16
1 ဒီးပှၤအံၣ်စရ့လးဖိဒီဒူၣ်ဒီထၢဟးထီၣ်ကွံာ်လၢအ့လံၣ်, ဒီးဖဲအဝဲသ့ၣ်ဟးထီၣ်ကွံာ်လၢကီၢ်အဲၤကူပတူးအလီၢ်ခံန့ၣ် အဝဲသ့ၣ်ဟဲတုၤဆူပှၢ်မုၢ်ကနၢစံၤ, လၢအအိၣ်ဖဲအ့လံၣ်ဒီးကစၢၢ်စံၤနါအဘၢၣ်စၢၤ, ဖဲလါခံလါတလါထီၣ်တဆံယဲၢ်သီအနံၤ, န့ၣ်လီၤ.
2 ဒီးလၢပှၢ်မုၢ်ကနၢအပူၤန့ၣ်အဝဲသ့ၣ်ခဲလၢာ်ကဒူးကဒ့ၣ်တၢ်ဆူ စီၤမိၤၡ့ဒီးစီၤအၤဟရိၣ်အအိၣ်,
3 ဒီးစံးဘၣ်အဝဲသ့ၣ်, “ပဆၢလၢယွၤကမၤသံတ့ၢ်ပှၤလၢကီၢ်အဲၤကူပတူးအပူၤလီၤ. အစှၤကတၢၢ်ပဆ့ၣ်နီၤဒီးအီၣ်တၢ်ဖံးတၢ်ညၣ်ဒီးတၢ်အီၣ်တၢ်အီအဂၤလၢပအဲၣ်ဒိးအီၣ်ဖဲန့ၣ်သ့ဝဲလီၤ. မ့မ့ၢ်သုဟဲကိးပှၤဆူပှၢ်မုၢ်ကနၢအံၤအပူၤဒ်သိးပကသၣ်ဝံၤလီၤဒိသံခဲလၢာ်လီၤ.”
4 ဒီးယွၤစံးဘၣ်စီၤမိၤၡ့, “ခဲကနံၣ်အံၤ, ယကဒုးစူၤလီၤတၢ်အီၣ်တၢ်အီလၢမူခိၣ်လၢသုဝဲခဲလၢာ်အဂီၢ်လီၤ. ပှၤဂီၢ်မုၢ်ကဘၣ်ဟးထီၣ်ကိးမုၢ်နံၤဒီးပာ်ဖှိၣ်တၢ်လၢလၢလီၣ် လီၣ်လၢအနံၤဝဲန့ၣ်အဂီၢ်လီၤ. လၢကျဲဒ်သိးအံၤန့ၣ်, ယမၤကွၢ်အဝဲသ့ၣ်ဒ်သိးယကထံၣ်န့ၢ်အဝဲသ့ၣ်လၢမ့ၢ်အကပိာ်ထွဲ, မ့တမ့ၢ်တပိာ်ထွဲယတၢ်သိၣ်တၢ်သီတဖၣ်အခံဧါကသ့န့ၣ်လီၤ.
5 ဒီးလၢဃုနံၤတနံၤန့ၣ်အဝဲသ့ၣ်ကဘၣ်ဟဲက့ၤစိာ်တၢ်ပှဲၤသိးညီ နုၢ်အဟဲက့ၤစိာ်တ့ၢ်ဝဲန့ၣ်ခံစးဒီးကတဲာ်ကတီၤအီၤလီၤ.”
6 မၤသးဒ်န့ၣ်ဒီးစီၤမိၤၡ့ဒီးစီၤအၤဟရိၣ်စံးဘၣ်ကယဲၢ်ပှၤအံၣ် စရ့လးဖိခဲလၢာ်, “တဟါအံၤ, သုကသ့ၣ်ညါဘၣ်လၢယွၤမ့ၢ်ပှၤထုးထီၣ်ကွံာ်သုလၢ ကီၢ်အဲၤကူပတူးအပူၤန့ၣ်လီၤ.
7 လၢမုၢ်ဂီၤန့ၣ်သုကထံၣ်ဘၣ်ယွၤအိၣ်ဝဲဆိးဝဲအတၢ်ကပီၤကပြုၢ် ကပြီၤန့ၣ်လီၤ. အဝဲနၢ်ဟူတ့ၢ်သုတၢ်ကဒူးကဒ့ၣ်ထီဒါအီၤလီၤ. မ့ၢ်သုထီဒါအီၤလီၤ. အဂ့ၢ်ဒ်အံၤ, ထဲပဝဲဒၣ်ဧိၤပမ့ၢ်ပှၤလၢအမၤတၢ်ဒ်အတၢ်မၤလိာ်တဖၣ်အသိးန့ၣ်လီၤ.”
8 ဒီးစီၤမိၤၡ့စံးဝဲဒၣ်, “ယွၤမ့ၢ်ပှၤလၢကဟ့ၣ်သုတၢ်ဖံးတၢ် ညၣ်လၢသုကအီၣ်လၢမုၢ်ဟါ, ဒီးကိၣ်ပှဲၤသိးသုအဲၣ်ဒိးအီၣ်လၢမုၢ်ဂီၤအကတီၢ်န့ၣ်လီၤ. အဂ့ၢ်ဒ်အံၤ, အဝဲနၢ်ဟူတ့ၢ်သုတၢ်ကဒူးကဒ့ၣ်ထီဒါအီၤန့ၣ်လီၤ. ဖဲသုကဒူးကဒ့ၣ်ထီဒါပှၤန့ၣ်, မ့ၢ်သပှၢ်ကတၢၢ်သုကဒူးကဒ့ၣ်ထီဒါယွၤန့ၣ်လီၤ.”
9 စီၤမိၤၡ့စံးဘၣ်စီၤအၤဟရိၣ်, “တဲဘၣ်ပှၤဒီဒူၣ်ဒီထၢလၢ အကဟဲဒီးဆၢထၢၣ်လၢယွၤအမဲာ်ညါတက့ၢ်. အဂ့ၢ်ဒ်အံၤ, ယွၤနၢ်ဟူတ့ၢ်အဝဲသ့ၣ်အတၢ်ကဒူးကဒ့ၣ်တဖၣ်ထီဒါအီၤလီၤ.”
10 တုၤစီၤအၤဟရိၣ်ကတိၤတၢ်ဆူပှၤဒီဒူၣ်ဒီထၢန့ၣ်, အဝဲသ့ၣ်ဃၣ်ဃီၤအသးဆူပှၢ်မုၢ်ကနၢလီၤ. ဒီးသတူၢ်ကလာ်န့ၣ်ယွၤအတၢ်ကပီၤကပြုၢ်ကပြီၤအိၣ်ဖျါဝဲလၢတၢ်အၢၣ်အလိၤန့ၣ်လီၤ.
11-12 ဒီးယွၤစံးဘၣ်စီၤမိၤၡ့, “ယနၢ်ဟူတ့ၢ်ပှၤအံၣ်စရ့လးဖိတဖၣ်အတၢ်ကဒူးကဒ့ၣ်န့ၣ်လီၤ. တဲဘၣ်အီၤလၢဖဲမုၢ်ဟါလီၤသံယီၢ်ယာ်န့ၣ်အဝဲသ့ၣ်ကအိၣ်ဒီးတၢ် ဖံးတၢ်ညၣ်လၢကအီၣ်ဘၣ်ဝဲ, ဒီးလၢမုၢ်ဂီၤန့ၣ်အဝဲသ့ၣ်ကအိၣ်ဒီးကိၣ်ပှဲၤသိးအအဲၣ်ဒိးဝဲန့ၣ်လီၤ. တုၤနုၤတစုအဝဲသ့ၣ်ကသ့ၣ်ညါလၢယၤ, ယွၤအံၤမ့ၢ်အဝဲသ့ၣ်အကစၢ်ယွၤန့ၣ်လီၤ.”
13 ဒီးလၢမုၢ်ဟါလီၤန့ၣ်ထိၣ်ဘှၢၣ်အဖုအဂီၢ်ဖးဒိၣ်တဖုဟဲယူၤ နုာ်လီၤဝဲတုၤအမၤပှဲၤသူၣ်ဒဲအလီၢ်ခဲလၢာ်လီၤ. ဒီးလၢမုၢ်ဂီၤန့ၣ်ပစီၤထံအိၣ်ဝးတရံးသူၣ်ဒဲအလီၢ်န့ၣ်လီၤ.
14 ဖဲပစီၤထံပှံၢ်ထီၣ်ကွံာ်ဝဲန့ၣ်, တၢ်ကဘျံးဒံးဖိအိၣ်ဝဲဒၣ်လၢ ပှၢ်မုၢ်ကနၢအပူၤန့ၣ်လီၤ. တၢ်န့ၣ်ကပုာ်ဝဲဒ်ဘှ့ၣ်လီၤသကၤအသိးန့ၣ်လီၤ.
15 ဒီးဖဲပှၤအံၣ်စရ့လးဖိတဖၣ်ထံၣ်ဘၣ်တၢ်န့ၣ်ဒီးအဝဲသ့ၣ်တသ့ၣ် ညါဝဲလၢအမ့ၢ်တၢ်မနုၤလဲၣ်ဘၣ်အဃိသံကွၢ်လိာ်အသး, “တၢ်အံၤမ့ၢ်တၢ်မနုၤလဲၣ်.” န့ၣ်လီၤ.
စီၤမိၤၡ့စံးဘၣ်အဝဲသ့ၣ်, “တၢ်အံၤမ့ၢ်တၢ်အီၣ်လၢယွၤဟ့ၣ်လီၤသုလၢသုကအီၣ်အဂီၢ်လီၤ.
16 ယွၤမၤလိာ်ဝဲလၢသုဝဲတဂၤစုာ်စုာ်ကထၢဖှိၣ်တၢ်ပှဲၤသိးအလိၣ်ဘၣ်ဝဲ, လၢအဟံၣ်ဖိဃီဖိတဂၤစုာ်စုာ်အဂီၢ်တဂၤတဧိၤမ့ၢ်န့ၣ်လီၤ.
17 ပှၤအံၣ်စရ့လးဖိတဖၣ်မၤဝဲဒ်အံၤအသိး, ပှၤတနီၤပာ်ဖှိၣ်တၢ်အါ ဝဲဒီးတနီၤစှၤဝဲဒၣ်န့ၣ်လီၤ.
18 တုၤအဝဲသ့ၣ်ဃီၣ်ကွၢ်ဝဲဒီး, ပှၤလၢအပာ်ဖှိၣ်တၢ်အါန့ၢ်အတၢ် တအိၣ်အါကဲၣ်ဆိးဘၣ်ဒီးပှၤလၢအပာ်ဖှိၣ်တၢ်စှၤန့ၢ်အတၢ်တအိၣ် စှၤကဲၣ်ဆိးဒီးအီၤဘၣ်လီၤ. ပှၤတဂၤစုာ်စုာ်ပာ်ဖှိၣ်တၢ်ထဲသိးဒၣ်အလိၣ်ဘၣ်ဝဲန့ၣ်လီၤ.
19 ဒီးစီၤမိၤၡ့စံးဘၣ်အဝဲသ့ၣ်, “ပှၤတဘၣ်ပာ်ကိၣ်အံၤလၢခဲ မုၢ်ဆ့ၣ်အဂီၢ်နီတဂၤဘၣ်.”
20 ဘၣ်ဆၣ်ဒီးပှၤလၢအကျါတနီၤတဒိကနၣ်စီၤမိၤၡ့ဘၣ်, ဒီးပာ်ဃးဝဲတနီၤန့ၣ်လီၤ. မုၢ်ဆ့ၣ်ထီၣ်လၢခံတနံၤန့ၣ်ကိၣ် အံၤပှဲၤဝဲဒီးလၢၣ်ဒီးနၢဆံၣ်ဘီဝဲဒီးစီၤမိၤၡ့သးဒိၣ်ထီၣ်အဝဲသ့ၣ်လီၤ.
21 ကိးမုၢ်ဂီၤဒဲးန့ၣ်ပှၤကိးဂၤဒဲးစုာ်စုာ်ပာ်ဖှိၣ်တၢ်ထဲသိးအလိၣ်ဘၣ်ဝဲန့ၣ်လီၤ. ဒီးဖဲမုၢ်ကိၢ်ထီၣ်န့ၣ်တၢ်လၢအိၣ်လီၤတဲာ်လၢဟီၣ်ခိၣ်လိၤတဖၣ် ပှံၢ်လီၤကွံာ်ဝဲဒၣ်လီၤ.
22 လၢဃုသီတသီအနံၤန့ၣ်အဝဲသ့ၣ်ပာ်ဖှိၣ်တၢ်အီၣ်, လၢပှၤတဂၤစုာ်စုာ်အဂီၢ်ခံဧိၤမ့ၢ်န့ၣ်လီၤ. ဒီးကယဲၢ်ပှၤခိၣ်ပှၤနၢ်လၢဒူၣ်ဖိထၢဖိတဖၣ်အကျါဟဲဒီးတဲဘၣ် စီၤမိၤၡ့လၢတၢ်ဂ့ၢ်အံၤန့ၣ်လီၤ.
23 ဒီးအဝဲဒၣ်စံးဘၣ်အဝဲသ့ၣ်, “ယွၤမၤလိာ်တ့ၢ်ဝဲလၢခဲမုၢ် ဆ့ၣ်တနံၤန့ၣ်မ့ၢ်မုၢ်အိၣ်ဘှံးအနံၤစီဆှံလၢတၢ်ကဘၣ်ပာ်စီ ဆှံအီၤလၢယွၤအဂီၢ်န့ၣ်လီၤ. တၢ်လၢသုအဲၣ်ဒိးဘၢအီၤန့ၣ်ဘၢအီၤဒီးတၢ်လၢသုအဲၣ်ဒိးချီ အီၤန့ၣ်ချီအီၤတနံၤအံၤတက့ၢ်. တၢ်တမံၤလၢ်လၢ်လၢအအိၣ်လီၤတဲာ်န့ၣ်တၢ်ကဘၣ်ပာ်ကပၤအီၤဒီးပာ် ဃးအီၤလၢခဲမုၢ်ဆ့ၣ်အဂီၢ်လီၤ.”
24 ဒ်စီၤမိၤၡ့မၤလိာ်တ့ၢ်ဝဲအသိးအဝဲသ့ၣ်ပာ်ဃးတၢ်လၢအအိၣ်လီၤ တဲာ်တုၤမုၢ်ဆ့ၣ်ထီၣ်တနံၤလီၤ. တၢ်အီၣ်အံၤတဟးဂီၤဘၣ်ဒီးလၢၣ်တအိၣ်ဘၣ်လၢအပူၤဘၣ်လီၤ.
25 ဒီးစီၤမိၤၡ့စံးဝဲဒၣ်, “အီၣ်တၢ်န့ၣ်တနံၤအံၤတက့ၢ်. အဂ့ၢ်ဒ်အံၤ, တနံၤအံၤမ့ၢ်မုၢ်အိၣ်ဘှံးအနံၤ, မုၢ်တနံၤလၢတၢ်ပာ်စီဆှံအီၤလၢယွၤအဂီၢ်န့ၣ်လီၤ. ဒီးတမ့ၢ်လၢသုကထံၣ်ဘၣ်တၢ်အီၣ်လၢတၢ်အိၣ်ဆိးလီၢ်အချၢနီတမံၤဘၣ်.
26 သုကဘၣ်ပာ်ဖှိၣ်တၢ်အီၣ်လၢဃုသီအဂီၢ်လီၤ. မ့မ့ၢ်နွံသီတသီအနံၤန့ၣ်မ့ၢ်မုၢ်အိၣ်ဘှံးအနံၤဒီးတမ့ၢ်လၢ တၢ်ကအိၣ်နီတမံၤဘၣ်.”
27 လၢမုၢ်နွံနံၤတနံၤန့ၣ်ပှၤတနီၤဟးထီၣ်ဒ်သိးကလဲၤထၢကိၣ်လီၤ. ဘၣ်ဆၣ်ဒီးတထံၣ်ဘၣ်တၢ်နီတမံၤဘၣ်.
28 အန့ၣ်ဒီးယွၤစံးဘၣ်စီၤမိၤၡ့, “မ့ၢ်သုကဂ့ၢ်လိာ်လၢသု ကစူၢ်ယတၢ်မၤလိာ်တဖၣ်ဆံးယံာ်ဒံးလဲၣ်.
29 သ့ၣ်နီၣ်ထီၣ်ယၤ, ယွၤအံၤဟ့ၣ်တ့ၢ်သုမုၢ်တနံၤလၢတၢ်အိၣ်ဘှံး အဂီၢ်သတးဒီး, လၢဃုနံၤတနံၤန့ၣ်ယကဟ့ၣ်သုတၢ်အီၣ်, လၢဝဲလၢခံသီအဂီၢ်န့ၣ်လီၤ. ပှၤကိးဂၤဒဲးကဘၣ်အိၣ်, ဖဲအအိၣ်ဝဲအလီၢ်လၢမုၢ်နွံနံၤတနံၤန့ၣ်ဒီးတဘၣ်ဟးထီၣ်လၢ အဟံၣ်ပူၤဘၣ်.”
30 မၤသးဒ်န့ၣ်ဒီးပှၤတမၤတၢ်လၢနွံသီတသီန့ၣ်နီတဂၤဘၣ်.
31 ပှၤအံၣ်စရ့လးဖိတဖၣ်ကိးဝဲတၢ်အီၣ်န့ၣ်လၢမၤနၤလီၤ. တၢ်န့ၣ်မၤသးဒ်တၢ်အချံဝါဝါဆံးဆံးဖိဒီးဝံၣ်ဝဲဒ်ကိၣ်ဘ့ၣ် ဘၣ်ဘူတလါဖိတဖၣ်လၢအဘၣ်တၢ်မၤအီၤဃုာ်ဒီးကနဲစီန့ၣ်လီၤ.
32 ဒီးစီၤမိၤၡ့စံးဝဲဒၣ်, “ယွၤမၤလိာ်ပှၤလၢပကပာ်ဃးကိၣ်မၤ နၤတနီၤလၢပစၢၤပသွဲၣ်လၢခံတဖၣ်အဂီၢ်ဒ်သိးအဝဲသ့ၣ်ကထံၣ်ဘၣ် တၢ်အီၣ်လၢယွၤဟ့ၣ်ဒုးအီၣ်ပှၤလၢပှၢ်မုၢ်ကနၢအပူၤဖဲအထုးထီၣ် ပှၤလၢကီၢ်အဲၤကူပတူးအပူၤန့ၣ်လီၤ.”
33 စီၤမိၤၡ့စံးဘၣ်စီၤအၤဟရိၣ်, “ဟံးန့ၢ်သရာ်တဖျၢၣ်, ဒၢနုာ်ကိၣ်မၤနၤတဧိၤမ့ၢ်လၢအပူၤဒီးပာ်အီၤလၢယွၤအိၣ်ဝဲ ဆိးဝဲအလီၢ်အမဲာ်ညါဒ်သိးကဘၣ်တၢ်ပာ်ကတီၤအီၤလၢပစၢၤ ပသွဲၣ်လၢခံတဖၣ်အဂီၢ်တက့ၢ်.”
34 ဒီးဒ်ယွၤမၤလိာ်စီၤမိၤၡ့အသိးန့ၣ်, စီၤအၤဟရိၣ်ပာ်လီၤအီၤ လၢယွၤအတၢ်အၢၣ်လီၤအီလီၤအတလါအမဲာ်ညါဒ်သိးတၢ်ကပာ်ဃးအီၤ အဂီၢ်လီၤ.
35 ပှၤအံၣ်စရ့လးဖိတဖၣ်အီၣ်ဝဲကိၣ်မၤနၤဆူညါအနံၣ်လွံၢ်ဆံတုၤ အဝဲသ့ၣ်လဲၤတုၤကီၢ်ကနၤဧၣ်, တၢ်လီၢ်ဖဲအဝဲသ့ၣ်သူၣ်လီၤဆီလီၤ အသးန့ၣ်လီၤ.
36 (နီၣ်ထိၣ်လၢတၢ်ဃီၣ်အဃ့ထီအဂီၢ်ဖဲစိၤအဝဲန့ၣ်မ့ၢ်, တဧိၤမ့ၢ်ပှဲၤသိးတအ့ဖးဆံဆဲၣ်ပူတပူန့ၣ်လီၤ.)