45
1 စီၤယိၤသးပၢၤအတၢ်သးဘၣ်ဒိလၢအခ့အပှၤသ့ၣ်တဖၣ်အမဲာ်ညါတန့ၢ် လၢၤဘၣ်အဃိ, အဝဲမၢအဝဲသ့ၣ်ခဲလၢာ်ဟးထီၣ်ကွံာ်လၢဒၢးန့ၣ်လီၤ. ဖဲစီၤယိၤသးတဲဘၣ်အဒီပုၢ်ဝဲၢ်ခွါတဖၣ်လၢအဝဲမ့ၢ်မတၤလဲၣ် အခါန့ၣ်ပှၤအဂၤတအိၣ်ဘၣ်ဒီးအီၤနီတဂၤဘၣ်.
2 အဝဲဟီၣ်လၢအကလုၢ်သီၣ်ဖးဒိၣ်, တုၤဒၣ်လဲာ်ပှၤအဲၤကူပတူးဖိ တဖၣ်နၢ်ဟူဝဲ, ဒီးတၢ်ကစီၣ်န့ၣ်ဘၣ်တၢ်လဲၤစိာ်အီၤဆူစီၤပၤ အနူၢ်အစီၤပူၤလီၤ.
3 စီၤယိၤသးစံးဘၣ်အဒီပုၢ်ဝဲၢ်ခွါတဖၣ်, “ယမ့ၢ်စီၤယိၤသးလီၤ. မ့ၢ်ယပၢ်အိၣ်မူဒံးဧါ.” ဘၣ်ဆၣ်တုၤအဒီပုၢ်ဝဲၢ်ခွါတဖၣ်နၢ်ဟူတၢ်အံၤန့ၣ်အဝဲသ့ၣ်ပျံၤ တၢ်ဒိၣ်မးတုၤဒၣ်လဲာ်စံးဆၢက့ၤဝဲတသ့ဘၣ်န့ၣ်လီၤ.
4 ဒီးစီၤယိၤသးစံးဘၣ်အဝဲသ့ၣ်, “ဟဲသုးဘူးသုသးတက့ၢ်.” ဒီးအဝဲသ့ၣ်ဟဲဝဲဒီးအဝဲစံးဝဲ, “ယမ့ၢ်သုဒီပုၢ်ဝဲၢ်ခွါ စီၤယိၤသးလၢသုဆါကွံာ်တ့ၢ်အီၤဆူကီၢ်အဲၤကူပတူးအပူၤန့ၣ် လီၤ.
5 ခဲကနံၣ်အံၤတဘၣ်သးတံာ်တာ်မ့ၢ်ဂ့ၤ, ပာ်ဒ့ၣ်ပာ်ကမၣ်လီၤသုသး မ့ၢ်ဂ့ၤ, လၢသုဆါလီၤကွံာ်ယၤဖဲအံၤအဃိတဂ့ၤ. ပှၤလၢအဆှၢလီၤဆိယၤလၢသုမဲာ်ညါ, ဒ်သိးကအုၣ်က့ၤခီၣ်က့ၤပှၤ ဂီၢ်မုၢ်အသးသမူတဖၣ်န့ၣ်, မ့ၢ်နီၢ်နီၢ်ကစၢ်ယွၤလီၤ.
6 ခဲအံၤမ့ၢ်ဒံးဒၣ်ခံနံၣ်တနံၣ်လၢတၢ်သၣ်ဝံၤလီၤဒိမၤအသးလၢ ထံကီၢ်အံၤအပူၤလီၤ. ကအိၣ်ဒံးဝဲဆူမဲာ်ညါယဲၢ်နံၣ်လၢတၢ်ထဲၣ်တၢ်မ့ၢ်ဂ့ၤ, တၢ်ကူးတၢ်မ့ၢ်ဂ့ၤတအိၣ်ဘၣ်ဝဲန့ၣ်လီၤ.
7 ကစၢ်ယွၤဆှၢဆိတ့ၢ်ယၤလၢသုမဲာ်ညါ, ဒ်သိးကမၤပူၤမၤဖျဲးသု လၢကျဲလီၤလိၢ်လီၤလးဒ်အံၤ, လၢကမၤလီၤတံၢ်ဝဲလၢသု, ဒီးသုစၢၤသုသွဲၣ်တဖၣ်ကအိၣ်မူဘၣ် ဒံးဝဲအဂီၢ်လီၤ.
8 လၢတၢ်န့ၣ်အဃိပှၤလၢအဆှၢယၤဖဲအံၤနီၢ်နီၢ်တမ့ၢ်သုဘၣ်. မ့ၢ်ဒၣ်ကစၢ်ယွၤန့ၣ်လီၤ. အဝဲဒုးကဲထီၣ်တ့ၢ်ယၤလၢစီၤပၤ အပဒိၣ်အဒိၣ်ကတၢၢ်န့ၣ်လီၤ. ယမ့ၢ်ပှၤဘၣ်မူဘၣ်ဒါလၢထံကီၢ်ဒီဘ့ၣ်အဂီၢ်, ဒီးယမ့ၢ်ပှၤပၢဘၣ်ကီၢ်အဲၤကူပတူးဒီဘ့ၣ်ညါန့ၣ်လီၤ.
9 ခဲကနံၣ်အံၤက့ၤကဒါက့ၤချ့ချ့ဆူယပၢ်အအိၣ်ဒီးတဲအီၤလၢတၢ် အံၤမ့ၢ်တၢ်လၢအဖိခွါစီၤယိၤသးစံးဝဲတက့ၢ်. ကစၢ်ယွၤဒုးကဲထီၣ်ယၤပှၤပၢၤဘၣ်ကီၢ်အဲၤကူပတူးဒီဘ့ၣ်ညါ လံ. ဟဲဆူယအိၣ်ဒီးသုးဆၢသုးကတီၢ်တဂ့ၤ.
10 နအိၣ်နဆိးနဲဘူးဒီးယၤဃုာ်ဒီး, နဖိတဖၣ်, နလံၤတဖၣ်, နသိတဖၣ်, နမဲာ်တဲးလဲးတဖၣ်, နဂီၤဘုၣ်ဂီၤဖံးတဖၣ်, ဒီးတၢ်လၢအအိၣ်ဒီးနၤခဲလၢာ်ဖဲကီၢ်ကိၡ့ၣ်အလီၢ်ကဝီၤပူၤသ့ ဝဲလီၤ.
11 နမ့ၢ်အိၣ်လၢကီၢ်ကိၡ့ၣ်အပူၤဒီး, ယအံးထွဲကွၢ်ထွဲနၤသ့လီၤ. တၢ်သၣ်ဝံၤလီၤဒိကအိၣ်ဒံးဝဲယဲၢ်နံၣ်, ဒီးယတအဲၣ်ဒိးလၢနၤ, နပှၤဒူၣ်ဖိထၢဖိဒီးဆၣ်ဖိကီၢ်ဖိအဒၢတဖၣ်ကသၣ်ဝံၤလီၤဒိန့ၣ် ဘၣ်.”
12 စီၤယိၤသးစံးကဒီးဝဲ, “ခဲကနံၣ်အံၤသုဝဲသ့ၣ်ခဲလၢာ်, ဒီးနဲစ့ၢ်ကီးစီၤဘံၣ်ယၤမံၣ်ဧၢ, သုထံၣ်လၢယမ့ၢ်နီၢ်နီၢ်စီၤ ယိၤသးသ့လံ.
13 တဲဘၣ်ယပၢ်လၢယမ့ၢ်ပှၤလၢအန့ၢ်စိန့ၢ်ကမီၤဖဲအံၤလၢကီၢ်အဲၤ ကူပတူးအပူၤထဲလဲၣ်, ဒီးတဲဘၣ်အီၤဘၣ်ဃးတၢ်ကိးမံၤဒဲးလၢသုထံၣ်တ့ၢ်တက့ၢ်. ဒီးမၤချ့ချ့ဒီးဟဲကိးအီၤဖဲအံၤတက့ၢ်.”
14 အဝဲဖိးဟုဃာ်အဒီပုၢ်ဝဲၢ်ခွါစီၤဘံၣ်ယၤမံၣ်ဒီးဟီၣ်ဝဲလီၤ. ဒီးစီၤဘံၣ်ယၤမံၣ်စ့ၢ်ကီးဟီၣ်ဝဲဖဲအဖိးဟုဃာ်အီၤန့ၣ်လီၤ.
15 ဝံၤဒီး, ဖဲအဟီၣ်ဒံးအဖၢမုၢ်န့ၣ်, အဝဲဖိးဟုအဒီပုၢ်ဝဲၢ်ခွါ တဖၣ်ဒီးနၢမူအီၤတဂၤဘၣ်တဂၤလီၤ. ဝံၤဒီးအဒီပုၢ်ဝဲၢ်ခွါတဖၣ်စးထီၣ်ကတိၤတၢ်ဒီးအီၤလီၤ.
16 ဖဲတၢ်ကစီၣ်တုၤဃီၤဆူနူၢ်ပူၤစီၤပူၤလၢစီၤယိၤသးအဒီပုၢ် ဝဲၢ်ခွါတဖၣ်ဟဲလံန့ၣ်ဒီး, စီၤပၤဒီးအပဒိၣ်ပပှၢ်တဖၣ်သူၣ်ခုသးခုဝဲလီၤ.
17 စီၤပၤစံးဘၣ်စီၤယိၤသး, “တဲဘၣ်နဒီပုၢ်ဝဲၢ်ခွါတဖၣ်လၢ ကပဒၢးထီၣ်အဆၣ်ဖိကီၢ်ဖိတဖၣ်ဒီးက့ၤကဒါဆူကီၢ်ကနၤဧၣ်န့ၣ်တ က့ၢ်.
18 မ်အက့ၤကိးအပၢ်ဒီးအပှၤဒူၣ်ဖိထၢဖိတဖၣ်, ဒီးမ်အဟဲကဒါက့ၤဖဲအံၤတက့ၢ်. ယကဟ့ၣ်အဝဲသ့ၣ်တၢ်လီၢ်အဂ့ၤ ကတၢၢ်လၢကီၢ်အဲၤကူပတူးအပူၤဒီးအဝဲသ့ၣ်ကအိၣ်ဒီးတၢ်လၢလၢ လီၣ်လီၣ်လၢကအိၣ်မူဆူညါအဂီၢ်လီၤ.
19 တဲဘၣ်စ့ၢ်ကီးအဝဲသ့ၣ်လၢကက့ၤစိာ်လ့ၣ်ကဟၣ်တဖၣ်လၢကီၢ်အဲၤကူ ပတူးဒ်သိးကဟဲကိးအမါတဖၣ်, အဖိဆံးတဖၣ်, ဒီးဟဲကိးစ့ၢ်ကီးအပၢ်ဃုာ်ဒီးအဝဲသ့ၣ်န့ၣ်တက့ၢ်.
20 အလီၢ်တအိၣ်လၢအဝဲသ့ၣ်ကဘၣ်ကိၢ်ဘၣ်ဂီၤတၢ်လၢအဘၣ်ပာ်တ့ၢ်အတၢ်ဖိ တၢ်လံၤလၢအလီၢ်ခံအဃိဘၣ်. ကီၢ်အဲၤကူပတူးဒီတဘ့ၣ်ညါအတၢ်အဂ့ၤကတၢၢ်န့ၣ်, ကမ့ၢ်အဝဲသ့ၣ်အတၢ်လီၤ.”
21 စီၤယၤကိာ်အဖိခွါတဖၣ်မၤဝဲဒ်တၢ်စံးဘၣ်တဲဘၣ်အဝဲသ့ၣ်အသိး န့ၣ်လီၤ. စီၤယိၤသးဟ့ၣ်လီၤအဝဲသ့ၣ်လၢလ့ၣ်ကဟၣ်တဖၣ်ဒ်စီၤပၤမၤလိာ် ဝဲအသိး, ဒီးတၢ်အီၣ်လၢကျဲအဂီၢ်လီၤ.
22 အဝဲဟ့ၣ်စ့ၢ်ကီးအဝဲသ့ၣ်တဂၤဘၣ်တဂၤအတၢ်ကူတၢ်သိးလၢကကလံၤ အသးတဘျီအဂီၢ်လီၤ. မ့မ့ၢ်စီၤဘံၣ်ယၤမံၣ်န့ၣ်ဟ့ၣ်ဝဲစ့အဘ့ၣ်သၢကယၤဒီးအကူအသိး လၢကကလံၤအသးယဲၢ်ဘျီအဂီၢ်လီၤ.
23 စီၤယိၤသးဆှၢလီၤန့ၢ်အပၢ်လၢကသ့ၣ်ယီၤအဒုတဆံလၢတၢ်ပဒၢး အီၤဒီးကီၢ်အဲၤကူပတူးအတၢ်ဖိတၢ်လံၤအဂ့ၤကတၢၢ်တဖၣ်, ဒီးကသ့ၣ်ယီၤအဒုတဆံလၢတၢ်ပဒၢးအီၤဒီးဘုဧိၤဟုဧိၤ, ကိၣ်ဒီးတၢ်အီၣ်တၢ်အီအဂၤလၢကျဲအဂီၢ်လီၤ.
24 အဝဲဆှၢလီၤအဒီပုၢ်ဝဲၢ်ခွါတဖၣ်ဖဲအဟးထီၣ်န့ၣ်, ဒီးအဝဲစံးဘၣ်အဝဲသ့ၣ် “အ့ၣ်လိာ်သုသးလၢကျဲတဂ့ၤ.”
25 အဝဲသ့ၣ်ဟးထီၣ်လၢကီၢ်အဲၤကူပတူးအပူၤဒီးက့ၤကဒါက့ၤဆူ အဟံၣ်ဆူအပၢ်စီၤယၤကိာ်အအိၣ်လၢကီၢ်ကနၤဧၣ်န့ၣ်လီၤ.
26 အဝဲသ့ၣ်စံးဘၣ်အပၢ်, “စီၤယိၤသးအိၣ်မူဒံးဝဲလီၤ. အဝဲမ့ၢ်ပှၤပၢတၢ်လၢကီၢ်အဲၤကူပတူးဒီဘ့ၣ်အဖီခိၣ်လီၤ.” စီၤယၤကိာ်ကမၢကမၣ်ဒီးအသးလီၤကတုၤဒီးနာ်အဝဲသ့ၣ်တသ့ဘၣ်.
27 ဘၣ်ဆၣ်တုၤအဝဲသ့ၣ်တဲဘၣ်အီၤတၢ်ခဲလၢာ်လၢစီၤယိၤသးစံးဘၣ် အဝဲသ့ၣ်, ဒီးဖဲအဝဲထံၣ်ဘၣ်လ့ၣ်ကဟၣ်တဖၣ်လၢစီၤယိၤသးဆှၢလီၤဒ်သိးတၢ် ကလဲၤကိးအီၤဆူကီၢ်အဲၤကူပတူးန့ၣ်, အဝဲသ့ၣ်နီၣ်ထီၣ်က့ၤအသးလၢတၢ်သးလီၤကတုၤန့ၣ်လီၤ.
28 အဝဲစံးဝဲ, “ယဖိခွါစီၤယိၤသးမူဒံးဝဲလီၤ. တၢ်အံၤမ့ၢ်တၢ်လၢယမုၢ်လၢ်အဒိၣ်ကတၢၢ်လီၤ. ယကဘၣ်လဲၤဒီးထံၣ်ဘၣ်အီၤတချုးယသံဒံးဘၣ်န့ၣ်လီၤ.”