50
1 စီၤယိၤသးစုးလီၤအသးလၢအပၢ်အဖီခိၣ်, ဟီၣ်ယၢၤဝဲဒီးနၢမူ အပၢ်အမဲာ်န့ၣ်လီၤ.
2 ဝံၤဒီးစီၤယိၤသးဟ့ၣ်လီၤအကလုၢ်ဒ်သိးပှၤကဖှူအပၢ်အစိၣ်လၢ ကသံၣ်ဒ်သိးအစိၣ်သုတဟးဂီၤတဂ့ၤအဂီၢ်န့ၣ်လီၤ.
3 တၢ်ဖှူကသံၣ်ဒ်သိးအံၤညီနုၢ်ယံာ်ဝဲအသီလွံၢ်ဆံလီၤ. ပှၤအဲၤကူပတူးဖိတဖၣ်ဟီၣ်တၢ်ယၢၤတၢ်လၢအဃိအသီ နွံဆံလီၤ.
4 တုၤဟီၣ်တၢ်ယၢၤတၢ်အဆၢကတီၢ်ပူၤကွံာ်ဝဲန့ၣ်, စီၤယိၤသးစံးဘၣ်စီၤပၤအပဒိၣ်ပပှၢ်တဖၣ်, “ဝံသးစူၤလဲၤ စိာ်တၢ်ကစီၣ်အံၤဆူစီၤပၤအအိၣ်န့ၣ်တက့ၢ်.
5 ဖဲယပၢ်ဘူးကသံန့ၣ်အဝဲမၢယဆိၣ်တၢ်ဒီးအီၤဒ်သိးယကခူၣ်လီၤ အီၤလၢတၢ်သွၣ်ခိၣ်အပူၤလၢအကတဲာ်ကတီၤပာ်ဝဲအိၣ်လၢကီၢ် ကနၤဧၣ်အပူၤန့ၣ်လီၤ. အဃိဝံသးစူၤပျဲယလဲၤဒီးခူၣ်လီၤယပၢ်, ဝံၤဒီးယကဟဲက့ၤကဒါက့ၤလီၤ.”
6 စီၤပၤစံးဆၢဝဲ, “လဲၤဒီးခူၣ်လီၤနပၢ်ဒ်နဆိၣ်တ့ၢ်တၢ်ဒီး အီၤလၢနကမၤအီၤအသိးန့ၣ်တက့ၢ်.”
7 အဃိဒီး, စီၤယိၤသးလဲၤဝဲလၢကခူၣ်လီၤကွံာ်အပၢ်န့ၣ်လီၤ. ကယဲၢ်စီၤပၤအပဒိၣ်ပပှၢ်တဖၣ်, ပှၤအလီၢ်ဒိၣ်လၤထီလၢစီၤပၤအနူၢ် ပူၤစီၤပူၤတဖၣ်, ဒီးကယဲၢ်ပှၤသးပှၢ်တဖၣ်လၢကီၢ်အဲၤကူ ပတူးအပူၤန့ၣ်လဲၤဃုာ်တၢ်ဒီးစီၤယိၤသးန့ၣ်လီၤ.
8 အဝဲအဒူၣ်ဖိထၢဖိ, အဒီပုၢ်ဝဲၢ်ခွါတဖၣ်, ဒီးအပၢ်အဒူၣ်ဖိထၢ ဖိအဂၤတဖၣ်ခဲလၢာ်, လဲၤဃုာ်တၢ်ဒီးအီၤလီၤ. ထဲဒၣ်အဖိဆံးတဖၣ်, အသိတဖၣ်, မဲာ်တဲးလဲးတဖၣ်ဒီးအဂီၤဘုၣ် ဂီၤဖံးန့ၣ်အိၣ်တ့ၢ်ဝဲလၢကီၢ်ကိၡ့ၣ်အလီၢ်ကဝီၤပူၤန့ၣ်လီၤ.
9 ပှၤဒိးလ့ၣ်ကဟၣ်တဖၣ်, ပှၤဒိးကသ့ၣ်တဖၣ်လဲၤဃုာ်တၢ်ဒီးအီၤစ့ၢ် ကီးလီၤ. ပှၤလဲၤတၢ်တဖၣ်န့ၣ်မ့ၢ်ပှၤဂီၢ်မုၢ်ဖးဒိၣ်တဖုလီၤ.
10 ဖဲအဝဲသ့ၣ်လဲၤတုၤဆူအၤတၤအကြဲၢ်လၢအအိၣ်လၢထံကျိ ယၢ်ဒ့ၣ်အမုၢ်ထီၣ်န့ၣ်, အဝဲသ့ၣ်ဟီၣ်ဝဲယၢၤဝဲဒိၣ်ဒိၣ်မုၢ်မုၢ်, ယံာ်ယံာ်ထၢထၢ, ဒီးစီၤယိၤသးမၤတၢ်ဟီၣ်တၢ်ယၢၤအမူးတဖၣ်နွံ သီန့ၣ်လီၤ.
11 တုၤကီၢ်ကနၤဧၣ်အထံဖိကီၢ်ဖိတဖၣ်ထံၣ်ဘၣ်ပှၤဂီၢ်မုၢ်တဖၣ်အံၤ ဟီၣ်ဝဲယၢၤဝဲဖဲအၤတၤန့ၣ်အဝဲသ့ၣ်စံးဝဲ, “ပှၤကီၢ်အဲၤကူပတူးဖိတဖၣ်မၤတၢ်ဟီၣ်တၢ်ယၢၤအမူးတမူးအံၤ လီၤသညူးသပှၢ်နးလဲၣ်.” လၢတၢ်န့ၣ်အဃိ, တၢ်လီၢ်န့ၣ်ဘၣ်တၢ်ကိးအမံၤလၢ, “ဟ့းဘ့ၤလးမံးစရၤယံၣ်” န့ၣ်လီၤ.
12 ဒီးစီၤယၤကိာ်အဖိခွါတဖၣ်မၤတ့ၢ်တၢ်ဒ်အပၢ်မၤလိာ်တ့ၢ်အ ဝဲသ့ၣ်အသိး,
13 အဝဲသ့ၣ်လဲၤစိာ်အစိၣ်ဆူကီၢ်ကနၤဧၣ်ဒီးခူၣ်လီၤကွံာ်အီၤလၢ လၢၢ်ကအိပူၤလၢအအိၣ်လၢမးကပ့လၤ, လၢဝ့ၢ်မးမရ့အမုၢ်ထီၣ်စံာ်ပျီအပူၤန့ၣ်လီၤ. တၢ်လီၢ်န့ၣ်မ့ၢ်စံာ်ပျီလၢစီၤအၤဘြၤဟၣ်ပှ့ၤတ့ၢ်ဝဲလၢပှၤဃ့ၤ သးဖိစီၤဧ့ၤဖရိၣ်အအိၣ်ဒ်တၢ်ခူၣ်လီၤကွံာ်ပှၤသံအဟီၣ်ခိၣ်န့ၣ် လီၤ.
14 ဖဲစီၤယိၤသးခူၣ်လီၤကွံာ်အပၢ်ဝံၤန့ၣ်, အဝဲဟဲက့ၤကဒါက့ၤ ဆူကီၢ်အဲၤကူပတူးဃုာ်ဒီးအဒီပုၢ်ဝဲၢ်ခွါတဖၣ်ဒီးကယဲၢ်ပှၤ ခဲလၢာ်လၢအလဲၤဃုာ်တၢ်ဒီးအီၤလၢတၢ်ခူၣ်လီၤဘါလီၤ အဂီၢ်န့ၣ်လီၤ.
15 လၢအဝဲသ့ၣ်အပၢ်သံဝံၤအလီၢ်ခံန့ၣ်, စီၤယိၤသးအဒီပုၢ်ဝဲၢ် ခွါတဖၣ်စံးဝဲ, “စီၤယိၤသးမ့ၢ်သးဟ့ဒံးပှၤဒီးကူၣ်ကျဲၤဘၣ် ဖုးလၢကဟ့ၣ်ကၣ်ကဒါက့ၤကယဲၢ်တၢ်အၢလၢပမၤဘၣ်တ့ၢ် အီၤတဖၣ်ဒီး, ပကမၤဒ်လဲၣ်.”
16 လၢတၢ်န့ၣ်အဃိ, အဝဲသ့ၣ်ဆှၢလီၤတၢ်ကစီၣ်တမံၤဆူစီၤယိၤသး အအိၣ်စံးဝဲ, “တချုးလၢပပၢ်သံဒံးဘၣ်န့ၣ်,
17 အဝဲမၢတ့ၢ်ပှၤလၢပကတဲဘၣ်နၤ, ဝံသးစူၤပျၢ်ကွံာ်တၢ်ကမၣ်လၢ နဒီပုၢ်ဝဲၢ်ခွါတဖၣ်မၤတ့ၢ်ဝဲ, ဖဲအမၤကမၣ်ဘၣ်နၤအခါတက့ၢ်.’ ခဲအံၤဝံသးစူၤပျၢ်ပှၤ, နပၢ်အကစၢ်ယွၤအကုၢ်အပှၤတဖၣ်, အတၢ်ကမၣ်လၢအမၤဘၣ်တ့ၢ်ဝဲတက့ၢ်.” စီၤယိၤသးဟီၣ်ဝဲ, ဖဲအဝဲန့ၢ်ဘၣ်တၢ်ကစီၣ်အံၤန့ၣ်လီၤ.
18 အန့ၣ်ဒီး, အဒီပုၢ်ဝဲၢ်ခွါတဖၣ်အကစၢ်ဒၣ်ဝဲဟဲဒီးတီၤလီၤလၢ အမဲာ်ညါလီၤ. အဝဲသ့ၣ်စံးဝဲ, “ပအိၣ်လၢနမဲာ်ညါဖဲအံၤ, ဒ်နကုၢ်နပှၤတဖၣ်အသိးန့ၣ်လီၤ.”
19 ဘၣ်ဆၣ်ဒီး, စီၤယိၤသးစံးဘၣ်အဝဲသ့ၣ်, “ပျံၤတၢ်တဂ့ၤ. ယပာ်လီၤယသးလၢကစၢ်ယွၤအလီၢ်တသ့ဘၣ်.
20 သုကူၣ်ထီၣ်တၢ်အၢထီဒါယၤ, ဘၣ်ဆၣ်ဒီးကစၢ်ယွၤလဲလိာ်ကွံာ်အီၤဆူတၢ်အဂ့ၤ, ဒ်သိးပှၤဂီၢ်မုၢ်အါဂၤလၢအအိၣ်မူတနံၤအံၤအသးသမူတဖၣ်, ကဘၣ်တၢ်ပာ်ကီၤအီၤလၢတၢ်မၤတ့ၢ်အသးအဃိလီၤ.
21 သုပျံၤတၢ်ဖုးတၢ်အလီၢ်တအိၣ်နီတမံၤဘၣ်. ယကကွၢ်ထွဲသုဒီးသုဖိတဖၣ်လီၤ.” လၢတၢ်န့ၣ်အဃိ, အဝဲဒုးသးခူတလ့ၢ်က့ၤတ့ၢ်အဝဲသ့ၣ်ဒီးတၢ်မၤမုာ်မၤခုၣ်အတၢ် ကတိၤတဖၣ်လၢအမၤဘၣ်ဒိမးအဝဲသ့ၣ်အသးတဖၣ်န့ၣ်လီၤ.
22 စီၤယိၤသးအိၣ်ဒံးဝဲဆူညါလၢကီၢ်အဲၤကူပတူးအပူၤဃုာ်ဒီး အပၢ်အဒူၣ်ဖိထၢဖိန့ၣ်လီၤ. ဖဲအဝဲသံန့ၣ်အသးအိၣ်အနံၣ်တကယၤတဆံန့ၣ်လီၤ.
23 အဝဲအိၣ်မူဝဲတုၤအထံၣ်ဘၣ်စီၤအ့ဖရဲၣ်အဖိတဖၣ်ဒီးအလံၤတဖၣ် န့ၣ်လီၤ. အဝဲအိၣ်မူဘၣ်စ့ၢ်ကီးဝဲတုၤလၢအဒိးန့ၢ်ဘၣ်စီၤမနၤၡ့ၤအဖိ ခွါစီၤမၤကံၢ်အဖိတဖၣ်လၢအဝဲအဒူၣ်ဖိထၢဖိအပူၤန့ၣ်လီၤ.
24 အဝဲစံးဘၣ်အဒီပုၢ်ဝဲၢ်ခွါတဖၣ်, “ယကသံဘူးထီၣ်လံ. ဘၣ်ဆၣ်ကစၢ်ယွၤကအံးထွဲကကွၢ်ထွဲသုသပှၢ်ကတၢၢ်, ဒီးဆှၢထီၣ်သုလၢကီၢ်အံၤဆူကီၢ်တဘ့ၣ်လၢအဝဲဆိၣ်တ့ၢ်တၢ်သညူး သပှၢ်ဒီးစီၤအၤဘြၤဟၣ်, စီၤအံၤစဲးဒီးစီၤယၤကိာ်, အပူၤန့ၣ်လီၤ.”
25 အန့ၣ်ဒီး, စီၤယိၤသးမၢအပှၤဂီၢ်မုၢ်မၤတၢ်ဆိၣ်တမံၤန့ၣ်လီၤ. အဝဲစံးဝဲ, “အၢၣ်လီၤတၢ်ဒီးယၤလၢဖဲကစၢ်ယွၤဆှၢသုဆူ ကီၢ်အဝဲအံၤဒီး, သုကစိာ်ထီၣ်ကွံာ်ယစိၣ်ဃုာ်ဒီးသုန့ၣ်တ က့ၢ်.”
26 စီၤယိၤသးသံကွံာ်ဝဲလၢကီၢ်အဲၤကူပတူးအပူၤဖဲအသးအိၣ် အနံၣ်တကယၤတဆံန့ၣ်လီၤ. အဝဲသ့ၣ်ဖှူအစိၣ်လၢကသံၣ်ဒ်သိးအသုတဟးဂီၤတဂ့ၤဒီးဒၢနုာ် အီၤဆူကျုာ်တဖျၢၣ်အပူၤလီၤ.