17
(ဂံၢ်.၂၀:၁ - ၁၃)
1 ဒီးပှၤအံၣ်စရ့လးဖိဒီဒူၣ်ဒီထၢဟးထီၣ်ကွံာ်လၢပှၢ်မုၢ်ကနၢ စံၤဒီးလဲၤဆူညါတတီၤဘၣ်တတီၤဒ်ကစၢ်ယွၤမၤလိာ်ဝဲအသိးန့ၣ်လီၤ. အဝဲသ့ၣ်သူၣ်လီၤအဒဲဖဲတၢ်လီၢ်ရဖံၤဒံၣ်န့ၣ်လီၤ. ဘၣ်ဆၣ်ဒီးဖဲန့ၣ်, ထံတအိၣ်လၢအဝဲသ့ၣ်ကအီဝဲအဂီၢ်ဘၣ်လီၤ.
2 ဒီးအဝဲသ့ၣ်ကဒူးကဒ့ၣ်တၢ်လၢစီၤမိၤၡ့အလိၤဒီးစံးဝဲ, “ဟ့ၣ်ပှၤထံလၢပကအီအဂီၢ်တက့ၢ်.”
စီၤမိၤၡ့စံးဆၢဝဲ, “ဘၣ်မနုၤလၢသုကဒူးကဒ့ၣ်တၢ်ဒီးလ့ပစီယွၤန့ၣ်လဲၣ်.”
3 ဘၣ်ဆၣ်ဒီးပှၤဂီၢ်မုၢ်အသးသူထံနးနးကလဲာ်အဃိကဒူးကဒ့ၣ်တၢ် အါထီၣ်လၢစီၤမိၤၡ့အလိၤလီၤ. အဝဲသ့ၣ်စံးဝဲ, “ဘၣ်မနုၤလၢနထုးထီၣ်ပှၤလၢကီၢ်အဲၤကူပတူး အပူၤန့ၣ်လဲၣ်. မ့ၢ်ဒ်သိးနကမၤသံပှၤဒီးပဖိပလံၤဒီးပဆၣ်ဖိကီၢ်ဖိတဖၣ် လၢတၢ်သူအသးလၢထံအဂီၢ်န့ၣ်ဧါ.”
4 ဒီးစီၤမိၤၡ့ဘါထုကဖၣ်တၢ်ဆူယွၤအအိၣ်သပှၢ်ပှၢ်ဒီးစံး, “ယကမၤပှၤဂီၢ်မုၢ်အံၤဒ်လဲၣ်. အဝဲသ့ၣ်အိၣ်ကတဲာ်ကတီၤလံအသးလၢကကွံာ်သံယၤလၢလၢၢ်န့ၣ်လီၤ.”
5 ဒီးယွၤစံးဘၣ်စီၤမိၤၡ့, “ကိးန့ၢ်ပှၤအံၣ်စရ့လးဖိအခိၣ်အနၢ်တနီၤဒီးနၤ, ဒီးလဲၤလၢပှၤဂီၢ်မုၢ်အမဲာ်ညါတက့ၢ်. လဲၤစိာ်ဃုာ်နီၣ်ထိးဘိလၢနတီၢ်ထံကျိနံၤလါန့ၣ်တက့ၢ်.
6 ယကဆၢထၢၣ်လၢသုမဲာ်ညါလၢလ့တဖျၢၣ်အဖီခိၣ်ဖဲကစၢၢ်စံၤနါန့ၣ် လီၤ. တီၢ်လ့န့ၣ်ဒီးထံကဟဲထီၣ်လၢအပူၤလၢပှၤဂီၢ်မုၢ်ကအီအီၤအဂီၢ် လီၤ.” ဒီးစီၤမိၤၡ့မၤဝဲဒ်န့ၣ်လၢကီၢ်အံၣ်စရ့လးအခိၣ်အနၢ်တဖၣ်အမဲာ်ညါန့ၣ်လီၤ.
7 တၢ်လီၢ်န့ၣ်ဘၣ်တၢ်ယုၢ်အမံၤလၢမးစၤ, ဒီးမရံၤဘါလီၤ. အဂ့ၢ်ဒ်အံၤ, ပှၤအံၣ်စရ့လးဖိတဖၣ်ကဒူးကဒ့ၣ်တၢ်ဒီးလ့ပစီ ယွၤဖဲအဝဲသ့ၣ်စံးဝဲ, “မ့ၢ်ယွၤအိၣ်ဒီးပှၤဧါ, မ့တမ့ၢ်တအိၣ်ဘၣ်ဧါ,” အဃိန့ၣ်လီၤ.
8 ပှၤဧမၤလ့းဖိတဖၣ်ဟဲထီၣ်ဒီးဒုးပှၤအံၣ်စရ့လးဖိတဖၣ်ဖဲတၢ် လီၢ်ရဖံၤဒံၣ်န့ၣ်လီၤ.
9 ဒီးစီၤမိၤၡ့စံးဘၣ်စီၤယိၤၡူ, “ဃုထၢပှၤပိာ်ခွါတနီၤဒ် သိးကလဲၤဒုးပှၤဧမၤလ့းဖိတဖၣ်ခဲမုၢ်ဆ့ၣ်တက့ၢ်. ယကဆၢထၢၣ်လၢတၢ်လူၢ်ဒီခိၣ်ဒီးဟံးဃာ်နီၣ်ထိးဘိလၢကစၢ်ယွၤ မၢယဟဲစိာ်အီၤန့ၣ်လီၤ.”
10 ဒီးစီၤယိၤၡူမၤဝဲဒ်စီၤမိၤၡ့မၤလိာ်တ့ၢ်အီၤအသိးဒီးလဲၤ ထီၣ်ဝဲဒ်သိးကဒုးပှၤဧမၤလ့းဖိတဖၣ်ဖဲစီၤမိၤၡ့, စီၤအၤဟရိၣ်ဒီးစီၤဃူၢ်လဲၤထီၣ်ဆူကစၢၢ်ဒီခိၣ်အခါန့ၣ်လီၤ.
11 ပှၤအံၣ်စရ့လးဖိတဖၣ်မၤနၢၤတၢ်ဖဲအကတီၢ်လၢစီၤမိၤၡ့ယူာ် ထီၣ်ဒံးအစုတီၤတဖၣ်, ဘၣ်ဆၣ်ဖဲအဝဲပာ်လီၤအစုန့ၣ်ပှၤဧမၤလ့းဖိတဖၣ်စးထီၣ်မၤနၢၤ တၢ်န့ၣ်လီၤ.
12 ဖဲစီၤမိၤၡ့အစုတီၤတဖၣ်လီၤဘှံးဝဲန့ၣ်, စီၤအၤဟရိၣ်ဒီးစီၤဃူၢ်ဟံးန့ၢ်လၢၢ်တဖျၢၣ်လၢအဝဲကဆ့ၣ်နီၤဝဲ လၢအလိၤအဂီၢ်ဒီးအဝဲသ့ၣ်ဆၢထၢၣ်လၢအဝဲအဃၢၤဒီးဖီၣ်ဃးအဝဲ အစုတီၤဒီးယူာ်ထီၣ်အီၤကျၢၤကျၢၤတုၤလၢမုၢ်လီၤနုာ်ဝဲန့ၣ်လီၤ.
13 လၢကျဲဒ်အံၤန့ၣ်, စီၤယိၤၡူမၤနၢၤမၤဃၣ်ကွံာ်ပှၤဧမၤလ့းဖိ တဖၣ်လၢာ်လၢာ်ဆ့ဆ့န့ၣ်လီၤ.
14 ဒီးယွၤစံးဘၣ်စီၤမိၤၡ့, “ကွဲးနီၣ်တၢ်မၤနၢၤတမံၤအံၤ အဂ့ၢ်အကျိၤဒ်သိးကဘၣ်တၢ်သ့ၣ်နီၣ်အီၤတက့ၢ်. တဲဘၣ်စီၤယိၤၡူလၢယကမၤနၢၤကွံာ်ပှၤဧမၤလ့းဖိလၢာ်လၢာ်ဆ့ ဆ့န့ၣ်တက့ၢ်.”
15 စီၤမိၤၡ့ဘှီထီၣ်တၢ်လုၢ်တၢ်ပာ်အလီၢ်တခါဒီးကိးဝဲအမံၤလၢ, “ယွၤစံးနံး” အခီပညီ, “ယွၤမ့ၢ်ယနီၣ်တယၢ်” န့ၣ်လီၤ.
16 အဝဲစံးဝဲဒၣ်, “ယူာ်ထီၣ်ထီယွၤအနီၣ်တယၢ်တက့ၢ်. ယွၤကဒုးဒံးတၢ်ထီဒါပှၤဧမၤလ့းဖိတဘိယူၢ်ဃီန့ၣ်လီၤ.”