47
1 လၢတၢ်န့ၣ်အဃိ, စီၤယိၤသးကိးထီၣ်အဒီပုၢ်ဝဲၢ်ခွါယဲၢ်ဂၤ ဒီးလဲၤဆူစီၤပၤအအိၣ်န့ၣ်လီၤ. ဒီးစံးဘၣ်စီၤပၤ, “ယပၢ်ဒီးယဒီပုၢ်ဝဲၢ်ခွါသ့ၣ်တဖၣ်ဟဲလၢကီၢ်ကနၤဧၣ်ဃုာ်ဒီး အသိတဖၣ်, အဆၣ်ဖိကီၢ်ဖိတဖၣ်, ဒီးကယဲၢ်တၢ်အိၣ်ဒီးအီၤခဲလၢာ်န့ၣ်လံ. ခဲအံၤ, အဝဲသ့ၣ်အိၣ်လၢကီၢ်ကိၡ့ၣ်အလီၢ်ကဝီၤအပူၤန့ၣ်လီၤ.”
2 အန့ၣ်ဒီး, အဝဲဆှၢထီၣ်အဒီပုၢ်ဝဲၢ်ခွါတဖၣ်ဆူစီၤပၤအမဲာ်ညါ န့ၣ်လီၤ.
3 စီၤပၤသံကွၢ်အဝဲသ့ၣ်, “သုတၢ်မၤမ့ၢ်တၢ်မနုၤလဲၣ်.”
ဒီးအဝဲသ့ၣ်စံးဆၢဝဲ, “ကစၢ်ဧၢ, ပမ့ၢ်ပှၤကွၢ်သိတဖၣ်ဒ်ပမိၢ် ပၢ်ပဖံပဖုလၢပျၢၤတဖၣ်အသိးန့ၣ်လီၤ.
4 ပဟဲဒ်သိးပကအိၣ်သကိးလၢထံကီၢ်အံၤအပူၤလီၤ. အဂ့ၢ်ဒ်အံၤ, လၢကီၢ်ကနၤဧၣ်န့ၣ်တၢ်သၣ်ဝံၤလီၤဒိနးနးကျံး ကျံးအိၣ်ထီၣ်ဝဲတုၤဒၣ်လဲာ်အီၣ်ဆၣ်အလီၢ်လါဟ့လၢပသိတဖၣ်အဂီၢ် တအိၣ်လၢၤဘၣ်. ဝံသးစူၤပျဲပအိၣ်ပဆိးလၢကီၢ်ကိၡ့ၣ်အလီၢ်ကဝီၤအပူၤတ က့ၢ်.”
5 စီၤပၤစံးဘၣ်စီၤယိၤသး, “ခဲကနံၣ်အံၤနပၢ်ဒီးနဒီပုၢ်ဝဲၢ် ခွါတဖၣ်ဟဲတုၤလံအဃိ,
6 ကီၢ်အဲၤကူပတူးမ့ၢ်အဝဲသ့ၣ်အတၢ်န့ၣ်လီၤ. ပျဲအသူၣ်လီၤအလီၢ်အိၣ်လီၢ်ဆိးလၢကီၢ်ကိၡ့ၣ်, အလီၢ်ကဝီၤအပူၤ, တၢ်လီၢ်အဂ့ၤကတၢၢ်လၢကီၢ်အပူၤတက့ၢ်. ဒီးလၢအဝဲသ့ၣ်အကျါပှၤတနီၤနီၤလၢအမၤသ့မၤဘၣ်မ့ၢ်အိၣ်ဒီး, ဒုးကဲထီၣ်အီၤလၢပှၤကွၢ်ထွဲယကစၢ်ဒၣ်ယဲအဆၣ်ဖိကီၢ်ဖိအဒၢ တဖၣ်တက့ၢ်.”
7 အန့ၣ်ဒီး, စီၤယိၤသးဟဲကိးအပၢ်စီၤယၤကိာ်ဒီးဆှၢထီၣ်အီၤ ဆူစီၤပၤအအိၣ်န့ၣ်လီၤ. စီၤယၤကိာ်ဆိၣ်ဂ့ၤဆိၣ်ဝါစီၤပၤ,
8 ဒီးစီၤပၤသံကွၢ်အီၤ, “နသးအိၣ်ပှဲၤနံၣ်လံလဲၣ်.”
9 စီၤယၤကိာ်စံးဆၢဝဲ, “ယတၢ်ဟးဝ့ၤဝီၤအတၢ်အိၣ်မူယံာ်ဝဲ အနံၣ်တကယၤသၢဆံလီၤ. ဒီးနံၣ်ဧိၤလါဧိၤတဖၣ်အံၤတဒ်သိးဘၣ် ယမိၢ်ပၢ်ဖံဖုလၢပျၢၤအတၢ်ဟးဝ့ၤဝီၤလၢအါနံၣ်အါလါအပူၤ ဘၣ်. စှၤဝဲဒီးကီခဲဒိၣ်မးလီၤ.”
10 စီၤယၤကိာ်ဟ့ၣ်တၢ်လီၤဖးအတၢ်ဆိၣ်ဂ့ၤတထံၣ်ဆူစီၤပၤဝံၤဒီး ဟးထီၣ်ဝဲဒၣ်န့ၣ်လီၤ.
11 အန့ၣ်ဒီး, ဒ်စီၤပၤမၤလိာ်တ့ၢ်ဝဲအသိးန့ၣ်, စီၤယိၤသးဒုးအိၣ်ဒုးဆိးအပၢ်ဒီးအဒီပုၢ်ဝဲၢ်ခွါတဖၣ်လၢ ကီၢ်အဲၤကူပတူးအပူၤ, ဖဲတၢ်လီၢ်အဂ့ၤကတၢၢ်ဘူးဒီးဝ့ၢ်ရၤမစ့, ဒီးဟ့ၣ်လီၤဃုာ်အီၤတၢ်စုလီၢ်ခီၣ်ခိၣ်လီၤ.
12 စီၤယိၤသးလုၢ်အီၣ်လုၢ်အီအပၢ်, အဒီပုၢ်ဝဲၢ်ခွါတဖၣ်ဒီးကယဲၢ် အပၢ်အဒူၣ်ဖိထၢဖိအဂၤတုၤလၢပှၤအသးစၢ်ကတၢၢ်န့ၣ်လီၤ.
13 တၢ်သၣ်ဝံၤလီၤဒိမၤအသးနးနးကျံးကျံးတုၤဒၣ်လဲာ်တၢ်အီၣ်တၢ် အီတအိၣ်လၢတၢ်လီၢ်နီတပူၤဘၣ်, ဒီးပှၤဂီၢ်မုၢ်လၢကီၢ်အဲၤကူပတူးဒီးကီၢ်ကနၤဧၣ်တဖၣ်လီၤဘှါ ဝဲလၢတၢ်သူၣ်ဝံၤသၣ်စ့ၤအဃိန့ၣ်လီၤ.
14 စ့ခဲလၢာ်လၢအဝဲသ့ၣ်ပှ့ၤဘုဧိၤဟုဧိၤန့ၣ်စီၤယိၤသးပာ် ဖှိၣ်အီၤဒီးလဲၤစိာ်ဝဲဆူနူၢ်ဧိၤစီၤဧိၤလီၤ.
15 တုၤစ့ခဲလၢာ်လၢကီၢ်အဲၤကူပတူးဒီးကီၢ်ကနၤဧၣ်အပူၤဘၣ်တၢ် သူလၢာ်ကွံာ်အီၤန့ၣ်ပှၤအဲၤကူပတူးဖိတဖၣ်ဟဲဆူစီၤယိၤသး အအိၣ်ဒီးစံးဝဲ, “ဟ့ၣ်ပှၤတၢ်အီၣ်တၢ်အီတက့ၢ်. ပျဲပသံတဂ့ၤ. မၤတၢ်တမံၤမံၤတက့ၢ်. ပကျိၣ်ပစ့လၢာ်ကွံာ်ခဲ လၢာ်လံ.”
16 စီၤယိၤသးစံးဆၢဝဲ, “သုကျိၣ်သုစ့မ့ၢ်လၢာ်ကွံာ်ခဲလၢာ် န့ၣ်, ဟဲစိာ်သုဆၣ်ဖိကီၢ်ဖိအဒၢတဖၣ်ဒီးယကလဲလိာ်န့ၢ်သုဒီးတၢ် အီၣ်တၢ်အီန့ၣ်လီၤ.”
17 လၢတၢ်န့ၣ်အဃိ, အဝဲသ့ၣ်ဟဲစိာ်အဆၣ်ဖိကီၢ်ဖိအဒၢတဖၣ်ဆူ စီၤယိၤသးအအိၣ်, ဒီးအဝဲဟ့ၣ်ခီလဲန့ၢ်အဝဲသ့ၣ်တၢ်အီၣ်ဒီး အကသ့ၣ်တဖၣ်, အသိတဖၣ်, အမဲာ်တဲးလဲးတဖၣ်, အဂီၤဘုၣ်ဂီၤဖံးဒီးအကသ့ၣ်ယီၤတဖၣ်န့ၣ်လီၤ. နံၣ်အဝဲန့ၣ်, အဝဲလုၢ်အီၣ်အဝဲသ့ၣ်လၢတၢ်အီၣ်ဒ်တၢ်ဟ့ၣ်ခီ လဲလၢအဝဲသ့ၣ်အဆၣ်ဖိကီၢ်ဖိအဒၢတဖၣ်အဂီၢ်လီၤ.
18 လၢခံတနံၣ်န့ၣ်, အဝဲသ့ၣ်ဟဲဆူအအိၣ်ဒီးစံးဝဲ, “ကစၢ်ဧၢ, တီတီလိၤလိၤပတပာ်ခူသူၣ်တၢ်မၤအသးလၢနၤဘၣ်. ပကျိၣ်ပစ့လၢာ်ကွံာ်ခဲလၢာ်ဒီးပဆၣ်ဖိကီၢ်ဖိအဒၢတဖၣ်ကဲထီၣ် နတၢ်လံ. မ့တမ့ၢ်လၢပနီၢ်ခိနီၢ်ကစၢ်တဖၣ်ဒီးပဟီၣ်ခိၣ်တဖၣ်ဘၣ်န့ၣ်, ပကဟ့ၣ်နၤတၢ်တအိၣ်လၢၤနီတမံၤဘၣ်.
19 ပျဲပသံတဂ့ၤ. မၤတၢ်တမံၤမံၤတက့ၢ်. ပျဲပစံာ်ပပျီတဖၣ်ကဲ ထီၣ်တၢ်ကလီကလီတဂ့ၤ. ပှ့ၤပှၤဒီးပဟီၣ်ခိၣ်တဖၣ်ဒ်တၢ်ဟ့ၣ်ခီလဲလၢတၢ်အီၣ်တၢ်အီအဂီၢ် အသိးန့ၣ်တက့ၢ်. ပကကဲထီၣ်စီၤပၤအကုၢ်အပှၤတဖၣ်ဒီးပဟီၣ်ခိၣ်ကကဲထီၣ်အတၢ်န့ၣ် လီၤ. ဟ့ၣ်ပှၤဘုဧိၤဟုဧိၤလၢပကမူ, ဒီးတၢ်ချံတၢ်သၣ်ဒ်သိးပသူၣ်လီၤဖျးလီၤတၢ်လၢပစံာ်ပပျီ တဖၣ်အပူၤကသ့အဂီၢ်န့ၣ်တက့ၢ်.”
20 စီၤယိၤသးပှ့ၤကယဲၢ်ဟီၣ်ခိၣ်ခဲလၢာ်လၢကီၢ်အဲၤကူပတူးအပူၤ လၢစီၤပၤအဂီၢ်န့ၣ်လီၤ. ပှၤအဲၤကူပတူးဖိကိးဂၤဒဲးဘၣ်တၢ်မၤဆူၣ်အီၤလၢကဆါကွံာ် အဟီၣ်ခိၣ်, မ့ၢ်လၢတၢ်သၣ်ဝံၤလီၤဒိ မၤအသးနးနးကျံးကျံးအဃိ, ဒီးကယဲၢ်ဟီၣ်ခိၣ်ခဲလၢာ်ကဲထီၣ် စီၤပၤအတၢ်စုလီၢ်ခီၣ်ခိၣ်န့ၣ်လီၤ.
21 စီၤယိၤသးဒုးကဲထီၣ်ကီၢ်အဲၤကူပတူးအပှၤဂီၢ်မုၢ်လၢကိး သနၢၣ်ဒဲးဆူကုၢ်တဖၣ်လီၤ.
22 ဟီၣ်ခိၣ်ထဲတတီၤဧိၤလၢအဝဲတပှ့ၤဝဲန့ၣ်, မ့ၢ်ဟီၣ်ခိၣ်လၢအဘၣ် ဃးဒီးပှၤလုၢ်တၢ်အခိၣ်တဖၣ်န့ၣ်လီၤ. အဝဲသ့ၣ်ဆါကွံာ်အဟီၣ်ခိၣ်အလီၢ်တအိၣ်ဘၣ်. အဂ့ၢ်ဒ်အံၤ, စီၤပၤဟ့ၣ်အဝဲသ့ၣ်တၢ်နီၤဟ့ၣ်လၢတနံၤအဂီၢ်တနံၤအဂီၢ်, လၢကမူဝဲအဂီၢ်န့ၣ်လီၤ.
23 စီၤယိၤသးစံးဘၣ်ပှၤဂီၢ်မုၢ်, “သုထံၣ်လံဘၣ်. ခဲကနံၣ်အံၤယပှ့ၤတ့ၢ်လံသုဒီးသုဟီၣ်ခိၣ်တဖၣ်လၢစီၤပၤအဂီၢ် လံ. အအံၤမ့ၢ်တၢ်ချံလၢသုကဖှံလီၤလၢသုစံာ်ဧိၤပျီဧိၤအပူၤ အဂီၢ်န့ၣ်လီၤ.
24 ဖဲကူးတၢ်အကတီၢ်န့ၣ်, သုကဘၣ်ဟ့ၣ်စီၤပၤယဲၢ်ပူတပူ န့ၣ်လီၤ. တၢ်လၢအအိၣ်လီၤတဲာ်တဖၣ်န့ၣ်, သုသူအီၤလၢတၢ်ချံ အဂီၢ်ဒီးလၢတၢ်အီၣ်တၢ်အီလၢသုကစၢ်ဒၣ်သုဝဲဒီးသုဒူၣ်ဖိထၢ ဖိတဖၣ်အဂီၢ်သ့ဝဲန့ၣ်လီၤ.”
25 အဝဲသ့ၣ်စံးဆၢဝဲ, “ကစၢ်ဧၢ, နအုၣ်က့ၤခီၣ်က့ၤတ့ၢ်ပသးသမူ လံ. နဂ့ၤတ့ၢ်လၢပဖီခိၣ်လီၤ. ဒီးပကကဲထီၣ်စီၤပၤအကုၢ်အပှၤတဖၣ် လီၤ.”
26 လၢတၢ်န့ၣ်အဃိ, စီၤယိၤသးဒုးအိၣ်ထီၣ်တၢ်သိၣ်တၢ်သီတမံၤဘၣ် ထွဲဒီးကီၢ်အဲၤကူပတူးအဟီၣ်ခိၣ်တဖၣ်လၢ, တၢ်ကူးက့ၤလၢအန့ၢ်ယဲၢ်ပူတပူန့ၣ်ကြၢးမ့ၢ်စီၤပၤအတၢ်လီၤ. တၢ်သိၣ်တၢ်သီအံၤအိၣ်ဂၢၢ်ဝဲကျၢၤဝဲတုၤလၢမုၢ်မဆါတနံၤအံၤ လီၤ. ထဲပှၤလုၢ်တၢ်အခိၣ်တဖၣ်အဟီၣ်ခိၣ်ဧိၤန့ၣ်တကဲထီၣ်စီၤပၤအတၢ်စု လီၢ်ခီၣ်ခိၣ်ဘၣ်.
27 ပှၤအံၣ်စရ့လးဖိတဖၣ်အိၣ်ဝဲဆိးဝဲလၢကီၢ်အဲၤကူပတူးအပူၤ, လၢကီၢ်ကိၡ့ၣ်အလီၢ်ကဝီၤဖဲအဝဲသ့ၣ်ထူးထီၣ်တီၤထီၣ်, ဒီးအိၣ်ဒီးအဖိတဖၣ်အါဂၤန့ၣ်လီၤ.
28 စီၤယၤကိာ်အိၣ်ဆိးတ့ၢ်ဝဲလၢကီၢ်အဲၤကူပတူးအပူၤတဆံနွံ နံၣ်, တုၤလၢအသးအိၣ်ဝဲတကယၤလွံၢ်ဆံနွံနံၣ်န့ၣ်လီၤ.
29 ဖဲတၢ်ဆၢကတီၢ်ဘူးထီၣ်လၢအဝဲကသံန့ၣ်, အဝဲမၢပှၤကိးန့ၢ်အီၤအဖိခွါစီၤယိၤသးဒီးစံးဘၣ်အီၤ, “ပာ်နစုလၢယကံၣ်ဒုၣ်ကဆူးဒီးမၤတၢ်ဆိၣ်သညူးသပှၢ်တမံၤဒီး ယၤလၢ, နတခူၣ်လီၤယၤလၢကီၢ်အဲၤကူပတူးအပူၤဘၣ်န့ၣ်တက့ၢ်.
30 ယအဲၣ်ဒိးလၢယကဘၣ်တၢ်ခူၣ်လီၤယၤဖဲယပၢ်တဖၣ်ဘၣ်တၢ်ခူၣ်လီၤကွံာ် အီၤအလီၢ်န့ၣ်လီၤ. စိာ်ထီၣ်ကွံာ်ယၤလၢကီၢ်အဲၤကူပတူးအပူၤ, ဒီးခူၣ်လီၤယၤဖဲအဝဲသ့ၣ်ဘၣ်တၢ်ခူၣ်လီၤတ့ၢ်အီၤအလီၢ်န့ၣ်တက့ၢ်.”
စီၤယိၤသးစံးဆၢဝဲ, “ယကမၤဒ်နစံးဘၣ်ယၤအသိးလီၤ.”
31 စီၤယၤကိာ်စံးဝဲ, “မၤတၢ်ဆိၣ်တမံၤလၢနကမၤအီၤန့ၣ်တ က့ၢ်.” ဒီးစီၤယိၤသးမၤတၢ်ဆိၣ်န့ၣ်, ဒီးစီၤယၤကိာ်စံးဘျုးစံး ဖှိၣ်တၢ်ဖဲန့ၣ်, လၢလီၢ်မံခိၣ်န့ၣ်လီၤ.