49
1 စီၤယၤကိာ်ကိးဃီၤအဖိခွါတဖၣ်ဒီးစံးဝဲ, “ပာ်ဖှိၣ်သုသးဝးတ ရံးယၤ, ဒီးယကတဲသုတၢ်ကမၤအသးဒီးသုဆူညါန့ၣ်လီၤ.
2 စီၤယၤကိာ်အဖိခွါသ့ၣ်ဧၢ, ဟဲသကိးဃူဃူဒီးဒိကနၣ်တၢ်လၢ
သုပၢ်အံၣ်စရ့လးကစံးဝဲတက့ၢ်.
3 စီၤရူၤဘ့ၣ်, ယဖိဝဲၢ်ကိ, နမ့ၢ်ယဂံၢ်ယဘါ,
ဒီးယတၢ်ဒိၣ်တုာ်ခိၣ်ပှဲၤအဖိအဆိကတၢၢ်, ပှၤဒိၣ်ဝဲထီဝဲကတၢၢ် ဒီးအဂံၢ်ဆူၣ်ကတၢၢ်လၢယဖိခွါတဖၣ်အကျါလီၤ.
4 နလီၤဂာ်ဒ်ထံဒိၣ်ခိၣ်ယွၤတပျုာ်တပျီၤတမံၤအသိး, ဘၣ်ဆၣ်နတမ့ၢ်ပှၤအကါဒိၣ်ကတၢၢ်ဘၣ်. အဂ့ၢ်ဒ်အံၤ, နမံဃုာ်တ့ၢ်ဒီးယသံၣ်မါဒီးနမၤလီၤနပၢ်အလီၢ်မံ အသူးအသ့ၣ်န့ၣ်လီၤ.
5 စီၤစူၤမ့းအိၣ်ဒီးစီၤလ့ၤဝံမ့ၢ်ဒီပုၢ်ဝဲၢ်ခွါတဖၣ်လီၤ. အဝဲသ့ၣ်သူအတၢ်စုကဝဲၤတဖၣ်လၢကမၤဆူၣ်မၤစိးတၢ်အဂီၢ်လီၤ.
6 ယတမၤဃုာ်တၢ်လၢအဝဲသ့ၣ်အတၢ်ကတိၤခူသူၣ်တဖၣ်အပူၤမ့ၢ်ဂ့ၤ, ယတအိၣ်ဖှိၣ်ရိဖှိၣ်ဃုာ်ဒီးအဝဲသ့ၣ်လၢအတၢ်ထံၣ်လိာ်သးတဖၣ် အပူၤမ့ၢ်ဂ့ၤဘၣ်. အဂ့ၢ်ဒ်အံၤ, အဝဲသ့ၣ်မၤသံ တ့ၢ်ပှၤကညီတဖၣ်လၢတၢ်သးဒိၣ်အပူၤဒီးမၤဟးဂီၤကွံာ်ကျီၢ်ဖါ တဖၣ်အခီၣ်လၢတၢ်လိာ်ကွဲအဂီၢ်လီၤ.
7 မ်တၢ်ဆိၣ်အၢတမံၤကလီၤဘၣ်အဝဲသ့ၣ်အတၢ်သူၣ်ဒိၣ်သးဖျိးတက့ၢ်. အဂ့ၢ်ဒ်အံၤ, အတၢ်သူၣ်ဒိၣ်သးဖျိးန့ၣ်, လီၤပျံၤလီၤဖုးဒိၣ်မးလီၤ.
မ်တၢ်ဆိၣ်အၢကအိၣ်လၢအဝဲသ့ၣ်အတၢ်သးဒိၣ်တပျုာ်တပျီၤအလိၤတ က့ၢ်. အဂ့ၢ်ဒ်အံၤ, အၢဝဲသီဝဲဒိၣ်မးလီၤ. ယကရၤလီၤအဝဲသ့ၣ်လၢကီၢ်အံၣ်စရ့လးဒီကီၢ်ညါလီၤ.
ယကမၤလီၤပြံလီၤပြါအဝဲသ့ၣ်လၢအပှၤဂီၢ်မုၢ်တဖၣ်အကျါန့ၣ် လီၤ.
8 စီၤယူဒၤဧၢ, နဒီပုၢ်ဝဲၢ်ခွါတဖၣ်ကစံးထီၣ်ပတြၢၤနၤလီၤ. နစှီၤဃာ်နဒုၣ်နဒါတဖၣ်လၢအကိာ်လီၤ. နဒီပုၢ်ဝဲၢ်ခွါတဖၣ်ကတီၤလီၤလၢနမဲာ်ညါလီၤ.
9 စီၤယူဒၤလီၤဂာ်ဒ်ခ့ယုၢ်တဒုအသိး, မၤသံဆၣ်ဖိကီၢ်ဖိလၢကအီၣ်ဝဲ, ဒီးက့ၤကဒါက့ၤဆူအလၢၢ်ကအိပူၤ,
ကိာ်လီၤဒီးမံလီၤဝဲလီၤ. ပှၤမၤတံာ်တာ်အီၤတဘူၣ်ဘၣ်နီ တဂၤဘၣ်.
10 စီၤယူဒၤကစိာ်စီၤပၤအဘီမုၢ်နီၣ်ထိး, ဒီးအစၢၤအသွဲၣ်ကပၢတၢ် တဘိယူၢ်ဃီလီၤ. ပှၤကလုာ်တဖၣ်ကဟဲစိာ်န့ၢ်အီၤတၢ်ယူးယီၣ်ပာ်ကဲအတၢ်ဟ့ၣ်ဒီးတီၤ လီၤလၢအမဲာ်ညါအိၣ်ဒီးတၢ်စူၢ်အကလုၢ်န့ၣ်လီၤ.
11 အဝဲစၢဃာ်အကသ့ၣ်ယီၤဖိလၢစပံးမုၢ်တမုၢ်,
လၢစပံးမုၢ်တဖၣ်အကျါအဂ့ၤကတၢၢ်တမုၢ်လီၤ. အဝဲဆှူၣ်အကူအသိးတဖၣ်လၢစပံးထံလၢအဂီၤဒ်တၢ်သွံၣ်အသိး, အပူၤန့ၣ်လီၤ.
12 အမဲာ်ချံတဖၣ်ဂီၤဆှူၣ်ကလာ်လၢအအီစပံးထံအဃိ,
အမဲတဖၣ်ဝါဝဲလၢအအီတၢ်နုၢ်ထံအဃိလီၤ.
13 စီၤစဘူလိၣ်ကအိၣ်ကဆိးလၢပီၣ်လဲၣ်နံၤလီၤ. အထံကၢၢ်ခိၣ်ကမ့ၢ်သန့တခါလၢကဘီတဖၣ်အဂီၢ်လီၤ. အတၢ်န့ၢ်သါအကီၢ်န့ၣ်ကလဲၤဝဲယံၤတုၤလၢဝ့ၢ်စံဒိၣ်ဒၣ်လဲာ်လီၤ.
14 စီၤယံးစၣ်ကၢ်တဂ့ၤန့ၢ်ကသ့ၣ်ယီၤတဒုလၢအကိာ်လီၤဒီးမံလီၤ လၢအဂီၤကၢ်တဖၣ်အကဆူးဘၣ်.
15 ဘၣ်ဆၣ်အဝဲထံၣ်ဝဲလၢလီၢ်အိၣ်ဘှံးအံၤဂ့ၤဝဲ
ဒီးထံကီၢ်မ့ၢ်လီၢ်အမုာ်အခုၣ်လီၤ. လၢတၢ်န့ၣ်အဃိ, အဝဲသကူးလီၤအပျိၢ်ဒ်သိးကဝံထီၣ်ယိးထီၣ်တၢ် ဘိၣ်ဒီးကဘၣ်တၢ်မၤဆူၣ်အီၤလၢကမၤတၢ်ဒ်ကုၢ်တဂၤအသိးန့ၣ်လီၤ.
16 စီၤဒၣ်ကမ့ၢ်ပှၤပၢတၢ်တဂၤလၢအပှၤဂီၢ်မုၢ်အဂီၢ်လီၤ. အဝဲသ့ၣ်ကလီၤဂာ်ဒ်ကီၢ်အံၣ်စရ့လးအဒူၣ်အဂၤတဖၣ်အသိးန့ၣ်လီၤ.
17 စီၤဒၣ်ကမ့ၢ်ဂုၢ်တဘိလၢကျဲကပၤ,
ဂုၢ်လၢအအိၣ်ဒီးအစုၣ်အၢတဘိလၢကျဲဖိအကပၤလၢကဖျးကသ့ၣ်အခီၣ် နၢၣ်ခံဒ်သိးပှၤဒိးကသ့ၣ်ကလီၤတဲာ်ကွံာ်ဝဲဆူတၢ်လီၢ်ခံန့ၣ်လီၤ.
18 ယွၤဧၢ, ယအိၣ်ခိးကွၢ်လၢ်နတၢ်မၤပူၤမၤဖျဲးယၤလီၤ.
19 စီၤကးကဘၣ်တၢ်ဒုးအီၤလၢတမျိးတမျာ်တဖု,
ဘၣ်ဆၣ်အဝဲကဃၣ်အသးဒီးလူၤကဒါက့ၤအဝဲသ့ၣ်န့ၣ်လီၤ.
20 စီၤအၤၡ့ၢ်အကီၢ်ကဟ့ၣ်ထီၣ်တၢ်အီၣ်တၢ်အီလၢအဝံၣ်သိဝံၣ်ဘဲလီၤ. အဝဲကဟ့ၣ်ထီၣ်တၢ်အီၣ်ကြၢးဝဲဘၣ်ဝဲလၢစီၤပၤတဂၤအဂီၢ်လီၤ.
21 စီၤနးသၤလံမ့ၢ်တၤယုၢ်တဒုလၢဃ့ၢ်လၢတၢ်သဘျ့အပူၤအိၣ်ဒီး အဆူၣ်လၢအလွဲၢ်ဃံလၤဝဲလီၤ.
22 စီၤယိၤသးလီၤဂာ်ဒီးကသ့ၣ်ယီၤအရၢၢ်တဒုလၢထံထီၣ်ပၢၢ်တပူၤအ ဃၢၤ,
ကသ့ၣ်ဖိအရၢၢ်တဒုလၢတၢ်လူၢ်တလူၢ်အဒီခိၣ်န့ၣ်လီၤ.
23 အဝဲအဒုၣ်အဒါတဖၣ်ဒုးအီၤဆူၣ်ဆူၣ်ဒီးလူၤထွဲအခံလၢအချံၣ် တဖၣ်ဒီးအပျၢ်တဖၣ်န့ၣ်လီၤ.
24 ဘၣ်ဆၣ်ဒီးအဝဲအချံၣ်အိၣ်ဂၢၢ်ကျၢၤဝဲဒီးအစုဒုၣ်တဖၣ်ဘၣ်တၢ် ဒုးဆူၣ်ထီၣ်အီၤလၢတၢ်စိတၢ်ကမီၤလၢအဟဲဝဲလၢသ့တၢ်လၢာ်,
ပှၤကွၢ်သိ, ဒီးပှၤကဟုကယာ်ကီၢ်အံၣ်စရ့လးတဂၤအအိၣ်လီၤ.
25 အအံၤမ့ၢ်နပၢ်အကစၢ်ယွၤလၢအမၤစၢၤနၤ, သ့တၢ်လၢာ်ကစၢ်ယွၤလၢအဆိၣ်ဂ့ၤနၤ, လၢတၢ်ဆိၣ်ဂ့ၤတဖၣ်အတၢ်စူၤ ထံလၢအဟဲလၢထး, လၢတၢ်ယိာ်ပူၤအထံတဖၣ်လၢအဟဲထီၣ်လၢဟီၣ်ခိၣ်လာ်,
တၢ်ဆိၣ်ဂ့ၤတဖၣ်လၢဂီၤဘုၣ်ဂီၤဖံးဒီးဖိတဖၣ်အါအါဂီၢ်ဂီၢ်,
26 တၢ်ဆိၣ်ဂ့ၤတဖၣ်လၢဘုဧိၤဟုဧိၤဒီးဖီတဖၣ်, တၢ်ဆိၣ်ဂ့ၤတဖၣ်ဟဲလၢကစၢၢ်ကလိလၢပျၢၤတဖၣ်, တၢ်လၢအဘၣ်သူၣ်ဘၣ်သးပှၤတဖၣ်လၢအဟဲလၢတၢ်လူၢ် အထူအယိာ်တဖၣ်န့ၣ်လီၤ. မ်တၢ်ဆိၣ်ဂ့ၤတဖၣ်အံၤလီၤဘၣ်လၢစီၤယိၤသး,
ပှၤတဂၤလၢအဘၣ်တၢ်ပာ်လီၤဆီအီၤဒီးအဒီပုၢ်ဝဲၢ်ခွါတဖၣ်, အခိၣ်ဖီခိၣ်အမဲာ်တူၢ်ခိၣ်တက့ၢ်.
27 စီၤဘံၣ်ယၤမံၣ်လီၤဂာ်ဒီးထွံၣ်မံၤလၢအအၢအသီတဒုလီၤ. လၢဂီၤဒီးလၢဟါန့ၣ်အဝဲမၤသံတၢ်ဒီးအီၣ်ဂီၤကွံာ်တၢ်လီၤ.”
28 ပှၤသ့ၣ်တဖၣ်အံၤ, မ့ၢ်ပှၤအံၣ်စရ့လးဖိတဆံခံဒူၣ်, ဒီးအအံၤမ့ၢ်တၢ်လၢအဝဲသ့ၣ်အပၢ်စံးတ့ၢ်ဝဲဒ်တၢ်လီၤဖးအတၢ် ကတိၤလၢအဘၣ်ဘျီးဘၣ်ဒါဝဲတထံၣ်, ဆူအဖိခွါတဂၤဘၣ်တဂၤစုာ်စုာ်န့ၣ်လီၤ.
29 အန့ၣ်ဒီး, စီၤယၤကိာ်မၤလိာ်အဖိခွါတဖၣ်စံးဝဲ, အခဲအံၤမ့ၢ်လၢယကပာ်ဖှိၣ်ယသးဒီးယပှၤဂီၢ်မုၢ်လၢတၢ်သံဘူး ထီၣ်လံအဃိ, ခူၣ်လီၤကွံာ်ယၤဒီးယပၢ်တဖၣ်လၢလၢၢ်ကအိလၢအအိၣ်လၢပှၤဃ့ၤသး ဖိစီၤဧ့ၤဖရိၣ်အစံာ်ပျီပူၤ,
30 ဖဲမးကပ့လၤ, လၢဝ့ၢ်မးမရ့အမုၢ်ထီၣ်လၢကီၢ်ကနၤဧၣ်အပူၤန့ၣ် တက့ၢ်. စီၤအၤဘြၤဟၣ်ပှ့ၤတ့ၢ်လၢၢ်ကအိဒီးစံာ်ပျီအံၤလၢစီၤဧ့ၤ ဖရိၣ်အအိၣ်ဒ်တၢ်ခူၣ်လီၤပှၤသံအလီၢ်တပူၤန့ၣ်လီၤ.
31 တၢ်န့ၣ်မ့ၢ်တၢ်လီၢ်ဖဲအဝဲသ့ၣ်ခူၣ်လီၤကွံာ်စီၤအၤဘြၤဟၣ်ဒီး အမါနီၢ်စၤရါ, စီၤအံၤစဲးဒီးအမါနီၢ်ရံးဘကၤ, ဒီးတၢ်န့ၣ်မ့ၢ်တၢ်လီၢ်ဖဲယခူၣ်လီၤကွံာ်နီၢ်လ့ၤအၤန့ၣ်လီၤ.
32 စံာ်ပျီဒီးလၢၢ်ကအိလၢအအိၣ်ဖဲအပူၤန့ၣ်, ဘၣ်တၢ်ပှ့ၤတ့ၢ်အီၤ လၢပှၤဃ့ၤသးဖိတဖၣ်အအိၣ်န့ၣ်လီၤ. ခူၣ်လီၤယၤဖဲန့ၣ်တ က့ၢ်.”
33 ဖဲစီၤယၤကိာ်ဟ့ၣ်လီၤအတၢ်သိၣ်လီၤသီလီၤတဖၣ်ဆူအဖိခွါတဖၣ် အအိၣ်ဝံၤန့ၣ်အဝဲမံလီၤကဒါက့ၤဒီးသံဝဲဒၣ်လီၤ.