22
1 အအံၤမ့ၢ်တၢ်ကစီၣ်တခါဘၣ်ဃးဒီးတၢ်ထံၣ်လၢညါခီ အကစၢၢ်ကဆူးအဂ့ၢ်န့ၣ်လီၤ. တၢ်မနုၤမၤအသးန့ၣ်လဲၣ်. ဘၣ်မနုၤအဃိပှၤလၢဝ့ၢ်ပူၤတဖၣ် မၤမူးသးခုလၢအဟံၣ်တဖၣ်အခိၣ်ဒုးအဖီခိၣ်န့ၣ်လဲၣ်.
2 ဝ့ၢ်ဒီဝ့ၢ်ညါသီၣ်သထူၣ်ဘးလီ, ဒီးအိၣ်ပှဲၤဝဲဒီးတၢ်သီၣ်တၢ် သဲဒီးတၢ်ထိၣ်ဂဲၤသူၣ်ထီၣ်ဂဲၤသးန့ၣ်လီၤ. သုပှၤတဖၣ်လၢအသံတ့ၢ်လၢတၢ်ဒုးတၢ်ယၤအပူၤန့ၣ် တသံလၢအဒုးတၢ်အဃိဘၣ်.
3 တချုးလၢသုပှၤခိၣ်ပှၤနၢ်တဖၣ်ခးဘၣ်ပျၢ်တဘိဧိၤန့ၣ်, အဝဲသ့ၣ်, ထွးထီၣ်ဃ့ၢ်ဝဲဒီးဘၣ်တၢ်ဖီၣ်န့ၢ်အီၤခဲလၢာ်လီၤ.
4 ခဲကနံၣ်အံၤ, ပာ်လီၤတဲာ်ယၤထဲတဂၤဧိၤဒ်သိးယကဟီၣ်ယၢၤ နးနးကျံးကျံုးလၢယပှၤဂီၢ်မုၢ်ခဲလၢာ်လၢအသံတ့ၢ် တဖၣ်အဂီၢ်န့ၣ်တက့ၢ်. ဂုာ်ကျဲးစၢးမၤမုာ်ထီၣ်က့ၤယၤတဂ့ၤ.
5 အအံၤမ့ၢ်တၢ်ဆၢကတီၢ်တခါလၢတၢ်ပျံၤတၢ်ဖုး, တၢ်ဃၣ်ကွံာ်, ဒီးတၢ်သဘံၣ်ဘုၣ်မၤအသး လၢတၢ်ထံၣ်လၢညါခီအကစၢၢ်ကဆူးအပူၤ, ဒီးယွၤစိဒိၣ်ကမီၤထီ, သ့တၢ်လၢာ်ကစၢ်ဆှၢ လီၤတ့ၢ်အီၤလၢပဖီခိၣ်န့ၣ်လီၤ. ပဝ့ၢ်အခိၣ်ဒူတဖၣ်ဘၣ်တၢ်တီၢ် လီၤပှီၢ်ကွံာ်အီၤ, ဒီးတၢ်ကိးထီၣ်လၢတၢ်မၤစၢၤအဂီၢ်သီၣ် ကဒါက့ၤလၢကစၢၢ်တဖၣ်အကျါန့ၣ်လီၤ.
6 ပှၤသုးဖိလၢကီၢ်ဧ့ၤလၣ်တဖၣ်ဟဲဒိးကသ့ၣ်, အိၣ်ဒီးစုကဝဲၤလၢအမ့ၢ်ချံၣ်ဒီးပျၢ်တဖၣ်လီၤ. ပှၤသုးဖိလၢကီၢ်ကံၢ်တဖၣ်ကတဲာ်ကတီၤပာ် အကတီၤတဖၣ်လီၤ.
7 ကီၢ်ယူဒၤအကစၢၢ်ကဆူးတဖၣ်လၢအအိၣ်ဒီးဟီၣ်ခိၣ်ညၣ်ထ့ၣ် န့ၣ်, ပှဲၤဝဲဒီးလ့ၣ်ကဟၣ်တဖၣ်, ဒီးသုးဖိလၢအဒိးကသ့ၣ်တဖၣ် အိၣ်ဆၢထၢၣ်လၢဝ့ၢ်ယရူၤၡလ့ၣ်အကျဲစၢၤအမဲာ်ညါန့ၣ်လီၤ.
8 ကီၢ်ယူဒၤအတိာ်ဧိၤတာ်ဧိၤခဲလၢာ်လီၤပှီၢ်ကွံာ်ဝဲလီၤ.
ဖဲတၢ်န့ၣ်မၤအသးဒီး, သုဟဲထုးထီၣ်တၢ်စုကဝဲၤတဖၣ်လၢ တၢ်ပာ်စုကဝဲၤအလီၢ်န့ၣ်လီၤ.
9 သုထံၣ်ဘၣ်တၢ်လီၢ်တဖၣ်ဖဲဝ့ၢ်ယရူၤၡလ့ၣ်အခိၣ်ဒူတဖၣ်လိၣ် ဘၣ်တၢ်ဘှီဂ့ၤထီၣ်က့ၤအီၤန့ၣ်လီၤ.
10 သုကွၢ်ထံက့ၤဟံၣ်ကိးဖျၢၣ်ဒဲးလၢဝ့ၢ်ယရူၤၡလ့ၣ်အပူၤဒီးဂုၤ လီၤပှီၢ်အီၤတနီၤလၢသုကမၤန့ၢ်လၢၢ်တဖၣ်လၢတၢ်ကဘှီက့ၤ ဝ့ၢ်အခိၣ်ဒူအဂီၢ်လီၤ. လၢတၢ်ကပဒၢးဖှိၣ်ထံအဂီၢ်,
11 သုဘှီထီၣ်တၢ်ပာ်ကီၤထံအလီၢ်လၢဝ့ၢ်အအိပူၤဒ်သိးသုကမၤ န့ၢ်ထံလၢအဟဲယွၤလီၤဝဲလၢကွံအလီၢ်လံၤလီၤ. ဘၣ်ဆၣ်သုတကနၣ်ဃုာ်ယွၤလၢအကူၣ်ကျဲၤတ့ၢ်တၢ်အံၤဒီး ဒုးကဲထီၣ်လိၣ်ထီၣ်အီၤ, လၢတၢ်ဆၢကတီၢ်လၢအယံာ်တ့ၢ် မးလံတဂၤန့ၣ်ဘၣ်.
12 ယွၤစိဒိၣ်ကမီၤထီ, သ့တၢ်လၢာ်ကစၢ်ကိးထီၣ်တ့ၢ်လံသုလၢ သုကဟီၣ်တၢ်ယၢၤတၢ်ဒီးသူၣ်အုးသးအုး, လၢသုကလူၤသု ခိၣ်တဖၣ်ဒီးကူထီၣ်ကၤထီၣ်ထၢၣ်တၢ်ကံးယာ်လီၤ.
13 အခိၣ်တလိၣ်, သုနံၤသုအ့ဒီးမၤတ့ၢ်မူးသးခုလီၤ. သုမၤသံသိဒီးဂီၤဖံးလၢသုကအီၣ်တၢ်အဂီၢ်ဒီးသုအီစပံးထံန့ၣ်လီၤ. သုစံး, “ဂ့ၤပအီၣ်သကိးအီသကိးတခီလီၤ. ခဲဂီၤကိာ်န့ၣ်, ပကသံပဝဲလီၤ.”
14 ယွၤစိဒိၣ်ကမီၤထီ, သ့တၢ်လၢာ်ကစၢ်အကစၢ်ဒၣ်ဝဲကတိၤတ့ၢ် တၢ်ဒီးယၤဒီးစံးဝဲ, “ဖဲအဝဲသ့ၣ်အိၣ်မူဒံးအဖၢမုၢ်ဒီး, တၢ်အၢတၢ်သီအံၤတၢ်ပျၢ်ဖျဲးအီၤတသ့ဘၣ်နီတစုဘၣ်. ယၤ, ယွၤစိဒိၣ်ကမီၤထီ, သ့တၢ်လၢာ်ကစၢ်ကတိၤတ့ၢ်လံတၢ်လီၤ.”
15 တၢ်သုးမုၢ်ဂီၢ်မုၢ်အယွၤသ့တၢ်လၢာ်စံးဘၣ်တ့ၢ်ယၤလၢ ယကလဲၤဆူစီၤၡ့ၤဘနၤလၢအမ့ၢ်ပှၤပၢဆှၢကွၢ်ထွဲစီၤပၤအဟံၣ် အဃီဒီးစံးဘၣ်အီၤ,
16 “နဆိကမိၣ်လီၤနသးလၢနမ့ၢ်မတၤလဲၣ်. လၢနကစိးပျၤတၢ်သွၣ် ခိၣ်တပူၤလၢနဂီၢ်ဒၣ်နဲဖဲလ့ကစၢၢ်ကပၤအဂီၢ်န့ၣ်, နအိၣ်ဒီးတၢ်ခွဲး တၢ်ယာ်မနုၤလဲၣ်.
17 နကမ့ၢ်ပှၤအကါဒိၣ်သ့ၣ်သ့ၣ်လီၤ. ဘၣ်ဆၣ်ဒီး, ယွၤကဟံး ထီၣ်နၤဒီးစူးကွံာ်နၤလီၤ.
18 ကဟံးထီၣ်နၤဒ်တၢ်အဖျၢၣ်တဖျၢၣ်အသိးဒီးကွံာ်လီၤနၤဆူ ထံကီၢ်လၢအလဲၢ်ဒိၣ်တက့ၢ်အပူၤလီၤ. နကသံဖဲန့ၣ်လၢလ့ၣ် ကဟၣ်လၢနပာ်ကဖၢလၢနသးလၢအဃိတဖၣ်အကပၤလီၤ. နမ့ၢ်တၢ်လီၤမဲာ်ဆှးလၢနကစၢ်အဟံၣ်ဒူၣ်ဃီထၢအဂီၢ်လီၤ.
19 ယွၤကသုးကွံာ်နၤလၢနမူနဒါအလီၢ်ဒီးထုးလီၤတဲာ်ကွံာ်နၤလၢ နလီၢ်ဒိၣ်နလၤထီအလီၢ်န့ၣ်လီၤ.”
20 ယွၤစံးဘၣ်စီၤၡ့ၤဘနၤ, “ဖဲတၢ်န့ၣ်မၤအသးဒီး, ယကဆှၢ လီၤယခ့ယပှၤစီၤဃံးလကံယၤအဖိခွါစီၤအ့ၤလယါကံၣ်လီၤ.
21 ယကဒုးကၤထီၣ်အီၤလၢနမူနဒါအဆ့ကၤဒီးနယီၢ်တကိး, ဒီးဟ့ၣ်လီၤအီၤတၢ်စိကမီၤခဲလၢာ်လၢအအိၣ်တ့ၢ်ဒီးနၤလီၤ. အဝဲကလီၤဂာ်ဒီးပၢ်တဂၤလၢဝ့ၢ်ယရူၤၡလ့ၣ်ဒီးကီၢ် ယူဒၤအပှၤဂီၢ်မုၢ်အဂီၢ်န့ၣ်လီၤ.
22 ယကဟ့ၣ်လီၤအီၤတၢ်စိကမီၤလၢာ်လၢာ်ဆ့ဆ့လၢစီၤပၤ တဂၤလၢအဟဲလီၤစၢၤလၢစီၤပၤစီၤဒၤဝံး အဖီလာ်န့ၣ်လီၤ. အဝဲကအိၣ်ဒီးမူဒါလီၢ်လၤအနီၣ်ဝံာ်ခံတဖၣ်လီၤ. တၢ်လၢအအိးထီၣ်ဝဲန့ၣ်, ပှၤတကးတံၢ်နီတဂၤဘၣ်. ဒီးတၢ်လၢအကးတံၢ်ဝဲန့ၣ်, ပှၤတအိးထီၣ်နီတဂၤဘၣ်.
23 ယကစၢတံၢ်အီၤဂၢၢ်ဂၢၢ်ကျၢၤကျၢၤလၢအလီၢ်ဒ်နီၣ်ခိၣ်စူ တဘိအသိး, ဒီးအဝဲကမ့ၢ်တၢ်လၤကပီၤအဂ့ၢ်မိၢ်ပှၢ်လၢ အဒူၣ်ထၢဒီဒူၣ်အဂီၢ်လီၤ.
24 ဘၣ်ဆၣ်ဒီး, ကယဲၢ်အဘူးအတံၢ်ဒီးပှၤလၢအသန့ၤအသး လၢအီၤခဲလၢာ်, ကကဲထီၣ်တၢ်ဝံတၢ်ယိးတမံၤလၢအဂီၢ်န့ၣ်လီၤ. အဝဲသ့ၣ်ကဘျးလီၤစဲၤအသးလၢအလိၤဒ်တၢၢ်ဧိၤသပၢၤဧိၤ ဒီးလီခီတဖၣ်ဘျးလီၤစဲၤအသးလၢနီၣ်စဲတဘိအလိၤအသိးန့ၣ်လီၤ.
25 ဖဲတၢ်န့ၣ်မၤအသးဒီး, နီၣ်စဲလၢအဘၣ်တၢ်စဲထီအီၤဂၢၢ်ဂၢၢ် ကျၢၤကျၢၤန့ၣ်, ကလီၤဖျုဒီးလီၤတဲာ်ကွံာ်ဝဲန့ၣ်လီၤ. ဒီးတၢ်န့ၣ်, ကမ့ၢ်တၢ်အကတၢၢ်လၢတၢ်ခဲလၢာ်လၢအဘျး လီၤစဲၤအသးလၢအလိၤအဂီၢ်န့ၣ်လီၤ.” ယွၤကတိၤတ့ၢ်လံတၢ်န့ၣ်လီၤ.