23
1 အအံၤမ့ၢ်တၢ်ကစီၣ်ဘၣ်ဃးဝ့ၢ်ထါယၢၣ်အဂ့ၢ်န့ၣ်လီၤ. ကအုကစွါထီၣ်လၢတၢ်သူၣ်အုးသးအုးအပူၤ, သုဝဲပှၤကဘီဖိလၢအလဲၤတၢ်လၢပီၣ်လဲၣ် ပူၤသ့ၣ်ဧၢ, သုကဘီသန့ဖဲဝ့ၢ်ထါယၢၣ်န့ၣ်ဘၣ် တၢ်မၤဟးဂီၤအီၤလံ. အဟံၣ်တဖၣ်ဒီးအကဘီ သန့တဖၣ်ဟးဂီၤလၢာ်လံ. ဖဲသုကဘီတဖၣ်ဟဲက့ၤ ကဒါက့ၤလၢကီးကူပြူးန့ၣ်, သုန့ၢ်ဘၣ်တၢ်ကစီၣ်လီၤ.
2 ဟီၣ်ယၢၤတက့ၢ်, သုဝဲဝ့ၢ်စံဒိၣ်အပှၤကူၣ်တၢ်ကၤတၢ်သ့ၣ်ဧၢ,
3 သုဆှၢလီၤပှၤခီဂာ်ပီၣ်လဲၣ်လၢကပှ့ၤဒီးဆါဘုဧိၤဟုဧိၤလၢ အမဲထီၣ်သၣ်ထီၣ်လၢကီၢ်အဲၤကူပတူးဒီးပနံာ်တၢ်ကၤတၢ် ဒီးပှၤကလုာ်တဖၣ်အဂီၢ်လီၤ.
4 ဝ့ၢ်စံဒိၣ်ဧၢ, နဘၣ်တၢ်မဲာ်ဆှးလီၤ. ပီၣ်လဲၣ်ဒီးပီၣ်လဲၣ်ဖးဒိၣ် အထံယိာ်တဖၣ်ညိကွံာ်နၤဒီးစံးဝဲ, “ယဖိတအိၣ်နီတဂၤ, နီတစုဘၣ်. ယတလုၢ်ဒိၣ်ထီၣ်ဘၣ်ဖိခွါတဖၣ်ဒီးဖိမုၣ်တဖၣ်နီ တဘျီဘၣ်.”
5 ပှၤအဲၤကူပတူးဖိတဖၣ်ဒၣ်လဲာ်ကဖုးသံပျီၢ်ဂီၤဒီးဖံးသကုၣ် ခီသကုၣ်ဖဲအဝဲသ့ၣ်သ့ၣ်ညါဝဲလၢဝ့ၢ်ထါယၢၣ်ဘၣ်တၢ်မၤဟး ဂီၤအီၤလံန့ၣ်လီၤ.
6 ကအုကစွါထီၣ်လၢတၢ်သူၣ်အုးသးအုးအပူၤ, သုဝဲပှၤဂီၢ်မုၢ်လၢကီၢ်ဖံၤနံက့ၤအပူၤသ့ၣ်ဧၢ, ကျဲးစၢးထွးထီၣ်ဃ့ၢ်ဆူကီၢ်စပၤနံတက့ၢ်.
7 တၢ်အံၤမ့ၢ်ဝ့ၢ်လၢပျၢၤ, ဝ့ၢ်ထါယၢၣ်လၢအပှဲၤဒီးတၢ်သးခုဘၣ်ကသ့ဧါ. အဝဲအံၤမ့ၢ်ဝ့ၢ်လၢအဆှၢလီၤပှၤလၢအခီ ဂာ်ပီၣ်လဲၣ်လၢကလဲၤနုာ်လီၤအိၣ်ဆိး ဒီးဒုးကဲထီၣ်ပှၤထံပှၤကီၢ်လၢအထံအကီၢ်န့ၣ်ဧါ.
8 ပှၤတဂၤလၢအကူၣ်ကျဲၤတၢ်ဒ်သိးတၢ်ခဲလၢာ်အံၤကလီၤဘၣ် လၢဝ့ၢ်ထါယၢၣ်, ဝ့ၢ်စိဒိၣ်ကမီၤထီလၢအပှၤပနံာ်တၢ်ကၤတၢ် တဖၣ်မ့ၢ်ပှၤဒိးဘၣ်တၢ်လၤတၢ်ကပီၤအဒိၣ်ကတၢၢ်လၢဟီၣ်ခိၣ် ချၢအံၤန့ၣ်မ့ၢ်မတၤတဂၤလဲၣ်.
9 ယွၤသ့တၢ်လၢာ်ကူၣ်ကျဲၤတ့ၢ်တၢ်အံၤလီၤ. အဝဲကူၣ်ကျဲၤတ့ၢ်ဝဲဒ်သိးကမၤကတၢၢ်ကွံာ်အဝဲသ့ၣ်အတၢ်ပာ် ထီၣ်ထီသးလၢတၢ်လၢအမၤတ့ၢ်ဝဲအဃိ, ဒီးဒ်သိးကမၤမဲာ် ဆှးအပှၤလၢတၢ်ပာ်လၤပာ်ကပီၤအီၤသ့ၣ်တဖၣ်အဂီၢ်လီၤ.
10 သုဝဲပှၤကီၢ်စပၤနံဖိသ့ၣ်ဧၢ, လဲၤဒီးထူစံာ်ထူပှဲၤတက့ၢ်. ပှၤလၢကဒီဒၣ်အိၣ်ပှိၤသုတအိၣ်လၢၤနီတဂၤဘၣ်.
11 ယွၤယူာ်ဃီၤအစုလၢပီၣ်လဲၣ်အဖီခိၣ်ဒီးမၤဃၣ်ကွံာ်ဘီမုၢ် တဖၣ်လီၤ. အဝဲခါလီၤအကလုၢ်လၢပှၤဖံၤနံက့ၤဖိအကူၣ် တၢ်ကၤတၢ်အလီၢ်ခၢၣ်သးတဖၣ်ကဘၣ်တၢ်မၤဟးဂီၤအီၤ အဂီၢ်လီၤ.
12 ဝ့ၢ်စံဒိၣ်ဧၢ, နတၢ်သူၣ်ဖှံသးညီအကတီၢ်ကတၢၢ်ဝဲလံ, ဒီးနပှၤဂီၢ်မုၢ်တဖၣ်ဘၣ်တၢ်မၤအၢမၤနးအီၤလီၤ. အဝဲသ့ၣ်မ့ၢ်ဃ့ၢ်ပူၤဖျဲးကွံာ်ဆူကီးကူပြူးဒၣ်လဲာ်, အဝဲသ့ၣ်တပူၤဖျဲးဒံးဘၣ်လီၤ.
13 (ပှၤလၢအပျဲလီၤဆၣ်ဖိကီၢ်ဖိအမံၤတဖၣ်လၢကဃ့ၢ်မၤနၢၤကွံာ်ဝ့ၢ် ထါယၢၣ်န့ၣ်မ့ၢ်ဒၣ်ပှၤဘၤဘူၤလိၣ်ဖိတဖၣ်, ဒီးတမ့ၢ်ပှၤအၤၡူၢ်ဖိ တဖၣ်ဘၣ်လီၤ. ပှၤလၢအဘှီထီၣ်ပၢၤတၢ်အလီၢ်တဖၣ်လၢ ကဒုးတၢ်ဒီး, မၤလီၤပှီၢ်ကွံာ်ဝ့ၢ်ထါယၢၣ်အတိာ်ခၢၣ်သနၢၣ်တဖၣ်, ဒီးပာ်တ့ၢ်အီၤလၢတၢ်ဟးဂီၤတဖၣ်အပူၤန့ၣ်, မ့ၢ်တ့ၢ်ဝဲပှၤဘၤဘူၤလိၣ်ဖိတဖၣ်လီၤ.)
14 ကအုကစွါထီၣ်လၢတၢ်သူၣ်အုးသးအုးအပူၤ, သုဝဲပှၤကဘီဖိလၢအလဲၤတၢ်လၢပီၣ်လဲၣ်ပူၤသ့ၣ်ဧၢ, ဝ့ၢ်လၢသုသန့ၤသုသးလၢအီၤန့ၣ်, ဘၣ်တၢ်မၤဟးဂီၤတ့ၢ်အီၤလံ.
15 တၢ်ဆၢကတီၢ်တခါန့ၣ်ဘူးထီၣ်လံဖဲဝ့ၢ်ထါယၢၣ်ကဘၣ်တၢ် သးပ့ၤနီၣ်အီၤအနံၣ်နွံဆံပှဲၤသိး, စီၤပၤတဂၤအတၢ်အိၣ်မူ အဆၢကတီၢ်လီၤ. ဖဲနံၣ်တဖၣ်န့ၣ်ပူၤကွံာ်ဒီး, ဝ့ၢ်ထါယၢၣ်ကလီၤဂာ်ဒီးပှၤဃဲသဲမုၣ်တဂၤလၢတၢ်သးဝံၣ်အပူၤ,
16 ဟံးန့ၢ်တနၢ်, လဲၤတရံးဝ့ၢ်,
နၤပှၤဃဲသဲမုၣ်လၢတၢ်သးပ့ၤနီၣ်အီၤတဂၤဧၢ,
ဒ့ဒီးသးဝံၣ်ကဒီးနတၢ်သးဝံၣ်တဖၣ်,
လၢတၢ်ကိးကဒါက့ၤပှၤပိာ်ခွါတဖၣ် လၢခံတဘျီအဂီၢ်တက့ၢ်.
17 ဖဲအနံၣ်နွံဆံလၢာ်ကွံာ်ဝဲန့ၣ်, ယွၤကပျဲဝ့ၢ်ထါယၢၣ်ကက့ၤက ဒါက့ၤဆူအတၢ်မၤလီၢ်လံၤ, ဒီးအဝဲကဒိးလဲလီၤအသးဆူဘီမုၢ် တဖၣ်လၢဟီၣ်ခိၣ်ချၢလီၤ.
18 ကျိၣ်စ့လၢအမၤန့ၢ်ဝဲလၢကူၣ်တၢ်ကၤတၢ်အဃိန့ၣ်, ကဘၣ်တၢ်ပာ်စီဆှံအီၤဆူယွၤလီၤ. အဝဲတပာ်ဖှိၣ်ပာ်တံၤဝဲဘၣ်. ပှၤလၢအဘူၣ်ထီၣ်ဘါထီၣ်ယွၤတဖၣ် ကသူအစ့လၢကပှ့ၤတၢ်အီၣ်ဒီးတၢ် ကူတၢ်ကၤလၢအဝဲသ့ၣ်လိၣ်ဘၣ်ဝဲန့ၣ်လီၤ.