48
1 လၢခံတယံာ်ဘၣ်န့ၣ်, စီၤယိၤသးဘၣ်တၢ်တဲဘၣ်အီၤလၢအပၢ်ဘၣ်ဆူး ဘၣ်ဆါဝဲဒၣ်န့ၣ်လီၤ. အဃိအဝဲ, ကိးထီၣ်အဖိခွါခံဂၤလၢအမ့ၢ်စီၤမနၤ ၡ့ၤဒီးစီၤအ့ဖရဲၣ်, ဒီးလဲၤထံၣ်စီၤယၤကိာ်န့ၣ်လီၤ.
2 ဖဲစီၤယိၤကိာ်ဘၣ်တၢ်တဲဘၣ်အီၤလၢအဖိခွါစီၤယိၤသးဟဲထံၣ် အီၤန့ၣ်, ပာ်ဆူၣ်ထီၣ်အသးဒီးဆ့ၣ်နီၤဝဲလၢလီၢ်မံပူၤန့ၣ်လီၤ.
3 စီၤယၤကိာ်စံးဘၣ်စီၤယိၤသး, “သ့တၢ်လၢာ်ကစၢ်ယွၤလီၣ်ဖျါ ထီၣ်အသးလၢယၤဖဲဝ့ၢ်လ့ူးစးလၢကီၢ်ကနၤဧၣ်အပူၤဒီးဆိၣ်ဂ့ၤ ယၤလီၤ.
4 အဝဲစံးဘၣ်ယၤ, ‘ယကဟ့ၣ်နၤလၢနဖိအါအါဂီၢ်ဂီၢ်, ဒ်သိးနစၢၤနသွဲၣ်တဖၣ်ကကဲထီၣ်ပှၤအါကလုာ်န့ၣ်လီၤ. ယကဟ့ၣ်လီၤနစၢၤနသွဲၣ်တဖၣ်လၢကီၢ်အံၤဒ်အဝဲသ့ၣ်အတၢ်န့ၢ်သါ အစိၤစိၤအဃၣ်ဃၣ်န့ၣ်လီၤ.”
5 စီၤယၤကိာ်စံးကဒီးဝဲ, “စီၤယိၤသးဧၢ, နဖိခွါခံဂၤလၢအအိၣ်ဖျဲၣ်ထီၣ်လၢနဂီၢ်လၢကီၢ်အဲၤကူပတူးအ ပူၤ, တချုးယဟဲဒံးဘၣ်ဖဲအံၤန့ၣ်ဘၣ်ဃးဒီးယၤလီၤ. စီၤအ့ဖရဲၣ်ဒီးစီၤမနၤၡ့ၤတဖၣ်န့ၣ်, မ့ၢ်စ့ၢ်ကီးယဖိခွါတဖၣ် ဒ်စီၤရူၤဘ့ၣ်ဒီးစီၤစူၤမ့းအိၣ်အသိးန့ၣ်လီၤ.
6 နဖိခွါမ့ၢ်အိၣ်အါထီၣ်န့ၣ်, ယတပာ်အီၤဒ်အဘၣ်ဃးဒီးယၤလၢၤဘၣ်. တၢ်န့ၢ်သါလၢအဝဲသ့ၣ်ကမၤန့ၢ်ဝဲန့ၣ်, ကဟဲခီဖျိဒၣ်လၢစီၤအ့ဖရဲၣ်ဒီးစီၤမနၤၡ့ၤန့ၣ်လီၤ.
7 ယမၤတၢ်အံၤမ့ၢ်ဒၣ်လၢနမိၢ်နီၢ်ရၤဃ့လးအဃိန့ၣ်လီၤ. ဖဲယဟဲက့ၤကဒါက့ၤလၢကီၢ်မ့းစပတၤမံန့ၣ်, အဝဲသံလၢကီၢ်ကနၤဧၣ်, တယံၤဒီးတၢ်လီၢ်ဖဲဝ့ၢ်အ့ဖရးသးအါအါ ဘၣ်, ဒီးမ့ၢ်တၢ်သးအုးဖးဒိၣ်လၢယဂီၢ်လီၤ. ယခူၣ်လီၤကွံာ်အီၤဖဲန့ၣ်, လၢကျဲဆူဝ့ၢ်အ့ဖရးသးအကပၤန့ၣ် လီၤ.” (အ့ဖရးသး, ခဲအံၤဘၣ်တၢ်သ့ၣ်ညါအီၤဒ်ဝ့ၢ်ဘ့ၤသလ့ဃ့ၣ်န့ၣ် လီၤ.)
8 ဖဲစီၤယၤကိာ်ထံၣ်ဘၣ်စီၤယိၤသးအဖိခွါတဖၣ်န့ၣ်အဝဲသံကွၢ် ဝဲ, “ပိာ်ခွါဖိသၣ်တဖၣ်အံၤမ့ၢ်မတၤလဲၣ်.”
9 စီၤယိၤသးစံးဆၢဝဲ, “အဝဲသ့ၣ်မ့ၢ်ယဖိခွါတဖၣ်လၢကစၢ်ယွၤ ဟ့ၣ်လီၤတ့ၢ်ယၤဖဲအံၤလၢကီၢ်အဲၤကူပတူးအပူၤန့ၣ်လီၤ.” ဒီးစီၤယၤကိာ်စံးဝဲ, “ဟဲကိးအီၤဆူယအိၣ်ဒ်သိးယကဆိၣ်ဂ့ၤ အဝဲသ့ၣ်န့ၣ်တက့ၢ်.”
10 စီၤယၤကိာ်အမဲာ်ချံခံးလီၤလၢအသးပှၢ်တ့ၢ်အဃိ, ဒီးအဝဲထံၣ်တၢ်တသ့ဂ့ၤဂ့ၤလၢၤဘၣ်. စီၤယိၤသးဟဲကိးဖိသၣ်ပိာ်ခွါတဖၣ်ဆူအအိၣ်, ဒီးအဝဲဖိးဟုဃာ်ဒီးနၢမူအဝဲသ့ၣ်န့ၣ်လီၤ.
11 စီၤယၤကိာ်စံးဘၣ်စီၤယိၤသး, “ယတမုၢ်လၢ်တ့ၢ်လၢယကထံၣ်ဘၣ် ကဒီးနၤနီတစုလၢၤဘၣ်. ဘၣ်ဆၣ်ခဲအံၤ, ကစၢ်ယွၤပျဲယထံၣ်ဘၣ်ဒၣ်လဲာ်နဖိတဖၣ်န့ၣ်လီၤ.”
12 အန့ၣ်ဒီး, စီၤယိၤသးဟံးန့ၢ်အဝဲသ့ၣ်လၢစီၤယၤကိာ်အဟုးလာ် ဒီးသကူးလီၤအသးလၢအမဲာ်ညါ, တုၤအဝဲအမဲာ်သၣ်ကျးလီၤအသးလၢဟီၣ်ခိၣ်လိၤန့ၣ်လီၤ.
13 စီၤယိၤသးပာ်စီၤအ့ဖရဲၣ်လၢစီၤယၤကိာ်အစုစ့ၣ်ဒီးစီၤမနၤ ၡ့ၤလၢအစုထွဲတကပၤန့ၣ်လီၤ.
14 ဘၣ်ဆၣ်စီၤယၤကိာ်ပာ်အစုထွဲလၢစီၤအ့ဖရဲၣ်, လၢအမ့ၢ်ပှၤအဆံးအခိၣ်အဖီခိၣ်, ဒီးပာ်ခီပတာ်အစုစ့ၣ်လၢစီၤ မနၤၡ့ၤလၢအမ့ၢ်ပှၤအဒိၣ်အခိၣ်အဖီခိၣ်န့ၣ်လီၤ.
15 ဝံၤဒီး, အဝဲဆိၣ်ဂ့ၤစီၤယိၤသးဒီးစံးဝဲ,
“မ်ကစၢ်ယွၤလၢယပၢ်
စီၤအၤဘြၤဟၣ်ဒီးစီၤအံၤစဲးမၤအတၢ်, ဆိၣ်ဂ့ၤပိာ်ခွါဖိသၣ် တဖၣ်အံၤတက့ၢ်.
မ်ကစၢ်ယွၤလၢအဆှၢတ့ၢ်ယၤတုၤမုၢ်တနံၤအံၤန့ၣ်, ဆိၣ်ဂ့ၤအဝဲသ့ၣ်တက့ၢ်.
16 မ်ကလူးလၢအမၤပူၤဖျဲးယၤ
လၢကယဲၢ်တၢ်ဘၣ်ဒိဘၣ်ထံးန့ၣ်, ဆိၣ်ဂ့ၤအဝဲသ့ၣ်တက့ၢ်.
မ်ယၤဒီးယပၢ်တဖၣ်လၢအမ့ၢ်, စီၤအၤဘြၤဟၣ်ဒီးစီၤအံၤစဲးအ မံၤ, မူဝဲလၢခီဖျိပိာ်ခွါဖိသ့ၣ်တဖၣ်အံၤတက့ၢ်.
မ်အဝဲသ့ၣ်ကအိၣ်ဒီးအဖိအါအါဂီၢ်ဂီၢ်, ဒီးအစၢၤအသွဲၣ်အါအါ ဂီၢ်ဂီၢ်န့ၣ်တက့ၢ်.”
17 စီၤယိၤသးအသးဘၣ်တံာ်တာ်ဖဲအထံၣ်ဝဲလၢအပၢ်ပာ်အစုထွဲ လၢစီၤအ့ဖရဲၣ်အခိၣ်လိၤအဃိ, အဝဲဖီၣ်ထီၣ်အပၢ်အစုဒ်သိးကသုး က့ၤဝဲလၢစီၤအ့ဖရဲၣ်အခိၣ်လိၤဆူစီၤမနၤၡ့ၤအခိၣ်လိၤအဂီၢ် န့ၣ်လီၤ.
18 အဝဲစံးဘၣ်အပၢ်, “တမ့ၢ်ဒ်န့ၣ်ဘၣ်ပၢ်ဧၢ, အအံၤမ့ၢ်ပှၤအဒိၣ်တဂၤအဃိပာ်နစုထွဲလၢအဝဲအခိၣ်လိၤတက့ၢ်.”
19 အပၢ်စီၤယၤကိာ်ဂ့ၢ်လိာ်တၢ်ဒီးစံးဝဲ, “ယသ့ၣ်ညါ, ယဖိခွါဧၢ, ယသ့ၣ်ညါကစီဒီလီၤ. စီၤမနၤၡ့ၤအစၢၤအသွဲၣ်တဖၣ်ကကဲထီၣ်စ့ၢ်ကီးပှၤဂီၢ်မုၢ်ဖးဒိၣ် တဖုန့ၣ်လီၤ. ဘၣ်ဆၣ်ဒီး, အပုၢ်ပိာ်ခွါကဒိၣ်ထီၣ်အါထီၣ်န့ၢ်ဒံးအီၤ, ဒီးအစၢၤအသွဲၣ်တဖၣ်ကကဲထီၣ်ပှၤကလုာ်ဖးဒိၣ်တဖၣ်န့ၣ်လီၤ.”
20 လၢတၢ်န့ၣ်အဃိ, အဝဲဒၣ်ဆိၣ်ဂ့ၤအဝဲသ့ၣ်လၢမုၢ်တနံၤန့ၣ်ဒီး စံးဝဲ, “ဖဲပှၤအံၣ်စရ့လးဖိတဖၣ်ဆိၣ်ဂ့ၤတၢ်န့ၣ်, ကသူသုမံၤတဖၣ်လီၤ. အဝဲသ့ၣ်ကစံးဝဲ, မ်ကစၢ်ယွၤဒုးလီၤဂာ် သုဒ်စီၤအ့ဖရဲၣ်ဒီးစီၤမနၤၡ့ၤအသိးန့ၣ်တက့ၢ်. လၢကျဲဒ်အံၤန့ၣ်, စီၤယၤကိာ်ပာ်ဒိၣ်ပာ်ကဲစီၤအ့ဖရဲၣ်အါန့ၢ် ဒံးစီၤမနၤၡ့ၤတက့ၢ်လီၤ.”
21 အန့ၣ်ဒီး, စီၤယၤကိာ်စံးဘၣ်စီၤယိၤသး, “ဒ်နထံၣ်အသိး, ယကသံဘူးထီၣ်လံ. ဘၣ်ဆၣ်ဒီး, ကစၢ်ယွၤကအိၣ်ဒီးနၤ, ဒီးကဆှၢကဒါက့ၤနၤဆူနမိၢ်ပၢ်ဖံဖုလၢပျၢၤတဖၣ်အကီၢ်န့ၣ် လီၤ.
22 ဒီးယဟ့ၣ်လီၤနၤလၢကီၢ်ၡက့ၣ်, ဟီၣ်ခိၣ်ညၣ်ထ့ၣ်အလီၢ်ကဝီၤလၢ ယမၤန့ၢ်လၢပှၤအမိၢ်ဖိအစုပူၤလၢယနးဒီးယချံၣ်လီၤ. ယတဟ့ၣ်လီၤဘၣ်နဒီပုၢ်ဝဲၢ်ခွါတဖၣ်လၢတၢ်လီၢ်န့ၣ်ဘၣ်.