41
1 နထုးထီၣ်သမၣ်လၢတခွဲဘိမ့ၢ်ဂ့ၤ, စၢအပျ့ၤလၢပျံၤတဘိမ့ၢ် ဂ့ၤဘၣ်ကသ့ဧါ.
2 နတုၢ်အနါဒ့လၢပျံၤတဘိမ့ၢ်ဂ့ၤ, ဘျးအခၣ်လၢနီၣ်ကွးမ့ၢ်ဂ့ၤ ဘၣ်ကသ့ဧါ.
3 ကဃ့ကညးနၤလၢနကပျဲအီၤဧါ. ကဃ့ကညးနၤလၢနကသး ကညီၤအီၤအဂီၢ်ဧါ.
4 ကအၢၣ်လီၤအီလီၤတၢ်ဒီးနၤဒီးအၢၣ်လီၤအသးလၢကမၤ နတၢ်တစိၤသးဧါ.
5 နကစၢဃာ်အီၤဒ်ထိၣ်တဘ့ၣ်လၢနအဲၣ်အီၤ, ဒ်တၢ်တမံၤမံၤ လၢကမၤသးဖှံနကုၢ်ပိာ်မုၣ်တဖၣ်အဂီၢ်ဧါ.
6 ပှၤမၤညၣ်ဖိကလိာ်တၢ်အပှ့ၤလၢအဖီခိၣ်ဧါ. ဒီးပှၤကၤတၢ်ဖိ တဖၣ်ကနီၤဖးအီၤဒ်သိးကဆါအီၤအဂီၢ်ဧါ.
7 နဆဲးဖျိအဖံးလၢဘီဆဲးညၣ်တဖၣ်မ့ၢ်ဂ့ၤ, ဆဲးထူၣ်ဖျိအခိၣ်လၢ နီၣ်ဆဲးတဖၣ်မ့ၢ်ဂ့ၤ, ကသ့ဧါ.
8 ထိးကွၢ်အီၤတဘျီဒီးနတကျဲးစၢးမၤလၢၤတၢ်အံၤနီတစုလၢၤ ဘၣ်. နတသးပ့ၤနီၣ်နဒုးတၢ်ဒီးအီၤနီတစုလၢၤဘၣ်.
9 ကွၢ်ကွၢ်, ပှၤတဂၤလၢ်လၢ်လၢအထံၣ်သမၣ်န့ၣ်အတၢ်သးဒူ လီၤမၢ်ကွံာ်ဝဲဒီးလီၤဃံၤဝဲဆူဟီၣ်ခိၣ်လိၤန့ၣ်လီၤ.
10 ဖဲအဘၣ်တၢ်ထိၣ်ဂဲၤထီၣ်အီၤန့ၣ်, အၢထီၣ်သီထီၣ်ဝဲဒိၣ်ဒိၣ်ကလဲာ် ဒီးပှၤဆၢထၢၣ်လၢအမဲာ်ညါဘူၣ်တအိၣ်နီတဂၤဘၣ်.
11 မတၤထီဒါအီၤဒီးပူၤဖျဲးကသ့ဒံးတဂၤလဲၣ်. ပှၤတအိၣ်ဘၣ်နီ တဂၤလၢဟီၣ်ခိၣ်ချၢဒီဘ့ၣ်ညါဒ်သိးအမၤတၢ်အံၤကသ့န့ၣ်ဘၣ်.
12 ပျဲယတဲဘၣ်နၤဘၣ်ဃးသမၣ်အစုအခီၣ်တဖၣ်အဂ့ၢ်ဒီးပာ်ဖျါ ထီၣ်အဒိၣ်ဝဲဆူၣ်ဝဲထဲလဲၣ်န့ၣ်တက့ၢ်.
13 ပှၤအုၣ်ကွံာ်အဖံးမ့ၢ်ဂ့ၤ, ဖှီယာ်ကွံာ်အမဲခံဂ့ၢ်မ့ၢ်ဂ့ၤ, တန့ၢ်ဘၣ် နီတဂၤဘၣ်.
14 မတၤအိးထီၣ်အခၣ်ဃံလၢအပှဲၤဒီးအမဲလီၤပျံၤလီၤဖုးတဖၣ် ဘူၣ်တဂၤလဲၣ်.
15 အချၢဃံဘၣ်တၢ်ကးဘၢအီၤလၢအသဒံၣ်အကျိၤတဖၣ်ဒီးစဲ ဘူးတံၢ်အသးဒီးကိၤဒ်လၢၢ်အသိးလီၤ.
16 တဘ့ၣ်ဒီးတဘ့ၣ်စဲဘူးတံၢ်အသးတုၤဒၣ်လဲာ်ကလံၤဟဲနုာ်လၢ အကဆူးတပၢၢ်ဘၣ်.
17 အဝဲသ့ၣ်ခဲလၢာ်စဲဘူးတံၢ်လိာ်အသးကျၢၤကျၢၤဂ့ၤမးတုၤ ဒၣ်လဲာ်တၢ်လၢအထုးလီၤဖှၣ်ကွံာ်အီၤကသ့န့ၣ်တအိၣ်ဘၣ်နီ တမံၤဘၣ်.
18 တုၤအဆဲဝဲဒီးတၢ်ကပီၤထီၣ်, ဒီးအမဲာ်ချံတဖၣ်ဂီၤဝဲဒ်မုၢ်ထီၣ် အယဲၤအသိးလီၤ.
19 မ့ၣ်အူလၣ်ကပျီၤထီၣ်ဒီးမ့ၣ်အူဖီပ့ၢ်ထီၣ်လၢအထးခိၣ်လီၤ.
20 မ့ၣ်အူလုၢ်ခုၣ်ထီၣ်လၢအနါဒ့လီၤဂာ်ဒ်မ့ၣ်အူလုၢ်ဟးထီၣ် လၢတပိၢ်ဘိတဖၣ်အပူၤ, လၢသပၢၤကလာ်ထီၣ်တဖျၢၣ်အဖီလာ် အသိးလီၤ.
21 အတၢ်သါဆိၣ်ကဲၤထီၣ်မ့ၣ်အူကဖးဒီးမ့ၣ်အူလၣ်ဟဲထီၣ်လၢအ ထးခိၣ်လီၤ.
22 အကိာ်အဂံၢ်အဘါဆူၣ်ဝဲတုၤဒၣ်လဲာ်ကယဲၢ်ပှၤလၢအဘၣ် သဂၢၢ်ဒီးအီၤန့ၣ်ပျံၤတၢ်ဖုးတၢ်လီၤ.
23 အညၣ်ကဘျံးတဖၣ်စဲဘူးတံၢ်လိာ်အသးဃံးမးလၢအလိၤ ဒီးတဟူးတဝးဘၣ်.
24 အသးကိၤဝဲဒ်လၢၢ်တဖျၢၣ်အသိး, ဒီးကိၤဝဲဒ်ဆၢၣ်ဂူာ်အဖီ လာ်တဖျၢၣ်အသိးန့ၣ်လီၤ.
25 တုၤအထိၣ်ဂဲၤထီၣ်အသးဒီးပှၤအဆူၣ်ကတၢၢ်တဖၣ်ဒၣ်လဲာ်ပျံၤ တၢ်, အဝဲသ့ၣ်ပျံၤတၢ်လၢတၢ်မၤစၢၤလီၤသးတသ့ဘၣ်အပူၤလီၤ.
26 နးလၢအကမၤဆါအီၤမ့ၢ်ဂ့ၤ, ဘီမ့ၢ်ဂ့ၤ, ပျၢ်မ့ၢ်ဂ့ၤ, စုကဝဲၤအဂၤလၢကမၤဘၣ်ဒိအီၤမ့ၢ်ဂ့ၤတအိၣ်ဘၣ်နီတမံၤဘၣ်.
27 ထးန့ၣ်မၤအသးဒ်ဘုလီၢ်အသိး, ဒီးတိၢ်ဘီန့ၣ်ဒ်သ့ၣ်လၢအကျၣ် အသိးလၢအဂီၢ်လီၤ.
28 ပျၢ်လၢအကဒုးဃ့ၢ်အီၤကသ့တအိၣ်ဘၣ်. လၢၢ်လၢတၢ်ကွံာ် အီၤန့ၣ်လီၤဂာ်ဒ်ဘုလီၢ်ကမူၣ်အသိးန့ၣ်လီၤ.
29 ပာ်နီၣ်တီၢ်လၢလီၢ်ဧိၤဒံးဧိၤ, ဒီးနံၤဘၣ်ဘီလၢပှၤကညီကွံာ် အီၤတဖၣ်န့ၣ်လီၤ.
30 အသဒံၣ်တဖၣ်လၢအဟၢဖၢကနူၤန့ၣ်လီၤဂာ်ဒ်သပၢၤက့တဖၣ် လၢအကနၣ်အ့ၣ်ဝဲအသိးဒီးမၤလီၤကလဲဟီၣ်ခိၣ်ကပံာ်ဒ်ထဲၣ်ကနၣ် တဖၣ်အသိးလီၤ.
31 အဝဲဆှဲးဆှုပီၣ်လဲၣ်ဒ်ထံချီကလာ်ထီၣ်ဒီးဒုးဟဲထီၣ်စံၣ်ပိ လိတဖၣ်လၢအပူၤဒ်သိအသပၢၤတဖျၢၣ်အသိးလီၤ.
32 ပာ်လီၤတဲာ်ဝဲအကျိၤကဲၤကျိာ်ကလာ်ဒီးဒုးကဲထီၣ်ပီၣ်လဲၣ် ဖိဆူထံသဘှဲဝါလီၤ.
33 တၢ်ဒ်အဝဲန့ၣ်အသိးတအိၣ်ဘၣ်လၢဟီၣ်ခိၣ်ချၢဘၣ်. အဝဲမ့ၢ်တၢ်ဘၣ်တ့တမံၤလၢတၢ်ပျံၤတၢ်ဖုးတအိၣ်ဘၣ်ဒီးအီၤ နီတမံၤဘၣ်န့ၣ်လီၤ.
34 ကွၢ်တလီၤဆၣ်ဖိကီၢ်ဖိလၢအပာ်ထီၣ်ထီအသးဒိၣ်ကတၢၢ် တဖၣ်ဒၣ်လဲာ်, ဒီးအဝဲမ့ၢ်ဆၣ်ဖိကီၢ်ဖိအမံၤခဲလၢာ်အစီၤပၤန့ၣ် လီၤ.