13
1-2 ယွၤစံးဘၣ်စီၤမိၤၡ့, “ပာ်စီဆှံကယဲၢ်ဖိဝဲၢ်ကိပိာ်ခွါခဲလၢာ်လၢယဂီၢ်တက့ၢ်. အဂ့ၢ်ဒ်အံၤ, ပှၤအံၣ်စရ့လးဖိအဖိဝဲၢ်ကိပိာ်ခွါ, ဒီးကယဲၢ်ဆၣ်ဖိကီၢ်ဖိဝဲၢ်ကိအဖါခဲလၢာ်န့ၣ်ဘၣ်ဃးဒီးယၤလီၤ.”
3 ဒီးစီၤမိၤၡ့စံးဘၣ်ပှၤဂီၢ်မုၢ်, “သ့ၣ်နီၣ်ထီၣ်မုၢ်တနံၤအံၤ, မုၢ်တနံၤလၢသုဟးထီၣ်လၢကီၢ်အဲၤကူပတူး, တၢ်လီၢ်လၢသုကဲတ့ၢ်ကုၢ်န့ၣ်တက့ၢ်. တၢ်အံၤမ့ၢ်မုၢ်တနံၤလၢယွၤထုးထီၣ်ကွံာ်သုလၢအစိကမီၤဖးဒိၣ်န့ၣ်လီၤ. ကိၣ်လၢတၢ်မၤအီၤလၢကိၣ်မံၣ်န့ၣ်အီၣ်အီၤတဂ့ၤ.
4 သုဟးထီၣ်ကွံာ်လၢကီၢ်အဲၤကူပတူးအပူၤလၢမုၢ်တနံၤအံၤ, လၢလါခီၣ်ထံးကတၢၢ်တလါ, လါအၤဘံာ်အပူၤန့ၣ်လီၤ.
5 ယွၤအၢၣ်လီၤအီလီၤတ့ၢ်တၢ်လီၤတံၢ်လီၤဆဲးဒီးသုမိၢ်ပၢ်ဖံ ဖုလၢပျၢၤတဖၣ်လၢအကဟ့ၣ်သုလၢပှၤကနၤဧၣ်ဖိ, ပှၤဃ့ၤသးဖိ, ပှၤအမိၢ်ဖိ, ပှၤဃ့ၤဝံဖိဒီးပှၤယဘူၣ်ဖိတဖၣ်အကီၢ်န့ၣ်လီၤ. တုၤအဝဲဆှၢသုဆူကီၢ်လၢအထူးဝဲတီၤဝဲဒီးဟီၣ်ခိၣ်ညၣ်ထ့ၣ် ဂ့ၤဝဲတဘ့ၣ်အပူၤန့ၣ်သုကဘၣ်မၤဘူၣ်အံၤလၢလါအခီၣ်ထံး ကတၢၢ်တလါအပူၤကိးနံၣ်ဒဲးန့ၣ်လီၤ.
6 သုကဘၣ်အီၣ်ကိၣ်လၢအတအိၣ်ဒီးကိၣ်မံၣ်န့ၣ်နွံသီဒီးလၢနွံ နံၤတနံၤန့ၣ်, သုကဘၣ်မၤမူးတမူးလၢတၢ်မၤလၤကပီၤယွၤအဂီၢ်န့ၣ်လီၤ.
7 သုကဘၣ်အီၣ်ကိၣ်လၢအတအိၣ်ဒီးကိၣ်မံၣ်ဘၣ်န့ၣ်နွံသီ, ဒီးကိၣ်မံၣ်မ့ၢ်ဂ့ၤ, ကိၣ်လၢဘၣ်တၢ်မၤအီၤဒီးကိၣ်မံၣ်မ့ၢ်ဂ့ၤ တဘၣ်အိၣ်လၢသုကီၢ်ပူၤန့ၣ်နီတပူၤဘၣ်.
8 ဖဲဘူၣ်စးထီၣ်န့ၣ်, တဲနၢ်ပၢၢ်သုဖိခွါတဖၣ်လၢသုမၤတၢ်အံၤ န့ၣ်မ့ၢ်လၢယွၤမၤတ့ၢ်တၢ်လၢသုဂီၢ်ဖဲသုဟးထီၣ်လၢကီၢ်အဲၤ ကူပတူးအဃိန့ၣ်တက့ၢ်.
9 တၢ်အလုၢ်အလၢ်အံၤကမ့ၢ်တၢ်ဒုးသ့ၣ်နီၣ်ထီၣ်တၢ်, ဒ်တၢ်တမံၤလၢအဘၣ်တၢ်စၢဃးအီၤလၢသုစုလိၤမ့ၢ်ဂ့ၤလၢသု ခိၣ်တိသၣ်လိၤမ့ၢ်ဂ့ၤ, ဒ်သိးကဒုးသ့ၣ်နီၣ်ထီၣ်သုလၢသုကတိၢ် န့ၢ်ဒီးမၤလိထွဲယွၤအတၢ်သိၣ်တၢ်သီလၢအဟ့ၣ်လီၤပှၤယူဒၤဖိ န့ၣ်လီၤ.အဂ့ၢ်ဒ်အံၤ, ယွၤထုးထီၣ်ကွံာ်သုလၢကီၢ်အဲၤကူပတူးပတူးအပူၤလၢအတၢ်စိ တၢ်ကမီၤဖးဒိၣ်န့ၣ်လီၤ.
10 ဒီးတိၢ်န့ၢ်ဘူၣ်အံၤလၢအဆၢကတီၢ်ဒၣ်ဝဲကိးနံၣ်ဒဲးန့ၣ်တက့ၢ်.
11 ဒီးယွၤကဆှၢနုာ်သုဆူပှၤကနၤဧၣ်ဖိတဖၣ်အကီၢ်ပူၤ, ကီၢ်တဘ့ၣ်လၢအအၢၣ်လီၤအီလီၤတ့ၢ်ဝဲသပှၢ်ကတၢၢ်ဒီးသုဒီးသု မိၢ်ပၢ်ဖံဖုလၢပျၢၤတဖၣ်န့ၣ်လီၤ. ဒီးတုၤအဟ့ၣ်သုလၢကီၢ်အံၤန့ၣ်ဒီး,
12 သုကဘၣ်လုၢ်ထီၣ်ကယဲၢ်တၢ်အဝဲၢ်ကိကိးမံၤဒဲးဆူယွၤအအိၣ်န့ၣ်လီၤ. ဒီးကယဲၢ်သုဆၣ်ဖိကီၢ်ဖိအဝဲၢ်ကိအဖါခဲလၢာ်ဘၣ်ဃးဒီးယွၤန့ၣ်လီၤ.
13 ဘၣ်ဆၣ်ဒီးသုကဘၣ်ပှ့ၤကဒါက့ၤကသ့ၣ်ယီၤအဖိဝဲၢ်ကိအဖါကိးဒုဒဲးလၢအအိၣ်, ဒီးလၢတဒုအဂီၢ်န့ၣ်သုကဘၣ်ဟ့ၣ်သိဖိအဖါတဒုန့ၣ်လီၤ. သုမ့ၢ်တအဲၣ်ဒိးပှ့ၤက့ၤကသ့ၣ်ယီၤန့ၣ်ဒီးသုကဘၣ်ဘိးကၢ်ကွံာ်အကိာ်န့ၣ်လီၤ. ကယဲၢ်သုဖိဝဲၢ်ကိပိာ်ခွါကိးဂၤဒဲးန့ၣ်သုကဘၣ်ပှ့ၤက့ၤအီၤလီၤ.
14 ဒီးခါဆူညါန့ၣ်တုၤသုဖိခွါတဖၣ်သံကွၢ်သုလၢတၢ်အလုၢ်အလၢ် အံၤအခီပညီမ့ၢ်တၢ်မနုၤလဲၣ်န့ၣ်ဒီးသုကဘၣ်စံးဆၢအီၤ, ယွၤသူအစိကမီၤဖးဒိၣ်ဒီးထုးထီၣ်ကွံာ်ပှၤလၢကီၢ်အဲၤကူပတူး, ဖဲတၢ်လီၢ်လၢပကဲတ့ၢ်ကုၢ်န့ၣ်လီၤ.
15 ဒီးဖဲပှၤအဲၤကူပတူးဖိအစီၤပၤမၤကိၤအသးဒီးဂ့ၢ်လိာ်ဝဲလၢအကပျဲ ပဟးထီၣ်န့ၣ်, ယွၤမၤသံကယဲၢ်ပှၤကညီဒီးဆၣ်ဖိကီၢ်ဖိအဖိဝဲၢ် ကိခဲလၢာ်လၢကီၢ်အဲၤကူပတူးအပူၤန့ၣ်လီၤ. မၤသးဒ်န့ၣ်ဒီးပလုၢ်ထီၣ်ကယဲၢ်ဆၣ်ဖိကီၢ်ဖိအဖိဝဲၢ်ကိခဲလၢာ် ဆူယွၤအအိၣ်န့ၣ်လီၤ. မ့မ့ၢ်ပဖိဝဲၢ်ကိပိာ်ခွါတဖၣ်န့ၣ်ပပှ့ၤကဒါက့ၤအီၤန့ၣ်လီၤ.
16 တၢ်အလုၢ်အတၢ်အံၤကမ့ၢ်တၢ်ဒုးသ့ၣ်နီၣ်ထီၣ်က့ၤတၢ်တမံၤ, လၢအလီၤဂာ်ဒ်တၢ်တမံၤလၢအစၢတံၢ်အသးလၢပစုအလိၤမ့ၢ်ဂ့ၤ, ပခိၣ်တိသၣ်အလိၤမ့ၢ်ဂ့ၤန့ၣ်လီၤ. တၢ်အံၤကဒုးသ့ၣ်နီၣ်ထီၣ် က့ၤပှၤလၢယွၤထုးထီၣ်ကွံာ်ပှၤလၢကီၢ်အဲၤကူပတူးအပူၤခီဖျိ အတၢ်စိတၢ်ကမီၤဖးဒိၣ်န့ၣ်လီၤ.’ ”
17 ဒီးဖဲကီၢ်အဲၤကူပတူးအစီၤပၤပျဲပှၤဂီၢ်မုၢ်လဲၤတၢ်န့ၣ်, ကျဲလၢအလဲၤဆူပှၤဖလ့ၡသးဖိအကီၢ်မ့မ့ၢ်ကျဲလၢအဖုၣ်ဘၣ်ဆၣ် ကစၢ်ယွၤတဆှၢအဝဲသ့ၣ်လၢကျဲအဝဲန့ၣ်ဘၣ်. အဂ့ၢ်ဒ်အံၤ, ကစၢ်ယွၤစံးဝဲဒၣ်, “ယတအဲၣ်ဒိးလၢပှၤဂီၢ်မုၢ် ကလဲလိာ်ကွံာ်အသးဒီးဟဲက့ၤကဒါက့ၤဆူကီၢ်အဲၤကူပတူးဖဲ အဝဲသ့ၣ်ထံၣ်ဝဲဒၣ်လၢအကဘၣ်ဒုးတၢ်န့ၣ်ဘၣ်.”
18 ဒီးလၢတၢ်န့ၣ်အဃိယွၤဆှၢတရံးပှၤဂီၢ်မုၢ်လၢပှၢ်မုၢ်ကနၢအကျဲဆူပီၣ်လဲၣ်ဂီၤန့ၣ်လီၤ. ဒီးပှၤအံၣ်စရ့လးဖိတဖၣ်ဟံးထီၣ်အစုကဝဲၤလၢတၢ်ဒုးတၢ်ယၤအဂီၢ်န့ၣ်လီၤ.
19 ဒီးစီၤမိၤၡ့ဟံးထီၣ်စီၤယိၤသးအဃံတဖၣ်ဃုာ်ဒီးအီၤ, ဒ်စီၤယိၤသးမၤလိာ်တ့ၢ်ပှၤအံၣ်စရ့လးဖိတဖၣ်လၢကအၢၣ် လီၤအီၤသပှၢ်တၢၢ်လၢကမၤဝဲအသိးန့ၣ်လီၤ. စီၤယိၤသးစံးတ့ၢ်ဝဲဒၣ်, “တုၤကစၢ်ယွၤမၤပူၤဖျဲးသုန့ၣ်သုကဘၣ်စိာ်ကွံာ်ယနီၢ်ခိဃုာ်ဒီး သုလၢတၢ်လီၢ်အံၤန့ၣ်လီၤ.”
20 ပှၤအံၣ်စရ့လးဖိတဖၣ်ဟးထီၣ်လၢဝ့ၢ်စူးကိၤသးဒီးသူၣ်လီၤအဒဲ တဖၣ်ဖဲဝ့ၢ်အ့သၣ်လၢပှၢ်မုၢ်ကနၢအဃၢၤန့ၣ်လီၤ.
21 ဒီးလၢမုၢ်ဆါအကတီၢ်န့ၣ်ယွၤလဲၤတၢ်လၢအဝဲသ့ၣ်အမဲာ်ညါလၢတၢ် အၢၣ်အထူၣ်အပူၤ, ဒ်သိးကနဲၣ်အီၤကျဲဒီးလၢမုၢ်နၤအကတီၢ်န့ၣ်, လဲၤဝဲလၢအမဲာ်ညါလၢအမ့ၣ်အူအထူၣ်အပူၤဒ်သိးကဟ့ၣ်အီၤတၢ်ကပီၤ, ဒ်သိးအဝဲသ့ၣ်လဲၤတၢ်လၢမုၢ်ဆါဒီးလၢမုၢ်နၤကသ့ဝဲအဂီၢ်န့ၣ်လီၤ.
22 လၢမုၢ်ဆါအကတီၢ်န့ၣ်, တၢ်အၢၣ်အထူၣ်အိၣ်လၢပှၤဂီၢ်မုၢ်အမဲာ်ညါ, ဒီးလၢမုၢ်နၤအကတီၢ်န့ၣ်, မ့ၣ်အူအထူၣ်အိၣ်ဝဲထီဘိန့ၣ်လီၤ.