10
1 တုၤနုၤတစုယွၤစံးဘၣ်စီၤမိၤၡ့, “လဲၤဆူစီၤပၤအအိၣ်တက့ၢ်. အဂ့ၢ်ဒ်အံၤ, ယမၤကိၤတ့ၢ်အဝဲဒီးအပဒိၣ်ပပှၢ်တဖၣ်အသးဒ်သိးယကမၤတၢ်လီၤလးတဖၣ်အံၤလၢအကျါ,
2 ဒီးဒ်သိးသုကတဲသုဖိသုလံၤတဖၣ်လၢယမၤပျုၢ်ပှၤအဲၤကူပတူး ဖိတဖၣ်ဒ်လဲၣ်, ဖဲယမၤတၢ်ပနီၣ်လီၤလးတဖၣ်အခါန့ၣ်လီၤ. ဒီးသုကသ့ၣ်ညါလၢယမ့ၢ်ယွၤန့ၣ်လီၤ.”
3 လၢတၢ်န့ၣ်အဃိစီၤမိၤၡ့ဒီးစီၤအၤဟရိၣ်လဲၤဆူစီၤပၤအအိၣ် ဒီးစံးဘၣ်အီၤ, “ယွၤ, ပှၤဧ့ၤဘြံၤဖိအကစၢ်ယွၤစံးဒ်အံၤ, ဒ်သိးနသုတဆီၣ်လီၤနသးလၢယဖီလာ်တဂ့ၤဒီးနကဂ့ၢ်လိာ်ဆံးယံာ် ဒံးလဲၣ်. ပျၢ်ယပှၤဂီၢ်မုၢ်ဒ်သိးကလဲၤဘူၣ်ထီၣ်ဘါထီၣ်ယၤတက့ၢ်.
4 နမ့ၢ်ဂ့ၢ်လိာ်ဒံးယၤဒီးခဲဂီၤကိာ်ယကဒုးဟဲထီၣ်ဒွဲၣ်ဧိၤ သကံၤဧိၤလၢနကီၢ်ပူၤလီၤ.
5 ဒီးကအိၣ်အါဝဲတုၤဒၣ်လဲာ်ကမၤပှဲၤဟီၣ်ခိၣ်လၢာ်လၢာ်ဆ့ဆ့န့ၣ် လီၤ. အဝဲသ့ၣ်ကအီၣ်ကွံာ်တၢ်အိၣ်လီၤတဲာ်လၢသူၣ်တဖၣ်တမၤဟးဂီၤဘၣ် ဝဲ, ဒီးသ့ၣ်လၢအအိၣ်လီၤတဲာ်တဖၣ်ဒၣ်လဲာ်န့ၣ်လီၤ.
6 ဒီးကပှဲၤလၢနနီပူၤ, လၢနခ့နပှၤတဖၣ်အဟံၣ်ဒီးကယဲၢ်နပှၤဂီၢ် မုၢ်အဟံၣ်တဖၣ်ခဲလၢာ်အပူၤန့ၣ်လီၤ. ဒီးကအၢဝဲနးန့ၢ်ဒံးနပၢ်လၢပျၢၤတဖၣ်ထံၣ်ဘၣ်တ့ၢ်ဝဲဒၣ်န့ၣ်လီၤ.” ဒီးစီၤမိၤၡ့ဃၣ်အသးဒီးဟးထီၣ်ကွံာ်လၢစီၤပၤအအိၣ်န့ၣ်လီၤ.
7 စီၤပၤအပဒိၣ်ပပှၢ်တဖၣ်စံးဘၣ်အီၤ, “ပှၤတဂၤအံၤကမၤတံာ်တာ်ပှၤ ဆံးယံာ်လဲၣ်. ပျၢ်ကွံာ်ပှၤအံၣ်စရ့လးဖိအပိာ်ခွါတဖၣ်ဒ်သိးအကလဲၤဘူၣ်ထီၣ် ဘါထီၣ်အယွၤ, အကစၢ်ယွၤန့ၣ်တက့ၢ်. မ့ၢ်နတသ့ၣ်ညါဘၣ်လၢကီၢ်အဲၤကူပတူးအံၤဟးဂီၤကွံာ်လံန့ၣ်ဘၣ်ဧါ.”
8 တုၤနုၤတစုပှၤဒုးဟဲက့ၤစီၤမိၤၡ့ဒီးစီၤအၤဟရိၣ်ဆူစီၤပၤအအိၣ်ဒီးစီၤပၤစံးဘၣ်အီၤ, “သုကလဲၤဘူၣ်ထီၣ်ဘါထီၣ်ဘၣ်ယွၤသုကစၢ်ယွၤလီၤ. ဘၣ်ဆၣ်မ့ၢ်မတၤတဖၣ်ကလဲၤလဲၣ်န့ၣ်မၤလီတံၢ်တက့ၢ်.”
9 စီၤမိၤၡ့စံးဆၢဝဲဒၣ်, “ပကလဲၤဒီးပဖိဒံဖိသၣ်, ပပှၤသူၣ်က့သးပှၢ်တဖၣ်, ပဖိခွါတဖၣ်ဒီးပဖိမုၣ်တဖၣ်, ပသိ, ပမဲာ်တဲးလဲးဒီးပဂီၤဘုၣ်ဂီၤဖံးတဖၣ်န့ၣ်လီၤ. အဂ့ၢ်ဒ်အံၤပကဘၣ်မၤမူးလၢတၢ်မၤလၤကပီၤယွၤအဂီၢ်န့ၣ်လီၤ.”
10 ဒီးစီၤပၤစံးဝဲဒၣ်, “ယဆိၣ်လီၤယသးလၢယွၤလၢယတပျဲသုလဲၤ ကိးပှၤပိာ်မုၣ်တဖၣ်ဒီးဖိဒံဖိသၣ်သ့ၣ်တဖၣ်န့ၣ်ဘၣ်. သုအိၣ်ဒီးတၢ်ကူၣ်လၢသုကပူထီၣ်တၢ်လီၤ.
11 တသ့ဘၣ်. တၢ်န့ၣ်မ့မ့ၢ်တၢ်လၢသုအဲၣ်ဒိးမၤအဃိဒီး, ထဲပှၤပိာ်ခွါတဖၣ်ဧိၤကဘၣ်လဲၤဘူၣ်ထီၣ်ဘါထီၣ်ယွၤန့ၣ်လီၤ.” ဒီးစီၤမိၤၡ့ဒီးစီၤအၤဟရိၣ်တဖၣ်ဘၣ်တၢ်ဟီထီၣ်ကွံာ်အီၤလၢ စီၤပၤအမဲာ်ညါန့ၣ်လီၤ.
12 တုၤနုၤတစု, ယွၤစံးဘၣ်စီၤမိၤၡ့, “ယူာ်ထီၣ်နစုလၢကီၢ် အဲၤကူပတူးအဖီခိၣ်ဒ်သိးဒွဲၣ်တဖၣ်ကဟဲလီၤအဂီၢ်န့ၣ်တက့ၢ်. အဝဲသ့ၣ်ကဟဲလီၤဒီးအီၣ်ကွံာ်ကယဲၢ်တၢ်လၢအမဲထီၣ်ခဲလၢာ်ဒီး ကယဲၢ်တၢ်လၢသူၣ်တမၤဟးဂီၤဒီးအိၣ်လီၤတဲာ်တ့ၢ်တဖၣ်န့ၣ်လီၤ.”
13 မၤသးဒ်န့ၣ်ဒီးစီၤမိၤၡ့ယူာ်ထီၣ်အနီၣ်ထိးဘိဒီးယွၤဒုးဟဲ ကလံၤလၢမုၢ်ထီၣ်လၢအအူတၢ်လၢကီၢ်န့ၣ်အဖီခိၣ်သ့တနံၤကျၢၤ ဒီးသီတနၤကျၢၤန့ၣ်လီၤ. တုၤမုၢ်ဆ့ၣ်ထီၣ်ဒီးကလံၤလၢမုၢ်ထီၣ်ဟဲစိာ်ဃုာ်ဒွဲၣ်ဧိၤသကံၤ ဧိၤန့ၣ်လီၤ.
14 အဝဲသ့ၣ်ဟဲဝဲအါဖုအါဂီၢ်ဒီးစီၢ်လီၤလၢကီၢ်အဲၤကူပတူးဒီ ဘ့ၣ်ညါန့ၣ်လီၤ. တၢ်န့ၣ်မ့ၢ်ဒွဲၣ်ဧိၤသကံၤဧိၤအဖုအဂီၢ်အဒိၣ်ကတၢၢ်လၢတၢ်တထံၣ် ဘၣ်တ့ၢ်အီၤနီတစုမ့ၢ်ဂ့ၤ, တဘၣ်တၢ်ထံၣ်ကဒီးအီၤနီတစုလၢၤမ့ၢ်ဂ့ၤဘၣ်န့ၣ်လီၤ.
15 အဝဲသ့ၣ်လုၣ်ဘၢကွံာ်ဟီၣ်ခိၣ်တုၤဒၣ်လဲာ်ဟီၣ်ခိၣ်ထီၣ်သူလၢအဃိ န့ၣ်လီၤ. အဝဲသ့ၣ်အီၣ်ကွံာ်ကယဲၢ်တၢ်အိၣ်လီၤတဲာ်တဖၣ်လၢသူၣ် တမၤဟးဂီၤအီၤ, ဃုာ်ဒီးသ့ၣ်သၣ်ခဲလၢာ်လၢသ့ၣ်တဖၣ်အလိၤန့ၣ်လီၤ. ဒီးတၢ်အဟ့အလါတအိၣ်တ့ၢ်ဘၣ်နီတမံၤလၢသ့ၣ်ဧိၤဝၣ်ဧိၤမ့ၢ်ဂ့ၤ, တၢ်မုၢ်တၢ်ဘိမ့ၢ်ဂ့ၤလၢကီၢ်အဲၤကူပတူးဒီကီၢ်ညါအပူၤဘၣ်.
16 ဒီးစီၤပၤကိးန့ၢ်စီၤမိၤၡ့ဒီးစီၤအၤဟရိၣ်ချ့ချ့ကလဲာ်ဒီးစံးဝဲဒၣ်, “ယမၤဒဲးဘးဘၣ်ယွၤ, သုကစၢ်ယွၤ, ဒီးသုဝဲသ့ၣ်လံ.
17 ဒီးခဲကနံၣ်အံၤပျၢ်လၢ်ယတၢ်ဒဲးဘးအအံၤတစုဒီးဃ့ကညးယွၤ, သုကစၢ်ယွၤဒ်သိးကဟံးထီၣ်ကွံာ်တၢ်စံၣ်ညီၣ်လၢအမၤသံတၢ်သ့ အံၤလၢယၤတက့ၢ်.”
18 စီၤမိၤၡ့ဟးထီၣ်ကွံာ်လၢစီၤပၤအမဲာ်ညါဒီးဃ့ကညးတၢ်ဆူ ယွၤအအိၣ်န့ၣ်လီၤ.
19 ဒီးယွၤလဲလိာ်ကွံာ်ကလံၤလၢမုၢ်ထီၣ်ဆူကလံၤအဆူၣ်လၢမုၢ်နုာ်, ဒီးစိာ်ကွံာ်ဒွဲၣ်ဧိၤသကံၤဧိၤတဖၣ်ဒီးအူကွံာ်အီၤတုၤအတုၤဆူ ပီၣ်လဲၣ်ဂီၤန့ၣ်လီၤ. ဒီးဒွဲၣ်ဧိၤသကံၤဧိၤတအိၣ်တ့ၢ်ဝဲနီ တဘ့ၣ်လၢကီၢ်အဲၤကူပတူးန့ၣ်ဘၣ်.
20 ဘၣ်ဆၣ်ယွၤမၤကိၤထီၣ်ကီၢ်အဲၤကူပတူးအစီၤပၤအသး, ဒီးတပျဲလဲၤဘၣ်ပှၤအံၣ်စးရ့လးဖိအတၢ်ဘၣ်.
တၢ်ခံးသူ
21 ဒီးယွၤစံးဘၣ်စီၤမိၤၡ့, “ယူာ်ထီၣ်နစုဆူမူခိၣ်ဒီးတၢ် ခံးသူကလီၤဘၣ်ကီၢ်အဲၤကူပတူး, တုၤဒၣ်လဲာ်ပှၤကကလၢာ်ဘၣ်အီၤကသ့ဝဲလီၤ.”
22 မၤသးဒ်န့ၣ်ဒီးစီၤမိၤၡ့ယူာ်ထီၣ်အစုဆူမူခိၣ်, ဒီးတၢ်ခံးသူလီၤလၢကီၢ်အဲၤကူပတူးဒီဘ့ၣ်ညါသၢသီန့ၣ် လီၤ.
23 ဒီးပှၤအဲၤကူပတူးဖိတဖၣ်ထံၣ်လိာ်အသးတဂၤဒီးတဂၤတသ့ဘၣ်. ဒီးအကတီၢ်ဖဲန့ၣ်ပှၤတဟးထီၣ်ဘၣ်လၢအဟံၣ်ပူၤနီတဂၤဘၣ်. မ့မ့ၢ်ပှၤအံၣ်စရ့လးဖိတဖၣ်အိၣ်ဒီးတၢ်ကပီၤလၢအအိၣ်ဝဲဆိး ဝဲအလီၢ်န့ၣ်လီၤ.
24 စီၤပၤကိးန့ၢ်စီၤမိၤၡ့ဒီးစံးဝဲဒၣ်, “လဲၤဘူၣ်ထီၣ်ဘါထီၣ်သု ယွၤတက့ၢ်. သုပှၤပိာ်မုၣ်ပိာ်မၢၤဒီးသုဖိဒံဖိသၣ်ဒၣ်လဲာ် မ်အကလဲၤဃုာ်ဒီးသုတက့ၢ်. ဘၣ်ဆၣ်သုသိ, သုမဲာ်တဲးလဲး, ဒီးသုဂီၤဘုၣ်ဂီၤဖံးတဖၣ်မ်အကအိၣ်လီၤတဲာ်ဖဲအံၤတက့ၢ်.”
25 စီၤမိၤၡ့စံးဆၢဝဲဒၣ်, “နကဘၣ်ဟ့ၣ်လီၤပှၤလၢဆၣ်ဖိကီၢ်ဖိ တဖၣ်လၢတၢ်လုၢ်တၢ်ပာ်ဒီးတၢ်လုၢ်မ့ၣ်အူအဂီၢ်, ဒ်သိးပကလုၢ်ထီၣ်အီၤဆူယွၤ, ပကစၢ်ယွၤအအိၣ်န့ၣ်လီၤ.
26 ပပာ်တ့ၢ်အီၤတသ့ဘၣ်. ပကဘၣ်လဲၤစိာ်ပဆၣ်ဖိကီၢ်ဖိတဖၣ်ဃုာ်ဒီး ပှၤလီၤ. တဘၣ်အိၣ်လီၤတဲာ်တ့ၢ်နီတဒုဘၣ်. ဆၣ်ဖိကီၢ်ဖိတဖၣ်လၢပကလုၢ်ထီၣ်ယွၤ, ပကစၢ်ယွၤအဂီၢ်န့ၣ်, ပကဘၣ်ဃုထၢအီၤလၢပကစၢ်ဒၣ်ပဝဲန့ၣ်လီၤ. ဒီးတချုးဒံးဘၣ်လၢပတုၤဃီၤဖဲန့ၣ်န့ၣ်, ပကဘၣ်လုၢ်ထီၣ်ပာ်ထီၣ် ဆၣ်ဖိကီၢ်ဖိမတၤဆူယွၤအအိၣ်န့ၣ်ပသ့ၣ်ညါတသ့ဒံးဘၣ်.”
27 ယွၤမၤကိၤထီၣ်စီၤပၤအသး, ဒီးတပျၢ်ဘၣ်အဝဲသ့ၣ်လၢကဟးထီၣ်ဘၣ်.
28 ဒီးစီၤပၤစံးဘၣ်စီၤမိၤၡ့, “ဟးထီၣ်ကွံာ်လၢယမဲာ်ညါတက့ၢ်. မ်ယသုတထံၣ်ကဒီးလၢၤနၤတဂ့ၤ. မုၢ်တနံၤလၢယထံၣ်နၤန့ၣ်, နကသံလီၤ.”
29 စီၤမိၤၡ့စံးဆၢအီၤ, “ဒ်နစံးတ့ၢ်နဲအသိးနတထံၣ်ဘၣ်ယၤနီတစုလၢၤဘၣ်.”