8
ဒ့ၣ်တဖၣ်
1 တုၤနုၤတစုယွၤစံးဘၣ်စီၤမိၤၡ့, ဒီးစံးဝဲဒၣ်, “လဲၤဆူစီၤပၤအအိၣ်ဒီးတဲဘၣ်အီၤလၢယွၤစံးဝဲဒၣ်, ပျၢ်ယပှၤဂီၢ်မုၢ်, ဒ်သိးအဝဲသ့ၣ်လဲၤဘူၣ်ထီၣ်ဘါထီၣ်ယၤကသ့အဂီၢ်န့ၣ်တက့ၢ်.
2 နမ့ၢ်ဂ့ၢ်လိာ်ဒီးယကစံၣ်ညီၣ်နထံနကီၢ်ခီဖျိတၢ်မၤပှဲၤအီၤဒီး ဒ့ၣ်ဧိၤကွီၣ်ဧိၤလီၤ.
3 ထံကျိနံၤလါကပှဲၤဒီးဒ့ၣ်ဧိၤကွီၣ်ဧိၤတုၤဒၣ်လဲာ်ကလဲၤဆူ နနူၢ်ပူၤစီၤပူၤ, နလီၢ်မံဒၢးပူၤ, နလီၢ်မံခးအလိၤ, နပဒိၣ် ပပှၢ်ဒီးနပှၤဂီၢ်မုၢ်အဟံၣ်ပူၤဒီးတုၤဒၣ်လဲာ်လၢနဖၣ်ကပူၤ, ဒီးနစံၢ်ကိၣ်အသပၢၤပူၤန့ၣ်လီၤ.
4 အဝဲသ့ၣ်ကစံၣ်ထီၣ်လၢနလိၤ, နပှၤဂီၢ်မုၢ်ဒီးနပဒိၣ်ပပှၢ်တဖၣ်အ လိၤန့ၣ်လီၤ.”
5 ဒီးယွၤစံးဘၣ်စီၤမိၤၡ့, “တဲဘၣ်စီၤအၤဟရိၣ်လၢကယူာ်ထီၣ် အနီၣ်ထိးဘိလၢထံကျိတဖၣ်အဖီခိၣ်, ထံကျိၤတဖၣ်အဖီခိၣ်, ဒီးကမါတဖၣ်အဖီခိၣ်, ဒီးဒုးဟဲထီၣ်ဒ့ၣ်ဧိၤကွီၣ်ဧိၤဒီးမၤပှဲၤကီၢ်အဲၤကူပတူးန့ၣ်တက့ၢ်.”
6 လၢတၢ်န့ၣ်အဃိစီၤအၤဟရိၣ်ယူာ်ထီၣ်အနီၣ်ထိးဘိလၢထံတဖၣ်အဖီခိၣ်, ဒီးဒ့ၣ်တဖၣ်ဟဲထီၣ်ဝဲဒီးမၤပှဲၤကီၢ်အဲၤကူပတူး န့ၣ်လီၤ.
7 ဘၣ်ဆၣ်ပှၤမၤကဒါပမဲာ်တဖၣ်ဒုးဟဲထီၣ်စ့ၢ်ကီးဒ့ၣ်ဧိၤကွီၣ်ဧိၤ တဖၣ်လၢကီၢ်အဲၤကူပတူးအပူၤန့ၣ်လီၤ.
8 စီၤပၤမၢပှၤကိးန့ၢ်အီၤစီၤမိၤၡ့ဒီးစီၤအၤဟရိၣ်ဒီးစံးဝဲဒၣ်, “ဃ့ကညးယွၤလၢအကဒုးဟးထီၣ်ကွံာ်ဒ့ၣ်ဧိၤကွီၣ်ဧိၤလၢယ အိၣ်, ဒီးလၢယပှၤဂီၢ်မုၢ်အအိၣ်တက့ၢ်. ဒီးယကပျၢ်သုပှၤဂီၢ်မုၢ်ဒ်သိး အဝဲသ့ၣ်လဲၤလုၢ်တၢ်ပာ်တၢ်ဆူယွၤအအိၣ်ကသ့ဝဲန့ၣ်လီၤ.”
9 စီၤမိၤၡ့စံးဆၢဝဲ, “ထဲပာ်လီၤန့ၢ်ယၤတၢ်ဆၢကတီၢ်လၢယက ဃ့ကညးတၢ်လၢနဂီၢ်, နပဒိၣ်ပပှၢ်အဂီၢ်, ဒီးနပှၤဂီၢ်မုၢ်အဂီၢ်တက့ၢ်. တုၤနုၤတစုဒ့ၣ်ဧိၤကွီၢ်ဧိၤတဖၣ်ကဟးထီၣ်ကွံာ်လၢသုအိၣ်, ဒီးမ့တမ့ၢ်ဘၣ်လၢထံကျိနံၤလါအပူၤန့ၣ်, လၢတၢ်လီၢ်အဂၤတအိၣ်လီၤတဲာ်ဘၣ်နီတမံၤဘၣ်.”
10 ဒီးစီၤပၤစံးဆၢဝဲဒၣ်, “ဃ့ကညးတၢ်လၢယဂီၢ်ခဲဂီၤကိာ်တက့ၢ်.” ဒီးစီၤမိၤၡ့စံးဝဲဒၣ်, “ယကမၤဒ်နမၢယၤအသိးဒီးနကသ့ၣ်ညါလၢကစၢ်အဂုၤအဂၤတအိၣ်ဘၣ်ဒ်ပယွၤ, ပကစၢ်ယွၤအသိးဘၣ်န့ၣ်လီၤ.
11 ဒီးဒ့ၣ်ဧိၤကွီၣ်ဧိၤတဖၣ်ကဟးထီၣ်ကွံာ်လၢနအိၣ်, ဒီးလၢနပဒိၣ်ပပှၢ်ဒီးလၢနပှၤဂီၢ်မုၢ်အအိၣ်, ဒီးကအိၣ်လီၤတဲာ်ဒၣ်ထဲလၢထံကျိနံၤလါအပူၤန့ၣ်လီၤ.”
12 ဒီးစီၤမိၤၡ့ဒီးစီၤအၤဟရိၣ်ဟးထီၣ်ကွံာ်လၢစီၤပၤအအိၣ်, ဒီးစီၤမိၤၡ့ဃ့ကညးယွၤလၢကဒုးဟးထီၣ်ကွံာ်ဒ့ၣ်ဧိၤကွီၣ် ဧိၤတဖၣ်လၢစီၤပၤအအိၣ်န့ၣ်လီၤ.
13 ဒီးယွၤမၤဝဲဒ်စီၤမိၤၡ့ဃ့ဝဲအသိးဒီးဒ့ၣ်ဧိၤကွီၣ်ဧိၤ တဖၣ်သံကွံာ်ဝဲဒၣ်လၢဟံၣ်တဖၣ်အပူၤ, လၢတၢ်အဂၤတဖၣ်အပူၤဒီးလၢစံာ်ခိၣ်ပျီပူၤန့ၣ်လီၤ.
14 ဒီးပှၤအဲၤကူပတူးဖိတဖၣ်ပာ်ဖှိၣ်ဝဲဒၣ်တပူၣ်တပူၣ်တုၤကီၢ်ဒီဘ့ၣ်နၢအုၣ်ဝဲလၢအဃိန့ၣ်လီၤ.
15 ဖဲစီၤပၤထံၣ်ဝဲဒၣ်လၢဒ့ၣ်တဖၣ်သံဝဲန့ၣ်, အသးကိၤထီၣ်ကဒီးဝဲ ဒ်ယွၤစံးတ့ၢ်ဝဲအသိး, ဒီးစီၤပၤတဒိကနၣ်စီၤမိၤၡ့ဒီးစီၤအၤဟရိၣ်ဘၣ်န့ၣ်လီၤ.
ဃးသူဃးလါတဖၣ်
16 ဒီးယွၤစံးဘၣ်စီၤမိၤၡ့, “တဲဘၣ်စီၤအၤဟရိၣ်လၢကတီၢ်ဟီၣ် ခိၣ်လၢအနီၣ်ထိးဘိဒ်သိးဟီၣ်ခိၣ်ကမူၣ်ကကဲထီၣ်ဃးသူဃးလါလၢ ကီၢ်အဲၤကူပတူးဒီဘ့ၣ်ညါအပူၤန့ၣ်တက့ၢ်.”
17 ဒီးစီၤအၤဟရိၣ်တီၢ်ဟီၣ်ခိၣ်လၢအနီၣ်ထိးဘိဒီးကယဲၢ်ဟီၣ်ခိၣ် ကမူၣ်လၢကီၢ်အဲၤကူပတူးဒီဘ့ၣ်ညါအပူၤကဲထီၣ်ဃးသူဃးလါ တဖၣ်ဒီးအိၣ်ဝဲဒၣ်လၢပှၤဂီၢ်မုၢ်ဒီးဆၣ်ဖိကီၢ်ဖိတဖၣ်အလိၤလီၤ.
18 ပှၤမၤကဒါပှၤမဲာ်တဖၣ်ကျဲးစၢးဒုးအိၣ်ထီၣ်ဃးသူဃးလါတဖၣ်ဘၣ် ဆၣ်ဒီးတကဲထီၣ်ဝဲဒၣ်ဘၣ်. ဒီးဃးသူဃးလါတဖၣ်အိၣ်ဝဲဒၣ်လၢတၢ်လီၢ်ကိးပူၤဒဲး,
19 ဒီးပှၤမၤကဒါပှၤမဲာ်တဖၣ်စံးဘၣ်စီၤပၤ, “တၢ်အံၤမ့ၢ်ကစၢ်ယွၤအတၢ်မၤလီၤ.” ဘၣ်ဆၣ်ဒီးစီၤပၤအသးကိၤဝဲဒ်သိးဒၣ်ယွၤစံးဝဲလၢစီၤပၤ တမ့ၢ်ကဒိကနၣ်စီၤမိၤၡ့ဒီးစီၤအၤဟရိၣ်ဘၣ်န့ၣ်လီၤ.
သၣ်ဘုလါတဖၣ်
20 ဒီးယွၤစံးဘၣ်စီၤမိၤၡ့, “ခဲဂီၤကိာ်ဂီၤဂီၤန့ၣ်လဲၤထံၣ် လိာ်စီၤပၤဖဲအလဲၤဆူထံနံၤဒီးတဲဘၣ်အီၤလၢယွၤစံးဝဲဒ်အံၤ, “ပျၢ်ယပှၤဂီၢ်မုၢ်ဒ်သိးအဝဲသ့ၣ်ကဘူၣ်ထီၣ်ဘါထီၣ်ယၤအဂီၢ်န့ၣ်တက့ၢ်.
21 ယဟ့ၣ်ပလီၢ်နၤလၢနမ့ၢ်တပျၢ်ဘၣ်ယပှၤဂီၢ်မုၢ်ဒီး, ယကမၢသၣ်ဘုလါတဖၣ်ဟဲလီၤလၢနလိၤ, ဒီးနပဒိၣ်ပပှၢ်တဖၣ်ဒီးနပှၤဂီၢ်မုၢ်အလိၤဒီးလၢနဟံၣ်တဖၣ်အပူၤလီၤ. ဒီးပှၤအဲၤကူပတူးဖိအဟံၣ်ပူၤကပှဲၤဒီးသၣ်ဘုလါတဖၣ်ဒီးဟီၣ် ခိၣ်ကပှဲၤစ့ၢ်ကီးဒီးသၣ်ဘုလါလီၤ.
22 ဘၣ်ဆၣ်ယကပျဲပူၤကီၢ်ကိၡ့ၣ်ဖဲယပှၤဂီၢ်မုၢ်တဖၣ်အိၣ်ဝဲဆိးဝဲဒ် သိးသၣ်ဘုလါသုတအိၣ်ဖဲန့ၣ်နီတဘ့ၣ်တဂ့ၤန့ၣ်လီၤ. ယကမၤတၢ်အံၤဒ်သိးနကသ့ၣ်ညါလၢ, ယၤ, ယွၤအံၤယမ့ၢ်ပှၤလၢအမၤတၢ်အံၤလၢကီၢ်အံၤအပူၤလီၤ.
23 ဒီးယကမၤလီၤဆီယပှၤဂီၢ်မုၢ်ဒီးနပှၤဂီၢ်မုၢ်လီၤ. တၢ်လီၤလးအံၤကမၤအသးခဲဂီၤကိာ်န့ၣ်လီၤ.”
24 ဒီးယွၤဆှၢလီၤသၣ်ဘုလါဂီၢ်မုၢ်ဆူစီၤပၤအနီပူၤ, ဒီးအပဒိၣ်ပပှၢ်အဟံၣ်ပူၤန့ၣ်လီၤ. ဒီးကီၢ်အဲၤကူပတူးဒီဘ့ၣ် ညါဟးဂီၤဝဲလၢသၣ်ဘုလါတဖၣ်အံၤအဃိလီၤ.
25 ဒီးစီၤပၤမၢပှၤကိးန့ၢ်အီၤစီၤမိၤၡ့ဒီးစီၤအၤဟရိၣ်ဒီး စံးဝဲဒၣ်, “လဲၤဒီးလုၢ်တၢ်ပာ်တၢ်ဆူသုကစၢ်ယွၤ, ဖဲအံၤလၢကီၢ်အံၤအပူၤတက့ၢ်.”
26 စီၤမိၤၡ့စံးဆၢဝဲဒၣ်, “ပမၤဒ်သိးန့ၣ်တဘၣ်ဝဲဘၣ်. အဂ့ၢ်ဒ်အံၤ, ပှၤအဲၤကူပတူးဖိတဖၣ်ကထီဒါပှၤလၢဆၣ်ဖိကီၢ်ဖိ တဖၣ်လၢပလုၢ်ထီၣ်ပာ်ထီၣ်အီၤဆူယွၤ, ပကစၢ်ယွၤအအိၣ်အ ဃိန့ၣ်လီၤ. ပမ့ၢ်သူဆၣ်ဖိကီၢ်ဖိတဖၣ်အံၤလၢအထီဒါပှၤအဲၤကူပတူး ဖိတဖၣ်ဒီးလုၢ်ထီၣ်ပာ်ထီၣ်အီၤဖဲအဝဲသ့ၣ်ထံၣ်ဝဲအလီၢ်န့ၣ် အဝဲသ့ၣ်ကကွံာ်သံပှၤလၢလၢၢ်လီၤ.
27 ပကဘၣ်လဲၤတၢ်သၢနံၤကျဲဆူပှၢ်မုၢ်ကနၢအပူၤဒီးလုၢ်တၢ်ပာ်တၢ် ဆူယွၤ, ပကစၢ်ယွၤအအိၣ်ဒ်အဝဲမၤလိာ်တ့ၢ်ပှၤအသိးန့ၣ်လီၤ.”
28 စီၤပၤစံးဝဲဒၣ်, “ယကပျၢ်သုဒ်သိးသုကလဲၤလုၢ်တၢ်ပာ်တၢ်ဆူ ယွၤသုကစၢ်ယွၤအအိၣ်လၢပှၢ်မုၢ်ကနၢဘၣ်ဆၣ်သုတဘၣ်လဲၤယံၤယံၤ ကလဲာ်ဘၣ်. ဒီးဃ့ဘါထုကဖၣ်တၢ်လၢယဂီၢ်တက့ၢ်.”
29 စီၤမိၤၡ့စံးဆၢဝဲဒၣ်, “တုၤယဟးထီၣ်လၢနအိၣ်တဘျီဃီန့ၣ်ယကဃ့ ကညးယွၤဒ်သိးသၣ်ဘုလါတဖၣ်ကဟးထီၣ်ကွံာ်လၢနလိၤ, ဒီးလၢနပဒိၣ်ပပှၢ်တဖၣ်ဒီးလၢနပှၤဂီၢ်မုၢ်အလိၤန့ၣ်လီၤ. ဘၣ်ဆၣ်ဒီးနတဘၣ်လီန့ၢ်ကဒီးပှၤဒီးတြီပှၤဂီၢ်မုၢ်လၢကလဲၤလုၢ် တၢ်ပာ်တၢ်ဆူယွၤအအိၣ်န့ၣ်ဘၣ်.”
30 ဒီးစီၤမိၤၡ့ဟးထီၣ်ကွံာ်လၢစီၤပၤအအိၣ်ဒီးဃ့ကညးတၢ်ဆူ ယွၤအအိၣ်လီၤ.
31 ဒီးယွၤမၤဝဲဒ်စီၤမိၤၡ့ဃ့ဝဲအသိးလီၤ. သၣ်ဘုလါတဖၣ်ဟးထီၣ်ကွံာ်လၢစီၤပၤအလိၤ, အပဒိၣ်ပပှၢ်တဖၣ်ဒီးအပှၤဂီၢ်မုၢ်အလိၤ, ဒီးတအိၣ်လီၤတဲာ်ဘၣ်နီတဘ့ၣ်ဘၣ်.
32 ဘၣ်ဆၣ်တုၤလၢအအံၤတစုဒၣ်လဲာ်စီၤပၤမၤကိၤအသးဒီးတပျၢ်ဘၣ် ပှၤဂီၢ်မုၢ်ဘၣ်.