4
1 ဒီးစီၤမိၤၡ့စံးဆၢယွၤ, “ပှၤအံၣ်စရ့လးဖိတဖၣ်မ့ၢ်တနာ် ယၤဒီးတဒိကနၣ်ဘၣ်တၢ်လၢယတဲအီၤ, ဒီးမ့ၢ်စံးဝဲဒၣ်လၢနတလီၣ်ဖျါထီၣ်နသးလၢယၤဘၣ်န့ၣ်ယကဘၣ်မၤ ဒ်လဲၣ်.”
2 ဒီးယွၤစံးဘၣ်အီၤ, “တၢ်အိၣ်လၢနစုပူၤန့ၣ်မ့ၢ်မနုၤတမံၤ လဲၣ်.” ဒီးစံးဆၢဝဲဒၣ်, “မ့ၢ်နီၣ်ထိးတဘိလီၤ.”
3 ဒီးယွၤစံးဝဲဒၣ်, “တ့ၢ်လီၤကွံာ်အီၤဆူဟီၣ်ခိၣ်လိၤတ က့ၢ်.” ဒီးတုၤစီၤမိၤၡ့တ့ၢ်လီၤကွံာ်ဝဲဆူဟီၣ်ခိၣ်လိၤန့ၣ်ဒီးကဲ ထီၣ်ဝဲလၢဂုၢ်တဘိအဃိစီၤမိၤၡ့ထွးထီၣ်ဃ့ၢ်ဝဲလီၤ.
4 ဒီးယွၤစံးဘၣ်စီၤမိၤၡ့, “ယူာ်ထီၣ်နစုဒီးဖီၣ်န့ၢ်အီၤလၢ အမဲၢ်တက့ၢ်.” မၤသးဒ်န့ၣ်ဒီးစီၤမိၤၡ့ယူာ်ထီၣ်အစုဒီးဖီၣ်န့ၢ်အီၤ, ဒီးကဲထီၣ်ကဒါက့ၤနီၣ်ထိးဘိန့ၣ်လီၤ.
5 ဒီးယွၤစံးဝဲဒၣ်, “မၤတၢ်အံၤလၢနကပာ်ဖျါထီၣ်တၢ်အုၣ်သးဆူ ပှၤအံၣ်စရ့လးဖိသ့ၣ်တဖၣ်အအိၣ်လၢယွၤ, အဝဲသ့ၣ်အပၢ်ဖးဒိၣ်လၢပျၢၤတဖၣ်အကစၢ်ယွၤ, စီၤအၤဘြၤဟၣ်, စီၤအံၤစဲးဒီးစီၤယၤကိာ်အကစၢ်ယွၤန့ၣ်လီၣ်ဖျါထီၣ်တ့ၢ်လံအသး လၢသုမဲာ်ညါလံန့ၣ်တက့ၢ်.”
6 ဒီးယွၤစံးဘၣ်ကဒီးစီၤမိၤၡ့, “ဒၢနုာ်နစုဆူနဆ့ကၤအပူၤ တက့ၢ်.” ဒီးစီၤမိၤၡ့ဒၢနုာ်အစုဆူအဆ့ကၤအပူၤန့ၣ်လီၤ. ဒီးဖဲအဝဲထုးထီၣ်အစုဆူတၢ်ချၢန့ၣ်အစုဘၣ်တၢ်ဆါအၢ, လီၤဝါဝဲဒ်မူခိၣ်ဖီအသိးန့ၣ်လီၤ.
7 ဒီးယွၤစံးဝဲဒၣ်, “ဒၢနုာ်ကဒီးနစုဆူနဆ့ကၤအပူၤတက့ၢ်.” ဒီးစီၤမိၤၡ့ဒၢနုာ်ကဒါက့ၤအစုဆူအဆ့ကၤအပူၤန့ၣ်လီၤ. ဒီးဖဲအထုးထီၣ်က့ၤအစုန့ၣ်အစုဘျါက့ၤဝဲဒီးကဲထီၣ်က့ၤ ဝဲဒ်အဖံးအညၣ်အဂၤတဖၣ်အသိးန့ၣ်လီၤ.
8 ဒီးယွၤစံးဝဲဒၣ်, “အဝဲသ့ၣ်မ့ၢ်တနာ်ဘၣ်နၤဒီးမ့ၢ်တပာ်ကဲ တၢ်လီၤလးအခီၣ်ထံးတမံၤအံၤန့ၣ်, ကနာ်တၢ်လီၤလးလၢခံတမံၤန့ၣ်လီၤ.
9 ဒီးလၢတၢ်လီၤလးခံမံၤအံၤအဃိအံၤဒၣ်လဲာ်အဝဲသ့ၣ်မ့ၢ်တနာ် ဒံးဝဲနၤ, ဒီးတဒိကနၣ်ဘၣ်တၢ်လၢနတဲအီၤန့ၣ်, ဟံးန့ၢ်ထံတနီၤလၢထံ ကျိနံၤလါဒီးလူလီၤအီၤဆူဟီၣ်ခိၣ်လိၤတက့ၢ်. ထံန့ၣ်ကကဲထီၣ်တၢ်သွံၣ်န့ၣ်လီၤ.”
10 တုၤနုၤတစုစီၤမိၤၡ့စံးဘၣ်ယွၤ, “ယွၤဧၢ, လၢသီမ့ၢ်ဂ့ၤ, စးထီၣ်လၢနကတိၤတၢ်ဒီးနခ့နပှၤမ့ၢ်ဂ့ၤ, ယတမ့ၢ်ပှၤကတိၤတၢ်သ့ နီတစုဘၣ်. အဂ့ၢ်ဒ်အံၤ, ယမ့ၢ်ပှၤလၢအထးခိၣ်ဒီးအပျ့ၤဃၢန့ၣ်လီၤ.”
11 ဒီးယွၤစံးဘၣ်အီၤ, “မ့ၢ်မတၤတ့ပှၤကညီအထးခိၣ်လဲၣ်. ပှၤတအုၣ်, ပှၤနၢ်တအၢ, ပှၤထံၣ်တၢ်သ့ဒီးပှၤမဲာ်ဘျီၣ်န့ၣ်မ့ၢ် မတၤဒုးကဲထီၣ်အီၤတဂၤလဲၣ်. ယၤ, ယွၤတမ့ၢ်ဘၣ်ဧါ.
12 ဒီးခဲကနံၣ်အံၤ, လဲၤတက့ၢ်. ယကမၤစၢၤနၤလၢနတၢ်ကတိၤ, ဒီးသိၣ်လိနၤတၢ်လၢနကဘၣ်စံးဘၣ်တဲဘၣ်တဖၣ်န့ၣ်လီၤ.”
13 ဘၣ်ဆၣ်ဒီးစီၤမိၤၡ့စံးဆၢဝဲဒၣ်, “ယွၤဧၢ, မၢလီၤပှၤအဂၤတဂၤတက့ၢ်.”
14 ဒီးလၢတၢ်အံၤအဃိယွၤအတၢ်သးထီၣ်ကဲၤထီၣ်ဘၣ်စီၤမိၤၡ့ဒီး စံး, “ပှၤလ့ၤဝံဖိစီၤအၤဟရိၣ်န့ၣ်တမ့ၢ်နဒီပုၢ်ဝဲၢ်ဘၣ်န့ၣ်ဧါ. ယသ့ၣ်ညါလၢအဝဲမ့ၢ်ပှၤကတိၤတၢ်သ့ဂ့ၤမးတဂၤလီၤ. ဒီးအဝဲဟဲလံဝဲဒ်သိးကသဂၢၢ်နၤဒီးတုၤအထံၣ်ဘၣ်နၤန့ၣ်ကသးခု ဝဲဒိၣ်မးလီၤ.
15 ဒီးနဘၣ်ကတိၤတၢ်ဒီးအီၤ, တဲဘၣ်အီၤတၢ်လၢကဘၣ်စံးကတိၤဝဲန့ၣ် လီၤ. ဒီးယကမၤစၢၤသုဝဲခံဂၤလၢာ်လၢသု ကဘၣ်ကတိၤတၢ်ဒ်လဲၣ်ဒီးသိၣ်လိသုလၢသုကဘၣ်မၤတၢ်မနုၤလဲၣ်န့ၣ်လီၤ.
16 အဝဲကမ့ၢ်ပှၤကတိၤတၢ်ဆူပှၤဂီၢ်မုၢ်လၢနဂီၢ်န့ၣ်လီၤ. ဒီးနဲဒၣ်နကအိၣ်လၢကစၢ်ယွၤအလီၢ်လၢအဂီၢ်န့ၣ်လီၤ.
17 ဟံးထီၣ်နီၣ်ထိးဘိအံၤလၢနစုပူၤဒ်သိးနကဒုးနဲၣ်တၢ်ပနီၣ် လီၤလးသ့ၣ်တဖၣ်န့ၣ်တက့ၢ်.”
18 တုၤနုၤတစု, စီၤမိၤၡ့က့ၤကဒါက့ၤဆူအမံၤပှၢ်စီၤယံးသရိၤ အအိၣ်ဒီးစံးဘၣ်အီၤ, “ဝံသးစူၤပျဲယက့ၤကဒါက့ၤဆူယ ဘူးယတံၢ်တဖၣ်အအိၣ်လၢကီၢ်အဲၤကူပတူးအပူၤဒီးကွၢ်, မ့ၢ်အဝဲသ့ၣ်အိၣ်မူဒံးတဂၤဂၤဧါ.” ဒီးစီၤယံးသရိၤစံးဘၣ်အီၤ, “က့ၤမုာ်မုာ်တက့ၢ်,” န့ၣ်လီၤ.
19 ဖဲစီၤမိၤၡ့အိၣ်ဒံးဝဲဒၣ်လၢကီၢ်မံးဒယၣ်အပူၤန့ၣ်ယွၤစံး ဘၣ်အီၤ, “က့ၤကဒါက့ၤဆူကီၢ်အဲၤကူပတူးန့ၣ်တက့ၢ်. အဂ့ၢ်ဒ်အံၤပှၤလၢအအဲၣ်ဒိးမၤသံနၤတဖၣ်သံလံဝဲခဲလၢာ်လံ.”
20 ဒီးစီၤမိၤၡ့ဟံးန့ၢ်အမါဒီးအဖိခွါတဖၣ်, ဒီးဒုးဒိးအီၤလၢကသ့ၣ်ယီၤ, ဒီးက့ၤက့ၤဝဲဒၣ်ဆူကီၢ်အဲၤကူပတူးလီၤ. ဒီးစီၤမိၤၡ့စိာ်ထီၣ်နီၣ်ထိးဘိလၢအစူပူၤလၢကစၢ်ယွၤစံး ဘၣ်အီၤလၢကဘၣ်ဟံးန့ၢ်ဝဲန့ၣ်လီၤ.
21 ဒီးယွၤစံးဘၣ်စီၤမိၤၡ့, “တုၤနက့ၤကဒါက့ၤဆူကီၢ်အဲၤကူပတူး န့ၣ်မၤတၢ်လီၤလးတဖၣ်လၢယဟ့ၣ်စိဟ့ၣ်ကမီၤနၤလၢနကမၤအီၤ လၢစီၤပၤဖၤရိၤအမဲာ်ညါတက့ၢ်. ယကမၤကိၤထီၣ်အသးဒ်သိးအသုတပျဲပှၤဂီၢ်မုၢ်တဖၣ်ဟးထီၣ်တဂ့ၤ န့ၣ်လီၤ.
22 ဒီးနဘၣ်စံးဘၣ်စီၤပၤဖၤရိၤ, ယွၤစံးဝဲဒၣ်, ‘အံၣ်စရ့လးမ့ၢ်ယဖိဝဲၢ်ကိန့ၣ်လီၤ.
23 ဒီးယစံးဘၣ်နၤပျဲယဖိခွါလဲၤတၢ်, ဒ်သိးအကဘူၣ်ထီၣ်ဘါထီၣ် ယၤ, ဘၣ်ဆၣ်ဒီးနဂ့ၢ်လိာ်နဲလီၤ. ခဲအံၤယကမၤသံနဖိဝဲၢ်ကိတဖၣ်လီၤ.’ ”
24 ဒီးလၢအတၢ်လဲၤကျဲဖဲတၢ်အိၣ်ဘှံးအလီၢ်တတီၤန့ၣ်ယွၤထံၣ် စီၤမိၤၡ့ဒီးအဲၣ်ဒိးမၤသံအီၤလီၤ.
25 ဒီးနီၢ်စံးဖိရၤဟံးန့ၢ်ဒီဖိလၢအကနၣ်အ့ၣ်တဘ့ၣ်ဒီးကူးတဲာ် အဖိခွါအတၢ်ခိၣ်ဖံးဒီးထိးဝဲလၢစီၤမိၤၡ့အခီၣ်န့ၣ်လီၤ.
26 မ့ၢ်လၢတၢ်ကူးတရံးတၢ်အတၢ်ခွဲးတၢ်ယာ်အဃိ, နီၢ်စံးပိရၤစံးဘၣ်စီၤမိၤၡ့, “နမ့ၢ်ဝၤလၢအဘၣ်ဃးဒီးယၤ လၢသွံၣ်ထံန့ၣ်လီၤ.” ဒီးလၢတၢ်န့ၣ်အဃိ, ယွၤမၤပူၤဖျဲးစီၤမိၤၡ့အသးသမူန့ၣ်လီၤ.
27 အခါဖဲန့ၣ်ယွၤစံးဘၣ်စီၤအၤဟရိၣ်, “လဲၤထံၣ်လိာ်စီၤမိၤၡ့လၢပှၢ်မုၢ်ကနၢတက့ၢ်.” ဒီးအဝဲလဲၤထံၣ်လိာ်စီၤမိၤၡ့လၢကစၢၢ်စီဆှံဒီးနၢမူအီၤလီၤ.
28 တုၤနုၤတစုစီၤမိၤၡ့တဲဘၣ်စီၤအၤဟရိၣ်ကယဲၢ်တၢ်လၢယွၤစံး ဘၣ်အီၤခဲလၢာ်, ဒီးတၢ်လီၤလးတဖၣ်လၢယွၤမၢအမၤဝဲ န့ၣ်လီၤ.
29 ဒီးစီၤမိၤၡ့, ဒီးစီၤအၤဟရိၣ်လဲၤဆူကီၢ်အဲၤကူပတူးဒီး ဒုးအိၣ်ဖှိၣ်ရိဖှိၣ်ပှၤအံၣ်စရ့လးဖိအပှၤသူၣ်က့သးပှၢ်ခဲ လၢာ်န့ၣ်လီၤ.
30 ဒီးစီၤအၤဟရိၣ်တဲဘၣ်အဝဲသ့ၣ်လၢကယဲၢ်တၢ်လၢယွၤစံးဘၣ်စီၤမိၤၡ့တဖၣ်န့ၣ်လီၤ. ဒီးစီၤမိၤၡ့မၤတၢ်လီၤလးတဖၣ်လၢပှၤဂီၢ်မုၢ်အမဲာ်ညါန့ၣ်လီၤ.
31 ဒီးပှၤဂီၢ်မုၢ်နာ်ဝဲဒီးဖဲအဝဲသ့ၣ်နၢ်ဟူဝဲဒၣ်လၢကစၢ်ယွၤဟဲဆူ အဝဲသ့ၣ်အအိၣ်ဒီးထံၣ်အတၢ်နးတၢ်ဖှီၣ်န့ၣ်အဝဲသ့ၣ်ဆုးလီၤအခိၣ် ဒီးဘူၣ်ထီၣ်ဘါထီၣ်ယွၤလီၤ.