9
1 ဒီးယွၤစံးဘၣ်စီၤမိၤၡ့, “လဲၤဆူစီၤပၤအအိၣ်ဒီးတဲဘၣ် အီၤလၢယွၤ, ပှၤဧ့ၤဘြံၤဖိတဖၣ်အကစၢ်ယွၤစံးဝဲဒၣ်, ‘ပျၢ်ယပှၤဂီၢ်မုၢ်ဒ်သိးအဝဲသ့ၣ်ကလဲၤဘူၣ်ထီၣ်ဘါထီၣ်ယၤ အဂီၢ်တက့ၢ်.
2 နမ့ၢ်ဂ့ၢ်လိာ်ကဒီးလၢအဝဲသ့ၣ်ကဟးထီၣ်ဒီး,
3 ယကစံၣ်ညီၣ်နၤခီဖျိတၢ်ဆှၢလီၤတၢ်သံသတြိာ်နးမးလၢနဆၣ်ဖိကီၢ်ဖိလၢအအိၣ်လၢစံာ်ပူၤပှဲၤပူၤ, ကသ့ၣ်အလိၤ, ကသ့ၣ်ယီၤအလိၤ, ကီၤလၤအူးအလိၤ, ကျီၢ်အလိၤ, သိဒီးမဲာ်တဲးလဲးတဖၣ်အလိၤန့ၣ်လီၤ.
4 ဘၣ်ဆၣ်ဒီးယကပာ်လီၤဆီပှၤအံၣ်စရ့လးဖိတဖၣ်အဆၣ်ဖိကီၢ်ဖိဒီး ပှၤအဲၤကူပတူးဖိတဖၣ်အဆၣ်ဖိကီၢ်ဖိဒီးပှၤအံၣ်စရ့လးဖိတဖၣ် အဆၣ်ဖိကီၢ်ဖိတဘၣ်သံနီတဒုဘၣ်.
5 ယၤ, ယွၤအံၤ, ယပာ်လီၤတၢ်ဆၢကတီၢ်လၢခဲဂီၤကိာ်န့ၣ် ယကမၤတၢ်အံၤ န့ၣ်လီၤ.’ ”
6 လၢမုၢ်ဆ့ၣ်ထီၣ်တနံၤန့ၣ်ယွၤမၤဝဲဒ်အစံးတ့ၢ်ဝဲအသိး, ဒီးပှၤအဲၤကူပတူးဖိတဖၣ်အဆၣ်ဖိကီၢ်ဖိသံဝဲခဲလၢာ်န့ၣ်လီၤ. မ့မ့ၢ်ပှၤအံၣ်စရ့လးဖိအဆၣ်ဖိကီၢ်ဖိတသံဝဲနီတဒုဘၣ်.
7 စီၤပၤသံကွၢ်ဝဲဒၣ်လၢတၢ်မနုၤမၤတ့ၢ်အသးလဲၣ်. ဒီးဘၣ်တၢ်တဲဘၣ်အီၤလၢပှၤအံၣ်စရ့လးဖိတဖၣ်အဆၣ်ဖိကီၢ်ဖိ တသံနီတဒုဘၣ်အဂ့ၢ်လီၤ. ဘၣ်ဆၣ်အသးကိၤဝဲဒီးတပျၢ်ပှၤဂီၢ်မုၢ် ဘၣ်.
တၢ်ဝ့တၢ်ကျူၤ
8 တုၤနုၤတစုယွၤစံးဘၣ်စီၤမိၤၡ့ဒီးစီၤအၤဟရိၣ်, “ဟံးန့ၢ်ဖၣ်ကပူၤအဖၣ်ဆါလၢသုစုအစှီၤတနီၤ, ဒီးမ်စီၤမိၤၡ့ဖှံထီၣ်အီၤလၢကလံၤကျါလၢစီၤပၤအမဲာ်ညါတက့ၢ်.
9 ဒီးကရၤလီၤအသးဒ်တၢ်ကမူၣ်အသိးလၢကီၢ်အဲၤကူပတူးဒီကီၢ်ညါ အဖီခိၣ်, ဒီးကဒုးအိၣ်ထီၣ်တၢ်ဝ့တၢ်ကျူၤလၢအကဲထီၣ်တၢ်ပူၤလီၢ်လၢပှၤ ကညီဒီးဆၣ်ဖိကီၢ်ဖိတဖၣ်အလိၤန့ၣ်လီၤ.”
10 လၢတၢ်န့ၣ်အဃိအဝဲသ့ၣ်ဟံးန့ၢ်ဖၣ်ကပူၤအဖၣ်ဆါတနီၤဒီးဆၢထၢၣ် လၢစီၤပၤအမဲာ်ညါန့ၣ်လီၤ. စီၤမိၤၡ့ဖှံထီၣ်အီၤဆူကလံၤကျါဒီးဒုးအိၣ်ထီၣ်တၢ်ဝ့တၢ် ကျူၤလၢအကဲထီၣ်တၢ်ပူၤလီၢ်လၢပှၤဂီၢ်မုၢ်ဒီးဆၣ်ဖိကီၢ်ဖိတဖၣ်အလိၤန့ၣ်လီၤ.
11 ဒီးပှၤမၤကဒါပှၤမဲာ်တဖၣ်န့ၣ်ဟဲထီၣ်ဆူစီၤမိၤၡ့မဲာ်ညါတကဲဘၣ် လၢအဝဲသ့ၣ်ပှဲၤဒီးတၢ်ဝ့တၢ်ကျူၤဒ်ပှၤအဲၤကူပတူးဖိအဂၤတဖၣ်အသိးအဃိန့ၣ်လီၤ.
12 ဘၣ်ဆၣ်ဒီးယွၤမၤကိၤထီၣ်စီၤပၤအသး, ဒီးဒ်ယွၤစံးဝဲအသိး, စီၤပၤတဒိကနၣ်ဘၣ်စီၤမိၤၡ့ဒီးစီၤအၤဟရိၣ်ဘၣ်.
သူၣ်
13 တုၤနုၤတစုယွၤစံးဘၣ်စီၤမိၤၡ့, “ဂဲၤဆၢထၢၣ်ခဲဂီၤကိာ် ဂီၤဂီၤဒီးလဲၤထံၣ်လိာ်စီၤပၤဒီးတဲဘၣ်အီၤလၢယွၤ, ပှၤဧ့ၤဘြံၤ ဖိတဖၣ်အကစၢ်ယွၤစံးဝဲ, “ပျၢ်ယပှၤဂီၢ်မုၢ်ဒ်သိးအကလဲၤဘူၣ်ထီၣ်ဘါထီၣ်ယၤတက့ၢ်.
14 အအံၤတစုယတစံၣ်ညီၣ်ထဲနပဒိၣ်ပပှၢ်ဒီးနပှၤဂီၢ်မုၢ်န့ၣ်ဘၣ်. မ့မ့ၢ်ယကစံၣ်ညီၣ်စ့ၢ်ကီးနၤဒ်သိးနကသ့ၣ်ညါလၢပှၤဒ်သိးယၤ တအိၣ်ဘၣ်လၢဟီၣ်ခိၣ်ချၢနီတဂၤဘၣ်, န့ၣ်လီၤ.
15 ဒီးတုၤယကယူာ်ထီၣ်ယစုလၢယကတီၢ်နၤဒီးနပှၤဂီၢ်မုၢ်လၢတၢ်ဆူး တၢ်ဆါဒီး, သုကဘၣ်တၢ်မၤဟးဂီၤသုလၢာ်လၢာ်ဆ့ဆ့လၢဟီၣ်ခိၣ်ချၢလီၤ.
16 ဘၣ်ဆၣ်ယပာ်မူနၤဒ်သိးယကဒုးနဲၣ်နၤလၢယစိယကမီၤဒ်သိးယမံၤ ကဘၣ်တၢ်စံၣ်တဲၤတဲလီၤအီၤလၢဟီၣ်ခိၣ်ဒီဘ့ၣ်ညါန့ၣ်လီၤ.
17 အန့ၣ်ဒၣ်လဲာ်နပာ်ကဖၢလၢဒံးနသးဒီးဂ့ၢ်လိာ်လၢနကပျၢ်ယပှၤဂီၢ် မုၢ်ဟးထီၣ်န့ၣ်လီၤ.
18 ခဲဂီၤကိာ်လၢအကတီၢ်ဒ်အံၤန့ၣ်ယကဒုးစူၤလီၤသူၣ်နးနးကလဲာ် လၢကီၢ်အဲၤကူပတူးတသ့ၣ်ညါတ့ၢ်ဘၣ်လၢအတၢ်စံၣ်စိၤတဲစိၤအပူၤ နီတစုဘၣ်န့ၣ်လီၤ.
19 ခဲကနံၣ်အံၤဟ့ၣ်လီၤသုကလုၢ်ဒီးမၤလိာ်လၢသုဆၣ်ဖိကီၢ်ဖိ တဖၣ်လၢသုဘုၣ်အီၤဒီးကယဲၢ်တၢ်တမံၤလၢ်လၢ်လၢအအိၣ်လၢတၢ်ပျီ ပူၤခဲလၢာ်ကဘၣ်တၢ်ပာ်အီၤလၢတၢ်ဒုးခိၣ်ဖီလာ်လၢတၢ်ပူၤဖျဲး အလီၢ်တက့ၢ်. သူၣ်ကလီၤလၢပှၤဂီၢ်မုၢ်ဒီးဆၣ်ဖိကီၢ်ဖိအအိၣ်လီၤတဲာ်လၢတၢ် ချၢတဖၣ်အလိၤဒီးကသံဝဲခဲလၢာ်လီၤ.”
20 စီၤပၤအခ့အပဒိၣ်ပပှၢ်တနီၤပျံၤတၢ်လၢယွၤစံးဘၣ်တ့ၢ်ဝဲ တဖၣ်အဃိ, ဒီးမၢအကုၢ်အပှၤတဖၣ်ဒီးအဆၣ်ဖိကီၢ်ဖိတဖၣ်က့ၤနုာ် ဆူတၢ်ဒုးခိၣ်အဖီလာ်လၢတၢ်အိၣ်သဒၢအဂီၢ်န့ၣ်လီၤ.
21 မ့မ့ၢ်ပှၤလၢအတပာ်ကဲဘၣ်ယွၤအတၢ်စံးဘၣ်တ့ၢ်တဖၣ်န့ၣ်ပာ်တ့ၢ် အကုၢ်အပှၤဒီးအဆၣ်ဖိကီၢ်ဖိတဖၣ်လၢတၢ်ချၢန့ၣ်လီၤ.
22 တုၤနုၤတစုယွၤစံးဘၣ်စီၤမိၤၡ့, “ယူာ်ထီၣ်နစုဆူမူခိၣ် ဒီးသူၣ်ကလီၤလၢကီၢ်အဲၤကူပတူးဒီကီၢ်ညါအဖီခိၣ်, လၢပှၤဂီၢ်မုၢ်, ဆၣ်ဖိကီၢ်ဖိဒီးကယဲၢ်တၢ်မုၢ်တၢ်ဘိတဖၣ်လၢအအိၣ်လၢစံာ်ပျီ ပူၤအလိၤန့ၣ်လီၤ.”
23 လၢတၢ်န့ၣ်အဃိစီၤမိၤၡ့ယူာ်ထီၣ်အနီၣ်ထိးဘိဆူမူခိၣ်လီၤ. ဒီးယွၤမၢလီသီၣ်, ဒီးသူၣ်လီၤ, ဒီးလီဖျးလီၤတၢ်ဆူဟီၣ်ခိၣ်လိၤန့ၣ်လီၤ. ယွၤဆှၢလီၤ,
24 လီဝၢ်ဒံးကပြ့ၢ်ဆူအံၤဆူနုၤန့ၣ်လီၤ. ဒီးတၢ်န့ၣ်မ့ၢ်ကလံၤမုၢ်အဆူၣ်ကတၢၢ်လၢကီၢ်အဲၤကူပတူးသ့ၣ်ညါ ဘၣ်ဝဲလၢအတၢ်စံၣ်စိၤတဲစိၤအပူၤန့ၣ်လီၤ.
25 ဒီးသူၣ်န့ၣ်လီၤဘၣ်လၢကယဲၢ်ကီၢ်အဲၤကူပတူးဒီဘ့ၣ်ညါ, တၢ်လီၢ်ကိးပူၤဒဲးလၢအအိၣ်လၢခိဃုာ်ဒီးပှၤဂီၢ်မုၢ်ဒီးဆၣ် ဖိကီၢ်ဖိခဲလၢာ်အလိၤလီၤ. ဒီးသူၣ်လီၤဘၣ်လၢကယဲၢ်တၢ်မုၢ်တၢ်ဘိလၢစံာ်ပျီပူၤဒီးမၤကၢ် လီၤသ့ၣ်ခဲလၢာ်န့ၣ်လီၤ.
26 သူၣ်တလီၤဘၣ်ဒၣ်ထဲလၢကီၢ်ကိၡ့ၣ်ဖဲပှၤအံၣ်စရ့လးဖိတဖၣ်အိၣ် ဝဲဆိၣ်ဝဲအလီၢ်ဧိၤန့ၣ်လီၤ.
27 တုၤနုၤတစုစီၤပၤမၢပှၤကိးန့ၢ်အီၤစီၤမိၤၡ့ဒီးစီၤအၤ ဟရိၣ်ဒီးစံးဝဲဒၣ်, “တဘျီအံၤယမၤတ့ၢ်တၢ်ဒဲးဘးလံ. ယွၤအိၣ်လၢတၢ်အဘၣ်တခီ, မ့မ့ၢ်ယၤဒီးယပှၤဂီၢ်မုၢ်ပအိၣ်လၢတၢ်အကမၣ်တခီလီၤ.
28 ဒီးဃ့ကညးယွၤတက့ၢ်. အဂ့ၢ်ဒ်အံၤလီသီၣ်ဒီးသူၣ်လီၤန့ၣ်အါ လံလၢပဂီၢ်လံ. ဒီးယအၢၣ်လီၤလၢယကပျၢ်သုဒီးသုတအိၣ်တဆိးဘၣ် ဖဲအံၤလၢၤဘၣ်.”
29 ဒီးစီၤမိၤၡ့စံးဘၣ်အီၤ, “တဘျီဃီဖဲယဟးထီၣ်လၢဝ့ၢ်ပူၤ ဒီးယကယူာ်ထီၣ်ယစုဒီးဃ့ကညးယွၤလီၤ. လီသီၣ်ကဆိကတီၢ်ဝဲ, ဒီးသူၣ်တလီၤလၢၤဘၣ်ဝဲဘၣ်, တုၤနုၤတစုနကသ့ၣ်ညါလၢဟီၣ်ခိၣ်အံၤမ့ၢ်ယွၤအတၢ်လီၤ.
30 ဘၣ်ဆၣ်ဒီးယသ့ၣ်ညါလၢနၤဒီးနပဒိၣ်ပပှၢ်တဖၣ်တုၤခဲအံၤဒၣ်လဲာ် သုတပျံၤဒံးယွၤ, ကစၢ်ယွၤဘၣ်န့ၣ်လီၤ.”
31 ပအီမုၢ်ဒီးဘုမုယီၤအမုၢ်တဖၣ်ဟးဂီၤကွံာ်ဝဲခဲလၢာ်မ့ၢ်လၢ ဘုမုယီၤအစဲၤမံဝဲဒီးပအီမုၢ်ဖီထီၣ်သၣ်ထီၣ်ဝဲအဃိလီၤ.
32 မ့မ့ၢ်ဘုကၠူၣ်ဒီးဘုစမ့းတဖၣ်တဟးဂီၤဘၣ်. မ့ၢ်လၢမံဝဲစဲၤခံ အဃိန့ၣ်လီၤ.
33 တုၤနုၤတစုစီၤမိၤၡ့ဟးထီၣ်ကွံာ်လၢစီၤပၤအမဲာ်ညါဒီးလဲၤ ထီၣ်ဆူဝ့ၢ်ချၢန့ၣ်လီၤ. ဒီးယူာ်ထီၣ်အစုဆူယွၤအအိၣ်ဒီးဃ့ ကညးယွၤန့ၣ်လီၤ. လီသီၣ်, သူၣ်လီၤဒီးတၢ်စူၤလီၤဆိက တီၢ်ကွံာ်အသးခဲလၢာ်န့ၣ်လီၤ.
34 ဒီးတုၤစီၤပၤထံၣ်တၢ်မၤအသးအံၤဒီးအဝဲမၤကဒီးတၢ်ဒဲးဘးလီၤ. အဝဲဒီးအပဒိၣ်ပပှၢ်တဖၣ်အသးကိၤဒံးဝဲဒ်လၢညါအသိးန့ၣ်လီၤ.
35 ဒီးဒ်ယွၤစံးဆိပာ်တ့ၢ်လံခီဖျိစီၤမိၤၡ့အသိးစီၤပၤ တပျၢ်ဘၣ်ပှၤအံၣ်စရ့လးဖိဘၣ်.