15
1 တုၤနုၤတစု, စီၤမိၤၡ့ဒီးပှၤအံၣ်စရ့လးဖိတဖၣ်သးဝံၣ်တၢ် သးဝံၣ်အံၤဆူယွၤအအိၣ်လီၤ.
“ယကသးဝံၣ်ထီၣ်ယွၤလီၤ. အဂ့ၢ်ဒ်အံၤ, အဝဲမၤနၢၤတၢ်အိၣ်ဒီးတၢ်မၤနၢၤအကဟုကညီၢ်ဖးဒိၣ်လီၤ.
အဝဲတြူာ်ကွံာ်ကသ့ၣ်တဖၣ်ဒီးပှၤလၢအဒိးအီၤတဖၣ်ဆူပီၣ်လဲၣ်ပူၤလီၤ.
2 ယွၤမ့ၢ်ပှၤအိၣ်ပှိၤယၤလၢအဂံၢ်အဘါဆူၣ်လီၤ.
အဝဲမ့ၢ်ပှၤတဂၤလၢအအုၣ်က့ၤခီၣ်က့ၤယၤလီၤ.
အဝဲမ့ၢ်ယကစၢ်ယွၤဒီးယကစံးထီၣ်ပတြၢၤအီၤ,
မ့ၢ်ယပၢ်အကစၢ်ယွၤဒီးယကသးဝံၣ်ထီၣ်အတၢ်ဒိၣ်တၢ်ထီအဂ့ၢ်လီၤ.
3 ယွၤမ့ၢ်ပှၤဒုးတၢ်တဂၤ,
4 အဝဲကွံာ်တ့ၢ်ကွံာ်ကီၢ်အဲၤကူပတူးအသုးမုၢ်ဒီးအလ့ၣ်ကဟၣ်ဒုး သုးတဖၣ်ဆူပီၣ်လဲၣ်ပူၤ,
အသုးခိၣ်သုးနၢ်အဂ့ၤကတၢၢ်တဖၣ်လီၤအုးသံလၢပီၣ်လဲၣ်ဂီၤအပူၤလီၤ.
5 ပီၣ်လဲၣ်ယိာ်လုၣ်ဘၢအဝဲသ့ၣ်
ဒီးလီၤဘျၢဝဲတုၤဆူအခံဒးဒ်လၢၢ်တဖျၢၣ်အသိးန့ၣ်လီၤ.
6 ယွၤဧၢ, နစုထွဲလီၤလးမးလၢတၢ်စိကမီၤအပူၤလီၤ.
မၤဟးဂီၤဒုၣ်ဒါတဖၣ်တုၤအလီၤသဘှံးလီၤ.
7 နမၤနၢၤကွံာ်နဒုၣ်နဒါတဖၣ်လၢနတၢ်ကဟုကညီၢ်အတၢ်မၤနၢၤလီၤ.
နတၢ်သးဒိၣ်ကပျီၤထီၣ်ဝဲဒီးအီၣ်ကွံာ်အဝဲသ့ၣ်ခဲလၢာ်ဒ်ဘုလီၢ် အသိးလီၤ.
8 နအူထီၣ်ကလံၤလၢပီၣ်လဲၣ်အဖီခိၣ်ဒီးထံပာ်ဖှိၣ်အသးထီၣ်ထီဆူ ထး,
ဆၢထၢၣ်ဝဲဘျၢယုၢ်ကလာ်ဒ်တၢ်အဒူၣ်အသိး
ဒီးပီၣ်လဲၣ်အလီၢ်ယိာ်ကတၢၢ်န့ၣ်ကဲထီၣ်တၢ်လီၢ်အကိၤလီၤ.
9 ဒုၣ်ဒါန့ၣ်စံးဝဲဒၣ်, ယကလူၤထွဲဒီးဖီၣ်န့ၢ်အဝဲသ့ၣ်,
ယကနီၤဖးအတၢ်စုလီၢ်ခီၣ်ခိၣ်ဒီးဟံးန့ၢ်ကယဲၢ်တၢ်လၢယသးလီခဲလၢာ်,
ယကထုးထီၣ်ယနးဒီးဟံးန့ၢ်တၢ်အိၣ်ဒီးအဝဲသ့ၣ်ခဲလၢာ်န့ၣ်လီၤ.
10 ဘၣ်ဆၣ်ဒီးယွၤဧၢ, နတၢ်သါထီၣ်တဘီမၤလီၤအုးသံကွံာ်ပှၤ အဲၤကူပတူးဖိတဖၣ်လီၤ.
အဝဲသ့ၣ်လီၤဘျၢဝဲဒ်စၢၢ်လၢထံ လီၤပျံၤလီၤဖုးအပူၤအသိးန့ၣ်လီၤ.
11 ယွၤဧၢ, လၢကစၢ်တဖၣ်အကျါန့ၣ်မ့ၢ်မတၤတဂၤလီၤဂာ်ဒ်သိးနၤန့ၣ်လဲၣ်.
မ့ၢ်မတၤတဂၤလီၤဂာ်ဒ်သိးနၤလၢတၢ်လီၤလးအတၢ်စီဆှံအပူၤန့ၣ်လဲၣ်.
မ့ၢ်မတၤတဂၤမၤတၢ်လီၤလးဒီးမၤတၢ်ဒိၣ်ဒိၣ်မုၢ်မုၢ်တဖၣ်ဒ်နမၤတ့ၢ်အသိးန့ၣ်သ့ဝဲလဲၣ်.
12 နယူာ်ထီၣ်နစုထွဲဒီးဟီၣ်ခိၣ်ယူၢ်လီၤကွံာ်ပဒုၣ်ပဒါ တဖၣ်လီၤ.
13 လၢနတၢ်သးတီဒီးနတၢ်အၢၣ်လီၤန့ၣ်, နဆှၢနပှၤဂီၢ်မုၢ်လၢ နအုၣ်က့ၤခီၣ်က့ၤတ့ၢ်အီၤန့ၣ်လီၤ.
လၢနဂံၢ်နဘါန့ၣ်နဆှၢတ့ၢ်အဝဲသ့ၣ်ဆူနကီၢ်စီဆှံ အပူၤလီၤ.
14 ပှၤကလုာ်တဖၣ်နၢ်ဟူဝဲဒီးအဝဲသ့ၣ်ကနိးကစုာ်လၢတၢ်ပျံၤတၢ်ဖုး အပူၤလီၤ.
ပှၤဖလ့ၡသးဖိတဖၣ်ဘၣ်တၢ်စှီၤတံၢ်အီၤလၢတၢ်ပျံၤ တၢ်ဖုးလီၤ.
15 ခိၣ်နၢ်တဖၣ်လၢကီၢ်အဒိၣ်အပူၤန့ၣ်ပျံၤတၢ်နးနးကလဲာ်,
ကီၢ်မိၤအးအပှၤဂံၢ်ဆူၣ်ဘါဆူၣ်တဖၣ်ကနိးကစုာ်ဝဲ,
ဒီးပှၤဂီၢ်မုၢ်လၢကီၢ်ကနၤဧၣ်အတၢ်သူၣ်ဒူသးဒူ လီၤမၢ်ကွံာ်လီၤ.
16 တၢ်ပျံၤတၢ်ဖုးနးနးကလဲာ်လီၤဘၣ်လၢအဝဲသ့ၣ် အလိၤလီၤ.
အဝဲသ့ၣ်ထံၣ်ဘၣ်နဂံၢ်နဘါ, ယွၤဧၢ.
ဒီးဆၢထၢၣ်လၢတၢ်မၤနၢၤတအိၣ်ဘၣ်အပူၤဃုာ်ဒီးတၢ်ပျံၤတၢ်ဖုး တုၤနပှၤဂီၢ်မုၢ်လဲၤထီၣ်ပူၤကွံာ်ဝဲတစု, နပှၤဂီၢ်မုၢ်လၢနမၤထူၣ်ဖျဲးထီၣ်အီၤလၢကုၢ်အလီၢ်န့ၣ်လီၤ.
17 ယွၤဧၢ, နဟဲစိာ်နုာ်အီၤဒီးသူၣ်လီၤအီၤလၢနကစၢၢ်ဒီခိၣ်,
တၢ်လီၢ်ဖဲနၤ, ယွၤဃုထၢတ့ၢ်အီၤလၢနဟံၣ်အဂီၢ်,
ယွၤအတၢ်လုၢ်ဟံၣ်လၢနနီၢ်ကစၢ်ဒၣ်နဲနသူၣ်ထီၣ် အီၤလီၤ.
18 နဲဒၣ်, ယွၤဧၢ, နကမ့ၢ်စီၤပၤအစိၤစိအဃၣ်ဃၣ်လီၤ.”
19 ပှၤအံၣ်စရ့လးဖိတဖၣ်လဲၤခီဂာ်ပီၣ်လဲၣ်လၢဟီၣ်ခိၣ်ဃ့ထီအဖီ ခိၣ်လီၤ. ဘၣ်ဆၣ်ဖဲပှၤအဲၤကူပတူးဖိအလ့ၣ်ကဟၣ်ဒုးသုးတဖၣ်, ဃုာ်ဒီးအကသ့ၣ်တဖၣ်ဒီးအပှၤနီၣ်တၢ်တဖၣ်လဲၤနုာ်ဆူပီၣ်လဲၣ်ပူၤ န့ၣ်, ယွၤဒုးဟဲက့ၤကဒါက့ၤထံတဖၣ်ဒီးလုၣ်ဘၢကွံာ်အဝဲသ့ၣ်န့ၣ်လီၤ.
20 ဝံမုၣ်နီၢ်မံးရယၣ်လၢအမ့ၢ်စီၤအၤဟရိၣ်အဒီပုၢ်ဝဲၢ်မုၣ်ဟံး ထီၣ်အဒၢတြုၤလၢအစုပူၤဒီးကယဲၢ်ပိာ်မုၣ်ခဲလၢာ်, ပိာ်ထီၣ်အခံအိၣ်ဒီးဒၢတြုၤတဖၣ်ဒီးဂဲၤကလံာ်ဝဲလီၤ.
21 နီၢ်မံးရယၣ်သးဝံၣ်ထီၣ်တၢ်လၢအဝဲသ့ၣ်အဂီၢ်,
“သးဝံၣ်ထီၣ်ယွၤတက့ၢ်. အဂ့ၢ်ဒ်အံၤ, အဝဲမၤနၢၤတ့ၢ်လံ တၢ်မၤနၢၤလီၤကဟုကညီၢ်တမံၤလီၤ.
အဝဲကွံာ်လီၤကသ့ၣ်တဖၣ်ဒီးပှၤဒိးအီၤတဖၣ်ဆူ ပီၣ်လဲၣ်အပူၤလီၤ.”
22 အန့ၣ်ဝံၤဒီး, စီၤမိၤၡ့ဆှၢကီၢ်အံၣ်စရ့လးအပှၤဂီၢ်မုၢ်လၢ ပီၣ်လဲၣ်ဂီၤဆူပှၢ်မုၢ်ကနၢၡူၢ်အပူၤန့ၣ်လီၤ. အဝဲသ့ၣ်လဲၤခီတ့ၢ်ပှၢ်မုၢ်ကနၢသၢသီညါဘၣ်ဆၣ်တထံၣ်န့ၢ်ထံ နီတစဲးဘၣ်.
23 အန့ၣ်ဝံၤဒီးအဝဲသ့ၣ်တုၤမၤရၤန့ၣ်လီၤ. ဘၣ်ဆၣ်ထံအိၣ်ဖဲတၢ် အလီၢ်န့ၣ်ခၣ်ဝဲတုၤဒၣ်လဲာ်အဝဲသ့ၣ်အီဝဲတန့ၢ်ဘၣ်န့ၣ်လီၤ. လၢတၢ်န့ၣ်အဃိတၢ်လီၢ်န့ၣ်ဘၣ်တၢ်ကိးအီၤလၢမၤရၤန့ၣ်လီၤ.
24 ပှၤဂီၢ်မုၢ်ကဒူးကဒ့ၣ်တၢ်ဆူစီၤမိၤၡ့အအိၣ်ဒီးသံကွၢ်ဝဲ, “ပကဘၣ်အီတၢ်မနုၤလဲၣ်.”
25 ဒီးစီၤမိၤၡ့ဘါထုကဖၣ်တၢ်လၢအသူၣ်ကံၢ်သးလဲဆူယွၤအအိၣ် ဒီးယွၤဒုးနဲၣ်အီၤလၢသ့ၣ်တကူးလာ်လီၤ. အဝဲကွံာ်နုာ်ဝဲဆူထံအကျါဒီိးထံန့ၣ်ကဲထီၣ်ထံလၢတၢ်အီ အီၤသ့န့ၣ်လီၤ.
ဖဲန့ၣ်ယွၤဟ့ၣ်လီၤအဝဲသ့ၣ်လၢတၢ်ဘူၣ်တၢ်ဘါအတၢ်သိၣ်တၢ်သီ တဖၣ်လၢကအိၣ်မူထွဲဝဲအဂီၢ်, ဒီးမၤကွၢ်စ့ၢ်ကီးအဝဲသ့ၣ်န့ၣ်လီၤ.
26 ဒီးယွၤစံးဝဲဒၣ်, “သုမ့ၢ်ဒိကနၣ်ယၤလၢလၢပှဲၤပှဲၤ, ခီဖျိမၤတၢ်ဒ်တၢ်ဘၣ်ယသးဒီးတိၢ်န့ၢ်ဖံးဃၣ်ယတၢ်မၤလိာ်တဖၣ် န့ၣ်, ယတစံၣ်ညီၣ်ဘၣ်သုလၢတၢ်ဆါတဖၣ်လၢယဒုးလီၤဘၣ်အီၤ လၢပှၤအဲၤကူပတူးဖိတဖၣ်အလိၤန့ၣ်ဘၣ်. ယမ့ၢ်ယွၤ, ပှၤတဂၤလၢအမၤဘျါသုန့ၣ်လီၤ.”
27 လၢခံဒီးအဝဲသ့ၣ်ဟဲတုၤဆူအ့လံၣ်, ဖဲထံထီၣ်ပၢၢ်အိၣ်ဝဲတ ဆံခံပူၤဒီးစူၣ်ပလိၣ်အမုၢ်အိၣ်နွံဆံန့ၣ်လီၤ. ဖဲန့ၣ်အဝဲသ့ၣ်သူၣ်ဒဲလၢထံအဃၢၤန့ၣ်လီၤ.