43
1 ပှၤတဂၤန့ၣ်ဆှၢဃီၤယၤဆူတြဲၤဖးဒိၣ် လၢအကွၢ်တၢ်ဆူမုၢ်ထီၣ်တကပၤ,
2 ဒီးဖဲန့ၣ်, ယထံၣ်ဘၣ်အံၣ်စရ့လးအကစၢ်ယွၤအတၢ်အိၣ်ဝဲဆိးဝဲ အတၢ်ကပီၤကပြုၢ်ကပြီၤဟဲဝဲလၢမုၢ်ထီၣ်တခီန့ၣ်လီၤ. ကစၢ်ယွၤ အကလုၢ်န့ၣ်သီၣ်ထီၣ်ဝဲလီၤဂာ်ဒ်ပီၣ်လဲၣ်သီၣ်ထီၣ်ရုၢ်ရုၢ်အသိးဒီး ဟီၣ်ခိၣ်ကပီၤထီၣ်ဝဲဒီးတၢ်ကပီၤကပြုၢ်ကပြီၤန့ၣ်လီၤ.
3 တၢ်ထံၣ်လၢညါခီအံၤလီၤဂာ်ဒီးတၢ်တမံၤလၢယထံၣ်တ့ၢ်အီၤဖဲက စၢ်ယွၤဟဲဝဲဒ်သိးကမၤဟးဂီၤဝ့ၢ်ယရူၤၡလ့ၣ်အဂီၢ်ဒီးတဂၤတခါ လၢယထံၣ်ဘၣ်အီၤဖဲထံကျိကဘၢ်အကပၤအသိးန့ၣ်လီၤ. အန့ၣ်ဒီးယထိၣ်ဃံၤလီၤယသးဒီးကျးလီၤယမဲာ်လၢဟီၣ်ခိၣ်လိၤ န့ၣ်လီၤ.
4 တၢ်ကပီၤကပြုၢ်ကပြီၤန့ၣ်လဲၤခီဖျိမုၢ်ထီၣ်အတြဲၤ ဖးဒိၣ်ဒီးလဲၤနုာ်ဆူယွၤအတၢ်လုၢ်ဟံၣ်အပူၤန့ၣ်လီၤ.
5 ယွၤအသးစိာ်ကဖီထီၣ်ယၤဒီးဆှၢဃီၤယၤဆူအတၢ်လုၢ်ဟံၣ်အဂၢၤ လၢတၢ်အိပူၤတကပၤ, ဖဲယထံၣ်ဘၣ်လၢယွၤအတၢ်လုၢ်ဟံၣ် န့ၣ်ပှဲၤဝဲဒီးယွၤအလၤကပီၤန့ၣ်လီၤ.
6 ပှၤတဂၤန့ၣ်ဆၢထၢၣ်လၢယကပၤဖဲန့ၣ်, ဒီးယနၢ်ဟူယွၤကတိၤ တၢ်ဒီးယၤအကလုၢ်သီၣ်ထီၣ်ဝဲလၢယွၤအတၢ်လုၢ်ဟံၣ်အပူၤ န့ၣ်လီၤ.
7 ပှၤကညီလၢအသံသ့ဧၢ, အအံၤမ့ၢ်ယလီၢ်ပစိာ်န့ၣ်လီၤ. ယကအိၣ်ဆိးဖဲအံၤလၢကီၢ်အံၣ်စရ့လးအပှၤဂီၢ်မုၢ်အကျါဒီး ပၢအဝဲသ့ၣ်လီၤစိၤလီၤထီန့ၣ်လီၤ. ကီၢ်အံၣ်စရ့လးအပှၤဂီၢ် မုၢ်မ့ၢ်ဂ့ၤ, အစီၤပၤတဖၣ်မ့ၢ်ဂ့ၤတမၤမဲာ်ဆှးကဒီးလၢၤဘၣ်ယမံၤ စီဆှံနီတစုခီဖျိတၢ်ဘူၣ်ထီၣ်ဘါထီၣ်ယွၤအဂၤတဖၣ်မ့ၢ်ဂ့ၤ, ခီဖျိ တၢ်ခူၣ်လီၤဘျၢလီၤအစီၤပၤတဖၣ်, အစိၣ်လၢတၢ်လီၢ်အံၤအပူၤ မ့ၢ်ဂ့ၤလၢၤဘၣ်န့ၣ်လီၤ.
8 စီၤပၤတဖၣ်ဘှီထီၣ်အနူၢ်ဧိၤစီၤဧိၤအကျဲစၢၤအကျိၤထံးဒီးအတြဲၤအ ထူၣ်တဖၣ်သဃဲၤလိာ်အသးဒီးယတၢ်လုၢ်ဟံၣ်အကျဲစၢၤကျိၤထံးဒီးတြဲၤ ထူၣ်တဖၣ်တုၤဒၣ်လဲာ်လၢအဘၢၣ်စၢၤန့ၣ်အိၣ်ဒၣ်ထဲတၢ်ဒူၣ်တဒူၣ် ဧိၤန့ၣ်လီၤ. အဝဲသ့ၣ်မၤမဲာ်ဆှးယမံၤစီဆှံခီဖျိတၢ်လီၤ သးဘၣ်အၢတဖၣ်လၢအဝဲ, သ့ၣ်မၤတ့ၢ်ဝဲအဃိ သတးဒီးလၢယတၢ်သးကဲၤထီၣ်အပူၤန့ၣ်ယမၤဟးဂီၤကွံာ် အဝဲသ့ၣ်န့ၣ်လီၤ.
9 ခဲကနံၣ်အံၤအဝဲသ့ၣ်ကဘၣ်ဆိကတီၢ်ကွံာ်အတၢ်ဘူၣ်ထီၣ်ဘါထီၣ် ကစၢ်အဂၤတဖၣ်ဒီးသုးကွံာ်အစီၤပၤတဖၣ်အစိၣ်န့ၣ်လီၤ. အဝဲသ့ၣ် မ့ၢ်မၤဝဲဒ်န့ၣ်ဒီး, ယကအိၣ်ဆိးလၢအဝဲသ့ၣ်အကျါလီၤစိၤလီၤထီန့ၣ်လီၤ.
10 ဒီးယွၤစံးကဒီးဝဲဆူညါ, ပှၤကညီလၢအသံသ့ဧၢ, တဲဘၣ်ကီၢ်အံၣ်စရ့ လးအပှၤဂီၢ်မုၢ်ဘၣ်ဃးဒီးယွၤအတၢ်လုၢ်ဟံၣ်အဂ့ၢ်ဒီးပျဲအဝဲသ့ၣ်မၤလိ အတၢ်လုၢ်ဟံၣ်အက့ၢ်အဂီၤအဒိလၢတၢ်ပာ်လီၤပာ်စၢၤအီၤတက့ၢ်. ဒုးမဲာ်ဆှးကွံာ်အဝဲသ့ၣ်လၢတၢ်ဒဲးဘးတဖၣ်လၢအဝဲသ့ၣ်မၤဝဲ အဃိန့ၣ်တက့ၢ်.
11 ဒီးတုၤအဝဲသ့ၣ်အမဲာ်ဆှးလၢတၢ်လၢအမၤတ့ၢ်ဝဲတဖၣ်အဃိဝံၤန့ၣ်, ဒုးတၢ်နၢ်ပၢၢ်အဝဲသ့ၣ်ယွၤအတၢ်လုၢ်ဟံၣ်အက့ၢ်အဂီၤအဒိလၢ တၢ်ပာ်လီၤပာ်စၢၤအီၤလၢအမ့ၢ်, အက့ၢ်အဂီၤအတကွီၣ်, နုာ်က့ၤ ဟးထီၣ်အကျဲစၢၤကျိၤထံးတဖၣ်, တၢ်ဘှီထီၣ်အီၤအက့ၢ်အဂီၤ, တၢ်လၢအဘၣ်တၢ်ရဲၣ်လီၤကျဲၤလီၤအီၤကိးမံၤဒဲးဒီးအတၢ်သိၣ်တၢ်သီတဖၣ်ဒီးတၢ်ဘျၢတဖၣ်လၢတၢ်ကဘၣ်မၤထွဲအီၤန့ၣ်တက့ၢ်. ကွဲးလီၤတၢ်သ့ၣ်တဖၣ်အံၤခဲလၢာ်လၢအဝဲသ့ၣ်အဂီၢ် ဒ်သိးအဝဲသ့ၣ်ထံၣ်ဝဲကသ့လၢတၢ်ကိးမံၤဒဲးအံၤ ဘၣ်တၢ်ရဲၣ်ကျဲၤအီၤဒ်လဲၣ်ဒီးမၤပိာ်ထွဲတၢ်သိၣ်တၢ်ဘျၢခဲလၢာ် ကသ့ဝဲအဂီၢ်န့ၣ်တက့ၢ်.
12 တၢ်အံၤမ့ၢ် တၢ်လုၢ်ဟံၣ်အတၢ်သိၣ်တၢ်သီန့ၣ်လီၤ. ကယဲၢ်တၢ်လီၢ်ကဝီၤလၢ အအိၣ်ဝးတရံးအီၤလၢ ကစၢၢ်ဒီခိၣ်အံၤ, မ့ၢ်တၢ်စီဆှံဒီးဘၣ်တၢ်ပာ်စီဆှံအီၤန့ၣ်လီၤ.
13 အအံၤမ့ၢ်တၢ်လုၢ်လီၢ်အတၢ်ထိၣ်တၢ်တဲာ်တဖၣ်လီၤ. တၢ်သူနီၣ်ထိၣ် တမံၤဃီဒ်သိးဒၣ်တၢ်ထိၣ်ယွၤအတၢ်လုၢ်ဟံၣ်အသိးန့ၣ်လီၤ. ဝးတရံးတၢ်လုၢ်လီၢ်အခီၣ်ထံးန့ၣ်ထံယွၤလီၤအကျိၤအိၣ်ဝဲတကျိၤ လၢအယိာ်အိၣ်ဝဲတပျၢ်ဒီးအလဲၢ်အိၣ်ဝဲတပျၢ်အိၣ်ဒီးအကနူၤလၢ တၢ်ချၢတကပၤလၢအကစီၤထီၣ်ထီဝဲတထါန့ၣ်လီၤ.
14 တၢ်လုၢ်လီၢ်အဖီလာ်ကတၢၢ်တတီၤစးထီၣ်လၢအခီၣ်ထံးအခိၣ်ထိး န့ၣ်အကစီၤထီၣ်အိၣ်ဝဲဒၣ်ခံပျၢ်ဒီးအလဲၢ်အိၣ်ဝဲတပျၢ်ဒီးလၢခံတတီၤ န့ၣ်ဘၣ်တၢ်သုးအီၤဆူတၢ်လီၢ်ခံတပျၢ်ဝးဝးစးထီၣ်လၢအကနူၤဒီး အကစီၤထီၣ်ထီဝဲလွံၢ်ပျၢ်န့ၣ်လီၤ. မၤကဒီးလၢခံတတီၤန့ၣ် ဘၣ်တၢ်သုးအီၤဆူအလီၢ်ခံတပျၢ်ဝးဝးစးထီၣ်လၢအကနူၤန့ၣ်လီၤ.
15 တၢ်အပတီၢ်လၢအဖီခိၣ်ကတၢၢ်ဖဲပှၤဆိၣ်ကဲၤတၢ်လုၢ်တၢ်ပာ်တဖၣ် လၢအဖီခိၣ်န့ၣ်အကစီၤထီၣ်ထီစ့ၢ်ကီးဝဲလွံၢ်ပျၢ်န့ၣ်လီၤ. တၢ်လုၢ်လီၢ်အနၢၣ်လွံၢ်နၢၣ်လၢအဟဲဖျိးထီၣ်အသးန့ၣ်ထီန့ၢ်ဒံး ကယဲၢ်တၢ်အခိၣ်ထိးအဂၤတဖၣ်တက့ၢ်န့ၣ်လီၤ.
16 တၢ်လုၢ်လီၢ်အခိၣ်ဒီန့ၣ်မ့ၢ်တၢ်လွံၢ်နၢၣ်ဝးတရံးလၢအဃူဒ်သိးသိး လိာ်အသးဒီးတကပၤန့ၣ်မ့ၢ်ဝဲတဆံခံပျၢ်စုာ်စုာ်န့ၣ်လီၤ.
17 တၢ်အခၢၣ်သးတပတီၢ်န့ၣ်စ့ၢ်ကီးမ့ၢ်တၢ်လွံၢ်နၢၣ်ဃူသိးလိာ်အသး, တကပၤန့ၣ်အိၣ်တဆံလွံၢ်ပျၢ်စုာ်စုာ်, အိၣ်ဒီးအခိၣ်ဒူတခါလၢအကနူၤလၢ အချၢ, လၢအစီၤထီၣ်ထီဝဲတထါန့ၣ်လီၤ. (ထံယွၤလီၤ အကျိၤလဲၢ်ဝဲတပျၢ်န့ၣ်လီၤ.) ဃီသွါတဖၣ်လၢအလဲၤထီၣ်ဆူ တၢ်လုၢ်လီၢ်န့ၣ်အိၣ်ဝဲဒၣ်လၢမုၢ်ထီၣ်တကပၤန့ၣ်လီၤ.
18 ယွၤပၢဘၣ်တၢ်ခဲလၢာ်ကစၢ်စံးဘၣ်ယၤ, “ပှၤကညီလၢအသံသ့ဧၢ, ဒိကနၣ်တၢ်လၢယတဲဘၣ်နၤန့ၣ်တက့ၢ်. တုၤမ့ၢ် တၢ်လုၢ်လီၢ်ဘၣ်တၢ်ဘှီထီၣ်အီၤဝံၤန့ၣ်, နကဘၣ်ပာ်စီဆှံအီၤခီ ဖျိတၢ်ဆိၣ်ကဲၤတၢ်လုၢ်တၢ်ပာ်တဖၣ်လၢအဖီခိၣ်, ဒီးခီဖျိတၢ်ဖှံ ဆၣ်ဖိကီၢ်ဖိတဖၣ်လၢအဘၣ်တၢ်လုၢ်ထီၣ်အီၤအသွံၣ်လၢအဖီခိၣ် န့ၣ်လီၤ.
19 ပှၤလုၢ်တၢ်အခိၣ်တဖၣ်လၢအဘၣ်ဃးဒီးလ့ၤဝံအဒူၣ်လၢအမ့ၢ်ဒၣ်ထဲ စီၤစၤဒိးအစၢၤအသွဲၣ်တဖၣ်ဧိၤန့ၣ်ကဟဲနုာ်ဘၣ်ဆူအမဲာ်ညါလၢ ကမၤယတၢ်အဂီၢ်န့ၣ်လီၤ. ယၤ, ယွၤပၢဘၣ်တၢ်ခဲလၢာ်ကစၢ် ဟ့ၣ်လီၤတၢ်ကလုၢ်အံၤန့ၣ်လီၤ. နကဘၣ်ဟ့ၣ်လီၤအဝဲသ့ၣ်လၢ ဂီၤဖံးဖါဖိတဒုလၢကလုၢ်ထီၣ်ဝဲဒ်တၢ်လုၢ်တၢ်ပာ်တမံၤအသိး လၢတၢ်လုၢ်တၢ်ဒဲးဘးအဂီၢ်န့ၣ်လီၤ.
20 နကဘၣ်ဟံးန့ၢ်အသွံၣ်တနီၤဒီးပာ်ထီၣ်အီၤလၢတၢ်လုၢ်လီၢ်အနၢၣ် တဖၣ်အလိၤလၢအအိၣ်လၢတၢ်လုၢ်လီၢ်အခိၣ်ဒီအသနၢၣ်တဖၣ် န့ၣ်ဒီးလၢတၢ်လုၢ်လီၢ်အခၢၣ်သးတပတီၢ်အနၢၣ်တဖၣ်အလိၤ, ဒီးလၢကယဲၢ်အကနူၤခဲလၢာ်အလိၤန့ၣ်လီၤ. လၢကျဲဒ်သိးအံၤန့ၣ်, နကမၤကဆှီထီၣ်တၢ်လုၢ်လီၢ်ဒီးပာ်စီဆှံထီၣ်အီၤန့ၣ်လီၤ.
21 နကဘၣ်ဟံးန့ၢ်ဂီၤဖံးဖါဖိလၢတၢ်လုၢ်ထီၣ်အီၤဒ်တၢ်လုၢ်တၢ်ပာ် တမံၤလၢတၢ်လုၢ်တၢ်ဒဲးဘးအဂီၢ်န့ၣ်ဒီးဆိၣ်ကဲၤထီၣ်အီၤလၢ တၢ်လီၢ်ဖဲတၢ်ပာ်လီၤဆီအီၤလၢတၢ်လုၢ်ဟံၣ်အလီၢ်ကဝီၤအချၢ န့ၣ်လီၤ.
22 လၢခံတနံၤန့ၣ်နကဘၣ်ဟံးန့ၢ်မဲာ်တဲးလဲးဖါအလၢအပှဲၤတဒုဒီး လုၢ်ထီၣ်အီၤဒ်တၢ်လုၢ်တၢ်ပာ်တမံၤအသိးလၢတၢ်လုၢ်တၢ်ပျၢ် တၢ်ဒဲးဘးအဂီၢ်န့ၣ်လီၤ. မၤကဆှီထီၣ်တၢ်လုၢ်လီၢ်လၢမဲာ်တဲး လဲးဖါအသွံၣ်တမံၤဃီဒ်နမၤတ့ၢ်အီၤလၢဂီၤဖံးဖါအသွံၣ်အသိးန့ၣ် တက့ၢ်.
23 တုၤနမၤတၢ်တဖၣ်အံၤဝံၤတစုန့ၣ်, ဟံးထီၣ်ဂီၤဖံးဖါအလၢအပှဲၤ ဖိတဒုဒီးသိဖါအလၢအပှဲၤဖိတဒု,
24 ဒီးဟဲစိာ်အီၤဆူယအိၣ်တက့ၢ်. ပှၤလုၢ်တၢ်အခိၣ်တဖၣ်ကဖှံလီၤ အံသၣ်လၢအဝဲသ့ၣ်အဖီခိၣ်ဒီးဆိၣ်ကဲၤထီၣ်အီၤဒ်တၢ်လုၢ်တၢ်ပာ် တမံၤအသိးဆူယအိၣ်န့ၣ်လီၤ.
25 လၢနွံသီအတီၢ်ပူၤန့ၣ်ကိးမုၢ်နံၤဒဲးနကဘၣ်လုၢ်ထီၣ်မဲာ်တဲးလဲး ဖါအလၢအပှဲၤဖိတဒု, ဂီၤဖံးဖါအလၢအပှဲၤဖိတဒုဒီးသိဖါ အလၢအပှဲၤဖိတဒုဒ်တၢ်လုၢ်တၢ်ပာ်တဖၣ်လၢတၢ်လုၢ်တၢ်ပျၢ် တၢ်ဒဲးဘးအဂီၢ်န့ၣ်လီၤ.
26 လၢနွံသီအတီၢ်ပူၤန့ၣ်, ပှၤလုၢ်တၢ်အခိၣ်တဖၣ်ကဘၣ်ပာ်စီဆှံ ထီၣ်တၢ်လုၢ်လီၢ်ဒီးကဘၣ်ကတဲာ်ကတီၤအီၤလၢ တၢ်ကသူအီၤအဂီၢ်န့ၣ်လီၤ.
27 တုၤမ့ၢ်တနွံလၢာ်ကွံာ်န့ၣ်, ပှၤလုၢ်တၢ်အခိၣ်တဖၣ်ကဘၣ်စးထီၣ် လုၢ်ထီၣ်ပှၤဂီၢ်မုၢ်အတၢ်ဆိၣ်ကဲၤအတၢ်လုၢ်တဖၣ်ဒီးအတၢ်လုၢ် မၤဃူမၤဖိးတဖၣ်လၢတၢ်လုၢ်လီၢ်အဖီခိၣ်န့ၣ်လီၤ. အန့ၣ်တစု ယကဘၣ်သူၣ်ဘၣ်သးသုဝဲခဲလၢာ်လီၤ. ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.”