6
1 ဒီးယွၤစံးဘၣ်စီၤမိၤၡ့, “ခဲကနံၣ်အံၤနကထံၣ်ဘၣ်တၢ်လၢ ယကမၤကီၢ်အဲၤကူပတူးအစီၤပၤဒ်လဲၣ်န့ၣ်လီၤ. အဂ့ၢ်ဒ်အံၤ, ယကမၢဆူၣ်အီၤဒ်သိးကပျၢ်ယပှၤဂီၢ်မုၢ်လီၤ. ယကမၢဆူၣ်အီၤဒ်သိးကဟီထီၣ်ကွံာ်အဝဲသ့ၣ်လၢ အကီၢ်ပူၤသပှၢ်ကတၢၢ်န့ၣ်လီၤ.”
2 ဒီးကစၢ်ယွၤကတိၤတၢ်ဒီးစီၤမိၤၡ့ဒီးစံးဘၣ်အီၤ, “ယဲဒၣ်အံၤယမ့ၢ်ယွၤလီၤ.
3 ယလီၣ်ဖျါထီၣ်တ့ၢ်ယသးဆူစီၤအၤဘြၤဟၣ်, စီၤအံၤစဲးဒီး စီၤယၤကိာ်ဒ်သ့တၢ်လၢာ်ကစၢ်ယွၤအသိးန့ၣ်လီၤ. ဘၣ်ဆၣ်ဒီးယတဒုးသ့ၣ်ညါယသးလၢအဝဲသ့ၣ်ခီဖျိယမံၤစီဆှံ, ယွၤန့ၣ်ဘၣ်.
4 ဒီးယမၤစ့ၢ်ကီးတၢ်အၢၣ်လီၤအီလီၤဒီးအဝဲသ့ၣ်, ဒီးယအၢၣ်လီၤလၢယကဟ့ၣ်အဝဲသ့ၣ်လၢကီၢ်ကနၤဧၣ်, ကီၢ်လၢအဝဲသ့ၣ်အိၣ်ဆိးဝဲဒ်ပှၤတခီဘီမုၢ်ဖိတဖၣ်အသိးန့ၣ်လီၤ.
5 ဒီးခဲကနံၣ်အံၤယနၢ်ဟူပှၤအံၣ်စရ့လးဖိတဖၣ်အတၢ်ကအုကစွါ, ပှၤလၢပှၤအဲၤကူပတူးဖိမၢကဲကုၢ်အီၤ, ဒီးယသ့ၣ်နီၣ်ထီၣ်က့ၤ လံယတၢ်အၢၣ်လီၤအီလီၤန့ၣ်လံ.
6 လၢတၢ်န့ၣ်အဃိတဲဘၣ်ပှၤအံၣ်စရ့လးဖိတဖၣ်လၢယစံးဘၣ်အဝဲသ့ၣ်, ‘ယမ့ၢ်ယွၤလီၤ. ယကဒုးဟးထီၣ်ကွံာ်သုဒီးမၤထူၣ်ဖျဲးသုလၢပှၤ အဲၤကူပတူးဖိတဖၣ်အတၢ်မၢကဲကုၢ်သုန့ၣ်လီၤ. ယကယူာ်ထီၣ်ယစုဒုၣ်ဆူၣ်ဒီးဒုးလီၤဘၣ်တၢ်စံၣ်ညီၣ်လီၤ ပျံၤလီၤဖုးလၢအဝဲသ့ၣ်အလိၤဒီးယကအုၣ်က့ၤခီၣ်က့ၤသုလီၤ.
7 ဒီးယကဒုးကဲထီၣ်သုလၢယပှၤဂီၢ်မုၢ်, ဒီးယကကဲထီၣ်သုကစၢ်ယွၤလီၤ. ဒီးသုကသ့ၣ်ညါလၢယမ့ၢ်ယွၤ, သုကစၢ်ယွၤဖဲယမၤထူၣ်ဖျဲးသုလၢကီၢ်အဲၤကူပတူး အတၢ်မၢကဲကုၢ်အပူၤန့ၣ်လီၤ.
8 ဒီးယကဒုးလဲၤနုာ်သုဆူကီၢ်တဘ့ၣ်လၢယအၢၣ်အီလီၤလၢ ယကဟ့ၣ်စီၤအၤဘြၤဟၣ်, စီၤအံၤစဲးဒီးစီၤယၤကိာ်, ဒီးယကဟ့ၣ်လီၤသုဒ်သုတၢ်န့ၢ်သါအသိးန့ၣ်လီၤ. ယဲဒၣ်အံၤယမ့ၢ်ယွၤလီၤ.’ ”
9 ဒီးစီၤမိၤၡ့တဲဘၣ်တၢ်အံၤဆူပှၤအံၣ်စရ့လးဖိတဖၣ်လီၤ. ဘၣ်ဆၣ်ဒီးအဝဲသ့ၣ်တဒိကနၣ်ဘၣ်ဝဲဘၣ်. အဂ့ၢ်ဒ်အံၤ, အဝဲသ့ၣ်အသးဟးဂီၤလၢတၢ်မၢကဲကုၢ်အီၤအၢအၢသီသီ အဃိန့ၣ်လီၤ.
10 ဒီးယွၤကတိၤတၢ်ဒီးစီၤမိၤၡ့ဒီးစံးဝဲဒၣ်
11 “လဲၤဒီးတဲဘၣ်ကီၢ်အဲၤကူပတူးအစီၤပၤလၢအကဘၣ်ပျဲ ပှၤအံၣ်စရ့လးဖိတဖၣ်ဟးထီၣ်လၢအကီၢ်န့ၣ်တက့ၢ်.”
12 ဒီးစီၤမိၤၡ့စံးဆၢဝဲဒၣ်, “ပှၤအံၣ်စရ့လးဖိတဖၣ်ဒၣ်လဲာ် တဒိကနၣ်ယကလုၢ်ဘၣ်. ဒီးကီၢ်အဲၤကူပတူးအစီၤပၤကကနၣ် ယကလုၢ်ဒ်လဲၣ်. အဂ့ၢ်ဒ်အံၤယမ့ၢ်ပှၤလၢအကတိၤတၢ်တသ့ ဘၣ်တဂၤအဃိန့ၣ်လီၤ.”
13 ဒီးယွၤမၤလိာ်စီၤမိၤၡ့ဒီးစီၤအၤဟရိၣ်ဒီးစံးဝဲဒၣ်, “တဲဘၣ်ပှၤအံၣ်စရ့လးဖိတဖၣ်ဒီးကီၢ်အဲၤကူပတူးအစီၤပၤလၢ ယမၤလိာ်သုလၢသုကဒုးဟးထီၣ်ကွံာ်ပှၤအံၣ်စရ့လးဖိ လၢကီၢ်အဲၤကူပတူးအပူၤန့ၣ်တက့ၢ်.”
14 ဒီးစီၤရူၤဘ့ၣ်လၢအမ့ၢ်စီၤယၤကိာ်အဖိဝဲၢ်ကိအိၣ်ဒီးအဖိခွါ လွံၢ်ဂၤလၢအမ့ၢ်စီၤဃနိာ်, စီၤပးလူး, စီၤဃ့စရိၣ်ဒီးစီၤကၢ်မံၤန့ၣ်လီၤ. အဝဲသ့ၣ်တဖၣ်န့ၣ်မ့ၢ်ရူၤဘ့ၣ်အဒူၣ်အထၢတဖၣ်အပၢ်လၢပျၢၤတဖၣ် န့ၣ်လီၤ.
15 ဒီးစီၤစူၤမ့းအိၣ်ဒီးအဖိခွါဃုဂၤလၢအမ့ၢ်စီၤယမူးအ့လး, စီၤယးမံၣ်, စီၤအိၣ်ဟး, စီၤယၤကံၣ်, စီၤစိဃၢ်ဒီးပှၤကနၤဧၣ် မုၣ်တဂၤအဖိခွါစီၤၡီအူးလီၤ. အဝဲသ့ၣ်တဖၣ်န့ၣ်မ့ၢ်ဒူၣ်ထၢတဖၣ်လၢအဟံးန့ၢ်အဝဲသ့ၣ်အမံၤ, ဒ်အပၢ်လၢပျၢၤတဖၣ်အသိးန့ၣ်လီၤ.
16 ဒီးစီၤလ့ၤဝံအိၣ်ဒီးအဖိခွါသၢဂၤလၢအမ့ၢ်စီၤက့ရၡိၣ်, စီၤကဃး, ဒီးစီၤမရၤရံၤလီၤ. အဝဲသ့ၣ်တဖၣ်န့ၣ်မ့ၢ်ဒူၣ်ထၢတဖၣ်လၢအဟံးန့ၢ်အဝဲသ့ၣ်အမံၤ, ဒ်အပၢ်လၢပျၢၤတဖၣ်အသိးန့ၣ်လီၤ. ဒီးစီၤလ့ၤဝံအိၣ်မူဝဲဒၣ်တကယၤသၢဆံနွံနံၣ်န့ၣ်လီၤ.
17 ဒီးစီၤက့ရၡိၣ်အိၣ်ဒီးအဖိခွါခံဂၤလၢအမ့ၢ်, စီၤလံးဘနံၤဒီးစီၤၡံမံၤ, ဒီးအဝဲသ့ၣ်အိၣ်ဒီးအစၢၤအသွဲၣ်အါမးလီၤ.
18 ဒီးစီၤကဃးအိၣ်ဒီးအဖိခွါလွံၢ်ဂၤလၢအမ့ၢ်စီၤဧၤမရၣ်, စီၤယံးစဟၢ်, စီၤဃ့ဘြိၢ်ဒီးစီၤဧူးစံၤအ့လးလီၤ. ဒီးစီၤကဃးအိၣ်မူဝဲဒၣ်တကယၤသၢဆံသၢနံၣ်လီၤ.
19 ဒီးစီၤမရၤရံၤအိၣ်ဒီးအဖိခွါခံဂၤလၢအမ့ၢ်စီၤမးဃလံဒီး စီၤမူၡံၤလီၤ. ပှၤတဖၣ်အံၤမ့ၢ်လ့ၤဝံအဒူၣ်အထၢဒီးအစၢၤအသွဲၣ်တဖၣ်န့ၣ်လီၤ.
20 ဒီးစီၤဧၤမရၣ်ဟံးန့ၢ်အမါလၢအပၢ်အဒီပုၢ်ဝဲၢ်မုၣ်နီၢ်ယိက ဘ့ၣ်, ဒီးအဝဲဒၣ်ဆံးစၢ်န့ၢ်အီၤလၢစီၤအၤဟရိၣ်ဒီးစီၤမိၤၡ့န့ၣ်လီၤ. ဒီးစီၤဧၤမရၣ်အိၣ်မူဝဲဒၣ်တကယၤသၢဆံနွံနံၣ်န့ၣ်လီၤ.
21 ဒီးစီၤယံးစဟၢ်အိၣ်ဒီးအဖိခွါသၢဂၤလၢအမ့ၢ်, စီၤကိၤရး, စီၤန့ဖ့းဒီးစီၤစံးကရံလီၤ.
22 ဒီးစီၤဧူးစံၤအ့လးအိၣ်စ့ၢ်ကီးဒီးအဖိခွါသၢဂၤလၢအမ့ၢ်, စီၤမံၤၡအ့လး, စီၤအလံစဖၣ်ဒီးစီၤစံးသရံန့ၣ်လီၤ.
23 ဒီးစီၤအၤဟရိၣ်ဟံးန့ၢ်အမါလၢစီၤအမံၤနဒးအဖိမုၣ်ဒီးစီၤ နးၡိၣ်အဒီပုၢ်ဝဲၢ်မုၣ်နီၢ်အ့းလံၤစါဘ့းလီၤ. ဒီးအဝဲဒၣ်ဆံးစၢ်န့ၢ်အီၤလၢစီၤနၤဒး, စီၤအဘံဟူၤ, စီၤအလၤဧစၢ်ဒီးစီၤအံသမၢ်လီၤ.
24 ဒီးစီၤကိၤရးအိၣ်ဒီးအဖိခွါသၢဂၤလၢအမ့ၢ်စီၤအစံၢ်, စီၤအ့လကါနၤ, ဒီးစီၤအဘံအစၤဖးလီၤ. အဝဲသ့ၣ်မ့ၢ်စီၤကိၤရးအဒူၣ်ဖိထၢဖိတဖၣ်လီၤ.
25 ဒီးစီၤအၤဟရိၣ်အဖိခွါစီၤအလၤဧစၢ်န့ၣ်, ဟံးန့ၢ်အမါလၢစီၤပူတံၤ အ့လးအဖိမုၣ်တဖၣ်အကျါတဂၤဒီးအဝဲဒၣ်ဆံးစၢ်န့ၢ်အီၤ လၢစီၤဖံနဃၣ်လီၤ. အဝဲသ့ၣ်န့ၣ်မ့ၢ်လ့ၤဝံအဒူၣ်အခိၣ်အနၢ်တဖၣ် ဒီးအစၢၤအသွဲၣ်တဖၣ်န့ၣ်လီၤ.
26 ဒီးစီၤအၤဟရိၣ်ဒီးစီၤမိၤၡ့တဖၣ်မ့ၢ်ပှၤတဖၣ်လၢကစၢ်ယွၤစံး ဘၣ်အဝဲသ့ၣ်, “ကဲခိၣ်ကဲနၢ်ဒီးဒုးဟးထီၣ်ကွံာ်ပှၤအံၣ်စရ့လးဖိ အဒူၣ်တဖၣ်လၢကီၢ်အဲၤကူပတူးအပူၤတက့ၢ်.” န့ၣ်လီၤ.
27 အဝဲသ့ၣ်မ့ၢ်ပှၤလၢအတဲဘၣ်ကီၢ်အဲၤကူပတူးအစီၤပၤလၢကဒုးဟးထီၣ်ကွံာ် ပှၤအံၣ်စရ့လးဖိတဖၣ်န့ၣ်လီၤ.
28 ဒီးမုၢ်တနံၤလၢကစၢ်ယွၤကတိၤတၢ်ဒီးစီၤမိၤၡ့လၢကီၢ်အဲၤကူပတူးအပူၤန့ၣ်,
29 အဝဲစံးဝဲဒၣ်, “ယဲဒၣ်အံၤယမ့ၢ်ယွၤလီၤ. တၢ်လၢယတဲဘၣ်နၤတမံၤလၢ်လၢ်န့ၣ်တဲဘၣ်ကီၢ်အဲၤကူပတူး အစီၤပၤတက့ၢ်.”
30 ဘၣ်ဆၣ်စီၤမိၤၡ့စံးဆၢဝဲဒၣ်, “နသ့ၣ်ညါလၢယမ့ၢ်ပှၤလၢအကတိၤတၢ်တသ့ဘၣ်တဂၤလီၤ. ဒီးစီၤပၤကကနၣ်ယကလုၢ်ဒ်လဲၣ်.”