12
1 ယွၤကတိၤတၢ်ဒီးစီၤမိၤၡ့ဒီးစီၤအၤဟရိၣ်လၢကီၢ်အဲၤကူပတူးအပူၤ, စံးဝဲ
2 “လါတလါအံၤလၢသုဂီၢ်ကဘၣ်မ့ၢ်လါအခီၣ်ထံးကတၢၢ်တလါလၢတနံၣ် ဘၣ်တနံၣ်အဂီၢ်န့ၣ်လီၤ.
3 ဟ့ၣ်လီၤတၢ်သိၣ်တၢ်သီတဖၣ်အံၤလၢပှၤအံၣ်စရ့လးဖိအဒူၣ်ဖိ ထၢဖိခဲလၢာ်အဂီၢ်န့ၣ်တက့ၢ်. လါထီၣ်အသီတဆံအနံၤလၢလါတဘ့ၣ်အံၤအပူၤန့ၣ်, ပှၤတဂၤဘၣ်တဂၤကဘၣ်ဃုထၢသိဖိတဒုမ့တမ့ၢ်မဲာ်တဲးလဲးအစၢ်ဖိ တဒုလၢအဟံၣ်ဖိဃီဖိအဂီၢ်န့ၣ်လီၤ.
4 အဟံၣ်ဖိဃီဖိမ့ၢ်စှၤကဲာ်ဆိးလၢကအီၣ်ဆၣ်ဖိကီၢ်ဖိဒီဒုညါန့ၣ်ဒီး, မ်အဝဲဒၣ်ဒီးအပှၤလၢအအိၣ်ဘူးဒီးအဟံၣ်န့ၣ်ကနီၤလိာ်သကိးအသး ဒ်ပှၤအနီၣ်ဂံၢ်အိၣ်ဝဲအသိးဒီးအီၣ်ဝဲကလၢာ်န့ၣ်တက့ၢ်.
5 သုဃုထၢသိတဒုမ့တမ့ၢ်မဲာ်တဲးလဲးတဒုသ့ဝဲလီၤ. ဘၣ်ဆၣ်ဒီးကဘၣ်မ့ၢ်အဖါတဒုလၢအသးအိၣ်တနံၣ်ဒီးတအိၣ်ဘၣ်ဒီးတၢ် လီၤတူာ်လီၤကာ်နီတမံၤဘၣ်န့ၣ်လီၤ.
6 ဒီးလၢလါတလါအံၤတဆံလွံၢ်နံၤတနံၤဟါခီန့ၣ်ကီၢ်အံၣ်စရ့လး အကမျၢၢ်အဟံၣ်ဖိဃီဖိကိးဒူၣ်ဒဲးကဘၣ်မၤသံဆၣ်ဖိကီၢ်ဖိတဖၣ် န့ၣ်လီၤ.
7 ပှၤဂီၢ်မုၢ်ကဘၣ်ဟံးန့ၢ်တၢ်သွံၣ်တနီၤဒီးထွါအီၤလၢတြဲၤအထူၣ် တဖၣ်အလိၤဒီးလၢတြဲၤတဖၣ်အခိၣ်ထိးဖဲဟံၣ်လၢဆၣ်ဖိကီၢ်ဖိတဖၣ် ကဘၣ်တၢ်အီၣ်အီၤန့ၣ်လီၤ.
8 ဒီးလၢမုၢ်နၤအဝဲန့ၣ်တၢ်ဖံးတၢ်ညၣ်ကဘၣ်တၢ်ကၣ်မံအီၤဒီးအီၣ် အီၤဃုာ်ဒီးကိၣ်လၢတအိၣ်ဘၣ်ဒီးကိၣ်မံၣ်ဒီးတၢ်ဒီးတၢ်လၣ်အခၣ်န့ၣ်လီၤ.
9 အီၣ်သံကစဲာ်အီၤမ့တမ့ၢ်ချီအီၣ်အီၤတစဲးတဂ့ၤ. မ့မ့ၢ်ကၣ်မံအီၤလၢမ့ၣ်အူဒီဒုဃုာ်ဒီးအခိၣ်, အခီၣ်ဒီးတၢ်အိၣ်လၢအလဲပူၤတဖၣ်န့ၣ်တက့ၢ်.
10 သုတပာ်လီၤတဲာ်တၢ်နီတမံၤတုၤမုၢ်ဆ့ၣ်ထီၣ်န့ၣ်တဂ့ၤ. မ့ၢ်အိၣ်လီၤတဲာ်တ့ၢ်တမံၤမံၤန့ၣ်ဒီးကဘၣ်တၢ်ဆူးကဲၤထီၣ်ကွံာ်အီၤန့ၣ်လီၤ.
11 သုကဘၣ်အီၣ်အီၤချ့ချ့လီၤ. အဂ့ၢ်ဒ်အံၤ, သုကဘၣ်ကတဲာ်ကတီၤသုသးလၢတၢ်လဲၤတၢ်က့ၤအဂီၢ်, အိၣ်ဒီးသုခီၣ်ဖံးတဖၣ်လၢသုခီၣ်အလိၤဒီးသုနီၣ်က့အိၣ်လၢ သုစုပူၤန့ၣ်လီၤ. အအံၤမ့ၢ်ဘူၣ်လဲၤကပာ်လၢတၢ်မၤလၤကပီၤယၤယွၤအဂီၢ်န့ၣ်လီၤ.
12 လၢမုၢ်နၤအဝဲန့ၣ်ယကလဲၤခီဂာ်ကီၢ်အဲၤကူပတူးဒီးမၤသံကွံာ် ကယဲၢ်တၢ်အဝဲၢ်ကိအပိာ်ခွါမ့တမ့ၢ်အဖါလၢကီၢ်အဲၤကူပတူးအပူၤ လၢပှၤကညီတုၤလၢဆၣ်ဖိကီၢ်ဖိဒီးစံၣ်ညီၣ်ကီၢ်အဲၤကူပတူး အကစၢ်ခဲလၢာ်န့ၣ်လီၤ. ယဲဒၣ်အံၤယမ့ၢ်ယွၤလီၤ.
13 တၢ်သွံၣ်လၢတြဲၤအထူၣ်တဖၣ်အလိၤန့ၣ်ကမ့ၢ်တၢ်ပနီၣ်တမံၤလၢဟံၣ် လၢသုအိၣ်လၢအပူၤအဂီၢ်န့ၣ်လီၤ. တုၤယထံၣ်တၢ်သွံၣ်န့ၣ်ဒီးယကလဲၤကပာ်ကွံာ်သု, ဒီးတုၤယစံၣ်ညီၣ်ပှၤအဲၤကူပတူးဖိတဖၣ်န့ၣ်ဒီးယတမၤဆါသုဘၣ်န့ၣ်လီၤ.
14 သုကဘၣ်မၤလၤကပီၤမုၢ်နံၤအံၤဒ်တၢ်ဘူၣ်တၢ်ဘါအဘူၣ်တဘူၣ်ဒ်သိး ကဒုးသ့ၣ်နီၣ်ထီၣ်က့ၤသုတၢ်လၢယၤ, ယွၤမၤတ့ၢ်အီၤန့ၣ်လီၤ. မၤလၤကပီၤအီၤလၢဆၢကတီၢ်လၢအကဟဲထီဘိတက့ၢ်.”
15 ဒီးယွၤစံးဝဲဒၣ်, “လၢနွံသီအတီၢ်ပူၤန့ၣ်သုတဘၣ်အီၣ်ကိၣ် လၢအဘၣ်တၢ်မၤအီၤလၢကိၣ်မံၣ်နီတမံၤဘၣ်. အီၣ်ထဲကိၣ်လၢတအိၣ်ဘၣ်ဒီးကိၣ်မံၣ်န့ၣ်တက့ၢ်. လၢအခီၣ်ထံးတသီန့ၣ်သုကဘၣ်စူးကွံာ်ကိၣ်မံၣ်ခဲလၢာ် လၢသုဟံၣ်အပူၤတဖၣ်န့ၣ်လီၤ. အဂ့ၢ်ဒ်အံၤ, ပှၤတဂၤလၢ်လၢ်မ့ၢ်အီၣ်ဘၣ်ကိၣ်လၢတၢ်မၤအီၤလၢကိၣ် မံၣ်, လၢနွံသီအတီၢ်ပူၤန့ၣ်ကဘၣ်တၢ်ညိကွံာ်အီၤလၢယပှၤဂီၢ်မုၢ် အကျါန့ၣ်လီၤ.
16 ဒီးလၢအခီၣ်ထံးတသီဒီးနွံသီတသီန့ၣ်သုကဘၣ်ပာ်ဖှိၣ်ထီၣ်သု သးလၢတၢ်ဘူၣ်ထီၣ်ဘါထီၣ်အဂီၢ်လီၤ. လၢမုၢ်နံၤတဖၣ်န့ၣ်အတီၢ်ပူၤသုတဘၣ်မၤတၢ်နီတမံၤဘၣ်. ဘၣ်ဆၣ်ဒီးသုကတဲာ်ကတီၤတၢ်အီၣ်တၢ်အီသ့ဝဲလီၤ.
17 တိၢ်န့ၢ်ဘူၣ်ကိၣ်တအိၣ်ဘၣ်ဒီးကိၣ်မံၣ်အံၤန့ၣ်တက့ၢ်. အဂ့ၢ်ဒ်အံၤ, လၢမုၢ်နံၤအဝဲအံၤန့ၣ်ယဒုးဟးထီၣ်ကွံာ်သု ဒူၣ်တဖၣ်လၢကီၢ်အဲၤကူပတူးအပူၤလီၤ. သုကဘၣ်တိၢ်န့ၢ်မုၢ်တနံၤအံၤဒ်ဘူၣ်ဖးဒိၣ်တဘူၣ်အသိးအစိၤစိၤ အဃၣ်ဃၣ်န့ၣ်လီၤ.
18 စးထီၣ်လၢလါအခီၣ်ထံးတလါတဆံလွံၢ်သီဟါတုၤဃီၤလၢခံဆံ တသီဟါန့ၣ်သုတဘၣ်အီၣ်ကိၣ်တခါလၢ်လၢ်လၢအဘၣ်တၢ်မၤအီၤဒီးကိၣ် မံၣ်န့ၣ်ဘၣ်.
19 လၢနွံသီအတီၢ်ပူၤန့ၣ်ကိၣ်မံၣ်တဘၣ်အိၣ်လၢသုဟံၣ်တဖၣ်အပူၤ ဘၣ်. အဂ့ၢ်ဒ်အံၤ, ပှၤတဂၤလၢ်လၢ်လၢအအိၣ်ဖျဲၣ်ထီၣ်လၢကီၢ်ပူၤမ့ၢ် ဂ့ၤ, လၢတခီဘီမုၢ်ပူၤမ့ၢ်ဂ့ၤ, မ့ၢ်အီၣ်ကိၣ်လၢအဘၣ်တၢ်မၤအီလၢ ကိၣ်မံၣ်ဒီးအဝဲကဘၣ်တၢ်ညိကွံာ်အီၤလၢယပှၤကလုာ်အကျါန့ၣ်လီၤ.
20 တၢ်အိၣ်ဒီးကိၣ်မံၣ်န့ၣ်သုတဘၣ်အီၣ်နီတမံၤဘၣ်. သုဘၣ်အီၣ်ကိၣ်တအိၣ်ဒီးကိၣ်မံၣ်, ဖဲသုအိၣ်သုဆိးအလီၢ်ကိး ပူၤဒဲးလီၤ.”
21 ဒီးစီၤမိၤၡ့ကိးန့ၢ်ကီၢ်အံၣ်စရ့လးဖိအခိၣ်အနၢ်ခဲလၢာ်ဒီး စံးဘၣ်အဝဲသ့ၣ်, “သုဝဲတဂၤဘၣ်တဂၤသုကဘၣ်ဃုထၢထီၣ်သိဖိတဒုမ့တမ့ၢ်မဲာ် တဲးလဲးဖိတဒု, ဒီးမၤသံအီၤဒ်သိးသုဒူၣ်ဖိထၢဖိတဖၣ်မၤဘူၣ်လဲၤ ကပာ်ကသ့အဂီၢ်န့ၣ်တက့ၢ်.
22 ဒီးဟံးန့ၢ်ကဖျီၣ်အ့စိးတကဒိၣ်ဒီးဘျၢလီၤအီၤလၢသလၢအိၣ် ဒီးဆၣ်ဖိကီၢ်ဖိအသွံၣ်အပူၤဒီးထွါတၢ်သွံၣ်န့ၣ်လၢတြဲၤအထူၣ် တဖၣ်အလိၤဒီးကျိၤအိၣ်လၢသုဟံၣ်အတြဲၤဖီခိၣ်တက့ၢ်. တချုးလၢမုၢ်ဆ့ၣ်ထီၣ်ဒံးဘၣ်န့ၣ်ပှၤလၢသုကျါတဘၣ်ဟးထီၣ်လၢ ဟံၣ်နီတဂၤဘၣ်.
23 ဖဲယွၤလဲၤခီဂာ်ကီၢ်အဲၤကူပတူးဒ်သိးကမၤသံပှၤအဲၤကူပတူး ဖိတဖၣ်အခါန့ၣ်ကထံၣ်ဝဲတၢ်သွံၣ်အိၣ်လၢကျိၤတဖၣ်အလိၤဒီးတြဲၤ အထူၣ်တဖၣ်အလိၤဒီးတပျဲဘၣ်အတၢ်သံ အကလူးနုာ်လီၤဆူသုဟံၣ်တဖၣ်အပူၤဒီးမၤသံသုဘၣ်န့ၣ်လီၤ.
24 သုဝဲဒီးသုဖိသုလံၤတဖၣ်ကဘၣ်တိၢ်န့ၢ်တၢ်သိၣ်တၢ်ဘျၢတဖၣ်အံၤ လီၤထူလီၤယိာ်လီၤ.
25 ဖဲသုလဲၤနုာ်ဆူကီၢ်တဘ့ၣ်လၢယွၤအၢၣ်လီၤတ့ၢ်လၢကဟ့ၣ်သုဒီး, သုကဘၣ်မၤတၢ်အလုၢ်အလၢ်အံၤန့ၣ်လီၤ.
26 ဖဲသုဖိသုလံၤတဖၣ်သံကွၢ်သုလၢတၢ်အလုၢ်အလၢ်အံၤအခီ ပညီမ့ၢ်ဒ်လဲၣ်န့ၣ်,
27 သုကဘၣ်စံးဆၢလၢအအံၤမ့ၢ်တၢ်လုၢ်တၢ်ပာ်ဘၣ်ဃးဘူၣ်လဲၤကပာ်လၢ တၢ်ကမၤလၤကပီၤယွၤအဂီၢ်န့ၣ်လီၤ. အဂ့ၢ်ဒ်အံၤ, ယွၤလဲၤကပာ်ကွံာ်ပှၤအံၣ်စရ့လးဖိတဖၣ်အဟံၣ်လၢ ကီၢ်အဲၤကူပတူးအပူၤန့ၣ်လီၤ. အဝဲမၤသံကွံာ်ပှၤအဲၤကူပတူးဖိတဖၣ်ဒီးပျၢ်ဖျဲးပှၤန့ၣ်လီၤ.”
ဒီးပှၤအံၣ်စရ့လးဖိတဖၣ်တီၤလီၤဒီးဘူၣ်ထီၣ်ဘါထီၣ်ယွၤလီၤ.
28 အန့ၣ်ဒီးပှၤအံၣ်စရ့လးဖိတဖၣ်လဲၤဒီးမၤဝဲဒ်ယွၤမၤလိာ်စီၤမိၤၡ့ဒီးစီၤအၤဟရိၣ်အသိးန့ၣ်လီၤ.
29 လၢဖးဖီမုၢ်န့ၣ်ယွၤမၤသံကွံာ်ကယဲၢ်ဖိခွါဝဲၢ်ကိတဖၣ်လၢ ကီၢ်အဲၤကူပတူးအပူၤ, စးထီၣ်လၢစီၤပၤအဖိခွါလၢအကထီၣ်က့ၤနီ, တုၤလၢပှၤဘၣ်တၢ်စၢဃာ်လၢဃိာ်ပူၤတဖၣ်အဖိဝဲၢ်ကိန့ၣ်လီၤ. ကယဲၢ်ဆၣ်ဖိကီၢ်ဖိအဖိဝဲၢ်ကိတဖၣ်စ့ၢ်ကီးဘၣ်တၢ်မၤသံ အီၤန့ၣ်လီၤ.
30 လၢမုၢ်နၤအဝဲန့ၣ်, စီၤပၤ, အဝဲအခ့အပှၤတဖၣ်ဒီးကယဲၢ်ပှၤအဲၤကူပတူးဖိခဲလၢာ်ဖုးပၢၢ်ထီၣ်ဝဲဒၣ်လီၤ. ဒီးတၢ်ဟီၣ်ကိးပသူဖးဒိၣ်အိၣ်ထီၣ်ဝဲဒၣ်လၢကီၢ်အဲၤကူပတူး ဒီဘ့ၣ်ညါအပူၤမ့ၢ်လၢဖိဝဲၢ်ကိတဖၣ်သံဝဲဒၣ်လၢဟံၣ်ကိးဖျၢၣ် ဒဲးအပူၤအဃိန့ၣ်လီၤ.
31 ဒီးလၢမုၢ်တနၤဃီန့ၣ်စီၤပၤမၢပှၤလဲၤကိးန့ၢ်အီၤစီၤမိၤၡ့ဒီးစီၤအၤဟရိၣ်ဒီးစံးဝဲဒၣ်, “သုဝဲဒီးသုပှၤအံၣ်စရ့လးဖိခဲလၢာ် ဟးထီၣ်ကွံာ်တက့ၢ်.ပာ်တ့ၢ်ယထံယကီၢ်, လဲၤဒီးဘူၣ်ထီၣ်ဘါထီၣ်ယွၤဒ်သုဃ့တ့ၢ်လံအသိးန့ၣ်တက့ၢ်.
32 ဟံးန့ၢ်သုသိတဖၣ်, မဲာ်တဲးလဲးတဖၣ်ဒီးဂီၤဖံးတဖၣ်ဒီးဟးထီၣ်ကွံာ်တက့ၢ်. ဒီးဃ့ဘါထုကဖၣ်န့ၢ်စ့ၢ်ကီးလၢယတၢ်ဆိၣ်ဂ့ၤတမံၤအဂီၢ်တက့ၢ်.”
33 ပှၤအဲၤကူပတူးဖိတဖၣ်မၢကီၢ်အံၣ်စရ့လးအပှၤဂီၢ်မုၢ်လၢကမၤ ချ့ချ့ဒီးဟးထီၣ်ကွံာ်လၢထံကီၢ်အပူၤန့ၣ်လီၤ. အဝဲသ့ၣ်စံးဝဲဒၣ်, “သုမ့ၢ်တဟးထီၣ်ဘၣ်ဒီးပဝဲခဲလၢာ်ပကသံ ကွံာ်လီၤ.”
34 မၤသးဒ်န့ၣ်ဒီး, ပှၤဂီၢ်မုၢ်မၤပှဲၤအသပၢၤဘံၣ်သလၣ်တဖၣ်လၢကိၣ် ကမူၣ်ဃါဃုာ်အသးဒီးထံလၢတအိၣ်ဘၣ်ဒီးကိၣ်မံၣ်, ဘိၣ်ထီၣ်အီၤလၢတၢ်ကံးယာ်ဒီးယိးထီၣ်အီၤလၢအဖံဘၣ်ခိၣ်အလိၤ န့ၣ်လီၤ.
35 ပှၤအံၣ်စရ့လးဖိတဖၣ်မၤဝဲဒ်စီၤမိၤၡ့စံးဘၣ်တ့ၢ်အီၤအသိး, ဒီးဃ့ဝဲပှၤအဲၤကူပတူးဖိတဖၣ်လၢအတၢ်ကယၢကယဲထူဒီးစ့တဖၣ် ဒီးတၢ်ကူတၢ်သိးတဖၣ်န့ၣ်လီၤ.
36 ဒီးယွၤမၤဝဲဒ်သိးပှၤအဲၤကူပတူးဖိတဖၣ်ကပာ်ကဲပှၤဂီၢ်မုၢ် ဒီးဟ့ၣ်တၢ်လၢအဝဲသ့ၣ်ဃ့ဝဲတဖၣ်န့ၣ်လီၤ. လၢကျဲဒ်အံၤန့ၣ်, ပှၤအံၣ်စရ့လးဖိတဖၣ်ဟံးန့ၢ်ကွံာ်ပှၤအဲၤကူပတူးဖိတဖၣ် အတၢ်ထူးတၢ်တီၤန့ၣ်လီၤ.
37 ပှၤအံၣ်စရ့လးဖိတဖၣ်ဟးထီၣ်ဝဲလၢအခီၣ်စးထီၣ်လၢဝ့ၢ်ရၤမစ့ တုၤဆူဝ့ၢ်စူးကိၤသးန့ၣ်လီၤ. ပှၤပိာ်ခွါအိၣ်ဝဲဒၣ်အဂၤဃုကလီၢ်ဃၣ် ဃၣ်ဒီးပိာ်မုၣ်တဖၣ်ဒီးဖိသၣ်တဖၣ်တဘၣ်တၢ်ဂံၢ်ဃုာ်အီၤဘၣ်.
38 ပှၤဂီၢ်မုၢ်အဂၤဂီၢ်မုၢ်ဂီၢ်ပၤ, သိတဖၣ်မဲာ်တဲးလဲးတဖၣ်, ဒီးဂီၤဖံးအါအါဂီၢ်ဂီၢ်လဲၤဃုာ်တၢ်ဒီးအဝဲသ့ၣ်စ့ၢ်ကီးလီၤ.
39 အဝဲသ့ၣ်ဘၢကိၣ်တအိၣ်ဘၣ်ဒီးကိၣ်မံၣ်လၢကိၣ်ကမူၣ်ဃါဃုာ်ဒီးထံ လၢအဟဲစိာ်ဝဲလၢကီၢ်အဲၤကူပတူးအပူၤန့ၣ်လီၤ. အဂ့ၢ်ဒ်အံၤ, အဝဲသ့ၣ်ဘၣ်တၢ်နီၣ်ထီၣ်ကွံာ်အီၤလၢကီၢ်အဲၤကူ ပတူးအပူၤသတူၢ်ကလာ်အဃိတၢ်ဆၢကတီၢ်တအီၣ်ဘၣ်လၢက, ကတဲာ်ကတီၤအတၢ်အီၣ်မ့ၢ်ဂ့ၤ, ကတဲာ်ကတီၤကိၣ်ကမူၣ်ဃါဃုာ် ဒီးထံမ့ၢ်ဂ့ၤဘၣ်န့ၣ်လီၤ.
40 ပှၤအံၣ်စရ့လးဖိတဖၣ်အိၣ်ဆိးတ့ၢ်ဝဲဒၣ်လၢကီၢ်အဲၤကူပတူး အနံၣ်လွံၢ်ကယၤသၢဆံန့ၣ်လီၤ.
41 မုၢ်တနံၤဖဲအနံၣ်လွံၢ်ကယၤသၢဆံကတၢၢ်ဝဲန့ၣ်, ယွၤအပှၤဂီၢ်မုၢ်လၢဒူၣ်ကိးဒူၣ်ဒဲးအပူၤဟးထီၣ်ကွံာ်လၢကီၢ် အဲၤကူပတူးအပူၤန့ၣ်လီၤ.
42 အဝဲန့ၣ်မ့ၢ်မုၢ်တနၤလၢယွၤအိၣ်ခိးကွၢ်ဝဲဒ်သိးအကထုးထီၣ် ကွံာ်အဝဲသ့ၣ်လၢကီၢ်အဲၤကူပတူးအပူၤအဂီၢ်န့ၣ်လီၤ. မုၢ်တနၤဃီအံၤန့ၣ်မ့ၢ်မုၢ်တနၤလၢပှၤအံၣ်စရ့လးဖိအစၢၤ အသွဲၣ်တဖၣ်ကဘၣ်တိၢ်န့ၢ်အီၤဒီးပာ်စီဆှံအီၤလၢယွၤအဂီၢ်အစိၤ စိၤအဃၣ်ဃၣ်န့ၣ်လီၤ.
43 ဒီးယွၤစံးဘၣ်စီၤမိၤၡ့ဒီးစီၤအၤဟရိၣ်, “တၢ်တဖၣ်အံၤမ့ၢ်ဘူၣ်လဲၤကပာ်အကတၢ်သိၣ်တၢ်ဘျၢတဖၣ်လီၤ. ပှၤတခီဘီမုၢ်ဖိတဘၣ်အီၣ်ဘူၣ်လဲၤကပာ်အတၢ်အီၣ်နီတဂၤဘၣ်.
44 ဘၣ်ဆၣ်ဒီးကုၢ်တဂၤလၢ်လၢ်လၢသုပှ့ၤအီၤန့ၣ်သုမ့ၢ်ကူးတရံးဆိ အီၤသၢပျၢၤဒီးအီၣ်ဝဲသ့လီၤ.
45 ပှၤဟဲအိၣ်တစိၢ်တလီၢ်မ့ၢ်ဂ့ၤ, ပှၤမၤတၢ်ဖိလၢအဘၣ်တၢ်ဒိးလဲ အီၤတဖၣ်မ့ၢ်ဂ့ၤအီၣ်ဝဲတသ့နီတဂၤဘၣ်.
46 တၢ်အီၣ်ခဲလၢာ်န့ၣ်ကဘၣ်တၢ်အီၣ်အီၤလၢဟံၣ်ဖဲတၢ်ကတဲာ် ကတီၤတၢ်အီၣ်အံၤအပူၤန့ၣ်လီၤ. တၢ်တဘၣ်စိာ်ကွံာ်အီၤဆူဟံၣ်အချၢနီတစဲးဘၣ်. ဒီးတၢ်တဘၣ်တၢ်မၤကၢ်ဆၣ်ဖိကီၢ်ဖိအဃံနီတဘိဘၣ်.
47 ကီၢ်အံၣ်စရ့လးအကမျၢၢ်ဒီဒူၣ်ကဘၣ်တိၢ်န့ၢ်မူးဖးဒိၣ်အံၤန့ၣ်လီၤ.
48 ဘၣ်ဆၣ်ဒီးပှၤလၢတဒိးတၢ်ကူးတရံးအီၤတဖၣ်တဘၣ်အီၣ်အီၤနီတဂၤ ဘၣ်. ပှၤတခီဘီမုၢ်ဖိလၢအအိၣ်အဆိးလၢသုကျါမ့ၢ်အဲၣ်ဒိးတိၢ်န့ၢ် ဘူၣ်လဲၤကပာ်အံၤဒီးမၤလၤကပီၤယွၤန့ၣ်သုကဘၣ်ကူးတရံးဆိ ကယဲၢ်ပှၤပိာ်ခွါတဖၣ်လၢဒူၣ်ဖိထၢဖိတဒူၣ်န့ၣ်အပူၤလီၤ. စးထီၣ်ဖဲန့ၣ်အဝဲဒၣ်ကဘၣ်တၢ်ပာ်အီၤဒ်ပှၤအံၣ်စရ့လးဖိလၢ အအိၣ်ဖျဲၣ်လၢကီၢ်ပူၤတဂၤအသိးဒီးတူၢ်လိာ်အီၤလၢဘူၣ်အပူၤန့ၣ်လီၤ.
49 တၢ်သိၣ်တၢ်ဘျၢတဖၣ်အံၤဘၣ်ထွဲဒီးပှၤအံၣ်စရ့လးဖိလၢအအိၣ် ဖျဲၣ်လၢကီၢ်ပူၤမ့ၢ်ဂ့ၤပှၤတခီဘီမုၢ်ဖိလၢအအိၣ်အဆိးလၢသုကျါမ့ၢ်ဂ့ၤဒ်သိးသိးန့ၣ်လီၤ.”
50 ဒီးကယဲၢ်ပှၤအံၣ်စရ့လးဖိခဲလၢာ်စူၢ်ဒီးမၤထွဲတၢ်လၢယွၤမၤ လိာ်တ့ၢ်စီၤမိၤၡ့ဒီးစီၤအၤဟရိၣ်တဖၣ်န့ၣ်လီၤ.
51 ဒီးလၢမုၢ်နံၤအဝဲန့ၣ်, ယွၤထုးထီၣ်ကွံာ်ပှၤအံၣ်စရ့လးဖိ အဒူၣ်တဖၣ်လၢကီၢ်အဲၤကူပတူးအပူၤန့ၣ်လီၤ.