2
1 လၢအကတီၢ်အံၤ, ပိာ်ခွါတဂၤလၢလ့ၤဝံအဒူၣ်န့ၣ်ဒိးတ့ ဒိးဖျီအသးဒီးပိာ်မုၣ်တဂၤလၢအဒူၣ်ဒၣ်ဝဲန့ၣ်လီၤ.
2 ဒီးပိာ်မုၣ်န့ၣ်ဆံးစၢ်န့ၢ်အီၤလၢအဖိပိာ်ခွါဖိတဂၤ, ဒီးဖဲအထံၣ်န့ၢ်ဝဲလၢဖိသၣ်အံၤအက့ၢ်အဂီၤဂ့ၤန့ၣ်ပာ်ခူသူၣ် အီၤသၢလါန့ၣ်လီၤ.
3 ဒီးတုၤလၢအပာ်ခူသူၣ်ဝဲတသ့လၢၤဘၣ်တစုန့ၣ်, ပိာ်မုၣ်အံၤဟံးန့ၢ်စဲာ်တဖျၢၣ်လၢဘၣ်တၢ်ထ့အီၤလၢတပိၢ်ဆှဲ, ဒီးလံာ်တံၢ်အီၤလၢကျဲတံးဒ်သိးထံသုတနုာ်လီၤဆူအပူၤတဂ့ၤ အဂီၢ်လီၤ. အန့ၣ်ဝံၤဒီးဒၢနုာ်လီၤဝဲဖိသၣ်န့ၣ်လၢအပူၤ ဒီးလဲၤပာ်အီၤဖဲထံကျိနံၤလါအကၢၢ်နံၤလၢတပိၢ်ဆှဲအကျါ န့ၣ်လီၤ.
4 ဒီးဖိသၣ်အံၤအဝဲၢ်ပိာ်မုၣ်ဆၢထၢၣ်တယံၤတဘူးဒီးအီၤဒ်သိး ကထံၣ်ဘၣ်ဝဲတၢ်ကမၤအသးဒီးအီၤဒ်လဲၣ်ဒ်လဲၣ်အဂီၢ်န့ၣ်လီၤ.
5 စီၤပၤဖၤရိၤအဖိမုၣ်တဂၤဟဲလီၤလုၣ်ထံလၢထံကျိပူၤဖဲ အကုၢ်ပိာ်မုၣ်တဖၣ်ဟးဝဲလၢထံကျိကၢၢ်နံၤအခါန့ၣ်လီၤ. သတူၢ်ကလာ်စီၤပၤဖိမုၣ်ထံၣ်စဲာ်ဖိတဖျၢၣ်လၢဆှဲဖးထီတဖၣ် အကျါ, ဒီးမၢအကုၢ်ပိာ်မုၣ်ဖိတဂၤလဲၤဟံးန့ၢ်ဝဲလီၤ.
6 ဒီးအိးထီၣ်ဝဲ, ဒီးထံၣ်ဘၣ်ဖိသၣ်ပိာ်ခွါတဂၤလီၤ. ဒီးဖိသၣ်န့ၣ်ဟီၣ်ဝဲ, ဒီးသးကညီၤဘၣ်အီၤ, ဒီးစံးဝဲဒၣ်, “အဝဲအံၤမ့ၢ်ပှၤဧ့ၤဘြံၤ ဖိသၣ်ပိာ်ခွါဖိတဂၤလီၤ.”
7 တုၤနုၤတစုဖိသၣ်အံၤအဝဲၢ်မုၣ်သံကွၢ်စီၤပၤဖိမုၣ်, “မ့ၢ်ယဘၣ်လဲၤကိးန့ၢ်နၤပှၤဧ့ၤဘြံၤမုၣ်တဂၤလၢ က ဒုးအီၣ်နုၢ်န့ၢ်နၤဖိသၣ်တဂၤအံၤလၢနဂီၢ်န့ၣ်ဧါ.”
8 ဒီးစီၤပၤဖိမုၣ်စံးဆၢအီၤ, “လဲၤတက့ၢ်.” ဒီးပိာ်မုၣ်ဖိသၣ်န့ၣ်လဲၤကိးန့ၢ်ဖိသၣ်အမိၢ်လီၤ.
9 ဒီးစီၤပၤဖိမုၣ်စံးဘၣ်ဖိသၣ်အမိၢ်န့ၣ်, “က့ၤစိာ်ဖိသၣ် အံၤဒီးအံးထွဲကွၢ်ထွဲအီၤလၢယဂီၢ်တက့ၢ်. ဒီးယကဟ့ၣ်နၤလၢ အဘူးအလဲလီၤ.” မၤသးဒ်န့ၣ်ဒီးက့ၤစိာ်ဝဲဖိသၣ်ဒီးအံးထွဲ ကွၢ်ထွဲဝဲဒၣ်လီၤ.
10 လၢခံတုၤဖိသၣ်အံၤဒိၣ်ထီၣ်ဝဲန့ၣ်အမိၢ်လဲၤစိာ်အီၤဆူစီၤ ပၤဖိမုၣ်လၢအလုၢ်ဖိအီၤဒ်အဖိခွါဒၣ်ဝဲအသိးအအိၣ်န့ၣ်လီၤ. စီၤပၤဖိမုၣ်န့ၣ်စံးဝဲဒၣ်, “ယယုၢ်န့ၢ်အမံၤလၢစီၤမိၤၡ့မ့ၢ်လၢယထုးထီၣ်န့ၢ်အီၤလၢထံကျါအဃိလီၤ.”
11 ဖဲစီၤမိၤၡ့ဒိၣ်ထီၣ်ဝဲ, ဒီးဘၣ်မုၢ်တနံၤန့ၣ်လဲၤအိၣ်သကိး အပှၤကလုာ်, ပှၤဧ့ၤဘြံၤဖိတဖၣ်ဒီး ထံၣ်ဘၣ်လၢအဝဲသ့ၣ်ဘၣ်တၢ်မၢဆူၣ် မၢနၢၤအီၤန့ၣ်လီၤ. ဒီးထံၣ်ဘၣ်ပှၤအဲၤကူပတူးဖိတဂၤတီၢ်ပှၤဧ့ၤဘြံၤဖိတဂၤလၢ အမ့ၢ်အပှၤကလုာ်န့ၣ်လီၤ.
12 စီၤမိၤၡ့ကွၢ်တၢ်ဆူအံၤဆူနုၤဒီးဆိကမိၣ်ဝဲလၢပှၤတထံၣ်နီ တဂၤဘၣ်အဃိ, မၤသံကွံာ်ပှၤအဲၤကူပတူးဖိတဂၤန့ၣ်ဒီးမၤဘၢအ စိၣ်လၢမဲးအကျါန့ၣ်လီၤ.
13 လၢခံတနံၤန့ၣ်, စီၤမိၤၡ့လဲၤကဒီးဝဲ, ဒီးထံၣ်ပှၤဧ့ၤဘြံၤဖိခံဂၤအ့ၣ်လိာ်အသးန့ၣ်လီၤ. ဒီးစံးဘၣ်ပှၤလၢအမၤကမၣ်တၢ်တဂၤန့ၣ်, “ဘၣ်မနုၤလၢနဘၣ်တီၢ် နတံၤသကိးပှၤဧ့ၤဘြံၤဖိတဂၤန့ၣ်လဲၣ်.”
14 ပှၤတဂၤန့ၣ်စံးဆၢဝဲ, “မ့ၢ်မတၤပာ်နၤလၢပဒိၣ်ဒီးစံၣ်ညီၣ် ကွီၢ်တဂၤလၢပဖီခိၣ်န့ၣ်လဲၣ်. မ့ၢ်နဆိကမိၣ်လၢနကမၤသံယၤဒ်နမၤသံပှၤအဲၤကူပတူးဖိတဂၤ အသိးစ့ၢ်ကီးဧါ.” တုၤနုၤတစုစီၤမိၤၡ့ပျံၤတၢ်ဒီးဆိကမိၣ်လၢအသးပူၤ, “ပှၤသ့ၣ်ညါတၢ်လၢယမၤတ့ၢ်အီၤန့ၣ်လံ.”
15 ဖဲစီၤပၤနၢ်ဟူလၢစီၤမိၤၡ့မၤသံတၢ်န့ၣ်ဒီးအဝဲဃုမၤသံ စီၤမိၤၡ့လီၤ. ဘၣ်ဆၣ်ဒီး, စီၤမိၤၡ့ဃ့ၢ်ထီၣ်ကွံာ်ဆူကီၢ်မံးဒယၣ်ဒ်သိး အကအိၣ်ဝဲဖဲန့ၣ်လီၤ. တနံၤဖဲစီၤမိၤၡ့ဆ့ၣ်နီၤဝဲလၢထံပူၤတပူၤအဃၢၤန့ၣ်,
16 ကီၢ်မံးဒယၣ်အပှၤလုၢ်တၢ်အခိၣ်အဖိမုၣ်နွံဂၤဟဲဝဲဒ်သိးကဒၢၣ် ထံဒီးမၤပှဲၤထံကျိးတဖၣ်လၢအပၢ်အသိဒီးမဲာ်တဲးလဲးတဖၣ် အဂီၢ်န့ၣ်လီၤ.
17 ဘၣ်ဆၣ်ဒီးပှၤကွၢ်သိတနီၤဟဲဒီးဟီထီၣ်ကွံာ်အဝဲသ့ၣ်လီၤ. တုၤနုၤတစု, စီၤမိၤၡ့မၤစၢၤအဝဲသ့ၣ်ဒီးဒုးအီအဆၣ်ဖိ ကီၢ်ဖိတဖၣ်လၢထံန့ၣ်လီၤ.
18 ဒီးဖဲအဝဲသ့ၣ်က့ၤတုၤဆူအပၢ်စီၤရူၤအ့လးအအိၣ်န့ၣ်အပၢ်သံ ကွၢ်အဝဲသ့ၣ်, “တနံၤအံၤဘၣ်မနုၤလၢသုဟဲက့ၤဆိဝဲန့ၣ်လဲၣ်.”
19 ဒီးအဖိမုၣ်တဖၣ်စံးဆၢဝဲဒၣ်, “ပှၤအဲၤကူပတူးဖိတဂၤမၤ ပူၤဖျဲးပှၤလၢပှၤကွၢ်သိတဖၣ်အစုပူၤဒီးဒၢၣ်န့ၢ်ပှၤထံလၢ ပဂီၢ်ဒီးဒုးအီပဆၣ်ဖိကီၢ်ဖိတဖၣ်လၢထံန့ၣ်လီၤ.”
20 ဒီးသံကွၢ်ဝဲအဖိမုၣ်တဖၣ်, “ပှၤတဂၤန့ၣ်အိၣ်ဖဲလဲၣ်. ဘၣ်မနုၤသုပာ်တ့ၢ်အီၤလဲၣ်. လဲၤကိးအီၤဒ်သိးကအီၣ်သကိးတၢ် ဒီးပှၤတက့ၢ်.”
21 ဒီးစီၤမိၤၡ့ပာ်လီၤအသးလၢကအိၣ်ဝဲဖဲန့ၣ်ဒီးစီၤယံးသ ရိၤ, ဒီးစီၤယံးသရိၤဒိးတ့ဒိးဖျီအီၤဒီးအဖိမုၣ်နီၢ်စံးဖိ ရၤန့ၣ်လီၤ.
22 ဒီးနီၢ်စံးဖိရၤန့ၣ်ဆံးစၢ်န့ၢ်အဖိခွါတဂၤလၢစီၤမိၤၡ့အဂီၢ်, ဒီးယုၢ်ဝဲအမံၤလၢစီၤက့ရၡိၣ်လီၤ. အဂ့ၢ်ဒ်အံၤ, စီၤမိၤၡ့စံးဝဲဒၣ် ယမ့ၢ်တ့ၢ်ပှၤတမှံၤလၢတခီဘီမုၢ်အပူၤလီၤ.”
23 အါနံၣ်အါလါပူၤကွံာ်ဝံၤအလီၢ်ခံန့ၣ်ကီၢ်အဲၤကူပတူးအစီၤ ပၤသံဝဲဒၣ်လီၤ. ဘၣ်ဆၣ်ဒီးပှၤအံၣ်စရ့လးဖိတဖၣ်ကအုကစွါဝဲ လၢအဘၣ်တၢ်မၢကဲကုၢ်အဃိဒီးကိးပသူထီၣ်လၢတၢ်မၤစၢၤအဂီၢ် လီၤ. ဒီးအဝဲသ့ၣ်အတၢ်ကိးပသူထီၣ်ဘးဆူကစၢ်ယွၤအအိၣ်လီၤ.
24 ဒီးကစၢ်ယွၤနၢ်ဟူအတၢ်ကအုကစွါဒီးသ့ၣ်နီၣ်ထီၣ်က့ၤအတၢ်အၢၣ် လီၤအီလီၤဒီးစီၤအၤဘြၤဟၣ်, ဒီးစီၤအံၤစဲးဒီးစီၤယၤကိာ်န့ၣ်လီၤ.
25 ဒီးကစၢ်ယွၤကွၢ်လီၤပှၤအံၣ်စရ့လးဖိတဖၣ်ဒီးသူၣ်အိၣ်သးအိၣ် အဝဲသ့ၣ်န့ၣ်လီၤ.