41
1 ခံနံၣ်ပူၤကွံာ်အလီၢ်ခံကီၢ်အဲၤကူပတူးအစီၤပၤမံမီၢ်တ့ၢ် ဝဲဒၣ်လၢအဝဲဆၢထၢၣ်လၢထံကျိနံလၤအကပၤ,
2 ဖဲဂီၤဖံးမိၢ်လၢအဘီၣ်ဒီးပကွၢ်ဂ့ၤနွံဒုဟဲထီၣ်လၢထံကျိ ပူၤဒီးစးထီၣ်အီၣ်နီၣ်ဧိၤမံၤဧိၤန့ၣ်လီၤ.
3 ဝံၤဒီးဂီၤဖံးမိၢ်အဂၤနွံဒုဟဲထီၣ်ဝဲ, ဒီးအဝဲသ့ၣ်န့ၣ်ဃဲၤဒီးပကွၢ်အီၤလာ်အၢလီၤ. အဝဲသ့ၣ်ဟဲဒီးဆၢထၢၣ်လၢဂီၤဖံးမိၢ်အဂၤတဖၣ်အကပၤလၢထံကျိ ကၢၢ်ပၤနံၤ,
4 ဒီးဂီၤဖံးမိၢ်အဃဲၤတဖၣ်အီၣ်ကွံာ်ဂီၤဖံးမိၢ်အဘီၣ်တဖၣ်န့ၣ် လီၤ. ဒီးစီၤပၤပၢၢ်ထီၣ်ဝဲဒၣ်န့ၣ်လီၤ.
5 အဝဲမံဘၣ်ကဒီးအသးဒီးမံမီၢ်အတၢ်မံမီၢ်အဂၤတမံၤန့ၣ်လီၤ. ဘုအစဲၤနွံစဲၤလၢအကၢဒီးမံ, မဲထီၣ်လၢဘုမုၢ်တမုၢ်အလိၤ လီၤ.
6 ဝံၤဒီးဘုအဂၤအစဲၤနွံစဲၤပျိာ်ထီၣ်, သွံးဒီးဃ့ထီကွံာ်ဝဲ လၢမုၢ်ထီၣ်ကလံၤအဃိ,
7 ဒီးဘုစဲၤလၢအသွံးတဖၣ်ယူၢ်လီၤကွံာ်ဘုစဲၤလၢအကၢတဖၣ်န့ၣ် လီၤ. စီၤပၤပၢၢ်ထီၣ်ဝဲဒီးသ့ၣ်ညါလၢအဝဲဒၣ်မံမီၢ်တၢ်န့ၣ်လီၤ.
8 လၢမုၢ်ဆ့ၣ်ထီၣ်န့ၣ်အဝဲဘၣ်ကိၢ်ဘၣ်ဂီၤဝဲ, အဃိမၢပှၤကိးန့ၢ် အီၤကယဲၢ်ပှၤမၤကဒါမဲာ်တဖၣ်ဒီးပှၤကူၣ်ဘၣ်ကူၣ်သ့လၢကီၢ်အဲၤ ကူပတူးပူၤခဲလၢာ်န့ၣ်လီၤ. စီၤပၤတဲဘၣ်အဝဲသ့ၣ်လၢအတၢ်မံ မီၢ်တဖၣ်ဘၣ်ဆၣ်ဒီးပှၤဖးန့ၢ်အီၤအတၢ်မံမီၢ်တသ့ နီတဂၤဘၣ်.
9 တုၤနုၤတစုပှၤကွၢ်ထွဲစပံးထံစံးဘၣ်စီၤပၤ, “တနံၤအံၤ, ယကဘၣ်အၢၣ်လီၤအီလီၤလၢယမၤကမၣ်တ့ၢ်တၢ်န့ၣ်လီၤ.
10 နသးဒိၣ်ထီၣ်ဘၣ်တ့ၢ်ပှၤကုၢ်ကိၣ်အဒိၣ်ဒီးယၤ, ဒီးနဒၢနုာ်ပှၤလၢဃိာ်ပူၤလၢပှၤပၢၤတၢ်အခိၣ်အဟံၣ်ပူၤလီၤ.
11 ဘၣ်မုၢ်တနၤပဝဲတဂၤစုာ်စုာ်ပမံမီၢ်တ့ၢ်တၢ်မံမီၢ်တဂၤတမံၤ ဒီးတၢ်မံမီၢ်တဖၣ်အိၣ်ဒီးအခီပညီလီၤဆီလိာ်အသးန့ၣ်လီၤ.
12 ပှၤဧ့ၤဘြံၤသးစၢ်ဖိတဂၤအိၣ်ဒီးပှၤဖဲန့ၣ်, မ့ၢ်ပှၤပၢၤတၢ်အခိၣ်အကုၢ်အပှၤတဂၤလီၤ. ပတဲဘၣ်အီၤလၢပတၢ်မံ မီၢ်တဖၣ်, ဒီးအဝဲဒၣ်ဖးအခီပညီလၢပဂီၢ်လီၤ.
13 တၢ်ကဲထီၣ်အသးဒ်အဝဲစံးတ့ၢ်ဝဲအသိး, နပာ်က့ၤယၤလၢယ လီၢ်ဒၣ်ယဲ, မ့မ့ၢ်နမၤသံကွံာ်ပှၤကုၢ်ကိၣ်အဒိၣ်န့ၣ်လီၤ.”
14 စီၤပၤမၢပှၤလဲၤကိးန့ၢ်အီၤစီၤယိၤသး, ဒီးစီၤယိၤသးဘၣ် တၢ်ဟဲက့ၤကိးအီၤတဘျီဃီလၢဃိာ်ပူၤန့ၣ်လီၤ. ဖဲလူၤအခၣ်ဆူၣ်ဒီးလဲကူလဲသိးဝံၤဝဲန့ၣ်, အဝဲဟဲနုာ်ဆူစီၤပၤအမဲာ်ညါန့ၣ်လီၤ.
15 စီၤပၤစံးဘၣ်အီၤ, “ယမံမီၢ်တ့ၢ်တၢ်မံမီၢ်တမံၤ, ဒီးပှၤဖးန့ၢ်ယၤတသ့နီတဂၤဘၣ်. ယဘၣ်တၢ်တဲဘၣ်ယၤလၢနဖးတၢ် မံမီၢ်တဖၣ်သ့ဝဲလီၤ.”
16 စီၤယိၤသးစံးဆၢဝဲ, “ကစၢ်စီၤပၤဧၢ, ယဖးတၢ်မံမီၢ်အခီ ပညီတသ့ဘၣ်. ဘၣ်ဆၣ်ဒီးကစၢ်ယွၤကဟ့ၣ်နၤတၢ်အခီပညီလၢအဂ့ၤတမံၤလီၤ.”
17 စီၤပၤစံးဝဲ, “ယမံမီၢ်တ့ၢ်လၢယဆၢထၢၣ်လၢထံကျိနံလၤ အကၢၢ်နံၤ,
18 ဖဲဂီၤဖံးမိၢ်နွံဒုလၢအဘီၣ်ဒီးပကွၢ်ဂ့ၤဟဲထီၣ်လၢထံကျိ ပူၤဒီးစးထီၣ်အီၣ်နီၣ်ဧိၤမံၤဧိၤန့ၣ်လီၤ.
19 ဝံၤဒီးဂီၤဖံးမိၢ်အဂၤနွံဒုလၢအဃဲၤဒီးပကွၢ်အီၤလာ်အၢဟဲ ထီၣ်ဝဲန့ၣ်လီၤ. အဝဲသ့ၣ်မ့ၢ်ဂီၤဖံးမိၢ်အဃဲၤသံတဖၣ်လၢယတထံၣ်ဘၣ်တ့ၢ်နီတပူၤ လၢကီၢ်အဲၤကူပတူးန့ၣ်လီၤ.
20 ဂီၤဖံးမိၢ်အဃဲၤတဖၣ်အီၣ်ကွံာ်ဂီၤဖံးမိၢ်လၢအဘီၣ်,
21 ဘၣ်ဆၣ်ပှၤတသ့ၣ်ညါနီတဂၤမ့ၢ်လၢအဝဲသ့ၣ်ဖျါဃဲၤဒီးလာ်အၢဒၣ် ဒ်လၢညါအသိးအဃိန့ၣ်လီၤ. ဒီးယမံပၢၢ်ထီၣ်န့ၣ်လီၤ.
22 ယမံမီၢ်တ့ၢ်စ့ၢ်ကီးလၢယထံၣ်ဘုစဲၤနွံစဲၤလၢအကၢဒီးမံ, မဲထီၣ်လၢဘုမုၢ်တမုၢ်အလိၤလီၤ.
23 ဝံၤဒီးဘုစဲၤနွံစဲၤဟဲပျိာ်ထီၣ်, အဖျၢၣ်သွံးဒီးဃ့ထီ ကွံာ်လၢမုၢ်ထီၣ်ကလံၤ,
24 ဒီးဘုစဲၤအသွံးတဖၣ်ယူၢ်လီၤကွံာ်ဘုစဲၤအကၢတဖၣ်န့ၣ်လီၤ. ယတဲဘၣ်တ့ၢ်တၢ်မံမီၢ်တဖၣ်ဆူပှၤမၤကဒါမဲာ်တဖၣ်, ဘၣ်ဆၣ်အဝဲသ့ၣ်ဖးန့ၢ်ယၤတဘၣ်နီတဂၤဘၣ်.”
25 စီၤယိၤသးစံးဘၣ်စီၤပၤ, “တၢ်မံမီၢ်ခံမံၤအံၤ, အခီပညီ မ့ၢ်တၢ်တမံၤဃီလီၤ. ကစၢ်ယွၤတဲဘၣ်နၤတၢ်လၢအဝဲကမၤဝဲန့ၣ် လီၤ.
26 ဂီၤဖံးမိၢ်အဘီၣ်နွံဒုမ့ၢ်ဝဲနွံနံၣ်ဒီးဘုစဲၤလၢအကၢနွံ စဲၤမ့ၢ်စ့ၢ်ကီးနွံနံၣ်လီၤ. အဝဲသ့ၣ်အခီပညီမ့ၢ်တၢ်တမံၤဃီလီၤ.
27 ဂီၤဖံးမိၢ်အဃဲၤနွံဒုလၢအဟဲထီၣ်လၢခံဒီးဘုစဲၤနွံစဲၤလၢအသွံး, ဒီးဃ့ထီၣ်ကွံာ်လၢမုၢ်ထီၣ်ကလံၤန့ၣ်မ့ၢ်တၢ်သၣ်ဝံၤလီၤဒိ အနံၣ်နွံနံၣ်န့ၣ်လီၤ.
28 တၢ်အံၤမ့ၢ်ဒ်ယစံးတ့ၢ်နၤအသိး, ကစၢ်ယွၤဒုးနဲၣ်နၤတၢ်လၢအဝဲ ကမၤဝဲန့ၣ်လီၤ.
29 တၢ်အီၣ်ကုးအီပှဲၤနွံနံၣ်ကအိၣ်ဝဲလၢကီၢ်အဲၤကူပတူးဒီဘ့ၣ် ညါအပူၤလီၤ.
30 အန့ၣ်ဝံၤအလီၢ်ခံ, တၢ်သၣ်ဝံၤလီၤဒိနွံနံၣ်ကအိၣ်ထီၣ်ဝဲဒၣ်, ဒီးတၢ်အီၣ်ကုးအီပှဲၤအနံၣ်ခဲလၢာ်ကဘၣ်တၢ်သးပ့ၤနီၣ်ကွံာ် အီၤ, မ့ၢ်လၢတၢ်သၣ်ဝံၤလီၤဒိကမၤဟးဂီၤကွံာ်ထံကီၢ်အဃိန့ၣ်လီၤ.
31 တၢ်အီၣ်ကုးအီပှဲၤအဆၢကတီၢ်ကဘၣ်တၢ်သးပ့ၤနီၣ်ကွံာ်အီၤလၢာ် လၢာ်ဆ့ဆ့, မ့ၢ်လၢတၢ်သၣ်ဝံၤလီၤဒိလၢအပိာ်ထွဲထီၣ်အခံကမ့ၢ်တၢ်လၢအနး ဒိၣ်မးအဃိန့ၣ်လီၤ.
32 နတၢ်မံမီၢ်ဝံၤမံမီၢ်က့ၤခံဘျီအံၤအခီပညီမ့ၢ်ဝဲ, တၢ်ဂ့ၢ်အံၤဘၣ်တၢ်ပာ်ဂၢၢ်ပာ်ကျၢၤအီၤလၢကစၢ်ယွၤ, ဒီးတယံာ်ဘၣ်န့ၣ်အဝဲကဒုးကဲထီၣ်လိၣ်ထီၣ်အီၤန့ၣ်လီၤ.
33 ဒီးခဲကနံၣ်အံၤနကြၢးဃုထၢပှၤတနီၤလၢအအိၣ်ဒီးတၢ်ကူၣ်သ့ ဒီးတၢ်ထံၣ်တၢ်လၢသးအမဲာ်ဒီးပာ်လီၤအီၤလၢပှၤပၢၤဘၣ်ထံကီၢ် န့ၣ်လီၤ.
34 နကဘၣ်ဃုထၢပာ်လီၤစ့ၢ်ကီးပဒိၣ်ပပှၢ်အဂၤတဖၣ်ဒီးဟံးန့ၢ်တၢ် အီၣ်ကုးအီပှဲၤနွံနံၣ်အတၤသူတၤသၣ်တဖၣ်ယဲၢ်ပူတပူန့ၣ်လီၤ.
35 ဟ့ၣ်လီၤနကလုၢ်ဒ်သိးအဝဲသ့ၣ်ကထၢဖှိၣ်တၢ်အီၣ်တၢ်အီခဲလၢာ်ဖဲ တၢ်အီၣ်ကုးအီပှဲၤအနံၣ်လၢကဟဲဝဲတဖၣ်, ဒီးဟ့ၣ်စိဟ့ၣ်ကမီၤအဝဲသ့ၣ်လၢကပဒၢးပာ်ဘုဧိၤဟုဧိၤလၢဝ့ၢ် တဖၣ်အပူၤဒီးပၢၤဃာ်အီၤန့ၣ်တက့ၢ်.
36 တၢ်အီၣ်တၢ်အီတဖၣ်အံၤ, ကမ့ၢ်တၢ်ကတီၤပာ်တကလုာ်လၢထံကီၢ်အဂီၢ် ဖဲနွံနံၣ်လၢတၢ်သၣ်ဝံၤလီၤဒိအကဟဲဘၣ်ကီၢ်အဲၤကူပတူးအဂီၢ် န့ၣ်လီၤ.လၢကျဲဒ်သိးအံၤန့ၣ်ပှၤဂီၢ်မုၢ်တသၣ်ဝံၤလီၤဒိဘၣ်ဝဲ ဘၣ်.”
37 စီၤပၤဒီးအပဒိၣ်ပပှၢ်တဖၣ်အၢၣ်လီၤတူၢ်လိာ်တၢ်ကူၣ်ကျဲၤအံၤ,
38 ဒီးစီၤပၤစံးဘၣ်အဝဲသ့ၣ်, “ပကထံၣ်န့ၢ်ပှၤဂ့ၤဒိၣ်န့ၢ်စီၤ ယိၤသးတဂၤ, ပှၤတဂၤလၢကစၢ်ယွၤအသးစီဆှံအိၣ်လၢ အပူၤန့ၣ်တသ့နီတစုဘၣ်.”
39 စီၤပၤစံးဘၣ်စီၤယိၤသး, “ကစၢ်ယွၤဒုးနဲၣ်တ့ၢ်နၤကယဲၢ်တၢ် အံၤခဲလၢာ်, သတးဒီးအိၣ်ဖျါလၢနအိၣ်ဒီးတၢ်ကူၣ်သ့ဒီးတၢ်ထံၣ်လၢသးဒိၣ် န့ၢ်အါန့ၢ်ဒံးပှၤအဂၤတဂၤလၢ်လၢ်တက့ၢ်လီၤ.
40 ယကပာ်နၤလၢပှၤပၢယထံယကီၢ်အလီၢ်, ဒီးပှၤဂီၢ်မုၢ်ခဲလၢာ်ကစူၢ်တၢ်ကလုၢ်တဖၣ်လၢနဟ့ၣ်လီၤန့ၣ်လီၤ. လၢတၢ်စိတၢ်ကမီၤအလီၢ်န့ၣ်, နကမ့ၢ်ပှၤခံဂၤတဂၤလၢယၤဝံၤအလီၢ် ခံန့ၣ်လီၤ.
41 ဒီးခဲကနံၣ်အံၤယပာ်လီၤနၤလၢပဒိၣ်ဖးဒိၣ်လၢကီၢ်အဲၤကူပတူး ဒီဘ့ၣ်အဖီခိၣ်န့ၣ်လီၤ.”
42 စီၤပၤဘ့ၣ်လီၤကွံာ်ပသံးလၢအအိၣ်ဒီးစီၤပၤအတၢ်စဲပနီၣ်လၢ အစုလိၤဒီးဒုးသိးထီၣ်စီၤယိၤသးန့ၣ်လီၤ. အဝဲဒုးကၤထီၣ်အီၤလၢဆ့ကၤဘဲအဂ့ၤတဘ့ၣ်ဒီးဒုးလံာ်ထီၣ်အီၤ လၢဖဲထူတပျံၤလၢအကိာ်လိၤလီၤ.
43 စီၤပၤဟ့ၣ်လီၤအီၤလၢစီၤပၤအလ့ၣ်ကဟၣ်ခံဆိတဆိလၢကဒိးဝဲ အဂီၢ်, ဒီးပှၤဃ့ၢ်ဆိတၢ်တဖၣ်လၢစီၤပၤအလ့ၣ်ကဟၣ်မဲာ်ညါန့ၣ် ကိးထီၣ်ဝဲ, “ဟ့ၣ်ကျဲတက့ၢ်, ဟ့ၣ်ကျဲတက့ၢ်” န့ၣ်လီၤ. အန့ၣ်ဒီးစီၤယိၤသးဘၣ်တၢ်ဃုထၢပာ်လီၤအီၤဒ်ပဒိၣ် ဖးဒိၣ်လၢကီၢ်အဲၤကူပတူးဒီဘ့ၣ်အဖီခိၣ်န့ၣ်လီၤ.
44 စီၤပၤစံးဘၣ်အီၤ, “ယမ့ၢ်စီၤပၤလီၤ. နတၢ်ပျဲမ့ၢ်တအိၣ်ဘၣ် န့ၣ်ပှၤလၢကီၢ်အဲၤကူပတူးဒီတကီၢ်တယူာ်ထီၣ်ဘၣ်အစု မ့ၢ်ဂ့ၤ, သုးဘၣ်ဒၣ်လဲာ်အခီၣ်မ့ၢ်ဂ့ၤနီတဂၤဘၣ်.”
45 စီၤပၤယုၢ်န့ၢ်စီၤယိၤသးလၢအဲၤကူပတူးဖိအမံၤ, “စီၤစးဖနးသဖၤန့ၤ,” ဒီးဟ့ၣ်အီၤလၢအမါတဂၤလၢအမံၤမ့ၢ် နီၢ်အၤစနး, စီၤပိၤတံၤဖ့ရၤလၢအမ့ၢ်ပှၤလုၢ်တၢ်အခိၣ်လၢဝ့ၢ်ဟဲလံအီၣ်ဖီ လံာ်အဖိမုၣ်န့ၣ်လီၤ.
46 စီၤယိၤသးအသးအိၣ်အနံၣ်သၢဆံဖဲအစးထီၣ်မၤတၢ်လၢကီၢ်အဲၤကူ ပတူးအစီၤပၤအဂီၢ်န့ၣ်လီၤ. ဒီးစီၤယိၤသးဟးထီၣ်လၢစီၤပၤအနူၢ်ပူၤစီၤပူၤဒီးလဲၤတၢ် လၢကီၢ်အဲၤကူပတူးဒီဘ့ၣ်ညါန့ၣ်လီၤ.
47 လၢတၢ်အီၣ်ကုးအီပှဲၤနွံနံၣ်အတီၢ်ပူၤန့ၣ်, ဟီၣ်ခိၣ်ဒုးမဲထီၣ်သၣ်ထီၣ်ဘုဧိၤဟုဧိၤအါအါဂီၢ်ဂီၢ်လီၤ.
48 တၢ်န့ၣ်တဖၣ်ခဲလၢာ်စီၤယိၤသးထၢဖှိၣ်ဒီးပဒၢးပာ်အီၤလၢဝ့ၢ် တဖၣ်အပူၤန့ၣ်လီၤ. ဒီးလၢတဝ့ၢ်ဘၣ်တဝ့ၢ်န့ၣ်, အဝဲပဒၢးပာ်တၢ်အီၣ်တဖၣ်လၢအဟဲလၢပျီအိၣ်ခိၣ်အိၣ်ဃၢၤအီၤန့ၣ် လီၤ.
49 ဒီးဘုဧိၤဟုဧိၤအိၣ်အါဝဲဂီၢ်ဝဲဒ်မဲးလၢပီၣ်လဲၣ်နံၤအ သိး, တုၤဒၣ်လဲာ်စီၤယိၤသးဆိတ့ၢ်ဃီၣ်ဝဲမ့ၢ်လၢဃီၣ်ဝဲတကဲတသ့ လၢၤဘၣ်အဃိလီၤ.
50 ဒီးတချုးလၢတၢ်သၣ်ဝံၤလီၤဒိအနံၣ်တဖၣ်တုၤဃီၤဒံးဘၣ်န့ၣ် စီၤယိၤသးအိၣ်ဒီးအဖိခွါခံဂၤလၢနီၢ်အၤစနးန့ၣ်လီၤ.
51 စီၤယိၤသးစံးဝဲ, “ကစၢ်ယွၤဒုးသးပ့ၤနီၣ်ကွံာ်ယၤယတၢ်နး တၢ်ဖှီၣ်ခဲလၢာ်ဒီးကယဲၢ်ယပၢ်အဟံၣ်ဖိဃီဖိခဲလၢာ်လံ.” လၢတၢ်န့ၣ်အဃိအဝဲယုၢ်န့ၢ်အဖိခွါဝဲၢ်ကိအမံၤလၢစီၤမနၤၡ့ၤ လီၤ.
52 အဝဲစံးစ့ၢ်ကီးဝဲ, “ကစၢ်ယွၤဟ့ၣ်လံယၤလၢဖိတဖၣ်လၢယတၢ်ဘၣ် ကိၢ်ဘၣ်ဂီၤအကီၢ်ပူၤလံ.” လၢတၢ်န့ၣ်အဃိအဝဲယုၢ်န့ၢ်အဖိခွါခံဂၤတဂၤအမံၤလၢစီၤအ့ ဖရဲၣ်လီၤ.
53 ဒီးတၢ်အီၣ်ကူးအီပှဲၤနွံနံၣ်လၢကီၢ်အဲၤကူပတူးမုာ်လၤသး ခုဘၣ်တ့ၢ်ဝဲလၢအပူၤကတၢၢ်ကွံာ်ဝဲ,
54 ဒီးတၢ်သၣ်ဝံၤလီၤဒိနွံနံၣ်စးထီၣ်ဝဲ, ဒ်စီၤယိၤသးစံးတ့ၢ် ဝဲအသိးန့ၣ်လီၤ. လၢထံကီၢ်အဂၤခဲလၢာ်န့ၣ်, တၢ်သၣ်ဝံၤလီၤဒိအိၣ်ထီၣ်ဝဲ, ဘၣ်ဆၣ်ဒီးလၢကီၢ်အဲၤကူပတူးအပူၤသကုၤဆးဒးန့ၣ်တၢ်အီၣ်တၢ် အီအိၣ်ဝဲန့ၣ်လီၤ.
55 တုၤပှၤအဲၤကူပတူးဖိစးထီၣ်သူၣ်ဝံၤသၣ်စ့ၤန့ၣ်, အဝဲသ့ၣ်ကိးထီၣ်တၢ်ဆူစီၤပၤအအိၣ်လၢတၢ်အီၣ်တၢ်အီအဂီၢ်လီၤ. သတးဒီး, စီၤပၤဟ့ၣ်လီၤအကလုၢ်ဆူအဝဲသ့ၣ်အအိၣ်လၢအကလဲၤဆူ စီၤယိၤသးအအိၣ်, ဒီးမၤဒ်တၢ်လၢအဝဲကစံးဘၣ်တဲဘၣ်အဝဲသ့ၣ်န့ၣ်လီၤ.
56 တၢ်သၣ်ဝံၤလီၤဒိနးထီၣ်ဝဲ, ဒီးရၤလီၤအသးလၢထံကီၢ်ဒီတဘ့ၣ် အပူၤသတးဒီး, စီၤယိၤသးအိးထီၣ်ကွံာ်တၢ်ပဒၢးဘုဧိၤဟုဧိၤအဟံၣ်တဖၣ်ဒီး ဆါလီၤဘုဧိၤဟုဧိၤဆူပှၤအဲၤကူပတူးဖိတဖၣ်န့ၣ်လီၤ.
57 ပှၤဂီၢ်မုၢ်လၢဟီၣ်ခိၣ်ဒီဘ့ၣ်ဟဲဝဲဆူကီၢ်အဲၤကူပတူးလၢ ကပှ့ၤဘုဧိၤဟုဧိၤလၢစီၤယိၤသးအအိၣ်အဂီၢ်န့ၣ်လီၤ. အဂ့ၢ်ဒ်အံၤ, တၢ်သၣ်ဝံၤလီၤဒိအံၤနးဒိၣ်မးလၢတၢ်လီၢ်ကိးပူၤ ဒဲးန့ၣ်လီၤ.