44
1 စီၤယိၤသးမၢအဟံၣ်အခ့အပှၤတဖၣ်အခိၣ်ဒီးစံးဝဲ, “မၤပှဲၤပှၤတဖၣ်အံၤအထၢၣ်ဒီးတၢ်အီၣ်ဖဲအဝဲသ့ၣ်စိာ်ဝဲန့ၢ်, ဒီးဒၢနုာ်ပှၤတဂၤစုာ်စုာ်အစ့လၢအထၢၣ်ခိၣ်ထိးန့ၣ်တက့ၢ်.
2 ပာ်ယလီခီစ့လၢပှၤအဆံးကတၢၢ်တဂၤအထၢၣ်ဖီခိၣ်ဒီးဒၢနုာ်အစ့ လၢအသါကပှ့ၤဘုဧိၤဟုဧိၤအဂီၢ်န့ၣ်တက့ၢ်.” အဝဲမၤဝဲဒ်အဘၣ်တၢ်မၢအီၤအသိးန့ၣ်လီၤ.
3 လၢဂီၤထၢၣ်သၢဂီၤဂီၤန့ၣ်, ပှၤဒီပုၢ်ဝဲၢ်ခွါတဖၣ်ဘၣ်တၢ်ပျဲ က့ၤအီၤဃုာ်ဒီးအကသ့ၣ်ယီၤတဖၣ်န့ၣ်လီၤ.
4 ဖဲအဝဲသ့ၣ်ဟးပူၤထီၣ်ဒီးဝ့ၢ်တယံၤအါအါဘၣ်န့ၣ်, စီၤယိၤသးစံးဘၣ်ဟံၣ်အတၢ်ခ့တၢ်ပှၤအခိၣ်, “လူၤပိာ်ထွဲပှၤတဖၣ်န့ၣ်အခံချ့ချ့တက့ၢ်. ဖဲနချုးန့ၢ်အဝဲသ့ၣ်န့ၣ်, သံကွၢ်အီၤ, ဘၣ်မနုၤအဟ့ၣ်ဆၢတၢ်အၢလၢတၢ်ဂ့ၤအဂီၢ်န့ၣ်လဲၣ်.
5 ဘၣ်မနုၤအဟုၣ်န့ၢ်နကစၢ်အလီခီစ့န့ၣ်လဲၣ်. တၢ်န့ၣ်မ့ၢ်လီခီတဖျၢၣ်လၢအဝဲအီတၢ်လၢအပူၤ, လီခီတဖျၢၣ်လၢသူဝဲလၢကဖးတၢ်ခူသူၣ်အဂီၢ်န့ၣ်လီၤ. အဝဲသ့ၣ်မၤကမၣ်တ့ၢ်တၢ်ကမၣ်ဖးဒိၣ်တမံၤလီၤ.”
6 တုၤတၢ်ခ့တၢ်ပှၤန့ၣ်လဲၤချုးန့ၢ်အဝဲသ့ၣ်ဒီးတဲကဒါက့ၤတၢ် ကတိၤသ့ၣ်တဖၣ်န့ၣ်လီၤ.
7 အဝဲသ့ၣ်စံးဆၢအီၤ, “ကစၢ်ဧၢ, နတဲတၢ်ဒ်သိးအံၤန့ၣ်, အခီပညီဒ်လဲၣ်. ပဆိၣ်လီၤပသးလၢပတမၤတၢ်ဒ်န့ၣ်အသိးဘၣ်.
8 နသ့ၣ်ညါလၢပဟဲက့ၤစိာ်ကဒါက့ၤစ့လၢကီၢ်ကနၤဧၣ်, လၢပထံၣ်ဘၣ်လၢပထၢၣ်တဖၣ်အခိၣ်ထိးဆူနအိၣ်န့ၣ်လီၤ. လၢတၢ်န့ၣ်အဃိ, ပကဘၣ်ဟုၣ်န့ၢ်စ့မ့ၢ်ဂ့ၤ, ထူမ့ၢ်ဂ့ၤလၢနကစၢ်အဟံၣ်န့ၣ်ဘၣ်မနုၤလဲၣ်.
9 ကစၢ်ဧၢ, ပှၤလၢပကျါတဂၤဂၤမ့ၢ်ဘၣ်တၢ်ထံၣ်န့ၢ်အီၤလၢတၢ်န့ၣ် အိၣ်လၢအအိၣ်ဒီး, အဝဲကဘၣ်တၢ်မၤသံအီၤဒီးပဝဲပှၤအိၣ်လီၤတဲာ်တဖၣ်ပကကဲထီၣ် နကုၢ်တဖၣ်န့ၣ်လီၤ.”
10 အဝဲစံးဝဲ, “ယအၢၣ်လီၤလီၤ. ဘၣ်ဆၣ်ဒီးထဲဒၣ်ပှၤတဂၤဧိၤလၢ အဟံးန့ၢ်ကွံာ်လီခီကကဲထီၣ်ယကုၢ်ယပှၤ, ဒီးသုဝဲပှၤအိၣ်လီၤတဲာ်ပူၤဖျဲးသ့ဝဲလီၤ.”
11 လၢတၢ်န့ၣ်အဃိ, အဝဲသ့ၣ်ပာ်လီၤအထၢၣ်တဖၣ်ချ့သဒံးလၢဟီၣ်ခိၣ် လိၤ, ဒီးပှၤတဂၤဘၣ်တဂၤစုာ်စုာ်အိးထီၣ်အထၢၣ်န့ၣ်လီၤ.
12 စီၤယိၤသးအခ့အပှၤဃုတၢ်လီၤတံၢ်လီၤဆဲး, စးထီၣ်လၢပှၤသးပှၢ်ကတၢၢ်တဂၤတုၤလၢအသးစၢ်ကတၢၢ်တဂၤ, ဒီးလီခီန့ၣ်ဘၣ်တၢ်ထံၣ်န့ၢ်အီၤလၢစီၤဘံၣ်ယၤမံၣ်အထၢၣ်ပူၤ န့ၣ်လီၤ.
13 ပှၤဒီပုၢ်ဝဲၢ်ခွါတဖၣ်ဖှီယာ်ကွံာ်အဆ့ကၤတဖၣ်လၢတၢ်သူၣ်အုး သးအုးအပူၤ, ပဒၢးထီၣ်အကသ့ၣ်ယီၤတဖၣ်, ဒီးလဲၤကဒါက့ၤဆူဝ့ၢ်န့ၣ်လီၤ.
14 ဖဲစီၤယူဒၤဒီးအဒီပုၢ်ဝဲၢ်ခွါတဖၣ်လဲၤတုၤဆူစီၤယိၤသး အဟံၣ်န့ၣ်စီၤယိၤသးအိၣ်ဒံးလၢဟံၣ်န့ၣ်လီၤ. ဒီးအဝဲသ့ၣ်တီၤလီၤလၢစီၤယိၤသးအမဲာ်ညါ,
15 ဒီးစီၤယိၤသးစံးဝဲ, “သုမၤတ့ၢ်တၢ်ဒ်လဲၣ်. မ့ၢ်သုတသ့ၣ်ညါဘၣ်လၢပှၤအိၣ်လၢတၢ်လီၢ်တၢ်လၤဒ်ယၤအံၤ, ကသ့ၣ်ညါတၢ်လၢသုမၤ, မ့ၢ်လၢအဖးတၢ်ခူသူၣ်သ့အဃိ န့ၣ်ဘၣ်ဧါ.”
16 စီၤယူဒၤစံးဆၢဝဲ, “ကစၢ်ဧၢ, ပစံးဘၣ်နၤမနုၤကသ့လဲၣ်. ပဂ့ၢ်လိာ်နၤကသ့ဒ်လဲၣ်. ပကတိၤပူၤဖျဲးပသးကသ့ဒ်လဲၣ်. ကစၢ်ယွၤမၤဖျါထီၣ်ပတၢ်ဒဲးဘးတဖၣ်လံ. ဒီးခဲကနံၣ်အံၤပဝဲခဲလၢာ်ပမ့ၢ်နကုၢ်နပှၤတဖၣ်ဒီးတမ့ၢ်ဘၣ်ထဲ ပှၤတဂၤဧိၤလၢလီခီဘၣ်တၢ်ထံၣ်န့ၢ်လၢအအိၣ်န့ၣ်ဘၣ်.”
17 စီၤယိၤသးစံးဆၢဝဲ, “အိ, တမ့ၢ်ဘၣ်. ယတမၤတၢ်ဒ်န့ၣ်လ့ၤတက့ၤဘၣ်. ထဲပှၤတဂၤဧိၤလၢအအိၣ်ဒီးလီခီ န့ၣ်ကကဲထီၣ်ယကုၢ်လီၤ. သုဝဲပှၤအဂၤတဖၣ်က့ၤကဒါက့ၤပူၤပူၤဖျဲးဖျဲးဆူသုပၢ်အအိၣ် သ့ဝဲလီၤ.”
18 စီၤယူဒၤလဲၤဆူစီၤယိၤသးအအိၣ်ဒီးစံးဝဲ, “ကစၢ်ဧၢ, ဝံသးစူၤပျဲယကတိၤတၢ်ဒီးနၤလၢတၢ်သဘျ့အပူၤတက့ၢ်. တဘၣ်သးထီၣ်ယၤတဂ့ၤ. နမ့ၢ်ပှၤဒ်စီၤပၤအကစၢ်ဒၣ်ဝဲ အသိးလီၤ.
19 ကစၢ်ဧၢ, နသံကွၢ်ပှၤ, မ့ၢ်သုအိၣ်ဒီးသုပၢ်တဂၤမ့ၢ်ဂ့ၤ, သုဒီပုၢ်ဝဲၢ်ခွါအဂၤတဂၤမ့ၢ်ဂ့ၤန့ၣ်ဧါ.
20 ပစံးဆၢတ့ၢ်နၤလၢပအိၣ်ဒီးပပၢ်တဂၤလၢအသးပှၢ်တ့ၢ်လံ, ဒီးပဒီပုၢ်ဝဲၢ်ခွါအဆံးတဂၤ, လၢအအိၣ်ဖျဲၣ်ထီၣ်လၢအဂီၢ်ဖဲ အသးပှၢ်အဆၢကတီၢ်န့ၣ်လီၤ. ပိာ်ခွါဖိသၣ်န့ၣ်အဒီပုၢ်ဝဲၢ်ခွါ တဂၤသံလံ. ဒီးအဝဲမ့ၢ်ပှၤထဲတဂၤဧိၤလၢအမိၢ်အဖိတဖၣ်အကျါလၢအအိၣ်မူ ဒံး, ဒီးအပၢ်အဲၣ်အီၤဒိၣ်မးန့ၣ်လီၤ.
21 ကစၢ်ဧၢ, နမၢပဟဲကိးတ့ၢ်အီၤဖဲအံၤ, ဒ်သိးနထံၣ်အီၤကသ့ အဂီၢ်,
22 ဒီးပစံးဆၢတ့ၢ်နၤလၢပိာ်ခွါဖိသၣ်အံၤဟးဖးဒီးအပၢ်တသ့ ဘၣ်. မ့ၢ်ဟးဖးဝဲဒီး, အပၢ်ကသံလီၤ.
23 ဒီးနစံး, ပမ့ၢ်တဟဲကိးဘၣ်ပဒီပုၢ်ဝဲၢ်ခွါအဆံးကတၢၢ်ဒီးပှၤ ဘၣ်န့ၣ်, နတပျဲပကအိၣ်ဖျါလၢနမဲာ်ညါဘၣ်လီၤ.
24 ဖဲပက့ၤကဒါက့ၤဆူပပၢ်အအိၣ်န့ၣ်, ပတဲဘၣ်အီၤလၢတၢ်လၢနစံး တ့ၢ်န့ၣ်လီၤ.
25 ဒီးအဝဲတဲဘၣ်ပှၤလၢပကဟဲကဒါဒီးပှ့ၤန့ၢ်တၢ်အီၣ်တၢ်အီတစဲး န့ၣ်လီၤ.
26 ဒီးပစံးဆၢအီၤလၢ, ပလဲၤကဒါက့ၤတသ့ဘၣ်. မ့တမ့ၢ်လၢပဒီပုၢ်ဝဲၢ်ခွါအဆံးကတၢၢ်လဲၤဃုာ်ဒီးပှၤဘၣ်န့ၣ်, ပတဘၣ်တၢ်ပျဲနုာ်ပှၤဆူပှၤတဂၤန့ၣ်အမဲာ်ညါဘၣ်. ပလဲၤကသ့ဒၣ်ဖဲပဒီပုၢ်ဝဲၢ်ခွါအဆံးကတၢၢ်တဂၤလဲၤဃုာ်တၢ်ဒီး ပှၤဧိၤန့ၣ်လီၤ.
27 ပပၢ်စံးဘၣ်ပှၤ, ‘သုသ့ၣ်ညါလၢယမါနီၢ်ရၤဃ့လးဆံးစၢ်န့ၢ်ယၤ ဖိခွါထဲခံဂၤဧိၤန့ၣ်လီၤ.
28 အဝဲသ့ၣ်အကျါတဂၤန့ၣ်, ပာ်လီၤတဲာ်ကွံာ်ယၤလံ. အဝဲကဘၣ်တၢ်အ့ၣ်ဖှီယာ်ကွံာ်အီၤအက့က့အခီခီလၢဆၣ်ဖိ ကီၢ်ဖိအအၢအသီတဖၣ်, မ့ၢ်လၢစးထီၣ်လၢအဟးထီၣ်န့ၣ်ယတထံၣ်ဘၣ် လၢၤအီၤဘၣ်အဃိလီၤ.
29 ခဲအံၤသုမ့ၢ်ဟံးကွံာ်အဝဲတဂၤအံၤလၢယအိၣ်, ဒီးတၢ်မ့ၢ်မၤအသးတမံၤမံၤဒီးအီၤဒီး, တၢ်သးအုးလၢသုကဒုးဘၣ်ယၤန့ၣ်, ကမၤသံကွံာ်ယၤဒ်ယသးပှၢ်တ့ၢ်လံအသိးလီၤ.’ ”
30 စီၤယူဒၤစံးကဒီးဝဲ, “ကစၢ်ဧၢ, ဒီးခဲကနံၣ်အံၤ, ယမ့ၢ်က့ၤကဒါက့ၤဆူယပၢ်အအိၣ်တအိၣ်ဒီးပိာ်ခွါဖိသၣ်အံၤဘၣ် ဒီး, တစုဃီဖဲအဝဲထံၣ်ဝဲလၢပိာ်ခွါဖိအံၤတအိၣ်ဒီးယၤဘၣ်န့ၣ်, အဝဲကသံလီၤ. အဂ့ၢ်ဒ်အံၤ, အဝဲအသးသမူအိၣ်စၢဘိၣ်ဘံအသးဒီးပိာ်ခွါဖိသၣ် န့ၣ်အသးသမူ,
31 ဒီးအဝဲအသးပှၢ်ဒိၣ်မးတုၤဒၣ်လဲာ်တၢ်သူၣ်အုးသးအုးလၢပကဒုး ဘၣ်အီၤန့ၣ်ကမၤသံအီၤလီၤ.
32 အါန့ၣ်အန့ၢ်, ယအုၣ်ကီၤယသးသမူဒၣ်ယဲလၢပိာ်ခွါဖိသၣ်အဂီၢ် ဆူယပၢ်အအိၣ်လီၤ. ယတဲဘၣ်တ့ၢ်အီၤလၢယမ့ၢ်တဟဲက့ၤကိးပိာ်ခွါဖိသၣ်ဆူအအိၣ်ဘၣ် ဒီး, ယကတူၢ်တၢ်ပာ်ဒ့ၣ်ပာ်ကမၣ်တစိၤဒၣ်ယၤလီၤ.
33 ဒီးကစၢ်ဧၢ, ခဲကနံၣ်အံၤ, ယကအိၣ်ဖဲအံၤဒ်နကုၢ်နပှၤအသိးလၢပိာ် ခွါဖိသၣ်န့ၣ်အလီၢ်, ဒီးပျဲအဝဲက့ၤကဒါက့ၤဃုာ်ဒီးအဒီပုၢ်ဝဲၢ်ခွါအဂၤတဖၣ်တက့ၢ်.
34 ပိာ်ခွါဖိသၣ်မ့ၢ်တက့ၤဃုာ်ဒီးယၤဘၣ်ဒီး, ယက့ၤကဒါက့ၤဆူ ယပၢ်အအိၣ်ကသ့ဒ်လဲၣ်. တၢ်တတၢးတနါအံၤလၢကလီၤဘၣ် လၢယပၢ်အလိၤန့ၣ်, ယကွၢ်အီၤတကဲဘၣ်.”