသ့ၣ်ညါယမံၤလဲၣ်. တၢ်န့ၣ်မ့ၢ်မံၤတဖျၢၣ်လၢတၢ်လီၤလးအပူၤလီၤ.”
19 မၤသးဒ်န့ၣ်ဒီး, စီၤမၤနိဟံးန့ၢ်မဲာ်တဲးလဲးသးစၢ်ဖိတဒု ဒီးကိၣ်ကမူၣ်တစဲးဒီးလုၢ်ထီၣ်အီၤလၢလၢၢ်တၢ်လုၢ်လီၢ်အဖီခိၣ်ဆူယွၤ, လၢအမၤတၢ်လီၤလးတဖၣ်န့ၣ်အအိၣ်လီၤ.
20 ဖဲမ့ၣ်အူလၣ်တဖၣ်ဟဲထီၣ်ဝဲလၢတၢ်လုၢ်လီၢ်အဖီခိၣ်န့ၣ်စီၤမၤ နိဒီးအမါထံၣ်ယွၤအကလူးက့ၤထီၣ်ဆူမူခိၣ်လၢမ့ၣ်အူကျါန့ၣ် လီၤ.
21 တုၤနုၤတစု, စီၤမၤနိသ့ၣ်ညါလီၤတံၢ်ဝဲလၢပှၤတဂၤန့ၣ်မ့ၢ်ဝဲ ယွၤအကလူးဒီးအဝဲဒၣ်ဒီးအမါထိၣ်လီၤပှီၤအသး ဒီးပိာ်လီၤအမဲာ်လၢဟီၣ်ခိၣ်လိၤလီၤ. အဝဲသ့ၣ်တထံၣ်လၢၤကလူးန့ၣ် နီတစုလၢၤဘၣ်.
22 စီၤမၤနိစံးဘၣ်အမါ, “ပကသံသပှၢ်တၢၢ်လီၤ. အဂ့ၢ်ဒ်အံၤ, ပထံၣ်ဘၣ်တ့ၢ်ကစၢ်ယွၤလံ.”
23 ဘၣ်ဆၣ်ဒီးအမါစံးဆၢအီၤ, “ယွၤမ့ၢ်အဲၣ်ဒိးမၤသံတ့ၢ်ပှၤ ဒီးအဝဲတတူၢ်လိာ်တ့ၢ်ဝဲပတၢ်လုၢ်မၤဘူၣ်ဘၣ်. အဝဲတဒုးနဲၣ်တ့ၢ်ပှၤတၢ်ခဲလၢာ်အံၤမ့ၢ်ဂ့ၤ, စံးဘၣ်ပှၤတၢ်ဂ့ၢ်ဒ်အံၤတဖၣ်လၢအကတီၢ်အံၤန့ၣ်ဘၣ်.”
24 ဒီးပိာ်မုၣ်န့ၣ်ဆံးစၢ်ထီၣ်အဖိခွါတဂၤဒီးယုၢ်ဝဲအမံၤလၢ စီၤၡံၣ်ၡိၣ်လီၤ. ဖိသၣ်ဒိၣ်ထီၣ်ဝဲဒီးယွၤဆိၣ်ဂ့ၤအီၤလီၤ.
25 ဒီးယွၤအစိကမီၤစးထီၣ်မၤဆူၣ်ထီၣ်အဂံၢ်အဘါဖဲအဝဲအိၣ်လၢ ဝ့ၢ်စိးရၤဒီးဝ့ၢ်အ့ၤၡတိလးအဘၢၣ်စၢၤဖဲပှၤဒၣ်ဖိအသူၣ်ဒဲအလီၢ်ပူၤအခါန့ၣ်လီၤ.