21
1 အအံၤမ့ၢ်တၢ်ကစီၣ်ဘၣ်ဃးကီၢ်ဘၤဘူၤလိၣ်အဂ့ၢ်န့ၣ်လီၤ. ဒ်ကလံၤသဝံးအူတၢ်ဆူၣ်ဆူၣ်ခီဂာ်ပှၢ်မုၢ်ကနၢအသိး, တၢ်တတၢးတနါကဟဲထီၣ်လၢကီၢ်လၢအလီၤပျံၤလီၤဖုး တဘ့ၣ်အပူၤလီၤ.
2 ယထံၣ်တ့ၢ်တၢ်ထံၣ်လၢညါခီဘၣ်ဃးတၢ်မၤအသးအၢအၢ သီသီတဖၣ်, တၢ်ထံၣ်လၢညါခီဘၣ်ဃးတၢ် ဟ့ၣ်လီၤကွံာ်ဒီးတၢ်မၤဟးဂီၤတၢ်လီၤ.
ကီၢ်ဧ့ၤလၣ်အသုးမုၢ်ဧၢ, လဲၤဒုးတၢ်တက့ၢ်. ကီၢ်မၤဒဲအသုး မုၢ်ဧၢ, ကဝီၤဃာ်ဝ့ၢ်တဖၣ်န့ၣ်တက့ၢ်. ကစၢ်ယွၤကမၤကတၢၢ် ကွံာ်တၢ်နးတၢ်ဖှီၣ်လၢကီၢ်ဘၤဘူၤလိၣ်ဒုးအိၣ်ထီၣ်ဝဲန့ၣ်လီၤ.
3 တၢ်လၢယထံၣ်ဒီးနၢ်ဟူတ့ၢ်လၢတၢ်ထံၣ်လၢညါခီအပူၤတဖၣ် မၤပှဲၤယသးဒီးတၢ်ပျံၤတၢ်ဖုးဒီးတၢ်ဆူးတၢ်ဆါ, တၢ်ဆူးတၢ်ဆါလၢအလီၤဂာ်ဒီးပိာ်မုၣ်အဟုးဆါထီၣ်န့ၣ်လီၤ.
4 ယခိၣ်တရံးအသးဒီးယကနိးကစုာ်လၢတၢ်ပျံၤတၢ်ဖုးအဃိလီၤ. ယဆၢတ့ၢ်မးလၢမုၢ်ဟါကဟဲတုၤအိၣ်ဝဲ, ဘၣ်ဆၣ်တၢ်လၢ အဟဲတုၤအိၣ်ဝဲမ့ၢ်ဒၣ်ထဲတၢ်ပျံၤတၢ်ဖုးလီၤ.
5 လၢတၢ်ထံၣ်လၢညါခီအပူၤန့ၣ်ယထံၣ်ဘၣ်တၢ်အီၣ်အစီၢ်နီၤခိၣ် အိၣ်ကတဲာ်ကတီၤအသးဒီးလီၢ်ဒါတဖၣ်သလၣ်လီၤအသး လၢသမှံၤတဖၣ်ကဆ့ၣ်နီၤလၢအဖီခိၣ်အဂီၢ်လီၤ. အဝဲသ့ၣ်အီၣ်တၢ်ဒီးအီတၢ်လီၤ. သတူၢ်ကလာ်န့ၣ်တၢ်ကိးသတြီထီၣ်ဝဲ, “သုးခိၣ်သုးနၢ်တဖၣ်ဧၢ, ကတဲာ်ကတီၤထီၣ်သုကတီၤတဖၣ်တက့ၢ်.”
6 အန့ၣ်ဒီးယွၤစံးဘၣ်ယၤ, “လဲၤဒီးပာ်လီၤပှၤခိးတၢ်တဂၤ, ဒီးတဲဘၣ်အီၤလၢကတဲဖျါက့ၤတၢ်လၢအထံၣ်ဝဲတက့ၢ်.
7 အဝဲမ့ၢ်ထံၣ်ပှၤဟဲဒိးကသ့ၣ်, ခံဂၤခံဂၤစုာ်စုာ်, ဒီးပှၤဒိးကသ့ၣ်ယီၤဒီးကီၤလးအူးတဖၣ်ဒီး, အဝဲကဘၣ်ကွၢ်ထံပှၤတဖၣ်အံၤလီၤတံၢ်လီၤဆဲးလီၤ.”
8 ပှၤခိးတၢ်ဖိကိးထီၣ်ဝဲ, “တၢ်ဒိၣ်ဧၢ, ယဆၢထၢၣ်ခိးတ့ၢ်တၢ် လၢယလီၢ်မနၤနၤမဆါဆါလီၤ.”
9 သတူၢ်ကလာ်, လၢအံၤအဝဲသ့ၣ်ဟဲဝဲလံ. ပှၤဒိးကသ့ၣ်ခံဂၤခံဂၤ စုာ်စုာ်လီၤ. ပှၤခိးတၢ်ဖိဆှၢတၢ်ကစီၣ်, “ကီၢ်ဘၤဘူၤလိၣ်လီၤကွံာ်လံ. တၢ်ဂီၤတၢ်ဖီၣ်တဖၣ်လၢအဝဲသ့ၣ် ဘူၣ်ထီၣ်ဘါထီၣ်ဝဲခဲလၢာ်ကၢ်လီၤကလဲဒီးဒါလီၤ အသးလၢဟီၣ်ခိၣ်လိၤလီၤ.”
10 ယပှၤဂီၢ်မုၢ်အံၣ်စရ့လးဧၢ, သုဘၣ်တၢ်ယီၢ်သုဒ်ပှၤယီၢ်ဘုဟု အသိး, ဘၣ်ဆၣ်အခဲအံၤယဘိးဘၣ်သ့ၣ်ညါသုတၢ်ကစီၣ် အမုာ်လၢယနၢ်ဟူတ့ၢ်လၢယွၤသ့တၢ်လၢာ်ကစၢ်, အံၣ်စရ့လးအကစၢ်ယွၤ, အအိၣ်န့ၣ်လီၤ.
11 အအံၤမ့ၢ်တၢ်ကစီၣ်ဘၣ်ဃးကီၢ်အဒိၣ်အဂ့ၢ်န့ၣ်လီၤ. ပှၤတဂၤကိးဃီၤတၢ်ဆူယအိၣ်လၢကီၢ်အဒိၣ်တခီဒီးစံး, “ပှၤခိးတၢ်ဖိဧၢ, မုၢ်နၤကလၢာ်ကွံာ်ဝဲဖဲလဲၣ်အခါလဲၣ်. ကကတၢၢ်အခါဖဲလဲၣ်န့ၣ်တဲဘၣ်ယၤတက့ၢ်.”
12 ယစံးဆၢအီၤ, “မုၢ်ဂီၤဟဲဝဲလံ, ဘၣ်ဆၣ်မုၢ်နၤကဟဲကဒီး လီၤ. နမ့ၢ်အဲၣ်ဒိးသံကွၢ်ကဒီးန့ၣ်, ဟဲက့ၤကဒါက့ၤဒီးသံကွၢ် တက့ၢ်.”
13 အအံၤမ့ၢ်တၢ်ကစီၣ်ဘၣ်ဃးကီၢ်ဧ့ရ့းအဂ့ၢ်န့ၣ်လီၤ.
သုဝဲပှၤဒဒၣ်ဖိလၢအလဲၤသကိးတၢ်ဒီဖုဒီးပှၤသူၣ်ဒဲလၢကီၢ်ဧ့ရ့းအလီၢ်လီၤဃီသ့ၣ်ဧၢ,
14 ပှၤလၢတၢ်သူအသးလၢထံဒီးဟဲဆူသုအိၣ်တဖၣ်န့ၣ်, ဟ့ၣ်အီအီၤလၢထံတက့ၢ်. သုဝဲပှၤကီၢ်တ့မၤဖိသ့ၣ်ဧၢ, ဟ့ၣ်လီၤတၢ်အီၣ်လၢပှၤဘၣ်ဃ့ၢ်မှံဟးဖျိးတဖၣ်အဂီၢ်တက့ၢ်.
15 ပှၤသ့ၣ်တဖၣ်အံၤထွးထီၣ်ဃ့ၢ်ဝဲဒ်သိးကထူၣ်ဖျဲးထီၣ်လၢ နးတဖၣ်လၢအိၣ်ကတဲာ်ကတီၤအသးလၢကမၤသံအဝဲသ့ၣ်, လၢချံၣ်တဖၣ်လၢအိၣ်ကတဲာ်ကတီၤအသးလၢကခးတၢ်, ဒီးလၢတၢ်ဒုးတၢ်ယၤအတၢ်လီၤဘၣ်ယိၣ်ခဲလၢာ်န့ၣ်လီၤ.
16 အန့ၣ်ဒီးယွၤစံးဘၣ်ယၤ, “လၢတနံၣ်တီတီအပူၤန့ၣ်, က့ဒၢ်အဒူၣ်တဖၣ်အတၢ်ဒိၣ်တၢ်မုာ်ကတုၤ လၢတၢ်အကတၢၢ်လီၤ.
17 ပှၤခးချံၣ်တဖၣ်မ့ၢ်ပှၤအဒူကတၢၢ်လၢပှၤက့ဒၢ်ဖိအကျါလီၤ. ဘၣ်ဆၣ်, အဝဲသ့ၣ်ကအိၣ်တီၢ်ဒၣ်စှၤဂၤလီၤ. ယၤ, အံၣ်စရ့လးအကစၢ်ယွၤကတိၤတ့ၢ်လံတၢ်လီၤ.”