8
1 အအံၤမ့ၢ်တၢ်ကွဲးနီၣ်ဘၣ်ထွဲဒီးပှၤခိၣ်ပှၤနၢ်တဖၣ်လၢဒူၣ်ထၢ တဖၣ်အပူၤ, ပှၤအိၣ်လၢကီၢ်ဘၤဘူၤလိၣ်အတၢ်မၢကဲကုၢ်အပူၤဒီးပှၤ တဖၣ်လၢအဟဲက့ၤကဒါက့ၤဃုာ်ဒီးစီၤဧ့စြၤဆူဝ့ၢ်ယရူၤၡလ့ၣ်ဖဲစီၤ အၢ်တၤၡါၡတၤမ့ၢ်စီၤပၤဖးဒိၣ်အခါန့ၣ်လီၤ.
2 စီၤက့ရၡိၣ်လၢစီၤဖံၤနဃၣ်အဒူၣ်ထၢ, စီၤဒၤနံးယ့လးလၢစီၤအံသမၢ်အဒူၣ်ထၢ, စီၤၡကါနယၤအဖိခွါစီၤဃးတူၣ်လၢစီၤဒၤဝံးအဒူၣ်ထၢ,
3 စီၤစကၤရယၤလၢစီၤပၤရိာ်အဒူၣ်ထၢဃုာ်ဒီး
ပှၤတကယၤယဲၢ်ဆံဂၤလၢအဒူၣ်ထၢပူၤ (တၢ်ကွဲးနီၣ်အိၣ်ဝဲဘၣ်ထွဲဒီးအဝဲသ့ၣ်အတၢ်လီၤစၢၤ)
4 စီၤစရၤဃယၤအဖိခွါစီၤအ့လံၤဧ့နံၤလၢစီၤပၤဃးမိၤအး အဒူၣ်ထၢ, ဃုာ်ဒီးပှၤပိာ်ခွါဃုကယၤဂၤ,
5 စီၤယၤဃစအ့လးအဖိခွါစီၤၡကါနယၤလၢစီၤစးတူၤအဒူၣ်ထၢ, ဃုာ်ဒီးပှၤပိာ်ခွါသၢကယၤဂၤ,
6 စီၤယိနၤသၣ်အဖိခွါစီၤဧ့ဘ့းလၢစီၤဧၤဒံၣ်အဒူၣ်ထၢ, ဃုာ်ဒီးပှၤပိာ်ခွါယဲၢ်ဆံဂၤ,
7 စီၤအသၤလယၤအဖိခွါစီၤယၡၤယါလၢစီၤဧ့ၤလၣ်အဒူၣ်ထၢ, ဃုာ်ဒီးပှၤပိာ်ခွါနွံဆံဂၤ,
8 စီၤမံၤက့လးအဖိခွါစီၤစဘၤဒယၤလၢစီၤၡဖးတယၤအဒူၣ်ထၢ, ဃုာ်ဒီးပှၤပိာ်ခွါဃိးဆံဂၤ,
9 စီၤယဃံအ့လးအဖိခွါစီၤဧိၤဘါဒယၤလၢစီၤယိၤအာ်အဒူၣ်ထၢ, ဃုာ်ဒီးပှၤပိာ်ခွါခံကယၤတဆံဃိးဂၤ
10 စီၤယိၤစံးဖယၤအဖိခွါစီၤၡလိမံးလၢစီၤဘၤနံအဒူၣ်အထၢ, ဃုာ်ဒီးပှၤပိာ်ခွါတကယၤဃုဆံဂၤ,
11 စီၤဘ့ဘဲၤအဖိခွါစီၤစကၤရယၤလၢစီၤဘ့ဘဲၤအဒူၣ်ထၢ, ဃုာ်ဒီးပှၤပိာ်ခွါခံဆံဃိးဂၤ,
12 စီၤဟးကၤတၣ်အဖိခွါစီၤယိဃၤနၣ်လၢစီၤဧၤစကးအဒူၣ်ထၢ, ဃုာ်ဒီးပှၤပိာ်ခွါတကယၤတဆံဂၤ,
13 စီၤအလံၤဖ့လံး, စီၤယယ့ၤအ့လးဒီးစီၤၡမါယၤလၢစီၤအဒိၤနံကၣ် အဒူၣ်ထၢ, ဃုာ်ဒီးပှၤပိာ်ခွါဃုဆံဂၤ
(အဝဲသ့ၣ်ဟဲက့ၤကဒါက့ၤလၢခံ)
14 စီၤဧူသဲၤဒီးစီၤစၤဘူလၢစီၤဘံးကဝဲၤအဒူၣ်ထၢ, ဃုာ်ဒီးပှၤပိာ်ခွါနွံဆံဂၤန့ၣ်လီၤ.
15 ယကိးဖှိၣ်ပှၤဒီတဖုညါဖဲထံကျိယွၤလီၤဆူဝ့ၢ်အၤဟဝၤအကပၤ ဒီးပသူၣ်ဒဲဖဲန့ၣ်သၢသီလီၤ. ယထံၣ်န့ၢ်လၢပှၤလုၢ်တၢ်အခိၣ်တဖၣ်အိၣ်ဝဲလၢပှၤတဖုန့ၣ်အကျါ, ဘၣ်ဆၣ်ပှၤလ့ၤဝံဖိတအိၣ်နီတဂၤဘၣ်.
16 ယကိးန့ၢ်ပှၤခိၣ်ပှၤနၢ်ခွံဂၤလၢအမ့ၢ်ဝဲ, စီၤအလၤဧစၢ်, စီၤအရံၤအ့လး, စီၤၡမါယၤ, စီၤအ့လနၤသၣ်, စီၤယၤရံာ်, စီၤအ့လနၤသၣ်, စီၤနၤသၣ်, စီၤစကၤရယၤ, ဒီးစီၤမၡူလၣ်, ဒီးသရၣ်သိၣ်လိတၢ်ခံဂၤလၢအမ့ၢ်ဝဲစီၤယိၤရံာ်ဒီးစီၤအ့ လနၤသၣ်န့ၣ်လီၤ.
17 ယမၢလီၤအဝဲသ့ၣ်လဲၤဆူပှၤလၢအအိၣ်ဆိးဖဲကၤစဖၤယၤတဖၣ်အ ခိၣ်, စီၤဧံးဒိၤအအိၣ်, လၢကလဲၤဃ့အီၤဒီးပှၤမၤသဃဲၤတၢ်ဒီးအီၤ လၢတၢ်လုၢ်ဟံၣ်တဖၣ်ဒ်သိးကဆှၢန့ၢ်ပှၤ, ပှၤလၢကမၤကစၢ်ယွၤအတၢ်မၤလၢတၢ်လုၢ်ဟံၣ်အပူၤန့ၣ်လီၤ.
18 လၢကစၢ်ယွၤအဘျုးအဖှိၣ်အဃိ, အဝဲသ့ၣ်ဆှၢလီၤန့ၢ်ပှၤစီၤၡ့ၤ ရ့ဘယၤ, ပှၤတဂၤလၢအအိၣ်ဒီးတၢ်သ့တၢ်ဘၣ်, ပှၤလ့ၤဝံဖိတဂၤလၢစီၤမၤဃလံအဒူၣ်ထၢ, ဒီးအဖိခွါဒီးအဒီပုၢ်ဝဲၢ်ခွါတဆံဃိးဂၤဟဲဃုာ်ဒီးအီၤန့ၣ်လီၤ.
19 အဝဲသ့ၣ်ဆှၢလီၤစ့ၢ်ကီးစီၤဃၡၤဘယၤဒီးစီၤယၡၤယါလၢစီၤ မရၤရံၤအဒူၣ်ထၢဃုာ်ဒီးအဝဲသ့ၣ်အဘူးအတံၢ်တဖၣ်အဂၤခံဆံန့ၣ် လီၤ.
20 လၢပှၤတဖၣ်န့ၣ်အမဲာ်ညါ, တၢ်လုၢ်ဟံၣ်အပှၤမၤတၢ်ဖိတဖၣ်လၢအပၢ်လၢ ပျၢၤတဖၣ်ဘၣ်တၢ်ဃုထၢပာ်လီၤဆိတ့ၢ်အီၤလၢစီၤပၤဒၤဝံးဒီး အပဒိၣ်ပပှၢ်တဖၣ်လၢကမၤစၢၤပှၤလ့ၤဝံဖိတဖၣ်န့ၣ်, အိၣ်ဝဲခံကယၤခံဆံဂၤလီၤ. အဝဲသ့ၣ်ခဲလၢာ်ဘၣ်တၢ်ကွဲးနီၣ် ကွဲးဃါအမံၤန့ၣ်လီၤ.
21 ဖဲအၤဟဝၤထံကျိအကပၤန့ၣ်, ယဟ့ၣ်လီၤယကလုၢ်လၢပဝဲ ခဲလၢာ်ပကဒုၣ်တၢ်အီၣ်တၢ်အီဒီးဆီၣ်လီၤပသးလၢပကစၢ်ယွၤအမဲာ် ညါ, ဒီးဃ့အီၤလၢကဆှၢပှၤလၢပတၢ်လဲၤအပူၤဒီးကဒီဒၣ်အိၣ်ပှိၤပှၤ ဒီးပဖိတဖၣ်ဒီးကယဲၢ်တၢ်လၢအအိၣ်ဒီးပှၤတဖၣ်န့ၣ်လီၤ.
22 မ့ၢ်လၢယတဲဘၣ်တ့ၢ်စီၤပၤဖးဒိၣ်လၢပကစၢ်ယွၤဆိၣ်ဂ့ၤပှၤတဂၤ လၢ်လၢ်လၢအသန့ၤအသးလၢအီၤ, မ့မ့ၢ်အဝဲကသးဒိၣ်ထီၣ်ဒီးစံၣ်ညီၣ်ပှၤတဂၤလၢ်လၢ်လၢအတကနၣ်ဃုာ် အီၤအဃိ, မ့ၢ်တၢ်မဲာ်ဆှးလၢယဂီၢ်ဒ်သိးယကဃ့အီၤပှၤဒိးကသ့ၣ်သုးမုၢ် တဖုလၢကဒီဒၣ်ပှၤလၢပဒုၣ်ပဒါအကလုာ်ကလုာ်ဖဲပလဲၤတၢ်အခါန့ၣ်လီၤ.
23 လၢတၢ်န့ၣ်အဃိပဒုၣ်တ့ၢ်တၢ်အီၣ်တၢ်အီဒီးပဘါထုကဖၣ်တ့ၢ်လၢ ကစၢ်ယွၤကအိၣ်ပှိၤမၤစၢၤပှၤဒီး, အဝဲဒၣ်စံးဆၢတ့ၢ်ပတၢ်ထုကဖၣ် တဖၣ်န့ၣ်လီၤ.
24 လၢပှၤလုၢ်တၢ်အဒိၣ်လၢအတီခိၣ်ရိၣ်မဲတဖၣ်အကျါန့ၣ်, ယဃုထၢစီၤၡ့ၤရ့ဘယၤ, စီၤဃၡၤဘယၤဒီးပှၤအဂၤတဆံန့ၣ်လီၤ.
25 အန့ၣ်ဝံၤဒီးယစီၤထီၣ်ဒီးဟ့ၣ်လီၤပှၤလုၢ်တၢ်အခိၣ်တဖၣ်လၢစ့, ထူဒီးတၢ်အဃၢၤအဃိၢ်တဖၣ်လၢစီၤပၤဖးဒိၣ်, အဝဲအပှၤဟ့ၣ်ကူၣ်ဟ့ၣ်ဖးတၢ်တဖၣ်ဒီးပဒိၣ်ပပှၢ်တဖၣ်, ဒီးအံၣ်စရ့လးအပှၤဂီၢ်မုၢ်ဟ့ၣ်တ့ၢ်ဝဲဒ်သိးတၢ်ကသူအီၤလၢတၢ် လုၢ်ဟံၣ်အပူၤအဂီၢ်န့ၣ်လီၤ.
26 တၢ်အံၤမ့ၢ်တၢ်လၢယဟ့ၣ်လီၤအဝဲသ့ၣ်လီၤ.
စ့လီၤတယၢၢ်အကံကၢ်ဃုကယၤယဲၢ်ဆံ. တၢ်အဃၢၤအဃိၢ်စ့အကံကၢ်တကယၤ, ထူလီၤတယၢၢ်အကံကၢ်တကယၤ.
27 သလၢထူအဖျၢၣ်ခံဆံလီၤတယၢၢ်ဒၤရံးတကထိ, သလၢတိၢ်ဘီအစီဂ့ၤ ခံဖျၢၣ်လၢအလုၢ်အပှ့ၤအိၣ်ဒ်သိးထူန့ၣ်လီၤ.
28 ယစံးဘၣ်အဝဲသ့ၣ်, “သုစီဆှံလၢယွၤ, သုမိၢ်ပၢ်ဖံဖုလၢ ပျၢၤအကစၢ်ယွၤအဂီၢ်, ဒီးဒ်န့ၣ်အသိးသုတၢ်သးအိၣ်အတၢ်မၤဘူၣ်တဖၣ်လၢအမ့ၢ်ကယဲၢ်စ့ ဒီးထူအဃၢၤအဃိၢ်လၢတၢ်ဟဲစိာ်ဆူအအိၣ်တဖၣ်စ့ၢ်ကီးန့ၣ်လီၤ.
29 ပၢၤအီၤဂ့ၤဂ့ၤဘၣ်ဘၣ်တုၤလီၤလၢသုတုၤဆူတၢ်လုၢ်ဟံၣ်န့ၣ်တ က့ၢ်. ဖဲန့ၣ်, လၢပှၤလုၢ်တၢ်အခိၣ်တဖၣ်အဒၢးပူၤန့ၣ်စီၤအီၤဒီးဟ့ၣ် လီၤအီၤဆူပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်အခိၣ်အနၢ် တဖၣ်ဒီးဆူအံၣ်စရ့လးအပှၤဂီၢ်မုၢ်လၢဝ့ၢ်ယရူၤၡလ့ၣ်ပူၤ, အခိၣ်အနၢ်တဖၣ်အအိၣ်တက့ၢ်.”
30 လၢတၢ်န့ၣ်အဃိပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်ဟံး န့ၢ်မူဒါလၢကကွၢ်ထွဲစ့ဒီးထူဒီးတၢ်အဃၢၤအဃိၢ်တဖၣ်လၢတၢ် လဲၤစိာ်အီၤဆူတၢ်လုၢ်ဟံၣ်လၢအအိၣ်လၢဝ့ၢ်ယရူၤၡလ့ၣ်အပူၤအဂီၢ် န့ၣ်လီၤ.
31 ဒီးလၢလါအခီၣ်ထံးတလါထီၣ်တဆံခံသီတသီန့ၣ်ပဟးထီၣ်လၢထံ ကျိၤအၤဟဝၤဒီးပလဲၤဆူဝ့ၢ်ယရူၤၡလ့ၣ်န့ၣ်လီၤ. ပကစၢ်ယွၤအိၣ်ဒီးပှၤဒီးဒီဒၣ်အိၣ်ပှိၤပှၤလၢဒုၣ်ဒါအတၢ်ဟဲ ထီၣ်ဒုးပှၤဒီးခိးခူသူၣ်ဒုးပှၤလၢပတၢ်လဲၤအပူၤန့ၣ်လီၤ.
32 ဖဲပလဲၤတုၤဃီၤဆူဝ့ၢ်ယရူၤၡလ့ၣ်န့ၣ်ပအိၣ်ဘှံးသၢသီလီၤ.
33 ဒီးလၢလွံၢ်သီတသီန့ၣ်ပလဲၤဆူတၢ်လုၢ်ဟံၣ်, စီၤန့ၢ်စ့, ထူဒီးတၢ်အဃၢၤအဃိၢ်တဖၣ်ဒီးဟ့ၣ်လီၤဆူစီၤဧူၤ ရံယၤအဖိခွါပှၤလုၢ်တၢ်အခိၣ်စီၤမရ့မိးအစုပူၤန့ၣ်လီၤ. ဒီးပှၤလၢအအိၣ်ဒီးအီၤတဖၣ်န့ၣ်မ့ၢ်ဝဲစီၤဖံၤနဃၣ်အဖိခွါ စီၤအလၤဧစၢ်ဒီးပှၤလ့ၤဝံဖိခံဂၤလၢအမ့ၢ်စီၤယ့ၤၡူအဖိ ခွါစီၤယိၤစဘးဒီးစီၤဘံနူၤအဖိခွါစီၤနိဒယၤသ့ၣ်တဖၣ် န့ၣ်လီၤ.
34 ကယဲၢ်တၢ်ခဲလၢာ်ဘၣ်တၢ်ဂံၢ်အီၤဒီးတၢ်ကွဲးနီၣ်အလၢအပှဲၤ တမံၤဘၣ်တၢ်မၤအီၤတကတီၢ်ဃီန့ၣ်လီၤ.
35 ကယဲၢ်ပှၤခဲလၢာ်လၢအဟဲက့ၤကဒါက့ၤလၢတၢ်စိာ်မၢကဲကုၢ်အလီၢ် န့ၣ်ဟဲစိာ်ဃီၤတၢ်မၤဘူၣ်တဖၣ်ဒ်တၢ်လုၢ်တၢ်ပာ်တဖၣ်လၢကဘၣ်တၢ် ဆိၣ်ကဲၤထီၣ်အီၤဆူပှၤအံၣ်စရ့လးဖိအကစၢ်ယွၤအအိၣ်န့ၣ်လီၤ. အဝဲသ့ၣ်မၤဘူၣ်လီၤဂီၤဖံးဖါတဆံခံဒုလၢပှၤအံၣ်စရ့လးဖိ ခဲလၢာ်အဂီၢ်, သိဖါခွံဆံဃုဒုဒီးသိဖိနွံဆံနွံဒု, ဒီးမဲာ်တဲးလဲးတဆံခံဒုစ့ၢ်ကီးလၢကမၤကဆှီထီၣ်က့ၤအသးလၢ တၢ်ဒဲးဘးအဂီၢ်န့ၣ်လီၤ. ကယဲၢ်ဆၣ်ဖိကီၢ်ဖိခဲလၢာ်အံၤဘၣ်တၢ်ဆိၣ်ကဲၤအီၤဒ်တၢ်လုၢ်တၢ် ပာ်တဖၣ်အသိးဆူယွၤန့ၣ်လီၤ.
36 အဝဲသ့ၣ်ဟံးန့ၢ်စ့ၢ်ကီးဝဲလံာ်ကွဲးနီၣ်ဟ့ၣ်စိဟ့ၣ်ကမီၤလၢ စီၤပၤဖးဒိၣ်ဟ့ၣ်လီၤတ့ၢ်အဝဲသ့ၣ်ဒီးဟ့ၣ်ဃီၤဝဲဆူပဒိၣ်ဖး ဒိၣ်တဖၣ်ဒီးပဒိၣ်ပပှၢ်တဖၣ်အအိၣ်လၢဖရၤသးအမုၢ်နုာ်အကီၢ်, လၢအမၤစၢၤတ့ၢ်ပှၤဂီၢ်မုၢ်ဒီးတၢ်ဘူၣ်ထီၣ်ဘါထီၣ်လၢတၢ်လုၢ် ဟံၣ်ပူၤဖဲန့ၣ်တဖၣ်အအိၣ်န့ၣ်လီၤ.