42
1 ဖဲစီၤယၤကိာ်သ့ၣ်ညါဝဲဒၣ်လၢဘုဧိၤဟုဧိၤအိၣ်ဝဲဒၣ်လၢကီၢ် အဲၤကူပတူးအပူၤန့ၣ်, အဝဲစံးဘၣ်အဖိခွါတဖၣ်, “ဘၣ်မနုၤလၢသုတမၤတၢ်တမံၤမံၤန့ၣ်လဲၣ်.
2 ယနၢ်ဟူဘုဧိၤဟုဧိၤအိၣ်လၢကီၢ်အဲၤကူပတူးလီၤ. လဲၤဖဲန့ၣ်ဒီးပှ့ၤဘုဧိၤဟုဧိၤတနီၤဒ်သိးပသုတသၣ်ဝံၤလီၤ ဒိသံတဂ့ၤန့ၣ်တက့ၢ်.”
3 အန့ၣ်ဒီး, စီၤယိၤသးအဒီပုၢ်ဝဲၢ်ခွါအဂၤဆံဆဲၣ်ဂၤလဲၤဆူ ကီၢ်အဲၤကူပတူးဒ်သိးကပှ့ၤန့ၢ်ဘုဧိၤဟုဧိၤအဂီၢ်,
4 ဘၣ်ဆၣ်, စီၤယၤကိာ်တဆှၢလီၤဘၣ်စီၤယိၤသးအဒီပုၢ်ဝဲၢ်ခွါတံၢ် နီၢ်လၢအမ့ၢ်စီၤဘံၣ်ယၤမံၣ်ဃုာ်ဒီးအဝဲသ့ၣ်ဘၣ်. အဂ့ၢ်ဒ်အံၤ, အဝဲဘၣ်ယိၣ်လၢတၢ်ကမၤအသးတမံၤမံၤဒီးစီၤဘံၣ်ယၤ မံၣ်အဃိန့ၣ်လီၤ.
5 စီၤယၤကိာ်အဖိခွါတဖၣ်ဟဲဃုာ်ဒီးပှၤအဂၤတဖၣ်လၢကပှ့ၤန့ၢ်ဘု ဧိၤဟုဧိၤ, မ့ၢ်လၢတၢ်သၣ်ဝံၤလီၤဒိအိၣ်ထီၣ်လၢကီၢ်ကနၤဧၣ်အပူၤအဃိလီၤ.
6 ဒ်ကီၢ်အဲၤကူပတူးအပဒိၣ်ဖးဒိၣ်တဂၤအသိး, စီၤယိၤသးဆါလီၤဘုဧိၤဟုဧိၤဆူပှၤဂီၢ်မုၢ်လၢအအိၣ်လၢဟီၣ် ခိၣ်ချၢခဲလၢာ်န့ၣ်လီၤ. လၢတၢ်န့ၣ်အဃိစီၤယိၤသးအဒီပုၢ်ဝဲၢ်ခွါတဖၣ်ဟဲဒီးသကူးလီၤ အသးတုၤအကျးလီၤအမဲာ်လၢဟီၣ်ခိၣ်လိၤလၢစီၤယိၤသးအမဲာ်ညါန့ၣ်လီၤ.
7 ဒီးဖဲစီၤယိၤသးထံၣ်ဘၣ်အဒီပုၢ်ဝဲၢ်ခွါတဖၣ်န့ၣ်အဝဲသ့ၣ်ညါ အဝဲသ့ၣ်, ဘၣ်ဆၣ်ဒီးအဝဲပာ်မၤအသးဒ်တသ့ၣ်ညါအဝဲသ့ၣ်အသိးန့ၣ်လီၤ. အဝဲသံကွၢ်အဝဲသ့ၣ်လၢတၢ်ကတိၤဆူၣ်ဆူၣ်အပူၤ, “သုဟဲလၢလဲၣ်ခီလဲၣ်.”
အဝဲသ့ၣ်စံးဆၢဝဲ, “ပဟဲလၢကီၢ်ကနၤဧၣ်ဒ်သိးပကပှ့ၤန့ၢ်တၢ် အီၣ်တၢ်အီလီၤ.”
8 စီၤယိၤသးမ့ၢ်သ့ၣ်ညါနီၣ်အဒီပုၢ်ဝဲၢ်ခွါတဖၣ်ဘၣ်ဆၣ်, အဝဲသ့ၣ်တသ့ၣ်ညါနီၣ်အီၤဘၣ်.
9 အဝဲသ့ၣ်နီၣ်ထီၣ်က့ၤတၢ်မံမီၢ်လၢအမံမီၢ်တ့ၢ်ဝဲဘၣ်ဃး ဒီးအဝဲသ့ၣ်ဒီးစံးဝဲဒၣ်, “သုမ့ၢ်ပှၤကွၢ်ဟုၣ်ကွၢ်စုးတၢ်တဖၣ်လီၤ. သုဟဲဒ်သိးသုကထံၣ်သ့ၣ်ညါပထံပကီၢ်အတၢ်ဂံၢ်စၢ်ဘါစၢ်အိၣ်ဖဲ လဲၣ်န့ၣ်လီၤ.”
10 အဝဲသ့ၣ်စံးဆၢဝဲ, “တမ့ၢ်ဘၣ်ကစၢ်ဧၢ, ပဟဲဃီၤဒ်နကုၢ်နပှၤတဖၣ်လၢပကပှ့ၤတၢ်အီၣ်တၢ်အီအဂီၢ်လီၤ.
11 ပမ့ၢ်ပှၤဒီပုၢ်ဝဲၢ်ခွါခဲလၢာ်လီၤ. ကစၢ်ဧၢ, ပတမ့ၢ်ပှၤကွၢ်ဟုၣ်ကွၢ်စုးတၢ်တဖၣ်ဘၣ်. ပမ့ၢ်ပှၤအတီအလိၤတဖၣ်လီၤ.”
12 စီၤယိၤသးစံးဘၣ်အဝဲသ့ၣ်, “တမ့ၢ်ဘၣ်. သုဟဲဒ်သိးသုကထံၣ်သ့ၣ်ညါပထံပကီၢ်အတၢ်ဂံၢ်စၢ်ဘါစၢ်အိၣ်ဖဲ လဲၣ်န့ၣ်လီၤ.”
13 အဝဲသ့ၣ်စံးဝဲ, “ကစၢ်ဧၢ, ပမ့ၢ်ပှၤဒီပုၢ်ဝဲၢ်ခွါခဲလၢာ်တဆံ ခံဂၤ, ပှၤတဂၤဃီလၢကီၢ်ကနၤဧၣ်ပူၤအဖိခွါတဖၣ်န့ၣ်လီၤ. ပဒီပုၢ်ဝဲၢ်ခွါတဂၤသံလံ. ဒီးခဲကနံၣ်အံၤပဒီပုၢ်ဝဲၢ်ခွါ အဆံးကတၢၢ်တဂၤန့ၣ်အိၣ်ဒီးပပၢ်လီၤ.”
14 စီၤယိၤသးစံးဆၢဝဲ, “မ့ၢ်ဒၣ်ဒ်ယစံးတ့ၢ်အသိးန့ၣ်, သုမ့ၢ်ပှၤကွၢ်ဟုၣ်ကွၢ်စုးတၢ်တဖၣ်လီၤ.”
15 အအံၤမ့ၢ်ကျဲလၢသုကဘၣ်တၢ်မၤကွၢ်သုန့ၣ်လီၤ. ယဆိၣ်တၢ်လၢစီၤပၤအမံၤအပူၤလၢ, သုဒီပုၢ်ဝဲၢ်ခွါအဆံးကတၢၢ်တဂၤမ့ၢ်တဟဲဖဲအံၤဘၣ်ဒီး, သုတဟးထီၣ်ဘၣ်နီတစုဘၣ်.
16 ပှၤလၢသုကျါတဂၤကဘၣ်က့ၤဒီးဟဲကိးအီၤန့ၣ်လီၤ. သုဝဲလၢအအိၣ်တ့ၢ်တဖၣ်သုကဘၣ်တၢ်ပၢၤဃာ်သုတုၤလၢတၢ်လၢသု စံးအတၢ်မ့ၢ်တၢ်တီ, ဘၣ်တၢ်မၤကွၢ်အီၤန့ၣ်လီၤ. မ့တမ့ၢ်ဘၣ်ဒ်န့ၣ်ဘၣ်န့ၣ်, ဒ်စီၤပၤမူဝဲအသိးန့ၣ်, သုမ့ၢ်ပှၤကွၢ်ဟုၣ်ကွၢ်စုးတၢ်တဖၣ်လီၤ.”
17 အန့ၣ်ဒီး, အဝဲဒၢနုာ်အဝဲသ့ၣ်ဆူဃိာ်ပူၤသၢသီန့ၣ်လီၤ.
18 လၢသၢသီတသီန့ၣ်စီၤယိၤသးစံးဘၣ်အဝဲသ့ၣ်, “ယမ့ၢ်ပှၤတဂၤလၢအပျံၤကစၢ်ယွၤလီၤ. ဒီးယကပျဲပူၤဖျဲးသုသးသမူတဖၣ်လၢတၢ်အဂ့ၢ်အခၢးတမံၤအဖီ ခိၣ်လီၤ.
19 လၢသုကအုၣ်သုသးလၢသုမ့ၢ်ပှၤအတီအလိၤအဂီၢ်, ပှၤလၢသုကျါတဂၤကအိၣ်လၢဃိာ်ပူၤဖဲသုဘၣ်တၢ်ပၢၤဃာ်တ့ၢ်သု လီၤ. ဒီးသုဝဲအဂၤတဖၣ်ကက့ၤ, ဒီးက့ၤစိာ်ဘုဧိၤဟုဧိၤလၢသုပှ့ၤတ့ၢ်တဖၣ်ဆူသုဟံၣ်ဖိဃီ ဖိလၢအသၣ်ဝံၤလီၤဒိတဖၣ်အအိၣ်န့ၣ်လီၤ.
20 ဒီးသုကဘၣ်ဟဲကိးသုဒီပုၢ်ဝဲၢ်ခွါအဆံးကတၢၢ်ဆူယအိၣ်လီၤ. တၢ်အံၤကအုၣ်အသးလၢသုတဲတၢ်မ့ၢ်တၢ်တီဒီးယတမၤသံ သုဘၣ်.”
ဒီးအဝဲသ့ၣ်အၢၣ်လီၤတူၢ်လိာ်တၢ်အံၤ,
21 ဒီးစံးလိာ်အသးတဂၤဒီးတဂၤ, “မ့ၢ်မး, ခဲအံၤပဘၣ်တၢ်နးတၢ် ဖှီၣ်လၢတၢ်လၢပမၤဘၣ်တ့ၢ်ပဒီပုၢ်ဝဲၢ်ခွါတဂၤအဃိလီၤ. ပထံၣ်တ့ၢ်အဝဲအိၣ်လၢတၢ်ကီတၢ်ခဲဖးဒိၣ်အပူၤဖဲအဝဲဃ့ကညးပှၤ လၢတၢ်မၤစၢၤအဂီၢ်, ဘၣ်ဆၣ်ပတဒိကနၣ်ဘၣ်အီၤဘၣ်. လၢတၢ်န့ၣ်အဃိခဲအံၤပအိၣ်လၢတၢ်ကီတၢ်ခဲအဝဲအံၤအပူၤန့ၣ် လီၤ.”
22 စီၤရူၤဘ့ၣ်စံးဝဲ, “ယတဲဘၣ်တ့ၢ်သုလၢ, မၤဘၣ်ဒိဆါပိာ်ခွါ ဖိသၣ်န့ၣ်တဂ့ၤ. ဘၣ်ဆၣ်, သုတဒိကနၣ်ဘၣ်. ဒီးခဲကနံၣ်အံၤပဘၣ်တၢ်ဟ့ၣ်ကၣ်ဆၢက့ၤပှၤလၢအတၢ်သံ အဃိလီၤ.”
23 စီၤယိၤသးနၢ်ပၢၢ်တၢ်လၢအဝဲသ့ၣ်စံးတ့ၢ်ဝဲ, ဘၣ်ဆၣ်အဝဲသ့ၣ်တသ့ၣ်ညါဝဲဘၣ်. အဂ့ၢ်ဒ်အံၤ, အဝဲသ့ၣ်ကတိၤတၢ်ဒီးအီၤခီဖျိပှၤကတိၤကျိးထံတၢ်တဂၤန့ၣ် လီၤ.
24 စီၤယိၤသးဟးထီၣ်ကွံာ်လၢအဝဲသ့ၣ်အအိၣ်ဒီးစးထီၣ်ဟီၣ်ဝဲဒၣ် လီၤ. တုၤအဝဲကတိၤထီၣ်ဖျဲးက့ၤတၢ်သ့န့ၣ်, အဝဲဟဲက့ၤကဒါက့ၤဒီး လၢအဝဲသ့ၣ်အကျါဟံးန့ၢ်စီၤစူၤမ့းအိၣ်, ဒီးမၢပှၤစၢဃာ်အီၤလၢအဝဲသ့ၣ်အမဲာ်ညါလီၤ.
25 စီၤယိၤသးဟ့ၣ်လီၤအကလုၢ်လၢတၢ်ကမၤပှဲၤအဒီပုၢ်ဝဲၢ်ခွါတဖၣ် အထၢၣ်လၢဘုဧိၤဟုဧိၤ, ဒီးဒၢနုာ်က့ၤပှၤတဂၤစုာ်စုာ်အစ့လၢအထၢၣ်ဒၣ်ဝဲအပူၤ, ဒီးဟ့ၣ်လီၤအဝဲသ့ၣ်တၢ်အီၣ်တၢ်အီ လၢကျဲအဂီၢ်န့ၣ်လီၤ. တၢ်အံၤဘၣ်တၢ်မၤအီၤန့ၣ်လီၤ.
26 ပှၤဒီပုၢ်ဝဲၢ်ခွါတဖၣ်ပဒၢးထီၣ်အကသ့ၣ်ယီၤတဖၣ်ဒီးဘုဧိၤဟု ဧိၤလၢအပှ့ၤဝဲဒီးအဝဲသ့ၣ်ဟးထီၣ်ဝဲဒၣ်လီၤ.
27 ဖဲတၢ်လီၢ်လၢအဝဲသ့ၣ်ကမံဝဲန့ၣ်, အဝဲသ့ၣ်အကျါတဂၤအိးထီၣ် အထၢၣ်လၢကဒုးအီၣ်အကသ့ၣ်ယီၤအဆၣ်ဒီး, ထံၣ်န့ၢ်အစ့ဒၣ်ဝဲလၢအထၢၣ်အခိၣ်ထိးန့ၣ်လီၤ.
28 အဝဲကိးထီၣ်အဒီပုၢ်ဝဲၢ်ခွါတဖၣ်ဒီးစံးဝဲ, “ယစ့ဘၣ်တၢ်ဟ့ၣ်ကဒါက့ၤယၤလံ. အိၣ်ဖဲအံၤလၢယထၢၣ်ပူၤ လီၤ.” အဝဲသ့ၣ်အသးလီၤဘှါဒီးလၢတၢ်ပျံၤတၢ်ဖုးအဝဲသ့ၣ်သံကွၢ်လိာ် အသးတဂၤဒီးတဂၤ, “ကစၢ်ယွၤမၤပှၤဒ်လဲၣ်.”
29 တုၤအဝဲသ့ၣ်က့ၤတုၤဆူအပၢ်စီၤယၤကိာ်အအိၣ်လၢကီၢ်ကနၤဧၣ် အပူၤန့ၣ်, အဝဲသ့ၣ်တဲဘၣ်အီၤလၢတၢ်လၢအမၤတ့ၢ်အသးဒီးအဝဲသ့ၣ်ခဲလၢာ် ဒီးစံးဝဲ,
30 “ကီၢ်အဲၤကူပတူးအပဒိၣ်ဖးဒိၣ်ကတိၤတၢ်ဆူၣ်ဆူၣ်ကိၤကိၤဒီး ပှၤ, ဒီးပာ်တၢ်ကမၣ်လၢပလိၤလၢပမ့ၢ်ပှၤကွၢ်ဟုၣ်ကွၢ်စုးတၢ်ထီဒါ အထံအကီၢ်န့ၣ်လီၤ.
31 ပစံးဆၢအီၤလၢပတမ့ၢ်ပှၤကွၢ်ဟုၣ်ကွၢ်စုးတၢ်တဖၣ်ဘၣ်. ပမ့ၢ်ပှၤအတီအလိၤတဖၣ်လီၤ.
32 ပမ့ၢ်ပှၤဒီပုၢ်ဝဲၢ်ခွါခဲလၢာ်တဆံခံဂၤ, ပၢ်တဂၤဃီအဖိခွါ တဖၣ်န့ၣ်လီၤ. ပဒီပုၢ်ဝဲၢ်ခွါတဂၤသံလံ. ဒီးပပုၢ်အဆံးကတၢၢ်အိၣ်ဒံးဒီး ပပၢ်လၢကီၢ်ကနၤဧၣ်အပူၤန့ၣ်လီၤ.
33 ပှၤတဂၤန့ၣ်စံးဆၢဝဲ, ‘သုမ့ၢ်ပှၤအတီအလိၤဧါန့ၣ်, ယကဃုထံၣ်အီၤလၢကျဲဒ်အံၤလီၤ. သုဝဲအကျါ, ပှၤကဘၣ်အိၣ်တ့ၢ်ဒီးယၤတဂၤ, ဒီးပှၤအဂၤတဖၣ်ကဟံးန့ၢ်ဘုဧိၤ ဟုဧိၤလၢသုဟံၣ်ဖိဃီဖိလၢအသၣ်ဝံၤလီၤဒိတဖၣ်အဂီၢ်ဒီးဟး ထီၣ်လီၤ.
34 ဟဲကိးသုပုၢ်အဆံးကတၢၢ်ဆူယအိၣ်တက့ၢ်. အန့ၣ်ဒီးယကသ့ၣ်ညါလၢသုတမ့ၢ်ပှၤကွၢ်ဟုၣ်ကွၢ်စုးတၢ်တဖၣ်ဘၣ်. မ့မ့ၢ်ပှၤအတီအလိၤတဖၣ်န့ၣ်လီၤ. ယကဟ့ၣ်ကဒါက့ၤသုဒီပုၢ်ဝဲၢ်ခွါလၢသုဒီးသုအိၣ်ဖဲအံၤဒီး ကူၣ်တၢ်ကၤတၢ်သ့န့ၣ်လီၤ.’
35 ဒီးတုၤအဝဲသ့ၣ်မၤအိၣ်ကလီအထၢၣ်တဖၣ်န့ၣ်, အဝဲသ့ၣ်ကိးဂၤဒဲးထံၣ်ဘၣ်အစ့ထၢၣ်, ဒီးဖဲအထံၣ်အစ့န့ၣ်အဝဲ သ့ၣ်ဒီးအပၢ်စီၤယၤကိာ်ပျံၤတၢ်ဖုးတၢ်န့ၣ်လီၤ.
36 အဝဲသ့ၣ်အပၢ်စံးဘၣ်အီၤ, “မ့ၢ်သုအဲၣ်ဒိးယဖိတဖၣ်လီၤမၢ်သဒၣ် ကွံာ်ယၤခဲလၢာ်န့ၣ်ဧါ. စီၤယိၤသးလီၤမၢ်ကွံာ်လံ. စီၤစူၤမ့းအိၣ်လီၤမၢ်ကွံာ်လံ. ဒီးခဲကနံၣ်အံၤသုသးအိၣ် လဲၤစိာ်ကွံာ်စီၤဘံၣ်ယၤမံၣ်န့ၣ်ဧါ. ယမ့ၢ်ပှၤတဂၤလၢအတူၢ်ဘၣ်တၢ်လီၤ.”
37 စီၤရူၤဘ့ၣ်စံးဘၣ်အပၢ်, “ယမ့ၢ်တဟဲက့ၤကိးကဒါက့ၤဘၣ်စီၤ ဘံၣ်ယၤမံၣ်ဆူနအိၣ်န့ၣ်, နမၤသံယဖိခွါခံဂၤသ့လီၤ. ပာ်အီၤလၢယစုပူၤဒီးယကဟဲက့ၤကိးကဒါက့ၤအီၤန့ၣ်လီၤ.”
38 ဘၣ်ဆၣ်စီၤယၤကိာ်စံးဝဲ, “ယဖိခွါလဲၤဃုာ်တၢ်ဒီးသုတသ့ ဘၣ်. အဒီပုၢ်ဝဲၢ်ခွါသံလံ. ဒီးအဝဲမ့ၢ်ပှၤထဲတဂၤဧိၤလၢအအိၣ် တီၢ်န့ၣ်လီၤ. လၢကျဲန့ၣ်, တၢ်တမံၤမံၤကမၤဘၣ်ဖုးအသးဒီးအီၤလီၤ. ယမ့ၢ်ပှၤသးပှၢ်တဂၤ, ဒီးတၢ်သူၣ်အုးသးအုးလၢသု ကဒုးအိၣ်ထီၣ်လၢယဂီၢ်န့ၣ်ကမၤသံယၤလီၤ.”