27
1-2 ယွၤစံးဘၣ်ယၤ, “ပှၤကညီလၢအသံသ့ဧၢ, သးဝံၣ်တၢ်သံအတၢ်သးဝံၣ်တယုၢ် လၢဝ့ၢ်ထါယၢၣ်အဂီၢ်,
3 ဝ့ၢ်လၢအအိၣ်သူၣ်လီၤအသးလၢ ပီၣ်လဲၣ်အသရ့ၤဒီးမၤပနံၣ်တၢ်ကၤ အတၢ်မၤဒီး ပှၤဂီၢ်မုၢ်လၢအအိၣ်ဆိးလၢ ကယဲၢ်ပီၣ်လဲၣ်နံၤခဲလၢာ် န့ၣ်တက့ၢ်. တဲဘၣ်အီၤလၢယွၤ, ပၢဘၣ်တၢ်ခဲလၢာ်ကစၢ်စံးတၢ်အံၤ တက့ၢ်. ဝ့ၢ်ထါယၢၣ်ဧၢ, နပာ်ကဖၢလၢနသးလၢနတၢ်ဃံတုာ်လၤတုာ်အဃိန့ၣ်လီၤ.
4 နဟံၣ်မ့ၢ်ပီၣ်လဲၣ်လီၤ. ပှၤတဖၣ်လၢအသူၣ်ထီၣ်နၤန့ၣ်မၤထီၣ်နၤ ဒ်ကဘီဃံလၤတဘ့ၣ်အသိးန့ၣ်လီၤ.
5 အဝဲသ့ၣ် မၤသ့ၣ်ဘၣ်တဖၣ်လၢကစၢၢ်ဃ့ရမိၣ်အသ့ၣ်ဆှိတဖၣ် အဝဲသ့ၣ်ဟံးန့ၢ်လဘၤနိၣ်အသ့ၣ်ဆှိအ့ရ့း တထံးလၢနယၢ်ထူၣ် အဂီၢ်န့ၣ်လီၤ.
6 အဝဲသ့ၣ်ဟံးန့ၢ် ကီၢ်ဘၤၡၣ်အသ့ထိးအီၣ်တဖၣ်လၢကမၤ နီၣ်ဝၢ်တဖၣ်အဂီၢ်လီၤ. အဝဲသ့ၣ်မၤနကဘီအဒါလၢကီး ကူပြူးအသ့ၣ်ဆှိတအၤၡူၢ်ဒီး ကယၢကယဲအီၤဒီးကဆီမဲန့ၣ်လီၤ.
7 နယၢ်လၣ်တဖၣ်ဘၣ်တၢ်မၤအီၤလၢဖှီဝါကဆှၣ်, ဖှီဝါကဆှၣ်ဆးဒဲးကံၣ်ဒဲးဝ့ၤအသးဟဲလၢ ကီၢ်အဲၤကူပတူးတခီ, လၢအဘၣ်တၢ်သ့ၣ်ညါအီၤညီကဒၣ်လၢ အယံၤန့ၣ်လီၤ. နတၢ်ပနီၣ်တဖၣ်ဘၣ်တၢ်မၤအီၤလၢ တၢ်ကံးယာ်အဂ့ၤကတၢၢ်အိၣ်ဒီးအလွဲၢ်လုးတကုာ်ဟဲလၢ ကီးကူပြူးတခီန့ၣ်လီၤ.
8 နပှၤဝၢ်နီၣ်ဝၢ်ဖိတဖၣ် ဟဲဝဲလၢဝ့ၢ်တဖၣ်လၢ အမ့ၢ်ဝ့ၢ်စံဒိၣ်ဒီးဝ့ၢ်အၢ်ဝးန့ၣ်လီၤ. နပှၤဒၣ်နဲအသ့အဘၣ်တဖၣ် မ့ၢ်ပှၤကဘီဖိတဖၣ်န့ၣ်လီၤ.
9 ကဘီအပှၤစုသ့ဖိတဖၣ် မ့ၢ်ပှၤတဖၣ်လၢ အဘၣ်တၢ်သိၣ်လိန့ၢ်အီၤ ဂ့ၤဂ့ၤလၢ ဝ့ၢ်ကံးဘလးန့ၣ်လီၤ. ပှၤကဘီဖိတဖၣ်လၢကယဲၢ် ကဘီလၢ အလဲၤတၢ်လၢပီၣ်လဲၣ်အပူၤန့ၣ်, မၤပနံၣ်တၢ်ကၤတၢ် အတၢ်မၤလၢနကျးတဖၣ် အပူၤန့ၣ်လီၤ.
10 ပှၤသုးဖိတဖၣ်လၢ ကီၢ်ပၤရၣ်, ကီၢ်လူၤဒံဒီးကီၢ်လံးဘယၣ်မၤနၢ်နတၢ်လၢသုးမုၢ်အပူၤန့ၣ်လီၤ. အဝဲသ့ၣ်ဘျးထီၣ်အကတီၤတဖၣ်ဒီးခိၣ်ကုာ်သုးတဖၣ်လၢ နသုးဖိအိၣ်အဟံၣ်တဖၣ်အပူၤန့ၣ်လီၤ. အဝဲသ့ၣ်မ့ၢ် ပှၤတဖၣ်လၢအမၤနၢၤတၢ်လၢနလၤကပီၤအဂီၢ်န့ၣ်လီၤ.
11 ပှၤသုးဖိတဖၣ်လၢ ဝ့ၢ်အၢ်ဝးခိးပၢၤတၢ်လၢနဝ့ၢ်ခိၣ်ဒူတဖၣ် ဒီးပှၤကညီတဖၣ်လၢ ဝ့ၢ်ဂါမးခိးပၢၤတၢ်လၢနတၢးထီခၢၣ် သနၢၣ်တဖၣ်န့ၣ်လီၤ. အဝဲသ့ၣ်ဘျးထီၣ်အကတီၤတဖၣ် လၢနတၢ်ဒူၣ်တဖၣ်အလိၤန့ၣ်လီၤ. အဝဲသ့ၣ်မ့ၢ် ပှၤတဖၣ်လၢအမၤဃံမၤလၤန့ၣ်လီၤ.
12 နမၤပနံၣ်တၢ်ကၤအတၢ်မၤဒီး ကီၢ်စပၤနံဒီးနဟံးန့ၢ်စ့, ထး, ထးဝါဒီးပှာ်သူဒ်တၢ်အပှ့ၤအသိး လၢနတၢ်ဖိတၢ်လံၤအါအါ ကလဲာ်အဂီၢ်န့ၣ်လီၤ.
13 နမၤပနံၣ်တၢ်ကၤအတၢ်မၤလၢကီၢ်ကြံး(စ်), ဝ့ၢ်တူၤဘလးဒီး ဝ့ၢ်မ့ၤၡးအပူၤ, ဒီးမၤတၢ်ဆါတၢ်ပှ့ၤ နတၢ်ဖိတၢ်လံၤတဖၣ် လၢကုၢ်တဖၣ်အဂီၢ်ဒီး လၢတၢ်ပီးတၢ်လီတဖၣ်လၢတၢ်မၤအီၤ လၢတိၢ်ဘီအဂီၢ်န့ၣ်လီၤ.
14 နဆါကွံာ် နတၢ်ဖိတၢ်လံၤတဖၣ်ဒ်သိး နကမၤန့ၢ်ကသ့ၣ်တဖၣ် လၢပှၤမၢအီၣ်အီၤ, ကသ့ၣ်ဒုးသုးတဖၣ်ဒီး ကသ့ၣ်လၤတဖၣ်လၢ အဟဲလၢ တိကးရမၤအပှၤဟံၣ်ဖိ အအိၣ်ဂီၢ်န့ၣ်လီၤ.
15 ပှၤဂီၢ်မုၢ်လၢ ကီၢ်ဒံဒၣ်မၤတၢ်ပနံၣ်တၢ်ကၤဒီးနၤ, ပှၤဂီၢ်မုၢ်လၢ ပီၣ်လဲၣ်နံၤထံကီၢ်အါဘ့ၣ် ဟ့ၣ်လီၤနၤကဆီမဲဒီးသ့ၣ်သီလမူာ်လၢ ကလဲလိာ်ဝဲဒီး နတၢ်ဖိတၢ်လံၤတဖၣ်အဂီၢ်န့ၣ်လီၤ.
16 ကီၢ်စူၤရံအပှၤဂီၢ်မုၢ် ပှ့ၤနတၢ်ပနံာ်တၢ်ကၤတၢ်အတၢ်ပီးတၢ်လီ တဖၣ်ဒီး တၢ်ဖိတၢ်လံၤတဖၣ်လၢ အဟးထီၣ်လၢနထံလီၢ်ကီၢ်ပူၤ န့ၣ်လီၤ. အဝဲသ့ၣ်ဟ့ၣ်လီၤတၢ်မျၢ်လါဟ့, တၢ်ကံးယာ်လုးတကုာ်, တၢ်ဆးဒဲးကံၣ်ဒဲးဝ့ၤ, ဖှီဝါကဆှၣ်အဂ့ၤ, လၢၢ်နၢၤဒီး တၢ်မျၢ်ဂီၤဆှုၣ်တဖၣ် ဒ်တၢ်အပှ့ၤလၢ နတၢ်ဖိတၢ်လံၤလၢနဆါအီၤ တဖၣ်အဂီၢ်န့ၣ်လီၤ.
17 ကီၢ်ယူဒၤဒီးကီၢ်အံၣ်စရ့လးတဖၣ် ဟ့ၣ်နၤတၢ်အပှ့ၤလၢဘုကၠူၣ်, ကနဲစီ, သ့ၣ်စၤယံးအသိဒီးတၢ်နၢမူတဖၣ်လၢတၢ်ဖိတၢ်လံၤတဖၣ် လၢနဆါအီၤအဂီၢ်န့ၣ်လီၤ.
18 ဝ့ၢ်ဒၤမ့ၤစ့းအပှၤဂီၢ်မုၢ် ပှ့ၤပနံၣ်တၢ်ကၤတၢ်အတၢ်ပီးတၢ်လီတဖၣ်ဒီး တၢ်ဖိတၢ်လံၤတဖၣ်လၢ အဟးထီၣ်လၢနထံလီၢ်ကီၢ်ပူၤ, ဒီးဟ့ၣ်ဝဲအပှ့ၤလၢဃ့လဘိၣ်အစပံးထံဒီး စၤဟၣ်အသိဆူၣ်တဖၣ်န့ၣ်လီၤ.
19 အဝဲသ့ၣ်လဲလိာ်ထးလၢ တၢ်ပိာ်အီၤဝံၤဒီးတၢ်နၢမူတဖၣ်ဒီး နတၢ်ပနံာ်တၢ်ကၤတၢ် အတၢ်ပီးတၢ်လီတဖၣ်န့ၣ်လီၤ.
20 ပှၤဂီၢ်မုၢ်လၢ ဒံဒၣ်လဲယိာ်ယၣ်တဖၣ်လၢကသ့ၣ်ဂီၤကၢ်အဂီၢ်ဒီး နတၢ်ဖိတၢ်လံၤတဖၣ်န့ၣ်လီၤ.
21 ပှၤဧ့ရ့းဖိတဖၣ်ဒီး ဝ့ၢ်က့ဒၢ်အပဒိၣ်ဖးဒိၣ်တဖၣ်ဟ့ၣ်လီၤဝဲသိဖိ တဖၣ်, ဒီးမဲာ်တဲးလဲးတဖၣ်လၢ တၢ်ပနံၣ်တၢ်ကၤတၢ်ဒီးနၤအဂီၢ်လီၤ.
22 လၢနတၢ်ဖိတၢ်လံၤတဖၣ်အဂီၢ်န့ၣ်, ပှၤကၤတၢ်ဖိလၢကီၢ်ၡဘၤ ဒီးကီၢ်ရၤဧမၤတဖၣ် လဲလိာ်ဝဲဒီးတၢ်မျၢ်ပလဲတဖၣ်, ထူဒီးတၢ်နၢမူအဂ့ၤကတၢၢ်တဖၣ်န့ၣ်လီၤ.
23 ဝ့ၢ်တဖၣ်လၢအမ့ၢ်ဝ့ၢ်ဟၤရၣ်, ဝ့ၢ်ကးနၤ, ဝ့ၢ်ဧ့ဒ့ၣ်, ပှၤပနံၣ်တၢ်ဘးကၤတၢ်ဖိတဖၣ်လၢ ကီၢ်ၡဘၤဒီး ဝ့ၢ်တဖၣ်လၢအမ့ၢ်ဝ့ၢ်အၤၡူၢ်ဒီးဝ့ၢ်ကံလမး, အဝဲသ့ၣ်တဖၣ်ခဲလၢာ် မၤတၢ်ပနံၣ်တၢ်ကၤအတၢ်မၤဒီးနၤန့ၣ်လီၤ.
24 အဝဲသ့ၣ်ဆါဝဲ နတၢ်ကူတၢ်သိးဃံလၤလုၢ်ဒိၣ်ပှ့ၤဒိၣ်တဖၣ်, တၢ်ကံးညၣ်လုးတကုာ်, ဒီးတၢ်ဆးဒဲးကံၣ်ဒဲးဝ့ၤ, ဖုဒါ, လၢအအိၣ်ဒီး အလွဲၢ်စီၣ်ဂ့ၤတဖၣ်, ဒီးပျံၤအကလုာ် ကလုာ်ပိၤအသးဂ့ၤဂ့ၤန့ၣ်လီၤ.
25 နတၢ်ပနံၣ်တၢ်ကၤအတၢ်ပီးတၢ်လီတဖၣ်ဘၣ်တၢ်စိာ်အီၤလၢ တၢ်မၤကူၣ်မၤကၤအကဘီအဒိၣ်ကတၢၢ်တဖၣ် အကရူၢ်အပူၤ န့ၣ်လီၤ. နလီၤဂာ်ဒ်ကဘီတဘ့ၣ်လၢ ပီၣ်လဲၣ်အပူၤလၢတၢ်ပဒၢး ဃာ်အီၤဒီးတၢ်ပီးတၢ်လီတဖၣ်န့ၣ်လီၤ.
26 ဖဲနပှၤဝၢ်နီၣ်ဝၢ်ဖိတဖၣ်ဆှၢဃီၤနၤဆူပီၣ်လဲၣ်ပူၤန့ၣ်, မုၢ်ထီၣ်အကလံၤမၤဟးဂီၤနၤ, ယံၤဝဲဒီးကၢၢ်ပၤနံၤန့ၣ်လီၤ.
27 ကယဲၢ်နပနံၣ်တၢ်ကၤတၢ်အတၢ်ထူးတၢ်တီၤကယဲၢ်ပှၤဒိး ကဘီလၢနပှၤကဘီဖိအကျါနကဘီအပှၤစုသ့တဖၣ်ဒီး နပှၤမၤကူၣ်မၤကၤတဖၣ်ကယဲၢ်ပှၤသုးဖိလၢ ကဘီဖီခိၣ်ခဲလၢာ်န့ၣ် ဟါမၢ်ကွံာ်ဝဲခဲလၢာ် လၢပီၣ်လဲၣ်အပူၤဖဲနကဘီဟးဂီၤကွံာ်ဝဲန့ၣ်လီၤ.
28 ပှၤကဘီဖိလၢ အလီၤဘျၢတဖၣ်အတၢ်ကိးပသူထီၣ်န့ၣ်သီၣ်ထီၣ် ကဒါက့ၤဒၣ်လဲာ်လၢပီၣ်လဲၣ်ကၢၢ်နံၤန့ၣ်လီၤ.
29 ကဘီကိးဘ့ၣ်ဒဲးန့ၣ်ခဲအံၤ ဘၣ်တၢ်ဟးသဒၣ်ကွံာ်လံ, ဒီးကဘီဖိ ကိးဂၤဒဲးန့ၣ် လဲၤထီၣ်ဆူပီၣ်လဲၣ်ကၢၢ်ခိၣ်လံန့ၣ်လီၤ.
30 အဝဲသ့ၣ်ခဲလၢာ် ဘၣ်မိၣ်ဘၣ်မးနးနးကလဲာ်လၢနဂီၢ်, ဖှံထီၣ် ဟီၣ်ခိၣ်ကမူၣ်တဖၣ် လၢအခိၣ်လိၤဒီးထွၣ်တလ့ၣ်အသးလၢ ဖၣ်ဆၣ်ကျါန့ၣ်လီၤ.
31 အဝဲသ့ၣ်လူၤကွံာ်အခိၣ်တဖၣ်လၢ နဂီၢ်ဒီးကူထီၣ်ကၤထီၣ်ဝဲထၢၣ် တၢ်ကံးညၣ်န့ၣ်လီၤ. အဝဲသ့ၣ်အသးတဖၣ် ဆါဝဲနးနးကလဲာ် ဒ်အဟီၣ်ဝဲနးနး ကလဲာ်အသိးန့ၣ်လီၤ.
32 အဝဲသ့ၣ်အုၣ်တၢ်သံ အတၢ်သးဝံၣ်တယုၢ်လၢ နဂီၢ်လီၤ. စံးဝဲ, မ့ၢ်မတၤတဂၤထိၣ်သတြီၤအသးဒီး ဝ့ၢ်ထါယၢၣ်ကသ့န့ၣ်လဲၣ်. ခဲအံၤ ဝ့ၢ်ထါယၢၣ်အိၣ်ဘှီၣ်ကလာ်လၢ ပီၣ်လဲၣ်အပူၤလံ.
33 ဖဲနတၢ်ပနံၣ်တၢ်ကၤ အတၢ်ပီးတၢ်လီလဲၤဆူတခီထံတခီကီၢ်တဖၣ်န့ၣ် နမၤပှဲၤထီၣ် ကယဲၢ်ပှၤကိးကလုာ်ဒဲးအတၢ်လိၣ်တဖၣ်န့ၣ်လီၤ. စီၤပၤတဖၣ် မၤကဲဒိၣ်ထီၣ်အသးလၢနတၢ်ဖိတၢ်လံၤတဖၣ် အတၢ်ထူးတၢ်တီၤန့ၣ်လီၤ.
34 ခဲကနံၣ်အံၤ နဟးဂီၤလၢပီၣ်လဲၣ်အပူၤလံ. နလီၤဘျၢကွံာ်လံလၢ ပီၣ်လဲၣ်ဖးဒိၣ်အတၢ်ယိာ်ပူၤ, နတၢ်ဖိတၢ်လံၤတဖၣ်ဒီးပှၤတဖၣ်လၢ အမၤတၢ်လၢနဂီၢ်န့ၣ်လီၤ. မၢ်ကွံာ်ဃုာ်ဒီးနၤလၢပီၣ်လဲၣ်အပူၤ ခဲလၢာ်လံ.
35 ပှၤကိးဂၤလၢ အအိၣ်လၢပီၣ်လဲၣ်နံၤန့ၣ်ပျံၤတၢ်ဖုးတၢ်ဒီးအသးလီၤ ကတုၤလၢ နတၢ်ဟဲဝံဟဲစိာ်အဃိန့ၣ်လီၤ. အဝဲသ့ၣ်စီၤပၤတဖၣ် ဒၣ်လဲာ်ပျံၤတၢ်ဖုးတၢ်, ဒီးအမဲာ်သၣ်တဖၣ် ပှဲၤဒီးတၢ်ပျံၤတၢ်ဖုး န့ၣ်လီၤ.
36 နတအိၣ်လၢၤဘၣ်. နဟါမၢ်ကွံာ်လီၤစိၤ လီၤထီလံ, ဒီးကယဲၢ်ပှၤကူၣ်တၢ်ကၤတၢ်ဖိလၢ ဟီၣ်ခိၣ်ဒီဘ့ၣ်သူၣ်ပျံၤသးဖုး, ပျံၤတၢ်ဖုးတၢ်လၢ နတၢ်ဟဲဝံအၢအံၤ ကဘၣ်ဘၣ်ဖုးအဝဲသ့ၣ်န့ၣ်လီၤ.”