9
1 ဖဲတၢ်တဖၣ်အံၤဘၣ်တၢ်မၤဝံၤအီၤအလီၢ်ခံန့ၣ်, အံၣ်စရ့လးအပှၤဂီၢ်မုၢ်အခိၣ်အနၢ်တနီၤဟဲဒီးတဲဘၣ်ယၤလၢပှၤဂီၢ်မုၢ်, ပှၤလုၢ်တၢ်အခိၣ်တဖၣ်, ဒီးပှၤလ့ၤဝံဖိတဖၣ်တအိၣ်မၤလီၤဖးအသး ဒီးထံကီၢ်အိၣ်ဘူးအိၣ်တံၢ်တဖၣ်လၢအမ့ၢ်ဝဲကီၢ်ဧၣ်မိၣ်, ကီၢ်မိၤအး, ဒီးကီၢ်အဲၤကူပတူးအပှၤဂီၢ်မုၢ်တဖၣ်မ့ၢ်ဂ့ၤ, ပှၤကနၤဧၣ်ဖိတဖၣ်, ပှၤဃ့ၤသးဖိတဖၣ်, ပှၤပရးစၤဖိတဖၣ်, ပှၤယဘူၣ်ဖိတဖၣ်, ဒီးပှၤအမိၢ်ဖိတဖၣ်မ့ၢ်ဂ့ၤန့ၣ်ဘၣ်. အဝဲသ့ၣ်မၤတၢ်လၢအလီၤသးဘၣ်အၢတဖၣ်တမံၤဃီဒ်ပှၤဂီၢ်မုၢ်တဖၣ် အံၤမၤတ့ၢ်ဝဲအသိးန့ၣ်လီၤ.
2 ပှၤယူဒၤဖိပိာ်ခွါတဖၣ်ဆီဟံၣ်ဆီဃီဒီးပှၤတခီဘီမုၢ်ဖိ ပိာ်မုၣ်တဖၣ်, ဒီးလၢတၢ်န့ၣ်အဃိကစၢ်ယွၤအပှၤဂီၢ်မုၢ်လၢ အစီဆှံတဖၣ်အံၤဘၣ်တၢ်မၤသံၣ်သူမီၣ်ကျၣ်အီၤန့ၣ်လီၤ. ပှၤခိၣ်ပှၤနၢ်တဖၣ်ဒီးပဒိၣ်ပပှၢ်တဖၣ်န့ၣ်မ့ၢ်ပှၤမၤကမၣ်တၢ်အဒိၣ် ကတၢၢ်တဖၣ်န့ၣ်လီၤ.
3 တုၤယနၢ်ဟူတ့ၢ်တၢ်အံၤန့ၣ်ယဖှီကွံာ်ယကူယသိးတဖၣ်လၢတၢ်သးဟး ဂီၤအပူၤ, ယထဲးကွံာ်ယခိၣ်သူဒီးယခၣ်ဆူၣ်ဒီးဆ့ၣ်နီၤလၢတၢ်သူၣ်အုးသး အုးအတၢ်သးလီၤသဘှံးအပူၤန့ၣ်လီၤ.
4 ယဆ့ၣ်နီၤဖဲန့ၣ်လၢတၢ်သူၣ်အုးသးအုးအပူၤတုၤလီၤလၢဟါတၢ် လုၢ်တၢ်ပာ်ကဘၣ်တၢ်လုၢ်ထီၣ်အီၤအကတီၢ်န့ၣ်လီၤ. ဒီးပှၤဂီၢ်မုၢ်စးထီၣ်ဟဲအိၣ်ဝးတရံးယၤလီၤ. အဝဲသ့ၣ်မ့ၢ်ကယဲၢ်ပှၤတဖၣ်လၢအပျံၤဘၣ်တၢ်မ့ၢ်လၢအံၣ်စရ့လး အကစၢ်ယွၤအတၢ်ကတိၤဘၣ်ထွဲဒီးပှၤတဖၣ်လၢအဟဲက့ၤလၢတၢ်စိာ်မၢ ကဲကုၢ်အတၢ်ဒဲးဘးအဂ့ၢ်အဃိန့ၣ်လီၤ.
5 ဖဲဟါတၢ်လုၢ်တၢ်ပာ်အဆၢကတီၢ်တုၤဃီၤဝဲန့ၣ်, ယဆၢထၢၣ်လၢယတၢ်သူၣ်အုးသးအုးအလီၢ်, ဒီးလၢတၢ်ကူသိးဒံးဒၣ်ယဆ့ကၤတဖၣ်လၢအယာ်န့ၣ်, ယတီၤလီၤလၢတၢ်ထုကဖၣ်အပူၤဒီးယူာ်ထီၣ်ယစုတဖၣ်ဆူယွၤ, ယကစၢ်ယွၤအအိၣ်န့ၣ်လီၤ.
6 ယစံး, “အိ, ကစၢ်ယွၤဧၢ, ယမဲာ်ဆှးတ့ၢ်ဒိၣ်မးလၢယကမိာ်ထီၣ်ယခိၣ်လၢနမဲာ်ညါန့ၣ်လီၤ. ယတၢ်ဒဲးဘးတဖၣ်အိၣ်ဒီကထၢထီၣ်အသးထီန့ၢ်ဒံးပခိၣ်တဖၣ်ဒီး တုၤထီၣ်ထီဝဲထဲသိးမူခိၣ်တဖၣ်န့ၣ်လီၤ.
7 စးထီၣ်လၢပမိၢ်ပၢ်ဖံဖုလၢပျၢၤအမုၢ်နံၤတဖၣ်ဒီးတုၤလီၤခဲ ကနံၣ်အံၤန့ၣ်, ပဝဲဒၣ်, နပှၤဂီၢ်မုၢ်, မၤတ့ၢ်တၢ်ဒဲးဘးဒိၣ်ဒိၣ်မုၢ်မုၢ်န့ၣ် လီၤ. မ့ၢ်လၢပတၢ်ဒဲးဘးတဖၣ်အဃိပဝဲဒၣ်, ပစီၤပၤတဖၣ်, ဒီးပပှၤလုၢ်တၢ်အခိၣ်တဖၣ်, ပဘၣ်တၢ်ဟ့ၣ်လီၤကွံာ် တ့ၢ်ပှၤဆူပှၤတခီဘီမုၢ်ဖိအစီၤပၤတဖၣ်အစုပူၤ, ပဘၣ်တၢ်မၤသံမၤဝီတ့ၢ်ပှၤ, ဂုာ်ဆူၣ်ပျီဆူၣ်ပှၤဒီးစိာ်ထီၣ် ကွံာ်ပှၤဒ်ပှၤဘၣ်တၢ်စၢဃာ်တဖၣ်အသိးန့ၣ်လီၤ. ပဘၣ်တၢ်မၤမဲာ်ဆှးပှၤလၢာ်လၢာ်ဆ့ဆ့ဒ်ပမ့ၢ်ဒံးပဝဲခဲအံၤအသိး န့ၣ်လီၤ.
8 ခဲအံၤ, အိယွၤ, ပကစၢ်ယွၤဧၢ, လၢတၢ်ဆၢကတီၢ်ဖုၣ်ကိာ်အပူၤန့ၣ်, နဒုးဘၣ်ဘျုးဘၣ်ဖှိၣ်လံပှၤဒီးပျဲတ့ၢ်ပဝဲတနီၤဒ်သိးကထူၣ်ဖျဲးထီၣ် လၢတၢ်ကဲကုၢ်အလီၢ်ဒီးအိၣ်ဆိးပူၤပူၤဖျဲးဖျဲးလၢတၢ် လီၢ်စီဆှံအံၤအပူၤန့ၣ်လီၤ. နပျဲထူၣ်ဖျဲးထီၣ်ကွံာ်ပှၤလၢတၢ်ကဲကုၢ်အလီၢ်ဒီးဟ့ၣ်လီၤ ပှၤတၢ်အိၣ်မူအသီန့ၣ်လီၤ.
9 ပမ့ၢ်တ့ၢ်ကုၢ်တဖၣ်, ဘၣ်ဆၣ်နတပာ်ထီဃာ်ပှၤလၢကုၢ်အလီၢ်န့ၣ်ဘၣ်. နမၢကီၢ်ပၤရၣ်အစီၤပၤဖးဒိၣ်တဖၣ်ကွၢ်မဲာ်ပှၤဒီးပျဲပှၤလၢ ပကအိၣ်ဆိးဘၣ်ဒံးဒီးသူၣ်ထီၣ်ဘှီထီၣ်က့ၤနတၢ်လုၢ်ဟံၣ်လၢအအိၣ် လၢတၢ်ဟးဂီၤအပူၤဒီးထံၣ်န့ၢ်တၢ်ပူၤဖျဲးဖဲအံၤလၢကီၢ်ယူ ဒၤဒီးဝ့ၢ်ယရူၤၡလ့ၣ်အပူၤန့ၣ်လီၤ.
10 မ့မ့ၢ်ခဲအံၤအိကစၢ်ယွၤဧၢ, တၢ်ခဲလၢာ်လၢအမၤတ့ၢ်အသးဝံၤ အလီၢ်ခံန့ၣ်ပစံးတၢ်မနုၤကသ့ဒံးလဲၣ်. ပတစူၢ်ကဒီးတၢ်မၤလိာ်တဖၣ်,
11 လၢနဟ့ၣ်တ့ၢ်ပှၤခီဖျိနခ့နပှၤဝံတဖၣ်န့ၣ်ဘၣ်. အဝဲသ့ၣ်တဲဘၣ်ပှၤလၢကီၢ်လၢပကလဲၤမၤန့ၢ်အီၤန့ၣ်မ့ၢ်ကီၢ်လၢ တကဆှီဘၣ်မ့ၢ်လၢပှၤဂီၢ်မုၢ်လၢအအိၣ်ဆိးလၢအပူၤတဖၣ်, မၤပှဲၤအီၤဒီးတၢ်ဖံးတၢ်မၤလၢအလီၤသးဘၣ်အၢဒီးတၢ်ဘၣ်အၢဘၣ် သီတဖၣ်ဒီတကီၢ်ညါအဃိန့ၣ်လီၤ.
12 အဝဲသ့ၣ်တဲဘၣ်ပှၤလၢပမ့ၢ်အဲၣ်ဒိးအိၣ်မုာ်ဆိးပၢၤလၢကီၢ်အံၤ အပူၤဒီးဟ့ၣ်န့ၢ်သါပစၢၤပသွဲၣ်တဖၣ်လီၤစိၤလီၤထီဒီး, ပတဘၣ်ဆီဟံၣ်ဆီဃီဒီးပှၤဂီၢ်မုၢ်တဖၣ်န့ၣ်နီတစုဒီးမၤစၢၤ အဝဲသ့ၣ်လၢကဘီၣ်ထီၣ်ညီထီၣ်မ့ၢ်ဂ့ၤ, အိၣ်ဒီးတၢ်မၤနၢၤမ့ၢ်ဂ့ၤနီတစုဘၣ်.
13 ဖဲတၢ်ခဲလၢာ်မၤတ့ၢ်အသးဒီးပှၤဒ်တၢ်စံၣ်ညီၣ်လၢပတၢ်ဒဲးဘးတဖၣ် ဒီးတၢ်ကမၣ်တဖၣ်အဃိဝံၤဒၣ်လဲာ်, ပသ့ၣ်ညါလၢနၤ, ပကစၢ်ယွၤစံၣ်ညီၣ်တ့ၢ်ပှၤစှၤန့ၢ်ဒံးပကြၢးဘၣ် တၢ်စံၣ်ညီၣ်တက့ၢ်ဒီးပျဲဒံးပှၤလၢပကအိၣ်မူဝဲလီၤ.
14 လၢတၢ်န့ၣ်အဃိ, ပတပာ်ကဲကဒီးနတၢ်မၤလိာ်တဖၣ်ဒီးဆီဟံၣ်ဆီဃီ ဒီးပှၤဂီၢ်မုၢ်အအၢအသီတဖၣ်အံၤကသ့ဝဲဒ်လဲၣ်. ပမ့ၢ်မၤဒ်န့ၣ်ဒီးနကသးဒိၣ်ထီၣ်ဒိၣ်မးတုၤဒၣ်လဲာ်နကမၤဟးဂီၤ ကွံာ်ပှၤလၢာ်လၢာ်ဆ့ဆ့ဒီးတပျဲအိၣ်မူလီၤတဲာ်ပှၤနီတဂၤဘၣ် န့ၣ်လီၤ.
15 ယွၤ, အံၣ်စရ့လးအကစၢ်ယွၤဧၢ, နတီဝဲလိၤဝဲ, ဘၣ်ဆၣ်နပျဲအိၣ်မူဒံးပှၤလီၤ. ပအၢၣ်လီၤပတၢ်ကမၣ်လၢနၤ, ပဟဲဆူနခီၣ်ထံးမဲာ်ညါန့ၣ်ပတၢ်ကြၢးဝဲဘၣ်ဝဲတအိၣ်နီတမံၤ ဘၣ်.”