1 လၢကီၢ်အၤၡူၢ်အစီၤပၤဖးဒိၣ်စၤရကိၣ်အကလုၢ်န့ၣ်, ကီၢ်အၤၡူၢ်အသုးမုၢ်အသုးခိၣ်ကျၢၢ်လဲၤထီၣ်ဒုးပှၤဖလ့ၡသးဖိ အဝ့ၢ်အၤစဒိာ်န့ၣ်လီၤ. 2 တချုးတၢ်အံၤသၢနံၣ်န့ၣ်, ယွၤစံးဘၣ်တ့ၢ်စီၤအၤမိာ်အဖိခွါ စီၤယၡါယၤလၢကဘ့ၣ်လီၤအခီၣ်ဖံးဒီးထၢၣ်တၢ်ကံးယာ်လၢ အကၤဝဲန့ၣ်လီၤ. အဝဲဒိကနၣ်ဝဲ, ဒီးဟးဝ့ၤဝီၤအိၣ်ဘ့ၣ်ဆ့ အိၣ်ဘ့ၣ်ခီၣ်န့ၣ်လီၤ. 3 ဖဲဝ့ၢ်အၤစဒိာ်ဘၣ်တၢ်ဒုးန့ၢ်အီၤဝံၤဒီး, ယွၤစံးဝဲဒၣ်, “ယခ့ယပှၤစီၤယၡါယၤဟးဝ့ၤဝီၤတ့ၢ်အိၣ်ဘ့ၣ်ဆ့အိၣ်ဘ့ၣ်ခီၣ် သၢနံၣ်လံလီၤ. အဝဲအံၤမ့ၢ်တၢ်ပနီၣ်တခါလၢတၢ်ကမၤအသး ဒီးကီၢ်အဲၤကူပတူးဒီးကီၢ်ကူၤၡးလီၤ. 4 ကီၢ်အၤၡူၢ်အစီၤပၤဖးဒိၣ်ကဆှၢကွံာ်ပှၤလၢအဖီၣ်န့ၢ်ဝဲလၢထံကီၢ်ခံ ဘ့ၣ်န့ၣ်လၢတၢ်အိၣ်ဘ့ၣ်ဆ့အပူၤလီၤ. သးပှၢ်ဂ့ၤ, သးစၢ်ဂ့ၤ, အဝဲသ့ၣ်ကဟးဝဲအိၣ်ဘ့ၣ်ဆ့အိၣ်ဘ့ၣ်ခီၣ်, အခံခိၣ်တဖၣ်အိၣ်ဖျါ လၢခိဒီးဟဲစိာ်တၢ်မဲာ်ဆှးလၢကီၢ်အဲၤကူပတူးအဂီၢ်လီၤ. 5 ပှၤလၢအနာ်ကီၢ်ကူၤၡးဒီးကတိၤဒိၣ်ကတိၤသွါကီၢ် အဲၤကူပတူးတဖၣ်ကပျံၤတၢ်ဒီးကဘၣ်တၢ်မၤမဲာ်ဆှးအီၤလီၤ. 6 ဖဲတၢ်ဆၢကတီၢ်န့ၣ်ဟဲဝဲဒီး, ပှၤလၢအအိၣ်လၢကီၢ်ဖလ့ၡသး အပီၣ်လဲၣ်ကၢၢ်နံၤတဖၣ်ကစံးဝဲ, ကွၢ်တၢ်လၢအမၤတ့ၢ်အသး ဒီးပှၤတကလုာ်လၢပသန့ၤပသးလၢအီၤလၢကဒီဒၣ်အိၣ်ပှိၤပှၤလၢ ကီၢ်အၤၡူၢ်အစီၤပၤဖးဒိၣ်အဂီၢ်န့ၣ်တက့ၢ်. ပအိၣ်မူကသ့ဒံးဝဲလၢကျဲဒ်လဲၣ်.”