46
1 စီၤယၤကိာ်ဘိၣ်ထီၣ်စှၢၤထီၣ်ကယဲၢ်တၢ်အိၣ်ဒီးအီိၤခဲလၢာ်ဒီး လဲၤဝဲဆူဝ့ၢ်ဘ့ၢ်ၡဘၤ, ဖဲတၢ်လီၢ်လၢအလုၢ်ထီၣ်တ့ၢ်တၢ်လုၢ်တၢ်ပာ်တဖၣ်ဆူအပၢ်စီၤအံၤ စဲးအကစၢ်ယွၤအအိၣ်န့ၣ်လီၤ.
2 ကစၢ်ယွၤကတိၤတ့ၢ်တၢ်ဒီးအီၤလၢတၢ်ထံၣ်လၢညါခီအပူၤဖဲမုၢ် နၤအကတီၢ်ဒီးကိးထီၣ်အီၤ, “စီၤယၤကိာ်ဧၢ, စီၤယၤကိာ်ဧၢ.”
ဒီးအဝဲစံးဆၢဝဲ, “မ့ၢ်, ယအိၣ်ဖဲအံၤလီၤ.”
3 ကစၢ်ယွၤစံးဘၣ်အီၤ, “ယမ့ၢ်ကစၢ်ယွၤ, နပၢ်အကစၢ်ယွၤလီၤ. နကလဲၤဆူကီၢ်အဲၤကူပတူးန့ၣ်ပျံၤတၢ်တ ဂ့ၤ. ယကဒုးကဲထီၣ်နစၢၤနသွဲၣ်တဖၣ်လၢပှၤကလုာ်ဖးဒိၣ်ဖဲန့ၣ်လီၤ.
4 ယကလဲၤဃုာ်တၢ်ဒီးနၤဆူကီၢ်အဲၤကူပတူး, ဒီးယကဟဲက့ၤစိာ် ကဒါက့ၤနစၢၤနသွဲၣ်တဖၣ်ဆူကီၢ်အံၤလီၤ. စီၤယိၤသးကအိၣ်ဒီးနၤဖဲနသံအဆၢကတီၢ်န့ၣ်လီၤ.”
5 စီၤယၤကိာ်ဟးထီၣ်လၢဝ့ၢ်ဘ့ၢ်ၡဘၤ, ဒီးအဖိခွါတဖၣ်ဒုးဒိး ထီၣ်အီၤ, အဝဲသ့ၣ်အဖိဆံးတဖၣ်, ဒီးအဝဲသ့ၣ်အမါတဖၣ်လၢလ့ၣ်ကဟၣ်တဖၣ်လၢ ကီၢ်အဲၤကူပတူးအစီၤပၤဆှၢလီၤန့ၣ်လီၤ.
6 အဝဲသ့ၣ်လဲၤစိာ်အဆၣ်ဖိကီၢ်ဖိအဒၢတဖၣ်ဒီးအတၢ်ဖိတၢ်လံၤလၢ အဒိးန့ၢ်ဝဲလၢကီၢ်ကနၤဧၣ်အပူၤတဖၣ်ဒီးလဲၤဆူကီၢ်အဲၤကူ ပတူးန့ၣ်လီၤ. စီၤယၤကိာ်လဲၤကိးဃုာ်အစၢၤအသွဲၣ်ခဲလၢာ်ဒီးအီၤ,
7 လၢအမ့ၢ်ဝဲ, အဖိခွါတဖၣ်, အလံၤတဖၣ်, အဖိမုၣ်တဖၣ်ဒီးအလံၤ မုၣ်တဖၣ်န့ၣ်လီၤ.
8 စီၤယၤကိာ်အဒူၣ်ဖိထၢဖိလၢအလဲၤဃုာ်တၢ်ဒီးအီၤဆူကီၢ်အဲၤ ကူပတူးတဖၣ်အမံၤဒီးအနီၣ်ဂံၢ်မ့ၢ်ဝဲ, အဖိဝဲၢ်ကိစီၤရူၤဘ့ၣ်
9 ဒီးစီၤရူၤဘ့ၣ်အဖိခွါတဖၣ်လၢအမ့ၢ်ဝဲ, စီၤဃနိာ်, စီၤပးလူး, စီၤဃ့းစရိၣ်, ဒီးစီၤကၢ်မံၤလီၤ.
10 စီၤစူၤမ့းအိၣ်ဒီးအဖိခွါတဖၣ်လၢအမ့ၢ်ဝဲ, စီၤယၤမူအ့လး, စီၤယၤမံၣ်, စီၤအိၤဟး, စီၤယၤကံၣ်, စီၤစိဃၢ်ဒီးပှၤကနၤဧၣ် မုၣ်အဖိခွါစီၤၡီအူးလီၤ.
11 စီၤလ့ၤဝံအိၣ်ဒီးအဖိခွါတဖၣ်လၢအမ့ၢ်ဝဲ, စီၤက့ရၡိၣ်, စီၤကဃး, ဒီးစီၤမရၤရံၤလီၤ.
12 စီၤယူဒၤအိၣ်ဒီးအဖိခွါတဖၣ်လၢအမ့ၢ်ဝဲ, စီၤၡ့လၤ, စီၤဖ့ၤရ့းဒီးစီၤစ့ရၤလီၤ. (စီၤယူဒၤအဖိခွါအဂၤတဖၣ်လၢအမ့ၢ်ဝဲ, စီၤအ့ၢ်ဒီးစီၤအိၤနၣ်န့ၣ်သံလၢကီၢ်ကနၤဧၣ်အပူၤလီၤ.) ဒီးစီၤဖ့ၤရ့းအဖိခွါတဖၣ်မ့ၢ်ဝဲ, စီၤဃ့းစရိၣ်ဒီးစီၤဃမူ လီၤ.
13 စီၤယံးစၣ်ကၢ်အိၣ်ဒီးအဖိခွါတဖၣ်လၢအမ့ၢ်ဝဲ, စီၤတိၤလၤ, စီၤဖူဝၤ, စီၤယၤၡူာ်ဒီးစီၤၡံးမရိၣ်လီၤ.
14 စီၤစဘူလိၣ်အိၣ်ဒီးအဖိခွါတဖၣ်လၢအမ့ၢ်ဝဲ, စီၤစ့ရ့း, စီၤအ့လိၣ်ဒီးစီၤယၤလအ့လးလီၤ.
15 လၢအဖိမုၣ်နီၢ်ဒံနၤအမဲာ်ညါန့ၣ်, ပှၤသ့ၣ်တဖၣ်အံၤ, မ့ၢ်ဖိခွါတဖၣ်လၢနီၢ်လ့ၤအၤဆံးစၢ်န့ၢ်လၢစီၤယၤကိာ်အဂီၢ် လၢကီၢ်မ့းစပတၤမံအပူၤန့ၣ်လီၤ. အစၢၤအသွဲၣ်တဖၣ်လၢနီၢ်လ့ၤအၤအတၢ်ဂံၢ်မ့ၢ်ဝဲခဲလၢာ်သၢဆံသၢ ဂၤန့ၣ်လီၤ.
16 စီၤကးအိၣ်ဒီးအဖိခွါတဖၣ်န့ၣ်မ့ၢ်ဝဲ, စီၤစံးဖယိၣ်, စီၤဃးကံ, စီၤၡူနံၤ, စီၤအ့စဘိၣ်, စီၤဧ့ရံၤ, စီၤအရိဒံၤဒီးစီၤအၤ ရအ့လံလီၤ.
17 စီၤအၤၡ့ၢ်အိၣ်ဒီးအဖိခွါတဖၣ်န့ၣ်မ့ၢ်ဝဲ, စီၤယံးမနၤ, စီၤယံးၡဝၤ, စီၤယံးၡဝံၤ, စီၤဘရံဧၤဒီးအဒီပုၢ်ဝဲၢ်မုၣ်နီၢ်စ့ရၤလီၤ. စီၤဘရံဧၤအဖိခွါတဖၣ်မ့ၢ်ဝဲစီၤဃ့ဘ့ၢ်ဒီးစီၤမးလကံအ့ လၤလီၤ.
18 ပှၤတဆံဃုဂၤအံၤ, မ့ၢ်စီၤယၤကိာ်အစၢၤအသွဲၣ်တဖၣ်လၢနီၢ်စံၤလ ပၤ, ကုၢ်ပိာ်မုၣ်လၢစီၤလၤဘၣ်ဟ့ၣ်အဖိမုၣ်နီၢ်လ့ၤအၤဆံးစၢ်န့ၢ် အီၤန့ၣ်လီၤ.
19 စီၤယၤကိာ်အမါနီၢ်ရၤဃ့လးဆံးစၢ်န့ၢ်အီၤအဖိခွါခံဂၤလၢ အမ့ၢ်ဝဲ, စီၤယိၤသးဒီးစီၤဘံၣ်ယၤမံၣ်န့ၣ်လီၤ.
20 လၢကီၢ်အဲၤကူပတူးအပူၤန့ၣ်စီၤယိၤသးအိၣ်ဒီးအဖိခွါခံဂၤ လၢအမ့ၢ်ဝဲ, စီၤမနၤၡ့ၤဒီးစီၤအ့ဖရဲၣ်လၢနီၢ်အၤစနး, စီၤပိၤတံၤဖ့ရၤ, ပှၤလုၢ်တၢ်အဒိၣ်လၢဝ့ၢ်ဟဲလံအီၣ်ဖိလံာ်အဖိမုၣ်ဆံးစၢ်န့ၢ် အီၤန့ၣ်လီၤ.
21 စီၤဘံၣ်ယၤမံၣ်အဖိခွါတဖၣ်န့ၣ်မ့ၢ်ဝဲစီၤဘ့လၤ, စီၤဘ့က့ၢ်, စီၤအၤၡဘ့လး, စီၤက့ရၤ, စီၤနဧၤမၣ်, စီၤအ့ဃံၤ, စီၤရိဃး, စီၤမူးဖံၣ်, စီၤဃူဖံၣ်ဒီးစီၤအၤရးလီၤ.
22 ပှၤတဆံလွံၢ်ဂၤအံၤမ့ၢ်, စီၤယၤကိာ်အစၢၤအသွဲၣ်တဖၣ်လၢနီၢ်ရၤ ဃ့လးဆံးစၢ်န့ၢ်အီၤန့ၣ်လီၤ.
23 စီၤဒၣ်အိၣ်ဒီးအဖိခွါစီၤဃူၡံၣ်လီၤ.
24 စီၤနးသၤလံအိၣ်ဒီးအဖိခွါတဖၣ်လၢအမ့ၢ်ဝဲ, စီၤယၤစအ့လး, စီၤကူနံၤ, စီၤယ့စ့ၢ်ဒီးစီၤၡံးလ့ၣ်လီၤ.
25 ပှၤနွံဂၤအံၤ, မ့ၢ်စီၤယၤကိာ်အစၢၤအသွဲၣ်တဖၣ်လၢနီၢ်ဘံၤလဟၤ လၢအမ့ၢ်နီၢ်ရၤဃ့လးအကုၢ်လၢအပၢ်စီၤလၤဘၣ်ဟ့ၣ်အီၤဆံးစၢ် န့ၢ်အီၤန့ၣ်လီၤ.
26 စီၤယၤကိာ်အစၢၤအသွဲၣ်လိၤလိၤတဖၣ်လၢအလဲၤဃုာ်ဒီးအီၤဆူကီၢ် အဲၤကူပတူးန့ၣ်အတၢ်ဂံၢ်မ့ၢ်ဝဲခဲလၢာ်ပှၤဃုဆံဃုဂၤ, န့ၣ်လီၤ. ဖဲအံၤ, အဖိခွါတဖၣ်အမါတဘၣ်တၢ်ဂံၢ်အီၤဘၣ်.
27 ဖိခွါခံဂၤအိၣ်ဖျဲၣ်ဝဲလၢစီၤယိၤသးအဂီၢ်လၢကီၢ်အဲၤကူ ပတူးအပူၤန့ၣ်လီၤ. စီၤယၤကိာ်အဒူၣ်ဖိထၢဖိလၢအလဲၤန့ၣ်, အတၢ်ဂံၢ်တုၤဆူကီၢ်အဲၤကူပတူးအပူၤမ့ၢ်ဝဲ, ပှၤအဂၤနွံဆံန့ၣ်လီၤ.
28 စီၤယၤကိာ်ဆှၢလီၤဆိစီၤယူဒၤလၢကလဲၤတဲဘၣ်စီၤယိၤသးဒ် သိးကဟဲသဂၢၢ်အီၤဖဲကီၢ်ကိၡ့ၣ်န့ၣ်လီၤ. ဖဲအဝဲသ့ၣ်လဲၤတုၤဝဲန့ၣ်,
29 စီၤယိၤသးဒိးထီၣ်အလ့ၣ်ကဟၣ်ဒီးလဲၤဝဲဆူကီၢ်ကိၡ့ၣ်လၢ ကသဂၢၢ်အပၢ်အဂီၢ်လီၤ. ဖဲအဝဲသ့ၣ်ထံၣ်လိာ်အသးန့ၣ်, စီၤယိၤသးဖိးအပၢ်အကိာ်ဒီးဟီၣ်ဝဲဒၣ်ဖးယံာ်န့ၣ်လီၤ.
30 စီၤယၤကိာ်စံးဘၣ်စီၤယိၤသး, “ခဲကနံၣ်အံၤမ့ၢ်ယထံၣ်ဘၣ်နၤ ဒီးသ့ၣ်ညါလၢနအိၣ်မူအိၣ်ဂဲၤဒံးအဃိ, ယသံယသးမုာ်လံ.”
31 ဒီးစီၤယိၤသးစံးဘၣ်အဒီပုၢ်ဝဲၢ်ခွါတဖၣ်ဒီးအပၢ်အဒူၣ်ဖိထၢ ဖိအဂၤတဖၣ်, “ယကဘၣ်လဲၤတဲဘၣ်စီၤပၤလၢယဒီပုၢ်ဝဲၢ်ခွါတဖၣ် ဒီးယပၢ်အဒူၣ်ဖိထၢဖိလၢအအိၣ်လၢကီၢ်ကနၤဧၣ်, ဟဲတုၤဆူယအိၣ်လံ.
32 ယကတဲအီၤလၢသုမ့ၢ်ပှၤကွၢ်သိတဖၣ်ဒီးကွၢ်ထွဲဆၣ်ဖိကီၢ်ဖိ, ဒီးသုဟဲစိာ်သုသိတဖၣ်ဒီးဆၣ်ဖိကီၢ်ဖိတဖၣ်ဒီးတၢ်အဂၤခဲ လၢာ်လၢအမ့ၢ်သုတၢ်န့ၣ်လီၤ.
33 တုၤစီၤပၤကိးဃီၤသု, ဒီးသံကွၢ်သုလၢသုတၢ်မၤမ့ၢ်တၢ်မနုၤ လဲၣ်န့ၣ်,
34 တဲဘၣ်အီၤသပှၢ်ကတၢၢ်လၢ, သုမ့ၢ်ပှၤကွၢ်ထွဲဆၣ်ဖိကီၢ်ဖိ အဒၢလၢသုသးသမူဒီစိၤ, ဒ်သုမိၢ်ပၢ်ဖံဖုလၢပျၢၤတဖၣ်မၤ တ့ၢ်ဝဲအသိးတက့ၢ်. လၢကျဲဒ်အံၤန့ၣ်, အဝဲကပျဲသုအိၣ်သုဆိးလၢကီၢ်ကိၡ့ၣ်အလီၢ် ကဝီၤအပူၤန့ၣ်လီၤ.” စီၤယိၤသးစံးတၢ်အံၤမ့ၢ်လၢပှၤအဲၤကူပတူးဖိတဖၣ်တမၤဃုာ် တၢ်ဒီးပှၤကွၢ်သိတဖၣ်နီတစဲးလၢအသးဟ့, သးဘၣ်အၢဝဲအဃိလီၤ.