14
1 ယွၤကသးကညီၤကဒီးအပှၤဂီၢ်မုၢ်အံၣ်စရ့လးတဘျီဒီးဃု ထၢအီၤဒ်အတၢ်ဒၣ်ဝဲအသိးလီၤ. ကပျဲကဒီးအဝဲသ့ၣ်အိၣ်က့ၤလၢအ ထံအကီၢ်ဒၣ်ဝဲတဘျီ, ဒီးပှၤတခီဘီမုၢ်ဖိတ ဖၣ်ကဟဲအိၣ်ဆိးသကိးဒီးအဝဲသ့ၣ်ဖဲန့ၣ်, န့ၣ်လီၤ.
2 ပှၤကလုာ်အါကလုာ်ကမၤစၢၤပှၤအံၣ်စရ့လးဖိတဖၣ်ဒ်သိးကက့ၤ ကဒါက့ၤဘၣ်ဆူကီၢ်လၢယွၤဟ့ၣ်လီၤအဝဲသ့ၣ်န့ၣ်လီၤ. ဖဲန့ၣ်,ပှၤကလုာ်တဖၣ်ကမၤပှၤအံၣ်စရ့လးဖိတဖၣ်အတၢ် ခ့တၢ်ပှၤအတၢ်မၤဒ်ကုၢ်တဖၣ်အသိးန့ၣ်လီၤ. တဘျီပှၤလၢအမၤန့ၢ်မၤ နၢၤပှၤအံၣ်စရ့လးဖိတဖၣ်န့ၣ်, ခဲအံၤကဘၣ်တၢ်မၤန့ၢ်မၤ နၢၤအီၤလၢပှၤအံၣ်စရ့လးဖိ, ဒီးအံၣ်စရ့လးအပှၤဂီၢ်မုၢ်က ပၢပှၤတဖၣ်လၢ, တဘျီမၤနၢၤမၤဃၣ်တ့ၢ်အဝဲသ့ၣ်န့ၣ်လီၤ.
3 ယွၤကဟ့ၣ်ပှၤအံၣ်စရ့လးဖိလၢတၢ်မၤမုာ်ထီၣ်က့ၤလၢအတၢ်ဆါ ဆိးကဲးဒီးအတၢ်နးတၢ်ဖှီၣ်အပူၤဒီးလၢတၢ်မၤအဆူၣ်အကိၤလၢ တၢ်မၢဆူၣ်တ့ၢ်အဝဲသ့ၣ်န့ၣ်လီၤ.
4 ဖဲအဝဲမၤတၢ်အံၤဒီး, အဝဲသ့ၣ်ကဘၣ်ဒုၣ်ဒွဲၣ်ကီၢ်ဘၤဘူၤလိၣ်အစီၤ ပၤဒီးစံး, “စီၤပၤအအၢအသီတဂၤလီၤလံ. အဝဲတမၤအၢမၤ နးကဒီးပှၤနီတဂၤနီတစုလၢၤဘၣ်.
5 ယွၤမၤကတၢၢ်ကွံာ်စီၤပၤအအၢအသီတဖၣ်အတၢ်စိတၢ်ကမီၤဒီး
6 ပှၤလၢအမၤနၢၤမၤဃၣ်ပှၤဂီၢ်မုၢ်လၢတၢ်သးဒိၣ်ဒီးတဆိကတီၢ် လၢအတၢ်မၤနးမၤဖှီၣ်ပှၤကလုာ်တဖၣ်လၢအဝဲသ့ၣ်ဒုးန့ၢ်ဒီးမၤ နၢၤအီၤတဖၣ်န့ၣ်ယွၤဆိကတီၢ်ကွံာ်အီၤလံ.
7 အအံၤတစုန့ၣ်, ဟီၣ်ခိၣ်ဒီဘ့ၣ်မုာ်လၤသးခုလၢတၢ်အိၣ်ဘှံးဒီး တၢ်ဃူတၢ်ဖိးအပူၤလီၤ. ဒီးပှၤကိးဂၤဒဲးသူၣ်ဝံၣ်သးဆၢတၢ် လၢတၢ်သးခုအပူၤန့ၣ်လီၤ.
8 လဘၤနိၣ်အသ့ၣ်ဆှိဒီးအသ့ၣ်ဆှိအ့ရ့းတဖၣ်သူၣ်ခုသးခုလၢ စီၤပၤလၢအလီၤဝဲတဂၤအဃိလီၤ. အဂ့ၢ်ဒ်အံၤ, အဝဲတအိၣ်လၢၤ ဘၣ်အဃိဒီး, ပှၤကကူာ်လီၤအဝဲသ့ၣ်တအိၣ်ဘၣ်နီတဂၤလၢၤဘၣ်.
9 တၢ်သံအကီၢ်အိၣ်ကတဲာ်ကတီၤအသးလၢကတူၢ်လိာ်မုာ်ကီၢ် ဘၤဘူၤလိၣ်အစီၤပၤအဂီၢ်လီၤ. ပှၤတဖၣ်လၢအစိကမီၤ ဒိၣ်တ့ၢ်လၢဟီၣ်ခိၣ်ချၢအံၤအတဃၣ်တဖၣ်ဂဲၤဂီၤအသးဖဲအံၤ ဖဲနုၤန့ၣ်လီၤ. စီၤပၤတဖၣ်အတဃၣ်ဂဲၤဆၢ ထၢၣ်လၢအလီၢ်ပစိာ်တဖၣ်အဖီခိၣ်လီၤ.
10 အဝဲသ့ၣ်ခဲလၢာ်ကိးထီၣ်ဆူအဝဲအအိၣ်, ခဲအံၤနဂံၢ်စၢ်ဘါစၢ်ဒ်ပဝဲအသိးဒီး နမ့ၢ်ပှၤလၢပကျါတဂၤလီၤ.
11 ညီနုၢ်န့ၣ်နဘၣ်တၢ်မၤလၤကပီၤနၤလၢတနၢ်သီတူၢ်တဖၣ်အ တၢ်ဒ့တၢ်အူလီၤ. ဘၣ်ဆၣ်ဒီး, ခဲအံၤနအိၣ်လၢပှၤသံတဖၣ်အကီၢ် ပူၤလီၤ. နမံလီၤလၢလီၢ်မံခးလၢၣ်ဧိၤဆှးဧိၤအလိၤဒီးနဘၣ်တၢ် မၤဘၢနၤလၢယၣ်လုးထိးကလဲာ်တဖၣ်လီၤ.
12 ဘၤဘူၤလိၣ်အစီၤပၤ, ဆၣ်တူၢ်ဂီၤကပြုၢ်ကပြီၤဧၢ, နလီၤ တဲာ်ကွံာ်လၢမူခိၣ်လံ. လၢအပူၤကွံာ်န့ၣ်, နမၤန့ၢ်မၤနၢၤပှၤကလုာ်တဖၣ် ဘၣ်ဆၣ်ဒီး, ခဲအံၤနဘၣ်တၢ်ကွံာ်လီၤနၤဆူဟီၣ်ခိၣ်လိၤလံ.
13 နပာ်လီၤတ့ၢ်နသးလၢနကလဲၤထီၣ်ဆူမူခိၣ်ဒီးပာ်လီၤနလီၢ်ပစိာ် လၢဆၣ်အထီကတၢၢ်တဖၣ်အဖီခိၣ်လီၤ. နဆိကမိၣ်တ့ၢ်လၢန ကဆ့ၣ်နီၤဘၣ်ဒ်စီၤပၤတဂၤအသိးလၢကစၢၢ်ဒီခိၣ်လၢကလံၤ စိးတကပၤဖဲကစၢ်တဖၣ်ပာ်ဖှိၣ်အသးန့ၣ်လီၤ.
14 နစံးတ့ၢ်လၢနကလဲၤထီၣ်ဆူတၢ်အၢၣ်တဖၣ်အဒီခိၣ်ဒ်သိး နကလီၤဂာ်ဒီးသ့တၢ်လၢာ်တဂၤန့ၣ်လီၤ.
15 ဘၣ်ဆၣ်လၢ တၢ်န့ၣ်အလီၢ်, ခဲအံၤနဘၣ်တၢ်ထုးလီၤ ကွံာ်နၤဆူတၢ်လီၢ်အယိာ်ကတၢၢ်တတီၤလၢတၢ်သံအကီၢ်ပူၤန့ၣ်လီၤ.
16 ပှၤသံတဖၣ်ကကွၢ်စူၣ်ကွၢ်ထံနၤဒီးအဝဲသ့ၣ်ကသံကွၢ်ဝဲ, ‘ပှၤအဝဲအံၤမ့ၢ်ပှၤလၢအမၤဟူးဝးဟီၣ်ခိၣ်ဒီးမၤကနိးကစုာ် ဘီမုၢ်တဖၣ်န့ၣ်ဧါ.
17 အဝဲအံၤမ့ၢ်ပှၤလၢအမၤဟးဂီၤတ့ၢ်ဝ့ၢ်တဖၣ်ဒီးဒုး ကဲထီၣ်ဟီၣ်ခိၣ်ဆူမဲးမုၢ်ခိၣ်န့ၣ်ဧါ. အဝဲအံၤမ့ၢ်ပှၤလၢ အတပျၢ်ဖျဲးအပှၤဃိာ်ဖိတဖၣ်ဒီးတပျဲဘၣ်အဝဲသ့ၣ်လၢ ကက့ၤဆူဟံၣ်ဘၣ်တဂၤန့ၣ်ဧါ.’
18 ဟီၣ်ခိၣ်အစီၤပၤခဲလၢာ်မံလီၤလၢတၢ်သွၣ်ခိၣ်လီၤဘီလီၤမုၢ်တဖၣ် အပူၤန့ၣ်လီၤ.
19 မ့မ့ၢ်နဲ, နတၢ်သွၣ်ခိၣ်ပူၤတအိၣ်ဘၣ်. ဒီးနစိၣ်ဘၣ်တၢ်ကွံာ်လီၤ အီၤဆူတၢ်အုၣ်တၢ်ကျၣ်အပူၤလီၤ. ဘၣ်တၢ်ကးဘၢအီၤလၢ သုးဖိတဖၣ်အနီၢ်ခိလၢအသံလၢတၢ်ဒုးတၢ်ယၤအပူၤဒီးဘၣ်တၢ် စူးကွံာ်ဃုာ်အီၤဒီးအဝဲသ့ၣ်ဆူလၢၢ်လ့အပူၤတပူၤဒီးဘၣ်တၢ်ယီၢ်တံၢ် အီၤန့ၣ်လီၤ.
20 မ့ၢ်လၢနမၤဟးဂီၤနထံနကီၢ်ဒီးမၤသံနပှၤဒၣ်နဲတဖၣ်အဃိ, နတဘၣ်တၢ်ခူၣ်လီၤနၤဒ်စီၤပၤအဂၤတဖၣ်အသိးနီတစုဘၣ်. နဒူၣ်ဖိထၢဖိအအၢအသီတဖၣ်စ့ၢ်ကီးတအိၣ်မူတ့ၢ်ဘၣ်ဝဲဘၣ်.
21 မ်တၢ်မၤသံတၢ်စးထီၣ်တက့ၢ်. စီၤပၤအံၤအဖိခွါတဖၣ်ကဘၣ် သံလၢအမိၢ်ပၢ်ဖံဖုတဖၣ်အတၢ်ဒဲးဘးအဃိလီၤ. အဝဲသ့ၣ်တပၢဘၣ်ဟီၣ်ခိၣ်ဒီးကးဘၢအီၤလၢဝ့ၢ်တဖၣ်နီတဂၤ နီတစုဘၣ်.”
22 ယွၤသ့တၢ်လၢာ်ကစၢ်စံးဝဲဒၣ်, “ယကဒုးတၢ်ထီဒါဘၤဘူၤ လိၣ်ဒီးမၤဟးဂီၤအီၤလီၤ. ယတပာ်လီၤတဲာ်တၢ်နီတမံၤ, ဒီးဖိသၣ်တဖၣ်မ့ၢ်ဂ့ၤ, ပှၤအိၣ်မူတ့ၢ်တဖၣ်မ့ၢ်ဂ့ၤ, နီတဂၤဘၣ်. ယၤ, ယွၤ, စံးတ့ၢ်လံတၢ်လံလီၤ.
23 ယကဒုးကဲထီၣ်ကီၢ်ဘၤဘူၤလိၣ်လၢတၢ်ကပျၢၤအပူၤတပူၤဒီးဒိ ကအိတဖၣ်ကအိၣ်ဖဲန့ၣ်လီၤ. ယကခွဲသိၣ်ကီၢ်ဘၤဘူၤလိၣ်လၢ နီၣ်ခွဲသိၣ်တဘိလၢအကခွဲပျီကွံာ်တၢ်ခဲလၢာ်န့ၣ်လီၤ. ယၤ, ယွၤသ့တၢ်လၢာ်ကစၢ်, စံးတ့ၢ်လံဝဲလီၤ.”
24 ယွၤသ့တၢ်လၢာ်ကစၢ်မၤတ့ၢ်လံတၢ်ဆိၣ်တမံၤစံးဝဲ, “တၢ်လၢယကျဲၤတ့ၢ်န့ၣ်ကမၤအသးဒီးတၢ်လၢယပာ်လီၤတ့ၢ် ယသးလၢယကမၤန့ၣ်, ကဘၣ်တၢ်မၤကဲထီၣ်အီၤန့ၣ်လီၤ.
25 ယကမၤဟးဂီၤပှၤအၤၡူၢ်ဖိတဖၣ်လၢယကီၢ်အံၣ်စရ့လးအပူၤ ဒီးယီၢ်တံၢ်အဝဲသ့ၣ်လၢယကစၢၢ်တဖၣ်အဒီခိၣ်န့ၣ်လီၤ. ယကမၤထူၣ်ဖျဲးယပှၤဂီၢ်မုၢ်လၢပှၤအၤၡူၢ်ဖိတဖၣ်အနီၣ်ယိးဘိ ဒီးလၢတၢ်ဝံတၢ်ယိးတဖၣ်လၢအဝဲသ့ၣ်ဘၣ်ဝံတ့ၢ်ယိးတ့ၢ်ဝဲန့ၣ်လီၤ.
26 အဝဲအံၤမ့ၢ်ယတၢ်ကူၣ်တၢ်ကျဲၤလၢဟီၣ်ခိၣ်ဒီဘ့ၣ်အဂီၢ်ဒီးယစု ယူာ်ထီၣ်အသးလၢကစံၣ်ညီၣ်ပှၤကလုာ်တဖၣ်အဂီၢ်လီၤ.”
27 ယွၤသ့တၢ်လၢာ်ကစၢ်ပာ်လီၤတ့ၢ်အသးလၢကမၤတၢ်အံၤလီၤ. အဝဲယူာ်ထီၣ်အစုလၢကစံၣ်ညီၣ်တၢ်အဂီၢ်ဒီးပှၤထုးက့ၤအီၤ တန့ၢ်ဘၣ်နီတဂၤဘၣ်.
28 အအံၤမ့ၢ်တၢ်ကစီၣ်လၢတၢ်တဲဖျါအီၤဖဲစီၤပၤစီၤအၤဃးသံ ဝဲအနံၣ်န့ၣ်လီၤ.
29 ပှၤဖလ့ၡသးဖိသ့ၣ်ဧၢ, နီၣ်တီၢ်လၢအတီၢ်သုန့ၣ်ကၢ်လံ, ဘၣ်ဆၣ်သုတအိၣ်ဒီးတၢ်ဂ့ၢ်နီတမံၤလၢသုကသးခုအဂီၢ်ဘၣ်. ဖဲဂုၢ်တဘိသံန့ၣ်, ဂုၢ်အၢန့ၢ်ဒံးအန့ၣ်ဟဲထီၣ်လၢအလီၢ်လီၤ. ဂုၢ်တဘိအဒံၣ်ဖးထီၣ်ဝဲပ ယိၤလၢအယူၤတဘိလီၤ.
30 ယွၤကမ့ၢ်ပှၤကွၢ်သိလၢအပှၤဖှီၣ်ဖိယာ်ဖိတဖၣ်အဂီၢ်ဒီးက ပျဲအဝဲသ့ၣ်အိၣ်မူလၢတၢ်ပူၤဖျဲးအလီၢ်လီၤ. ဘၣ်ဆၣ်ဒီး, အဝဲကဆှၢလီၤတၢ်သၣ်ဝံၤလီၤဒိလၢအလီၤပျံၤလီၤဖုးဖးဒိၣ် လၢသုဝဲပှၤဖလ့ၡသးဖိတဖၣ်အဖီခိၣ်ဒီးတပျဲသုကမူနီတဂၤဘၣ် န့ၣ်လီၤ.
31 သုဝဲပှၤဖလ့ၡသးဖိအဝ့ၢ်တဖၣ်ဧၢ, ဟီၣ်အိၣ်ယူၤဒီးကိးထီၣ်လၢ တၢ်မၤစၢၤအဂီၢ်တက့ၢ်. သုဝဲခဲလၢာ်သ့ၣ်ဧၢ, ပျံၤတၢ်ဖုးတၢ်တက့ၢ်. ဖၣ်ကမူၣ်အတၢ်အၢၣ်တကိၢ်လိၣ်ဟဲထီၣ်လၢကလံၤစိးတခီလီၤ. မ့ၢ်သုးမုၢ်တဖုလၢပှၤပျံၤတၢ်တအိၣ်ဘၣ်လၢအသုးမုၢ်အကျါနီ တဂၤဘၣ်န့ၣ်လီၤ.
32 မ့ၢ်ပကစံးဆၢပှၤစိာ်တၢ်ကစီၣ်တဖၣ်လၢအဟဲဆူပအိၣ်လၢကီၢ် ဖလ့ၡသးတခီန့ၣ်ဒ်လဲၣ်. ပကတဲဘၣ်အဝဲသ့ၣ်လၢယွၤဒုးအိၣ်ထီၣ် ဒီးပာ်ဂၢၢ်ပာ်ကျၢၤလံဝ့ၢ်စံယိၣ်လီၤ. ဒီးအပှၤဂီၢ်မုၢ်လၢ အတူၢ်ဘၣ်တၢ်နးတၢ်ဖှီၣ်တဖၣ်ကထံၣ်န့ၢ်တၢ်ပူၤဖျဲးဖဲန့ၣ်န့ၣ်လီၤ.