1 အန့ၣ်ဝံၤဒီးပှၤတဂၤန့ၣ်ဆှၢနုာ်ယၤဆူတၢ်လုၢ်ဟံၣ်အဂၢၤလၢ တၢ်ချၢတကပၤဒီးဆှၢယၤဆူတၢ်သူၣ်ထီၣ်တဖျၢၣ်လၢအအိၣ်လၢ ယွၤအတၢ်လုၢ်ဟံၣ်အကလံၤစိးတကပၤ, တယံၤကဲာ်ဆိးဒီး တၢ်သူၣ်ထီၣ်တဖျၢၣ်လၢအအိၣ်လၢယွၤအတၢ်လုၢ်ဟံၣ်, အမုၢ်နုာ် အကတၢၢ်တကပၤဘၣ်န့ၣ်လီၤ. 2 တၢ်သူၣ်ထီၣ်အံၤ, အထီအိၣ်ဝဲအပျၢ်တကယၤဒီးအလဲၢ်အိၣ်ဝဲအပျၢ်ယဲၢ်ဆံန့ၣ်လီၤ. 3 အကပၤတခီန့ၣ်ကွၢ်ဃီၤတၢ်ဆူတၢ်လီၢ်လီၤပျီတခါလၢအလဲၢ် အိၣ်ဝဲအပျၢ်ခံဆံလၢအအိၣ်သဃဲၤလိာ်အသးဒီးယွၤအတၢ်လုၢ်ဟံၣ် ဒီးအဂၤတကပၤန့ၣ်ကွၢ်ဃီၤတၢ်ဆူကျဲလၢအဘၣ်တၢ်ဒါလီၤအီၤ လၢအအိၣ်လၢတၢ်လုၢ်ဟံၣ်အဂၢၤလၢတၢ်ချၢန့ၣ်လီၤ. တၢ်သူၣ်ထီၣ်န့ၣ်ဘၣ်တၢ်ဘှီအီၤသၢပတီၢ်, လၢတပတီၢ်စုာ်စုာ် ဘၣ်တၢ်သုးအီၤဆူအလီၢ်ခံအါန့ၢ်ဒံး, တၢ်လၢအအိၣ်လၢ အဖီလာ်တပတီၢ်တက့ၢ်န့ၣ်လီၤ. 4 လၢတၢ်သူၣ်ထီၣ်အံၤအကလံၤစိးတကပၤန့ၣ်အိၣ်ဒီးတၢ်လဲၤထီၣ် က့ၤလီၤအကျိၤတကျိၤလၢအလဲၢ်ဝဲဒၣ်အပျၢ်ခံဆံဒီးထီဝဲဒၣ် အပျၢ်တကယၤအိၣ်ဒီးကျဲစၢၤထံးတဖၣ်ဖဲတၢ်ကပၤအဝဲန့ၣ်လီၤ. 5 ဒၢးတဖၣ်လၢတၢ်သူၣ်ထီၣ်အဖီခိၣ်တဆီန့ၣ်အံၣ်န့ၢ်ဒံးဒၢးတဖၣ်လၢ အအိၣ်လၢအခၢၣ်သးဒီးအဖီလာ်ကတၢၢ်အဆီတဖၣ်န့ၣ်လီၤ. အဂ့ၢ်ဒ်အံၤ, အဝဲသ့ၣ်တဖၣ်ဘၣ်တၢ်သုးယံၤက့ၤအီၤဆူတၢ်လီၢ်ခံ အဃိန့ၣ်လီၤ. 6 ဒၢးတဖၣ်လၢအအိၣ်လၢတၢ်လီၢ်သၢဆီလိာ်န့ၣ်, အိၣ်လၢတၢ် အပတီၢ်တဖၣ်အလိၤဒီးတဘၣ်တၢ်ပၢၤဃးအီၤလၢထူၣ်တဖၣ် ဒ်တၢ်သူၣ်ထီၣ်အဂၤတဖၣ်အအိၣ်လၢတၢ်လုၢ်ဟံၣ်အဂၢၤအပူၤ န့ၣ်ဘၣ်. 7 တၢ်သူၣ်ထီၣ်အတၢ်ဒူၣ်လၢတၢ်ချၢအိၣ်တဒူၣ်လၢအအိၣ်သဃဲၤဒီး ဒၢးဖိတဖၣ်ဒီးတၢ်လုၢ်ဟံၣ်အဂၢၤလၢတၢ်ချၢန့ၣ်လီၤ. တၢ်ဒူၣ်န့ၣ်လဲၤဖျိကွံာ်ဒၢးဖိတဖၣ်အမဲာ်ညါအပျၢ်ယဲၢ်ဆံန့ၣ်လီၤ. 8 တၢ်ဒူၣ်လၢအအိၣ်သဃဲၤဒီးဒၢးဖိတဖၣ်လၢအအိၣ်ဖဲတၢ်လုၢ်ဟံၣ် အဂၢၤလၢတၢ်ချၢအကပၤန့ၣ်အထီအိၣ်ဝဲအပျၢ်ယဲၢ်ဆံ, ဒီး အအိၣ်တ့ၢ်န့ၣ်အထီမ့ၢ်ဝဲအပျၢ်ယဲၢ်ဆံလီၤ. 9 လၢဒၢးတဖၣ်အဖီလာ်ဖဲတၢ်သူၣ်ထီၣ်အမုၢ်ထီၣ်ကတၢၢ်န့ၣ် ကျဲစၢၤထံးအိၣ်ဝဲတပူၤလၢတၢ်ကဟဲနုာ်လီၤလၢတၢ်လုၢ်ဟံၣ် အဂၢၤလၢတၢ်ချၢတတီၤအဂီၢ်န့ၣ်လီၤ. 10 တၢ်ဒူၣ်လၢအအိၣ်စဲဘူးဒီးတၢ်လုၢ်ဟံၣ်အဂၢၤလၢတၢ်ချၢတတီၤ အံၤအိၣ်ဝဲလၢယွၤအတၢ်လုၢ်ဟံၣ်အဒူၣ်လၢမုၢ်ထီၣ်တကပၤ အမဲာ်ညါဒီးဒၢးဖိတဖၣ်အိၣ်ဖဲအမဲာ်ညါန့ၣ်လီၤ. 11 လၢဒၢးဖိတဖၣ်အံၤအမဲာ်ညါန့ၣ်အိၣ်ဒီးတၢ်လဲၤထီၣ်က့ၤလီၤ အကျိၤတကျိၤဒ်သိးဒၣ်လၢကလံၤစိးတကပၤန့ၣ်လီၤ. တၢ်လဲၤထီၣ်က့ၤလီၤအကျိၤအံၤန့ၣ်အိၣ်ဒီးအနီၣ်ထိၣ်, အက့ၢ်အဂီၤတကွီၣ်, တမံၤဃီဒီးကျဲစၢၤထံးတဖၣ် န့ၣ်လီၤ. 12 လၢတၢ်သူၣ်ထီၣ်အကလံၤထံးအတကပၤအဒၢးတဖၣ်အဖီလာ် န့ၣ်တြဲၤအိၣ်ဝဲတဘ့ၣ်ဖဲတၢ်သူၣ်ထီၣ်အမုၢ်ထီၣ်အကတၢၢ်ဖဲတၢ်အဒူၣ် စးထီၣ်အသးန့ၣ်လီၤ. 13 ပှၤတဂၤန့ၣ်စံးဘၣ်ယၤ, တၢ်သူၣ်ထီၣ်ခံဖျၢၣ်လၢာ်အံၤန့ၣ်စီဆှံ ဝဲလီၤ. လၢတၢ်သူၣ်ထီၣ်တဖၣ်အံၤအပူၤန့ၣ်, ပှၤလုၢ်တၢ်အဒိၣ်တဖၣ်လၢအလဲၤနုာ်ဆူယွၤအိၣ်ဝဲဆိးဝဲအလီၢ်န့ၣ်, အိၣ်ဝဲတၢ်လုၢ်အစီဆှံကတၢၢ်တဖၣ်န့ၣ်လီၤ. မ့ၢ်လၢဒၢးတဖၣ်စီဆှံဝဲအဃိ, ပှၤလုၢ်တၢ်အခိၣ်တဖၣ်ကပာ်ထီၣ် တၢ်လုၢ်အစီဆှံကတၢၢ်တဖၣ်ဖဲန့ၣ်လၢအမ့ၢ်ဝဲတၢ်လုၢ်ဘုဧိၤ ဟုဧိၤတဖၣ်ဒီးတၢ်လုၢ်တၢ်ပာ်တဖၣ်လၢတၢ်ပျၢ်တၢ်ဒဲးဘးအဂီၢ်မ့ၢ်ဂ့ၤတၢ် လုၢ်တၢ်ပာ်တဖၣ်လၢတၢ်ပျၢ်တၢ်ကမၣ်အဂီၢ်မ့ၢ်ဂ့ၤဖဲန့ၣ်လီၤ. 14 ဖဲပှၤလုၢ်တၢ်အခိၣ်တဖၣ်အိၣ်လၢယွၤအတၢ်လုၢ်ဟံၣ်အပူၤဒီး အဲၣ်ဒိးလဲၤဟးထီၣ်ဆူတၢ်လုၢ်ဟံၣ်အဂၢၤလၢတၢ်ချၢန့ၣ်, အဝဲသ့ၣ် ကဘၣ်ဘ့ၣ်လီၤတ့ၢ်အတၢ်ကူတၢ်သိးစီဆှံလၢအကၤဝဲဖဲအမၤယွၤ အတၢ်အခါ, လၢဒၢးအံၤအပူၤန့ၣ်လီၤ. အဝဲသ့ၣ်ကဘၣ်ကူထီၣ် သိးထီၣ်တၢ်ကူတၢ်ကၤအဂၤတဖၣ်, တချုးဒံးဘၣ်လၢအလဲၤ ဟးထီၣ်ဆူတၢ်လီၢ်ဖဲပှၤဂီၢ်မုၢ်တဖၣ်ပာ်ဖှိၣ်အသးဘၣ်န့ၣ်လီၤ.

15 တုၤပှၤတဂၤန့ၣ်ထိၣ်ဝဲတၢ်လုၢ်ဟံၣ်အလီၢ်ကဝီၤလၢတၢ်အိပူၤတကပၤ ဝံၤန့ၣ်အဝဲဆှၢထီၣ်ယၤခီဖျိမုၢ်ထီၣ်အတြဲၤဖးဒိၣ်ဝံၤဒီးထိၣ်ဝဲတၢ်လီၢ် ကဝီၤလၢတၢ်ချၢတကပၤန့ၣ်လီၤ. 16 အဝဲဟံးထီၣ်နီၣ်ထိၣ်တဘိန့ၣ်ဒီးထိၣ်ဝဲလၢမုၢ်ထီၣ်တကပၤဒီးအိၣ်ဝဲဒၣ် အပျၢ်ယဲၢ်ကယၤန့ၣ်လီၤ. 17 အဝဲထိၣ်ဝဲကလံၤစိးတကပၤလၢနီၣ်ထိၣ်ဘိန့ၣ်လီၤ. ဒီးအိၣ်ဝဲ အပျၢ်ယဲၢ်ကယၤန့ၣ်လီၤ. 18 အဝဲထိၣ်ဝဲကလံၤထံးတကပၤလၢနီၣ်ထိၣ်ဘိန့ၣ်, ဒီးအိၣ်ဝဲ အပျၢ်ယဲၢ်ကယၤန့ၣ်လီၤ. 19 အဝဲထိၣ်ဝဲမုၢ်နုာ်တကပၤလၢနီၣ်ထိၣ်ဘိန့ၣ်, ဒီးအိၣ်ဝဲအပျၢ်ယဲၢ်ကယၤန့ၣ်လီၤ. 20 လၢတၢ်န့ၣ်အဃိတၢ်ဒူၣ်န့ၣ်အနီၣ်ထိၣ်မ့ၢ်ဝဲအပျၢ်ယဲၢ်ကယၤဝးဝး န့ၣ်လီၤ. တၢ်ဒူၣ်အံၤနီၤဖးကွံာ်တၢ်လီၢ်လၢအစီဆှံဒီးတစီဆှံဘၣ်န့ၣ်လီၤ.