14
1 တနံၤန့ၣ်စီၤၡံၣ်ၡိၣ်လဲၤလီၤဆူဝ့ၢ်တံးမနး, ဖဲအပာ်သူၣ်ပာ်သးဘၣ်ပှၤဖလ့ၡသးမုၣ်ဖိတဂၤန့ၣ်လီၤ.
2 အဝဲက့ၤကဒါက့ၤဆူအဟံၣ်ဒီးတဲဘၣ်အပၢ်ဒီးအမိၢ်, “ပှၤဖလ့ၡသးမုၣ်ဖိအိၣ်လၢဝ့ၢ်တံးမနးတဂၤန့ၣ်ထုးန့ၢ်ယသးန့ၣ်လီၤ. မၤန့ၢ်အီၤလၢယဂီၢ်တက့ၢ်. ယအဲၣ်ဒိးဖျီယသးလၢအီၤလီၤ.”
3 မ့မ့ၢ်အပၢ်ဒီးအမိၢ်တခီသံကွၢ်အီၤ, “ဘၣ်မနုၤလၢနကဘၣ်လဲၤဆူပှၤဖလ့ၡသးဖိတစူၢ်တနာ်ယွၤအအိၣ်လၢနကမၤန့ၢ်နမါတဂၤအဂီၢ်လဲၣ်. မ့ၢ်နဃုန့ၢ်ပိာ်မုၣ်ဖိတဂၤလၢပဒူၣ်ဖိထၢဖိအကျါ, လၢပပှၤကလုာ်အကျါတသ့ဘၣ်ဧါ.”
ဘၣ်ဆၣ်ဒီးစီၤၡံၣ်ၡိၣ်တဲအပၢ်, “ပိာ်မုၣ်တဂၤန့ၣ်မ့ၢ်ပှၤလၢယအဲၣ်ဒိးနမၤန့ၢ်အီၤလၢယဂီၢ်လီၤ. ယအဲၣ်အီၤလီၤ.”
4 အမိၢ်အပၢ်တဖၣ်တသ့ၣ်ညါလၢတၢ်န့ၣ်မ့ၢ်ယွၤအတၢ်ဆှၢစီၤၡံၣ်ၡိၣ် လၢအကမၤတၢ်န့ၢ်အဂ့ၢ်ဘၣ်န့ၣ်လီၤ. အဂ့ၢ်ဒ်အံၤ, ယွၤဃုတၢ်အခွဲးအယာ်လၢကဒုးပှၤဖလ့ၡသးဖိတဖၣ်န့ၣ်လီၤ. အကတီၢ်ဖဲအံၤပှၤဖလ့ၡသးဖိတဖၣ်ပၢကီၢ်အံၣ်စရ့လးန့ၣ်လီၤ.
5 မၤသးဒ်န့ၣ်ဒီး, စီၤၡံၣ်ၡိၣ်လဲၤလီၤဆူဝ့ၢ်တံးမနးဃုာ်ဒီးအပၢ်ဒီးအမိၢ်လီၤ. ဖဲအဝဲသ့ၣ်လဲၤခီဖျိစပံးလီၢ်န့ၣ်အဝဲနၢ်ဟူခ့ယုၢ်ဖိတဒုကညီၤထီၣ်အကလုၢ်လီၤ.
6 သတူၢ်ကလာ်န့ၣ်ယွၤအစိကမီၤမၤဆူၣ်ထီၣ်စီၤၡံၣ်ၡိၣ် ဒီးအဝဲဖှီကွံာ်ခ့ယုၢ်တဒုန့ၣ်ထဲလၢအစုယၢ်ခီဧိၤန့ၣ် မၤသးဒ်မဲာ်တဲးလဲးအစၢ်ဖိတဒုအသိးလီၤ. ဘၣ်ဆၣ်ဒီးတတဲဘၣ်အမိၢ်အပၢ်လၢတၢ်လၢအမၤတ့ၢ်ဝဲအဂ့ၢ်န့ၣ်ဘၣ်.
7 အန့ၣ်ဝံၤဒီး, အဝဲလဲၤကတိၤတၢ်ဒီးပိာ်မုၣ်ဖိတဂၤန့ၣ်ဒီးဘၣ်အသးလၢပိာ်မုၣ်န့ၣ်လီၤ.
8 တဘျုးနံၤအလီၢ်ခံန့ၣ်စီၤၡံၣ်ၡိၣ်လဲၤကဒါက့ၤဝဲလၢအကဖျီအသး ဒီးပိာ်မုၣ်အဂီၢ်န့ၣ်လီၤ. ဖဲအလဲၤလၢကျဲန့ၣ်လဲၤကွၢ်ဝဲခ့ယုၢ်လၢအမၤသံတ့ၢ်ဝဲဒီး ကမၢကမၣ်ဝဲလၢအထံၣ်ဘၣ်ကနဲအဖုအဂီၢ်ဒီးကနဲစီအိၣ်လၢခ့ယုၢ်အသံစိၣ်အပူၤန့ၣ်လီၤ.
9 အဝဲပှၢ်န့ၣ်ဝဲကနဲစီန့ၣ်ဆူအစုပူၤဒီးဖဲအလဲၤတၢ်အခါန့ၣ်အီၣ်ဝဲဒၣ်လီၤ. ဝံၤဒီးလဲၤဆူအပၢ်ဒီးအမိၢ်အိၣ်ဒီးဟ့ၣ်ဒုးအီၣ်ဝဲတနီၤလီၤ. အဝဲသ့ၣ်အီၣ်ဝဲလီၤ. ဘၣ်ဆၣ်ဒီးစီၤၡံၣ်ၡိၣ်တတဲဘၣ်အဝဲသ့ၣ်လၢ အမၤန့ၣ်ကနဲစီၤန့ၣ်လၢခ့ယုၢ်အသံစိၣ်တဒုန့ၣ်အပူၤအဂ့ၢ်န့ၣ်ဘၣ်.
10 အပၢ်လဲၤဆူပိာ်မုၣ်ဖိတဂၤန့ၣ်အဟံၣ်ဒီးစီၤၡံၣ်ၡိၣ်မၤတၢ်အီၣ်တၢ်အီအမူးဖဲန့ၣ်လီၤ. တၢ်အံၤမ့ၢ်ပှၤသူၣ်ဘီၣ်သးစၢ်ဖဲန့ၣ်တဖၣ်အလုၢ်အလၢ်န့ၣ်လီၤ.
11 ဖဲပှၤဖလ့ၡသးဖိတဖၣ်ထံၣ်အီၤန့ၣ် အဝဲသ့ၣ်ဆှၢလီၤပှၤသးစၢ်အဂၤသၢဆံလၢအကအိၣ်ဒီးအီၤန့ၣ်လီၤ.
12 စီၤၡံၣ်ၡိၣ်စံးဘၣ်အဝဲသ့ၣ်, “ယကတဲသုလၢတၢ်ပှိၤပှံပှိၤပှီၢ် တခါလီၤ. ဒီးယတၤသုတဂၤစုာ်စုာ်လၢသုစံးဆၢယၤအခီပညီ တချုးဖဲတၢ်တ့တၢ်ဖျီအမူးတချုးဝံၤဝဲဒံးဘၣ်နွံသီအတီၢ်ပူၤန့ၣ်မ့ၢ်တသ့ဒီး, သုကဘၣ်ဟ့ၣ်ယၤဆ့ဖှီဝါအဂ့ၤလၢသုအိၣ်တဂၤတဘ့ၣ် ဒီးတၢ်ကလံၤကလဲတၢ်ကူတၢ်ကၤအဂီၢ်တဂၤတဘ့ၣ်စ့ၢ်ကီးလီၤ.”
13 “တဲပှၤနတၢ်ပှိၤပှံပှိၤပှီၢ်တက့ၢ်.” အဝဲသ့ၣ်စံးဆၢဝဲဒၣ်, “ပက, ကနၣ်အီၤလီၤ.”
14 စီၤၡံၣ်ၡိၣ်စံးဝဲ,
“လၢတၢ်အီၣ်အပူၤန့ၣ်တၢ်အီၣ်တၢ်အီဟဲထီၣ်ဝဲ,
လၢတၢ်လၢအဂံၢ်ဘါဆူၣ်အပူၤတၢ်အဆၢဟဲထီၣ်ဝဲ”, န့ၣ်လီၤ. သၢသီပူၤကွံာ်ဝဲဘၣ်ဆၣ်ဒီးအဝဲသ့ၣ်ဒွးဝဲတၢ်ပှိၤပှံပှိၤပှီၢ် အခီပညီမ့ၢ်တၢ်မနုၤမနုၤတသ့ဘၣ်.
15 လၢလွံၢ်သီတသီအနံၤန့ၣ်အဝဲသ့ၣ်စံးဘၣ်စီၤၡံၣ်ၡိၣ်အမါ, “က့ၤသံကွၢ်ခူသူၣ်နဝၤဒ်သိးကတဲပှၤလၢတၢ်ပှိၤပှံပှိၤပှီၢ် အခီပညီမ့ၢ်တၢ်မနုၤမနုၤတက့ၢ်. နမ့ၢ်တမၤဒ်န့ၣ်ဒီးပကဆူးကဲၤထီၣ် နပၢ်အဟံၣ်လၢမ့ၣ်အူဒီးဒွဲၣ်ကွံာ်နၤဃုာ်ဒီးအီၤန့ၣ်လီၤ. သုဝဲခံဂၤအံၤသုကွဲပှၤဒ်သိးသုကဂုာ်န့ၢ်တၢ်လၢပအိၣ်လီၤ တမ့ၢ်ဘၣ်ဧါ.”
16 မၤသးဒ်န့ၣ်ဒီး, စီၤၡံၣ်ၡိၣ်အမါက့ၤဆူအအိၣ်လၢမဲာ်ထံမဲာ်နိဒီးစံး, “နတအဲၣ်ယၤဘၣ်. နသးဟ့ယၤလီၤ. နတဲဘၣ်တၢ်ပှိၤပှံပှိၤပှီၢ်လၢဒီးနတတဲဘၣ်ယၤ လၢအခီပညီဘၣ်.”
စီၤၡံၣ်ၡိၣ်စံး, “ကွၢ်လၢအံၤ, ယမိၢ်ယပၢ်ဒၣ်လဲာ်န့ၣ်ယတတဲဘၣ်အဝဲသ့ၣ်ဘၣ်. ဘၣ်မနုၤလၢယကဘၣ်တဲနၤလဲၣ်.”
17 ပိာ်မုၣ်န့ၣ်ဟီၣ်လၢတၢ်န့ၣ်အဃိလၢမူးအမုၢ်နံၤနွံသီအပူၤန့ၣ်လီၤ. ဘၣ်ဆၣ်ဒီးလၢမူးအမုၢ်နံၤနွံသီတသီန့ၣ်အဝဲတဲဘၣ်ပိာ်မုၣ်န့ၣ် လၢတၢ်ပှိၤပှံပှိၤပှီၢ်အခီပညီန့ၣ်လီၤ. အဂ့ၢ်ဒ်အံၤပိာ်မုၣ်န့ၣ်သံကွၢ်အီၤသပှၢ်ပှၢ် တုၤအသးဘၣ်တံာ်တာ်အဃိန့ၣ်လီၤ. အန့ၣ်ဝံၤဒီးပိာ်မုၣ်န့ၣ်တဲဘၣ်ပှၤဖလ့ၡသးဖိတဖၣ်လီၤ.
18 မၤသးဒ်န့ၣ်ဒီး, လၢမူးနွံနံၤတနံၤတချုးလၢစီၤၡံၣ်ၡိၣ်နုာ် လီၤဆူလီၢ်မံဒၢးအပူၤန့ၣ်ပှၤဝ့ၢ်ဖိတဖၣ်န့ၣ်စံးဘၣ်အီၤ,
“တၢ်ကဆၢန့ၣ်ကနဲစီအိၣ်ဒံးဝဲသ့ဧါ
တၢ်အဂံၢ်အဘါကဆူၣ်န့ၣ်ခ့ယုၢ်အိၣ်ဒံးဝဲသ့ဧါ.” ဒီးစီၤၡံၣ်ၡိၣ်စံးဆၢဝဲဒၣ်,
“သုမ့ၢ်တထူစံာ်လၢယကျီၢ်မိၢ်ဘၣ်ဒီး, သုသ့ၣ်ညါတၢ်စံးဆၢခဲအံၤတသ့ဘၣ်လီၤ.”
19 သတူၢ်ကလာ်န့ၣ်ယွၤအစိကမီၤမၤဆူၣ်ထီၣ်အဂံၢ်အဘါဒီးအဝဲဒၣ်လဲၤ လီၤဝဲဆူဝ့ၢ်အၤၡကလိၣ်ဒီးမၤသံကွံာ်ပှၤအဂၤသၢဆံ, ဘ့ၣ်ကွံာ်အကူအသိး, ဒီးဟ့ၣ်လီၤကွံာ်အတၢ်ကူတၢ်သိးတဖၣ်န့ၣ် ဆူပှၤလၢအစံးဆၢတၢ်ပှိၤပှံပှိၤပှီၢ်တဖၣ်အအိၣ်န့ၣ်လီၤ. အန့ၣ်ဝံၤဒီးက့ၤဝဲဒၣ်ဆူအဟံၣ်လၢတၢ်သူၣ်ဒိၣ်သးဖျိးအပူၤလၢ တၢ်မၤတ့ၢ်အသးတဖၣ်အဃိလီၤ.
20 ဒီးအမါန့ၣ်ဘၣ်တၢ်ဟ့ၣ်လီၤအီၤဆူပှၤတဂၤလၢအဆှၢထီၣ်အီၤ ဖဲအဒိးတ့ဒိးဖျီအသးအကတီၢ်န့ၣ်လီၤ.