5
1 ဒီးစီၤမိၤၡ့ဒီးစီၤအၤဟရိၣ်လဲၤဆူကီၢ်အဲၤကူပတူးစီၤပၤ အအိၣ်, ဒီးစံးဘၣ်အီၤ, “ယွၤ, ပှၤအံၣ်စရ့လးဖိအကစၢ်ယွၤစံးဒ်အံၤ, ပျၢ်ယပှၤဂီၢ်မုၢ်, ဒ်သိးအကလဲၤမၤဘူၣ်လၢပှၢ်မုၢ်ကနၢလၢတၢ်မၤလၤကပီၤယၤအဂီၢ်န့ၣ်တက့ၢ်.”
2 ဒီးစီၤပၤစံးဝဲဒၣ်, “ယွၤမ့ၢ်မတၤတဂၤလၢယကဘၣ်ဒိကနၣ်အကလုၢ်ဒီးပျၢ်ပှၤအံၣ်စရ့ လးဖိန့ၣ်လဲၣ်. ယတသ့ၣ်ညါဘၣ်ယွၤဘၣ်. ဒီးယတပျၢ်စ့ၢ်ကီးပှၤအံၣ်စရ့လးဖိဘၣ်.”
3 ဒီးစီၤမိၤၡ့ဒီးစီၤအၤဟရိၣ်စံးဝဲဒၣ်, “ပှၤဧ့ၤဘြံၤဖိအကစၢ်ယွၤလီၣ်ဖျါထီၣ်အသးလၢပှၤလံ. ဒုးလဲၤလၢ်ပှၤသၢနံၤကျဲဆူပှၢ်မုၢ်ကနၢဒ်သိးပကလုၢ်တၢ်ပာ်တၢ်ဆူယွၤ, ပကစၢ်ယွၤအအိၣ်တက့ၢ်. ပမ့ၢ်တမၤဘၣ်ဒ်န့ၣ်ဒီးအဝဲကမၤသံပှၤလၢတၢ်ဆူးတၢ်ဆါဒီးတၢ်ဒုးတၢ်ယၤန့ၣ်လီၤ.”
4 ဒီးအဲၤကူပတူးအစီၤပၤစံးဘၣ်အီၤ, “ဘၣ်မနုၤလၢသုတြီ ပှၤဂီၢ်မုၢ်ဒ်သိးအသုတမၤအတၢ်မၤန့ၣ်လဲၣ်. မၢအက့ၤကဒါက့ၤဆူအတၢ်မၤတက့ၢ်.
5 သုပှၤဂီၢ်မုၢ်အနီၣ်ဂံၢ်အါထီၣ်န့ၢ်ဒံးပှၤအဲၤကူပတူးဖိတဖၣ်လီၤ. ဒီးခဲကနံၣ်အံၤသုအဲၣ်ဒိးဆိကတီၢ်အမၤတၢ်လီၤ.”
6 ဒီးလၢမုၢ်တနံၤဃီန့ၣ်အဲၤကူပတူးအစီၤပၤမၤလိာ်ဝဲဒၣ်ပှၤ အဲၤကူပတူးဖိလၢအကွၢ်ထွဲကုၢ်သ့ၣ်တဖၣ်ဒီးပှၤအံၣ်စရ့လးဖိ လၢအကွၢ်ထွဲတၢ်ဖံးတၢ်မၤတဖၣ်, ဒီးစံးဝဲဒၣ်,
7 “တဘၣ်ဟ့ၣ်ပှၤဂီၢ်မုၢ်လၢဘုလီၢ်လၢကမၤတၢးခီအဂီၢ်တဂ့ၤ. မၢအလဲၤဃုဒၣ်အတၢ်တက့ၢ်.
8 ဘၣ်ဆၣ်ဒီးမၢအမၤဒံးတၢးခီအနီၣ်ဂံၢ်ပှဲၤသိးဒီးအမၤတ့ၢ်ဝဲဒ် လၢညါအသိးန့ၣ်တက့ၢ်. မၢအမၤစှၤလီၤတဂ့ၤ. အဂ့ၢ်ဒ်အံၤအဝဲသ့ၣ်တဖၣ်ကၢၣ်ဝဲဒၣ်သတး ဒီးဃ့ယၤအခွဲးခဲအံၤခဲအံၤလၢယကပျဲအလဲၤလုၢ်ထီၣ်တၢ်လုၢ် တၢ်ပာ်တဖၣ်ဆူပကစၢ်ယွၤအအိၣ်န့ၣ်လီၤ.
9 မၢပှၤတဖၣ်အံၤမၤတၢ်ဆူၣ်ဆူၣ်ဒီးအါအါဒ်သိးအဆၢကတီၢ်သုတအိၣ် လၢကကနၣ်တၢ်ကတိၤကလီကလီတဂ့ၤ, န့ၣ်တက့ၢ်.”
10 ပှၤအဲၤကူပတူးဖိလၢအမၢကုၢ်တၢ်တဖၣ်ဒီးပှၤအံၣ်စရ့လးဖိလၢ အကွၢ်ထွဲတၢ်ဖံးတၢ်မၤတဖၣ်ဟးထီၣ်ဝဲဒီးကတိၤတၢ်ဒီးပှၤဂီၢ် မုၢ်ဒီးစံးဝဲဒၣ်, “စီၤပၤစံးဒ်အံၤ, ယတဟ့ၣ်သုဘုလီၢ်လၢၤဘၣ်.
11 သုကဘၣ်လဲၤမၤန့ၢ်အီၤဖဲသုထံၣ်န့ၢ်အီၤသ့အလီၢ်န့ၣ်လီၤ. ဘၣ်ဆၣ်ဒီးသုကဘၣ်မၤတၢးခီအနီၣ်ဂံၢ်ဒ်လၢညါအသိးန့ၣ်လီၤ.”
12 ဒီးပှၤဂီၢ်မုၢ်လဲၤဆူကီၢ်အဲၤကူပတူးဒီဘ့ၣ်ညါဒ်သိးကမၤန့ၢ် ဘုလီၢ်အဂီၢ်လီၤ.
13 ဒီးပှၤအဲၤကူပတူးဖိလၢအမၢကုၢ်တၢ်သ့ၣ်တဖၣ်မၢဆူၣ်အဝဲသ့ၣ် လၢကမၤတၢးခီအနီၣ်ဂံၢ်ဒ်သိးဒီးနီၣ်ဂံၢ်လၢအမၤတ့ၢ်ဝဲဒ်လၢ ညါဖဲအဘၣ်တၢ်ဟ့ၣ်အီၤလၢဘုလီၢ်အခါအသိးကိးနံၤဒဲးလီၤ.
14 ပှၤအဲၤကူပတူးဖိလၢအမၢကုၢ်တၢ်သ့ၣ်တဖၣ်တီၢ်ဝဲပှၤအံၣ်စရ့လး ဖိလၢအကွၢ်ထွဲတၢ်ဖံးတၢ်မၤတဖၣ်ဒီးစံးဝဲ, “ဘၣ်မနုၤလၢသုတမၤတၢးခီအနီၣ်ဂံၢ်ပှဲၤသိးဒီးနီၣ်ဂံၢ်လၢ ညါအသိးန့ၣ်လဲၣ်.”
15 ဒီးပှၤအံၣ်စရ့လးဖိလၢအကွၢ်ထွဲတၢ်ဖံးတၢ်မၤတဖၣ်လဲၤဆူ ကီၢ်အဲၤကူပတူးအစီၤပၤအအိၣ်ဒီးစံးဝဲဒၣ်, “ကစၢ်စီၤပၤဧၢ, ဘၣ်မနုၤလၢနမၤပှၤဒ်သိးအံၤလဲၣ်.
16 ပတဘၣ်တၢ်ဟ့ၣ်ပှၤလၢဘုလီၢ်နီတစဲးဘၣ်. ဘၣ်ဆၣ်တၢ်မၢပမၤဒံးတၢးခီန့ၣ်လီၤ. ဒီးခဲအံၤပဘၣ်တၢ်တီၢ်ပှၤဒီးပှၤလၢအမၤကမၣ်တၢ်မ့ၢ်နပှၤတဖၣ်လီၤ.”
17 ဒီးစီၤပၤစံးဝဲဒၣ်, “သုဝဲသ့ၣ်အံၤသုကၢၣ်ဒီးသုတအဲၣ်ဒိးမၤတၢ်အဃိသုမၢယပျဲ သုဒ်သိးသုကလဲၤမၤတၢ်လုၢ်တၢ်ပာ်တဖၣ်ဆူယွၤန့ၣ်လီၤ.
18 ဒီးခဲကနံၣ်အံၤလဲၤမၤတၢ်တက့ၢ်. သုတဘၣ်တၢ်ဟ့ၣ်သုလၢဘု လီၢ်ဘၣ်. ဘၣ်ဆၣ်ဒီးသုကဘၣ်မၤတၢးခီအနီၣ်ဂံၢ်ဒ်နီၣ်ဂံၢ်လၢညါ အသိးန့ၣ်လီၤ.”
19 ဒီးပှၤအံၣ်စရ့လးဖိလၢအကွၢ်ထွဲတၢ်ဖံးတၢ်မၤတဖၣ်သ့ၣ်ညါဝဲ ဒၣ်လၢအအိၣ်လၢတၢ်ကီတၢ်ခဲအပူၤဖဲအဝဲသ့ၣ်ဘၣ်တၢ်တဲ အီၤလၢကဘၣ်မၤတၢးခီအနီၣ်ဂံၢ်ပှဲၤသိးဒီးအနီၣ်ဂံၢ်ဒ်လၢညါ အသိးကိးမုၢ်နံၤန့ၣ်လီၤ.
20 ဒီးဖဲအဝဲသ့ၣ်ဟးထီၣ်လၢစီၤပၤဖၤရိာ်အအိၣ်န့ၣ်ဘၣ်သဃိာ်ဒီး စီၤမိၤၡ့ဒီးစီၤအၤဟရိၣ်လၢအအိၣ်ခိးအဝဲသ့ၣ်န့ၣ်လီၤ.
21 ဒီးအဝဲသ့ၣ်စံးဘၣ်စီၤမိၤၡ့ဒီးစီၤအၤဟရိၣ်, “ယွၤထံၣ်တၢ်လၢသုမၤန့ၣ်ဒီးကစံၣ်ညီၣ်သု, မ့ၢ်လၢသုထိၣ်ဂဲၤစီၤပၤဒီးအခ့အပှၤတဖၣ်အသးလၢကသးဟ့ပှၤအဃိန့ၣ်လီၤ. ဒီးသုဟ့ၣ်အဝဲသ့ၣ်တၢ်ပျဲတမံၤဒ်သိးအကမၤသံပှၤန့ၣ်လီၤ.”
22 ဒီးစီၤမိၤၡ့က့ၤကဒါက့ၤကဒီးဆူယွၤအအိၣ်ဒီးစံးဝဲ, “ကစၢ်ဧၢ, ဘၣ်မနုၤလၢနမၤအၢနပှၤဂီၢ်မုၢ်အံၤန့ၣ်လဲၣ်. ဘၣ်မနုၤလၢနမၢလီၤယၤဖဲအံၤန့ၣ်လဲၣ်.
23 စးထီၣ်လၢယလဲၤဆူစီၤပၤအအိၣ်ဒီးကတိၤတၢ်လၢနဂီၢ်န့ၣ်, အဝဲမၤအၢပှၤဂီၢ်မုၢ်နးနးကလဲာ်န့ၣ်လီၤ. ဒီးနတမၤဒံးတၢ်နီတမံၤလၢကမၤစၢၤအဝဲသ့ၣ်အဂီၢ်ဘၣ်.