လံာ်တၢ်ဟးထီၣ်ကွံာ်
EXODUS
လံာ်တၢ်ဟးထီၣ်ကွံာ်, အံၤဘၣ်ထွဲဒီးတၢ်ဂ့ၢ်လၢအကါဒိၣ်ဒိၣ် မးလၢပှၤအံၣ်စရ့လးဖိအတၢ်စံၣ်စိၤတဲစိၤအပူၤန့ၣ်လီၤ. လံာ်အံၤပာ်ဖျါထီၣ်တၢ်ဂ့ၢ်လၢအမ့ၢ်အံၣ်စရ့လးအပှၤဂီၢ်မုၢ်အတၢ် ဟးထီၣ်ကွံာ်လၢကီၢ်အဲၤကူပတူးလၢအဘၣ်တၢ်စိာ်မၢကဲကုၢ်တ့ၢ် အီၤအလီၢ်အဂ့ၢ်န့ၣ်လီၤ. လံာ်တဘ့ၣ်အံၤအိၣ်ဒီးတၢ်ဂ့ၢ်မိၢ်ပှၢ်လွံၢ်မံၤလၢအမ့ၢ်ဝဲ (၁) တၢ်မၤထူၣ်ဖျဲး ပှၤဧ့ၤဘြံၤဖိတဖၣ်လၢတၢ်စိာ်မၢကဲကုၢ်အလီၢ်. (၂) အဝဲသ့ၣ်အတၢ်လဲၤဆူကစၢၢ်စံၤနါ (၃) ကစၢ်ယွၤအတၢ်အၢၣ်လီၤအီၤလီၤတၢ်ဒီးအပှၤဂီၢ်မုၢ်ဖဲ ကစၢၢ်စံၤနါလၢအဟ့ၣ်လီၤအဝဲသ့ၣ်တၢ်သိၣ်တၢ်သီလၢအဘၣ်ထွဲဒီး တၢ်သကဲးပဝာ်, ထံဂ့ၢ်ကီၢ်ဂ့ၢ်ဒီးတၢ်ဘူၣ်တၢ်ဘါဒ်သိးကအိၣ်မူထွဲဝဲ, ဒီး (၄) တၢ်သိၣ်တၢ်သီလၢအဘၣ်ထွဲဒီးတၢ်သူၣ်ထီၣ်, တၢ်ကယၢကယဲတၢ်ဘူၣ်တၢ်ဘါအလီၢ်လၢပှၤအံၣ်စရ့လးဖိအဂီၢ်, ပှၤလုၢ်တၢ်အခိၣ်တဖၣ်ဒီးတၢ်ဘူၣ်ထီၣ်ဘါထီၣ်ကစၢ်ယွၤအဂီၢ်န့ၣ်လီၤ.
လၢတၢ်ခဲလၢာ်အဖီခိၣ်န့ၣ်, လံာ်အံၤပာ်ဖျါထီၣ်တၢ်ဂ့ၢ်လၢက စၢ်ယွၤမၤတ့ၢ်ဝဲဒ်အမ့ၢ်အတၢ်မၤထူၣ်ဖျဲးအပှၤဂီၢ်မုၢ်လၢအဘၣ်တၢ် စိာ်မၢကဲကုၢ်အီၤဒီးဒုးကဲထီၣ်အဝဲသ့ၣ်လၢပှၤတကလုာ်လၢအအိၣ် ဒီးတၢ်မုၢ်လၢ်လၢခါဆူညါအဂီၢ်န့ၣ်လီၤ.
ပှၤလၢအအိၣ်ဖျါလီၤလီၤဆီဆီလၢလံာ်အံၤအပူၤန့ၣ်မ့ၢ်ဝဲ စီၤမိၤၡ့, ပှၤတဂၤလၢကစၢ်ယွၤဃုထၢထီၣ်အီၤဒ်သိးအ ကပၢဆှၢအပှၤဂီၢ်မုၢ်ဖဲအဝဲသ့ၣ်အတၢ်ဟးထီၣ်ကွံာ်လၢကီၢ်အဲၤကူ ပတူးအပူၤန့ၣ်လီၤ. တၢ်ဂ့ၢ်လၢအဘၣ်တၢ်သ့ၣ်ညါအီၤအအါကတၢၢ် လၢလံာ်အံၤအပူၤန့ၣ်မ့ၢ်ဝဲတၢ်မၤလိာ်အထံၣ်တဆံ လၢအဖျါဖဲအဆၢဒိၣ်၂၀ အပူၤန့ၣ်လီၤ.
1
1 စီၤယၤကိာ်အဖိခွါတဖၣ်ဒီးအပှၤဟံၣ်ဖိဃီဖိဒၣ်ဝဲစုာ်စုာ်လၢ အလဲၤဃုာ်ဒီးအီၤဆူကီၢ်အဲၤကူပတူးအပူၤန့ၣ်မ့ၢ်ဝဲ
2 စီၤရူၤဘ့ၣ်, စီၤစူၤမ့းအိၣ်, စီၤလ့ၤဝံ, စီၤယူဒၤ,
3 စီၤယံးစၣ်ကၢ်, စီၤစဘူလိၣ်, စီၤဘံၣ်ယၤမံၣ်,
4 စီၤဒၣ်, စီၤနးသၤလံ, စီၤကးဒီးစီၤအၤၡ့ၢ်န့ၣ်လီၤ.
5 ဒီးကယဲၢ်ပှၤလၢအဟဲလီၤစၢၤလီၤသွဲၣ်တံၢ်နီၢ်လၢစီၤယၤကိာ် န့ၣ်အနီၣ်ဂံၢ်ခဲလၢာ်မ့ၢ်ဝဲအဂၤနွံဆံန့ၣ်လီၤ. မ့မ့ၢ်စီၤယိၤသးတခီအိၣ်ပာ်စၢၤလံလၢကီၢ်အဲၤကူပတူးအပူၤ န့ၣ်လီၤ.
6 ဒီးလၢအကတီၢ်အါနံၣ်အါလါအပူၤန့ၣ်, စီၤယိၤသး, ဒီးအဒီပုၢ်ဝဲၢ်တဖၣ်, ဒီးကယဲၢ်ပှၤလၢအအိၣ်လီၤတဲာ်တစိၤဃီ ဒီးအဝဲသ့ၣ်ခဲလၢာ်န့ၣ်သံဝဲဒၣ်လီၤ.
7 မ့မ့ၢ်အဝဲသ့ၣ်အစၢၤအသွဲၣ်လၢအမ့ၢ်ဝဲပှၤအံၣ်စရ့လးဖိတဖၣ် န့ၣ်, အိၣ်ဒီးအဖိအလံၤအါဂၤ, ဒီးအါထီၣ်ဂီၢ်ထီၣ်ဝဲဒီးဆူၣ်ထီၣ်ဝဲ တုၤကီၢ်အဲၤကူပတူးအိၣ်ပှဲၤဒီးအဝဲသ့ၣ်တဖၣ်န့ၣ်လီၤ.
8 ဒီးအခါဖဲန့ၣ်စီၤပၤအသီတဂၤလၢအတသ့ၣ်ညါဘၣ်စီၤယိၤသးန့ၣ် ပၢတၢ်လၢကီၢ်အဲၤကူပတူးအပူၤန့ၣ်လီၤ.
9 ဒီးစီၤပၤအံၤစံးဘၣ်အပှၤကူၣ်လိာ်တၢ်တဖၣ်, “ပှၤအံၣ်စရ့လးဖိတဖၣ်အံၤအါထီၣ်ဂီၢ်ထီၣ်ဝဲဒီးအဂံၢ်အဘါ ဆူၣ်ထီၣ်ဝဲတုၤဒၣ်လဲာ်မ့ၢ်တၢ်လီၤပျံၤလီၤဖုးလၢပဂီၢ်လီၤ.
10 ဒီးတၢ်ဒုးတၢ်ယၤမ့ၢ်အိၣ်ထီၣ်ဘၣ်ဖုးန့ၣ်, အဝဲသ့ၣ်ကပာ်ဖှိၣ် အသးဒီးပဒုၣ်ပဒါတဖၣ်ဒ်သိးကဒုးတၢ်ဒီးပှၤ, ဒီးဃ့ၢ်ပူၤဖျဲး ကွံာ်လၢထံကီၢ်အပူၤလီၤ. ပကဘၣ်ဃုကျဲလၢတၢ်တြီဆၢပှၤအံၣ်စရ့လးဖိတဖၣ် အါထီၣ်ဂီၢ်ထီၣ်အဂ့ၢ်န့ၣ်လီၤ.”
11 မၤသးဒ်န့ၣ်ဒီး, ပှၤအဲၤကူပတူးဖိတဖၣ်ပာ်လီၤပှၤအခိၣ်တဖၣ်လၢ တၢ်မၢကဲကုၢ်တၢ်အဂီၢ်လၢပှၤအံၣ်စရ့လးဖိသ့ၣ်တဖၣ်အဖီခိၣ်ဒ် သိးကမၤဟးဂီၤကွံာ်အသူၣ်အသးခီဖျိတၢ်မၤဆူၣ်မၤနၢၤန့ၣ် လီၤ. ဒီးပှၤအံၣ်စရ့လးဖိသ့ၣ်တဖၣ်သူၣ်ထီၣ်ဝ့ၢ်ပံသိၣ်ဒီးဝ့ၢ်ရၤ မစ့လၢကကဲထီၣ်တၢ်ပာ်ဖှိၣ်တၢ်အလီၢ်ခၢၣ်သးတဖၣ်လၢစီၤပၤအဂီၢ် န့ၣ်လီၤ.
12 ဘၣ်ဆၣ်ဒီး, ဒ်ပှၤအဲၤကူပတူးဖိတဖၣ်မၤနးမၤဖှီၣ်ပှၤအံၣ်စရ့လး ဖိတဖၣ်အါထီၣ်အသိးန့ၣ်, ပှၤအံၣ်စရ့လးဖိတဖၣ်အနီၣ်ဂံၢ်ဒံးအါထီၣ်ဒီးအိၣ်ရၤလီၤအသး ပှဲၤလၢကီၢ်ဒီဘ့ၣ်ညါအပူၤန့ၣ်လီၤ. ဒီးပှၤအဲၤကူပတူးဖိတဖၣ်ပျံၤဝဲပှၤအံၣ်စရ့လးဖိတဖၣ်န့ၣ်လီၤ.
13 ဒီးပှၤအဲၤကူပတူးဖိတဖၣ်မၤနးမၤဖှီၣ်ပှၤအံၣ်စရ့လးဖိတဖၣ် ခီဖျိတၢ်မၤဆူၣ်မၤနၢၤလၢတၢ်ကဲကုၢ်အတၢ်ကီတၢ်ခဲအပူၤန့ၣ် လီၤ.
14 ဒီးမၢဆူၣ်မၤနၢၤဝဲဒၣ်လၢတၢ်သူၣ်ထီၣ်ဘှီထီၣ်တၢ်မၤလီၢ်တဖၣ် ဒီးလၢစံာ်ပျီတဖၣ်အပူၤ, ဒီးတသးကညီၤဘၣ်ဝဲနီတစဲးဘၣ်န့ၣ်လီၤ.
15 ဒီးကီၢ်အဲၤကူပတူးအစီၤပၤစံးဘၣ်နီၢ်ၡံးပရၤဒီးနီၢ်ပူၤ ဧၤလၢအမ့ၢ်ပှၤကွၢ်ဟုးလၢမၤစၢၤပှၤဧ့ၤဘြံၤမုၣ်တဖၣ်န့ၣ်,
16 “ဖဲသုမၤစၢၤပှၤဧ့ၤဘြံၤမုၣ်တဖၣ်ဆံးစၢ်အဖိန့ၣ်မ့ၢ်အိၣ် ဖျဲၣ်ထီၣ်အပိာ်ခွါဖိဒီးမၤသံကွံာ်အီၤတက့ၢ်. မ့မ့ၢ်အပိာ်မုၣ်ဖိဒီးပျဲအမူတက့ၢ်,” န့ၣ်လီၤ.
17 ဘၣ်ဆၣ်ဒီးပိာ်မုၣ်လၢအကွၢ်ပဟုးတဖၣ်န့ၣ်မ့ၢ်ပှၤလၢအပျံၤကစၢ်ယွၤ ဒီးတမၤဝဲဒ်အဲၤကူပတူးအစီၤပၤမၤလိာ်ဝဲအသိးန့ၣ်ဘၣ်. မ့မ့ၢ်ပျဲဖိသၣ်ပိာ်ခွါတဖၣ်မူဝဲဒၣ်န့ၣ်လီၤ.
18 မၤသးဒ်န့ၣ်ဒီးစီၤပၤကိးန့ၢ်ပှၤကွၢ်ပဟုးတဖၣ်ဒီးသံကွၢ်ဝဲ, “ဘၣ်မနုၤလၢသုပျဲဖိသၣ်ပိာ်ခွါတဖၣ်အိၣ်မူဝဲဒၣ်န့ၣ်လဲၣ်.”
19 ဒီးအဝဲသ့ၣ်စံးဆၢဝဲဒၣ်, “ပှၤဧ့ၤဘြံၤမုၣ်တဖၣ်န့ၣ်တဒ်သိး ဒီးပှၤအဲၤကူပတူးမုၣ်တဖၣ်န့ၣ်ဘၣ်. အဝဲသ့ၣ်ဆံးစၢ်န့ၢ်အဖိညီဝဲ ဒီးတချုးလၢပဝဲတဂၤဂၤလဲၤတုၤဒံးဘၣ်န့ၣ်ဖိသၣ်တဖၣ်အိၣ် ဖျဲၣ်လံန့ၣ်လီၤ.”
20 ဒီးကစၢ်ယွၤမၤဂ့ၤပှၤကွၢ်ပဟုးတဖၣ်ဒီးပှၤဂီၢ်မုၢ်အါထီၣ်ဒီး ဆူၣ်ထီၣ်ဒိၣ်မးန့ၣ်လီၤ.
21 ဒီးမ့ၢ်လၢပှၤကွၢ်ပဟုးတဖၣ်ပျံၤကစၢ်ယွၤအဃိ, ကစၢ်ယွၤဟ့ၣ်အီၤလၢအဟံၣ်ဖိဃီဖိဒၣ်ဝဲစုာ်စုာ်လီၤ.
22 လၢခံကတၢၢ်န့ၣ်, စီၤပၤဟ့ၣ်လီၤအကလုၢ်ဆူပှၤအဲၤကူပတူးဖိ ဒီးစံးဝဲ, “ဟံးန့ၢ်ပှၤဧ့ၤဘြံၤဖိသၣ်ပိာ်ခွါဖိလၢအအိၣ် ဖျဲၣ်ထီၣ်သီကိးဂၤဒဲးဒီးတ့ၢ်လီၤကွံာ်အီၤဆူထံကျိနံၤလါ အပူၤတက့ၢ်. မ့မ့ၢ်ဖိသၣ်ပိာ်မုၣ်ဖိတဖၣ်န့ၣ်ပျဲအမူကိးဂၤဒဲး တက့ၢ်.”