1 အအံၤမ့ၢ်တၢ်ကစီၣ်ဘၣ်ဃးမိၤအးအကီၢ်လီၤ. ဝ့ၢ်ဧၢ်ဒီးဝ့ၢ်ကံၢ်တဖၣ်ဘၣ်တၢ်မၤဟးဂီၤ အီၤလၢတနၤဃီအတီၢ်ပူၤဒီးတၢ်ဘှ့ၣ် တၢ်ဘှီၣ်လုၣ်ဘၢကီၢ်မိၤအးဒီဘ့ၣ်န့ၣ်လီၤ. 2 ပှၤဒံးဘိၣ်ဖိတဖၣ်လဲၤထီၣ်ကစၢၢ်လၢကဟီၣ်ဝဲယၢၤဝဲဖဲတၢ်ဘူၣ် တၢ်ဘါအလီၢ်အိၣ်ဝဲန့ၣ်လီၤ. ပှၤမိၤအးဖိတဖၣ်ဟီၣ်ဝဲယၢၤဝဲလၢ တၢ်သူၣ်အုးသးအုးအပူၤလၢဝ့ၢ်နဘိဒီးဝ့ၢ်မ့ဒဘၤတဖၣ်အဃိလီၤ. အဝဲသ့ၣ်လူၤကွံာ်အခိၣ်တဖၣ်ဒီးအခၣ်ဆူၣ်တဖၣ်လၢတၢ်သူၣ်အုး သးအုးအပူၤလီၤ. 3 ပှၤဂီၢ်မုၢ်လၢကျဲတဖၣ်အပူၤန့ၣ်ကူကၤထၢၣ်တၢ်ကံးယာ်တဖၣ်ဒီးလၢ ဝ့ၢ်အတၢ်လီၢ်ဖးလဲၢ်အပူၤဒီးလၢဟံၣ်ခိၣ်ဒုးတဖၣ်အဖီခိၣ်န့ၣ် ပှၤဂီၢ်မုၢ်ကအုကစွါဒီးဟီၣ်ဝဲယၢၤဝဲလီၤ. 4 ပှၤဂီၢ်မုၢ်လၢဝ့ၢ်ဃ့ၡဘိၣ်ဒီးဝ့ၢ်အ့လဧၤလ့ၤတဖၣ်ကိးပသူထီၣ်ဝဲ, ဒီးအဝဲသ့ၣ်အတၢ်ကိးထီၣ်ဟူတုၤလၢဝ့ၢ်ယါဟးလီၤ. သုးဖိတဖၣ်ဒၣ်လဲာ်ကနိးကစုာ်ဝဲဒီးအတၢ်သူၣ်ဒူသးဒူလၢာ်ကွံာ် ဝဲလီၤ. 5 ယသးကိးပသူထီၣ်လၢကီၢ်မိၤအးအဂီၢ်လီၤ. ပှၤဂီၢ်မုၢ်ဃ့ၢ်ထီၣ်ကွံာ်ဝဲတုၤလၢဝ့ၢ်စိၤဧၢ်, ဒီးဆူအဲးကလးၡဃ့ၡၣ်န့ၣ်လီၤ. တနီၤလဲၤထီၣ်ကျဲဆူဝ့ၢ်လူဃံးဒီး ဟီၣ်ဝဲယၢၤဝဲဖဲအလဲၤတၢ်အဖၢမုၢ်လီၤ. တနီၤဃ့ၢ်ထူၣ်ဖျဲးထီၣ် ဆူဝ့ၢ်ဃိရနဲၣ်, အိၣ်ဒီးတၢ်သူၣ်အုးသးအုးအသီၣ်ဖးဒိၣ်လီၤ. 6 နံးမရံအထံကျိဖိလီၤသံးကွံာ်ဝဲ, တပံၢ်လၢအကပၤတဖၣ် ဃ့ထီကွံာ်ဝဲဒီးတၢ်အလါဟ့တအိၣ်တီၢ်နီတမံၤလၢၤဘၣ်. 7 ပှၤဂီၢ်မုၢ်လဲၤခီဂာ်ထံပံၢ်သလီအတြီၤဒီးကျဲးစၢးဃ့ၢ်ပူၤဖျဲးကွံာ် ဃုာ်ဒီးအတၢ်ဖိတၢ်လံၤတဖၣ်ခဲလၢာ်န့ၣ်လီၤ. 8 ဖဲမိၤအးအကီၢ်ဆၢတၢ်လီၢ်ကိးပူၤဒဲးန့ၣ်, တၢ်နၢ်ဟူဘၣ်တၢ် ဟီၣ်တၢ်ယၢၤအသီၣ်လီၤ. တၢ်နၢ်ဟူအီၤလၢဝ့ၢ်အ့ကလံၣ် ဒီးဝ့ၢ်ဘ့ၣ်အ့လံၣ်တဖၣ်လီၤ. 9 ဖဲဝ့ၢ်ဒံမိၣ်န့ၣ်, ထံကျိဂီၤဝဲဒီးတၢ်သွံၣ်ဒီးလၢပှၤဖဲန့ၣ်တဖၣ်အဂီၢ်န့ၣ်, ဒီးကစၢ်ယွၤအိၣ်ဒီးတၢ်တနီၤလၢအစုပူၤလၢအအၢဒိၣ်န့ၢ်အန့ၣ် တက့ၢ်လီၤ. မ့ၢ်လံ, ပှၤလၢအအိၣ်လီၤတဲာ်လၢကီၢ်မိၤအး အပူၤကိးဂၤဒဲးန့ၣ်, တၢ်ကမၤသံအီၤလၢတၢ်ဂၢ်သွံၣ်ဂၢ်စီၤဖး ဒိၣ်အပူၤလီၤ.