40
1 တၢ်ဆၢကတီၢ်တနီၤပူၤကွံာ်ဝံၤဒီးကီၢ်အဲၤကူပတူးအစီၤပၤအပှၤ ကွၢ်ထွဲစပံးထံတဂၤဒီးအပှၤကုၢ်ကိၣ်အဒိၣ်တဂၤမၤသးဒိၣ်ထီၣ် ဘၣ်စီၤပၤန့ၣ်လီၤ.
2-3 အဝဲသးထီၣ်ဘၣ်ပဒိၣ်ခံဂၤအံၤ, ဒီးဒၢနုာ်အီၤဆူဃိာ်ပူၤလၢပှၤပၢၤတၢ်အခိၣ်အဟံၣ်ပူၤ, တၢ်လီၢ်တပူၤဃီဖဲစီၤယိၤသးဘၣ်တၢ်ပာ်အီၤန့ၣ်လီၤ.
4 အဝဲသ့ၣ်အိၣ်လၢဃိာ်ပူၤအါနံၤအါသီဒီးပှၤပၢၤတၢ်အခိၣ်ပာ် လီၤစီၤယိၤသးဒ်အဝဲသ့ၣ်အခ့အပှၤလီၤ.
5 ဘၣ်မုၢ်တနၤလၢဃိာ်ပူၤန့ၣ်, ပှၤကွၢ်ထွဲစပံးထံဒီးပှၤကုၢ်ကိၣ် အဒိၣ်စုာ်စုာ်အိၣ်ဒီးအတၢ်မံမီၢ်တဂၤတမံၤ, ဒီးအတၢ်မံမီၢ်တဖၣ်န့ၣ်အိၣ်ဒီးအခီပညီလီၤဆီလိာ်အသးတဖၣ် လီၤ.
6 ဖဲစီၤယိၤသးဟဲဆူအဝဲသ့ၣ်အအိၣ်လၢဂီၤခီန့ၣ်အဝဲထံၣ်ဘၣ်ဝဲ ဒၣ်လၢအဝဲသ့ၣ်အိၣ်ဒီးတၢ်သးဘၣ်တံာ်တာ်န့ၣ်လီၤ.
7 အဝဲသံကွၢ်အဝဲသ့ၣ်, “တနံၤအံၤဘၣ်မနုၤလၢသုဖျါသူၣ်ကိၢ်သး ဂီၤဒိၣ်မးန့ၣ်လဲၣ်.”
8 အဝဲသ့ၣ်စံးဆၢဝဲ, “ပဝဲတဂၤစုာ်စုာ်ပအိၣ်ဒီးပတၢ်မံမီၢ် ဒီးဖဲအံၤပှၤလၢကဖးန့ၢ်ပှၤတၢ်မံမီၢ်တဖၣ်အံၤအခီပညီတအိၣ် နီတဂၤဘၣ်.”
စီၤယိၤသးစံးဘၣ်အဝဲသ့ၣ်, “ပှၤလၢအဟ့ၣ်တၢ်သ့တၢ်ဘၣ်လၢတၢ် ဖးတၢ်မံမီၢ်တဖၣ်အဂီၢ်န့ၣ်, မ့ၢ်ဒၣ်ကစၢ်ယွၤလီၤ. တဲယၤသုတၢ်မံမီၢ်တဖၣ်တက့ၢ်.”
9 လၢတၢ်န့ၣ်အဃိ, ပှၤကွၢ်ထွဲစပံးထံစံးဝဲ, “လၢယတၢ်မံမီၢ်အပူၤန့ၣ်, စပံးမုၢ်တမုၢ်အိၣ်ဝဲလၢယမဲာ်ညါ,
10 အိၣ်ဒီးအဒ့သၢဒ့လၢအလိၤလီၤ. တုၤအလၣ်တဖၣ်ဒိးထီၣ်တဘျီဃီ န့ၣ်, အဒ့အဖီဆှီးထီၣ်ဝဲဒီးစပံးသၣ်တဖၣ်အံၤမံထီၣ်ဝဲလီၤ.
11 ဒ်ယစိာ်စီၤပၤအလီခီအသိးန့ၣ်, ယဒဲးန့ၢ်စပံးသၣ်တဖၣ်ဒီးစံၢ် နုာ်အထံဆူလီခီပူၤဒီးဟ့ၣ်စီၤပၤလီၤ.”
12 စီၤယိၤသးစံးဝဲ, “အခီပညီမ့ၢ်တၢ်အံၤလီၤ. တၢ်အဒ့သၢဒ့န့ၣ်, မ့ၢ်မုၢ်နံၤသၢနံၤန့ၣ်လီၤ.
13 လၢသၢသီအတီၢ်ပူၤန့ၣ်, စီၤပၤကမၤထူၣ်ဖျဲးနၤ, ကပျၢ်နတၢ်ကမၣ်ဒီးပာ်က့ၤနၤလၢနလီၢ်န့ၣ်လီၤ. နကဟ့ၣ်အီၤအလီခီဒ်နမၤတ့ၢ်လၢညါအသိးဖဲနမ့ၢ်တ့ၢ်အပှၤကွၢ်ထွဲ စပံးထံန့ၣ်လီၤ.
14 ဘၣ်ဆၣ်ဝံသးစူၤသ့ၣ်နီၣ်ယၤဖဲတၢ်ကိးမံၤဒဲးဘၣ်လီၢ်ဘၣ်စးလၢ နဂီၢ်တက့ၢ်. ယဃ့ကညးနၤ, သးကညီၤယၤဒီးတဲဘၣ်စီၤပၤလၢယဂ့ၢ်ဒီးမၤစၢၤယၤဒ်သိး ယကထူၣ်ဖျဲးထီၣ်ကွံာ်လၢဃိာ်အံၤအပူၤန့ၣ်တက့ၢ်.
15 နီၢ်နီၢ်တခီန့ၣ်, ယဘၣ်တၢ်ဟုၣ်စိာ်ထီၣ်ယၤလၢပှၤဧ့ၤဘြံၤဖိတဖၣ် အကီၢ်ပူၤ, ဒီးဖဲအံၤ, လၢကီၢ်အဲၤကူပတူးအပူၤဒၣ်လဲာ်န့ၣ်, ယတမၤတၢ်နီတမံၤဒ်သိးကကြၢးဘၣ်တၢ်ဒၢနုာ်ဆူဃိာ်ပူၤဘၣ်.”
16 ဖဲပှၤကုၢ်ကိၣ်အဒိၣ်တဂၤ, ထံၣ်ဘၣ်ဝဲဒၣ်လၢတၢ်ဖးန့ၢ်ပှၤကွၢ် ထွဲစီၤပၤအစပံးထံအတၢ်မံမီၢ်အခီပညီဂ့ၤဝဲန့ၣ်စံးဘၣ်စီၤယိၤ သး, “ယအိၣ်ဒီးတၢ်မံမီၢ်တမံၤစ့ၢ်ကီးလီၤ. ယစိာ်ကိၣ်အနာ်သၢ ဖျၢၣ်လၢယခိၣ်လိၤလီၤ.
17 လၢနာ်အဖီခိၣ်ကတၢၢ်တဖျၢၣ်န့ၣ်ကိၣ်လၢစီၤပၤဘၣ်သူၣ်ဘၣ်သးအိၣ် ဝဲအကလုာ်ကလုာ်လၢစီၤပၤအဂီၢ်ဒီးထိၣ်တဖၣ်အီၣ်ကွံာ်အီၤန့ၣ် လီၤ.”
18 စီၤယိၤသးစံးဆၢဝဲ, “အခီပညီမ့ၢ်တၢ်အံၤလီၤ. နာ်သၢဖျၢၣ်အခီပညီမ့ၢ်မုၢ်နံၤသၢနံၤန့ၣ်လီၤ.
19 လၢသၢသီအတီၢ်ပူၤန့ၣ်, စီၤပၤကမၤထူၣ်ဖျဲးနၤဒီးကဒီၣ်တဲာ် ကွံာ်နခိၣ်လီၤ. ဒီးကဘျးလီၤစဲၤနနီၢ်ခိလၢထူၣ်တထူၣ်အလိၤဒီးထိၣ်တဖၣ်ကအီၣ် ကွံာ်နဖံးနညၣ်န့ၣ်လီၤ.”
20 သၢသီပူၤကွံာ်ဝံၤဖဲစီၤပၤအိၣ်ဖျဲၣ်ဆၢက့ၤအမုၢ်နံၤန့ၣ် စီၤပၤအိၣ်ဒီးအတၢ်အီၣ်အမူးဖးဒိၣ်တမူးလၢအပဒိၣ်ပပှၢ်ခဲလၢာ် အဂီၢ်လီၤ. အဝဲပျၢ်ဖျဲးကွံာ်ပှၤကွၢ်ထွဲစပံးထံဒီးပှၤကုၢ်ကိၣ်အဒိၣ်ဒီး ဟဲစိာ်အဝဲသ့ၣ်ဆူအပဒိၣ်ပပှၢ်တဖၣ်အမဲာ်ညါန့ၣ်လီၤ.
21 အဝဲပာ်က့ၤပှၤကွၢ်ထွဲစပံးထံလၢအလီၢ်လၢညါ,
22 မ့မ့ၢ်မၤသံကွံာ်ပှၤကုၢ်ကိၣ်အဒိၣ်န့ၣ်လီၤ. ဒီးတၢ်ခဲလၢာ်မၤအသးဒ်စီၤယိၤသးစံးတ့ၢ်ဝဲအသိးန့ၣ်လီၤ.
23 ဘၣ်ဆၣ်ပှၤကွၢ်ထွဲစပံးထံတဂၤတဆိကမိၣ်ထီၣ်လၢၤစီၤယိၤသးနီ တစဲးဘၣ်. သးပ့ၤနီၣ်ကွံာ်တၢ်ခဲလၢာ်ဘၣ်ဃးဒီးအီၤန့ၣ်လီၤ.