16
1 လၢဝ့ၢ်စ့လၤလၢပှၢ်မုၢ်ကနၢအပူၤတခီ, ပှၤမိၤအးဖိတဖၣ်ဆှၢအသိတဒုဒ်တၢ် ဟ့ၣ်တခါအသိးဆူပှၤတဂၤလၢအပၢတၢ်လၢဝ့ၢ် ယရူၤၡလ့ၣ်အပူၤန့ၣ်လီၤ.
2 အဝဲသ့ၣ်အိၣ်ခိးတၢ်ဖဲထံကျိအၤနိၣ် အကၢၢ်ခိၣ်ဒီးသုးအသးဖဲအံၤဖဲနုၤ လၢတၢ်တိာ်တအိၣ်ဘၣ်အပူၤ, ဒ်ထိၣ်တဖၣ်လၢအဘၣ် တၢ်နီၣ်ထီၣ်ကွံာ်အီၤလၢအသွံပူၤအသိးန့ၣ်လီၤ.
3 အဝဲသ့ၣ်တဲဘၣ်ပှၤယူဒၤဖိတဖၣ်, “တဲပှၤတၢ်လၢပကဘၣ်မၤအီၤတက့ၢ်. ဒီဒၣ်အိၣ်ပှိၤပှၤဒ်သ့ၣ်တထူၣ်လၢအဟ့ၣ်ထီၣ်တၢ် ကဒုအခုၣ်ဖဲမုၢ်ထူၣ်တၢ်ကိၢ်ဆါကတီၢ်, ဒီးပျဲပအိၣ်ဘှံးလၢန တၢ်ကဒုအပူၤတက့ၢ်. ပမ့ၢ်ဒၣ်ပှၤဘၣ်ကီဘၣ်ခဲတဖၣ်လီၤ. ပာ်ခူသူၣ်ပှၤဖဲပှၤထံၣ်န့ၢ်ပှၤတသ့ဘၣ်နီတဂၤဂၤအလီၢ်န့ၣ်တက့ၢ်.
4 ပျဲပအိၣ်လၢနထံလီၢ်ကီၢ်ပူၤတက့ၢ်. ဒီဒၣ်အိၣ်ပှိၤပှၤလၢပှၤတဖၣ်လၢအသးအိၣ်မၤဟးဂီၤပှၤန့ၣ် တက့ၢ်.” (တၢ်မၤအၢမၤနးဒီးတၢ်မၤဟးဂီၤကကတၢၢ်ဝဲ ဒီးပှၤတဖၣ်လၢအမၤဟးဂီၤထံကီၢ်ကလဲၤပူၤကွံာ်ဝဲလီၤ.
5 အန့ၣ်ဒီး, စီၤပၤဒၤဝံးအစၢၤအသွဲၣ်အကျါတဂၤကကဲစီၤပၤ, ဒီးအဝဲကပၢပှၤဂီၢ်မုၢ်လၢတၢ်သးတီဒီးတၢ်အဲၣ်တၢ်ကွံအပူၤလီၤ. တၢ်လၢအဘၣ်န့ၣ်, အဝဲကမၤဝဲချ့ချ့လီၤ. ဒီးတၢ်စံၣ်ညီၣ်တီ မၤအသးကစီဒီဧါန့ၣ်, ကကွၢ်ထွဲဝဲလီၤ.)
6 ပှၤယူဒၤဖိတဖၣ်စံးဝဲ, “ပနၢ်ဟူတ့ၢ်ပှၤမိၤအးဖိတဖၣ်ပာ် ထီၣ်ထီအသးထဲလဲၣ်လီၤ. ပသ့ၣ်ညါလၢအဝဲသ့ၣ်ပာ်ကဖၢလၢအ သးဒီးပာ်ထီၣ်ထီအသးလီၤ. ဘၣ်ဆၣ်ဒီး, အတၢ်ကတိၤ ဒိၣ်အကိာ်တဖၣ်န့ၣ်မ့ၢ်တၢ်အိၣ်ကလီလီၤ.”
7 ပှၤမိၤအးဖိတဖၣ်ကဟီၣ်ဝဲယၢၤဝဲလၢအဘၣ်တူၢ်တၢ်နးတၢ်ဖှီၣ် အဃိလီၤ. အဝဲသ့ၣ်ခဲလၢာ်ကဟီၣ်ဝဲယၢၤဝဲဖဲ အသ့ၣ်နီၣ်ထီၣ်တၢ်အီၣ်အဝံၣ်လၢအဝဲသ့ၣ်အီၣ်ညီနူၢ်ဝဲ လၢဝ့ၢ်ကံၢ်ဃရ့ၡးအပူၤလီၤ. အဝဲသ့ၣ်ကတုၤဆူတၢ်သးဟးဂီၤအပူၤလီၤ.
8 စံာ်ပျီဘူးဒီးဝ့ၢ်ဃ့ၡဘိၣ်တဖၣ်ဒီးစံးဘမၤအစပံးလီၢ်တဖၣ်ဘၣ် တၢ်မၤဟးဂီၤအီၤလံ. စပံးထံလၢစပံးလီၢ်တဖၣ်အံၤန့ၣ်ညီနုၢ်မၤ မူၤမၤဘှီးပှၤကလုာ်အစီၤပၤတဖၣ်, ဒီးလၢတဘျီန့ၣ်, စပံးမုၢ်တဖၣ်အံၤသလၣ်လီၤအသးတုၤလၢဝ့ၢ်ယၤစ့ၢ်, ဒီးဆူမုၢ်ထီၣ်တကပၤတုၤလၢပှၢ်မုၢ်ကနၢ, ဒီးဆူမုၢ်နုာ်တကပၤတုၤဆူပီၣ်လဲၣ်သံအဘးခီတခီန့ၣ်လီၤ.
9 ခဲအံၤယဟီၣ်ယယၢၤလၢစံးဘမၤအစပံးမုၢ်အလီၢ်တဖၣ် အဃိ, ဒ်ယဟီၣ်ယယၢၤလၢဝ့ၢ်ယၤစ့ၢ်အဃိအသိးန့ၣ်လီၤ. ယမဲာ်ထံတဖၣ်လီၤဝဲလၢဝ့ၢ်ဃ့ၡဘိၣ်ဒီးဝ့ၢ်အ့လဧၤလ့ၤ အဂီၢ်လီၤ. အဂ့ၢ်ဒ်အံၤတၢ်ကူးဘုတအိၣ်လၢၤ လၢအကမၤသးခုအပှၤဂီၢ်မုၢ်အဂီၢ်ဘၣ်.
10 လၢစံာ်ပျီလၢဟီၣ်ခိၣ်ညၣ်ထ့ၣ်ဂ့ၤတဖၣ်အပူၤ, ပှၤတသးခုလၢၤ နီတဂၤလၢၤဘၣ်. လၢစပံးလီၢ်တဖၣ်အပူၤပှၤကကိးပသူထီၣ် ဒီးသူၣ်ဝံၣ်သးဆၢတၢ်တအိၣ်လၢၤနီတဂၤလၢၤဘၣ်. ပှၤကယီၢ်စပံးသၣ်လၢကဒုးကဲထီၣ်စပံးထံအဂီၢ်တအိၣ်လၢၤ နီတဂၤလၢၤဘၣ်. တၢ်သးခုအတၢ်ကိးပသူထီၣ်တဖၣ် ဆိကတီၢ်အသးလံ.
11 ယကအုလၢတၢ်သးအုးအပူၤလၢကီၢ်မိၤအးအဂီၢ်, ဒီးယကအုလၢတၢ်ကိၢ်တၢ်ဂီၤအပူၤလၢဝ့ၢ်ကံၢ်ဃ့ရ့းအဂီၢ်လီၤ.
12 ပှၤမိၤအးဖိတဖၣ်မၤလီၤဘှံးလီၤတီၤအသးခီဖျိအတၢ်လဲၤ ဆူအတၢ်ဘူၣ်တၢ်ဘါအလီၢ်တဖၣ်လၢကစၢၢ်အလိၤဒီးဆူ အတၢ်လုၢ်ဟံၣ်တဖၣ်လၢကဘါထုကဖၣ်တၢ်အဂီၢ်လီၤ. ဘၣ်ဆၣ်ဒီး, တၢ်သ့ၣ်တဖၣ်အံၤတမၤဂ့ၤအဝဲသ့ၣ်နီတမံၤဘၣ်.
13 အအံၤမ့ၢ်တၢ်ကစီၣ်လၢယွၤဟ့ၣ်ဆိတ့ၢ်ဘၣ်ဃးကီၢ်မိၤအး အဂ့ၢ်န့ၣ်လီၤ.
14 ဒီးခဲအံၤယွၤစံးဝဲဒၣ်, “လၢသၢနံၣ်တီတီအပူၤန့ၣ်, ကီၢ်မိၤအးအတၢ်ထူးတၢ်တီၤဖးဒိၣ်ကလီၤမၢ်ကွံာ်ဝဲလီၤ. လၢအပှၤဂီၢ်မုၢ်အါအါဂီၢ်ဂီၢ်အကျါန့ၣ်, ထဲပှၤစှၤဂၤဧိၤက အိၣ်မူတ့ၢ်ဝဲဒီးအဝဲသ့ၣ်အဂံၢ်အဘါကစၢ်ဝဲလီၤ.”