28
1-2 ယွၤကတိၤတ့ၢ်တၢ်ဒီးယၤလီၤ. အဝဲစံးဝဲဒၣ်, “ပှၤကညီလၢအသံသ့ဧၢ, တဲဘၣ်ဝ့ၢ်ထါယၢၣ်အပှၤပၢတၢ်လၢ, တၢ်လၢယၤ, ယွၤပၢဘၣ်တၢ်ခဲလၢာ်ကစၢ်စံးဘၣ်အီၤန့ၣ်တက့ၢ်. လၢတၢ်ပာ်ထီၣ်ထီသးအပူၤန့ၣ်, နစံးလီၤနသးလၢ နမ့ၢ်ယွၤတဂၤန့ၣ်လီၤ. နစံးလၢ, ဒ်ယွၤတဂၤအသိးန့ၣ် နဆ့ၣ်နီၤလၢ လီၢ်ပစိာ်တဖျၢၣ်အဖီိခိၣ်, ဘၣ်တၢ်ကဝီၤဃာ်အီၤလၢ ပီၣ်လဲၣ်တဖၣ်န့ၣ်လီၤ. နကပာ်မၤနသး ဒ်ယွၤတဂၤအသိး, ဘၣ်ဆၣ်တမ့ၢ်ဘၣ်. နမ့ၢ်ဒၣ်ပှၤတဂၤလၢ အသံသ့, ဒီးတမ့ၢ်ဘၣ်တၢ်စီတၢ်ဆှံဘၣ်.
3 နဆိကမိၣ်လၢ နကူၣ်တၢ်သ့ဒိၣ်န့ၢ်ဒံးစီၤဒၤနံးယ့လးတက့ၢ်, ဒီးတၢ်ခူသူၣ်အိၣ်တဒၢလၢ နမဲာ်ညါတသ့နီတမံၤဘၣ်န့ၣ်လီၤ.
4 နတၢ်ကူၣ်သ့ဒီးတၢ်သ့တၢ်ဘၣ်မၤကဲဒိၣ်နၤဒီးတၢ်ထူးတၢ်တီၤ တဖၣ်လၢထူဒီးစ့န့ၣ်လီၤ.
5 နမၤပနံၣ်တၢ်ကၤအတၢ်မၤအိၣ်ဒီးတၢ်သးဆး, တၢ်ပ့ၢ်တၢ်ဆှါဒီး နမၤအါထီၣ်နတၢ်စုလီၢ်ခီၣ်ခိၣ်ကွ့ၢ်ကွ့ၢ်န့ၣ်လီၤ. နပာ်ထီၣ်ထီနသးလၢ နတၢ်ထူးတၢ်တီၤတဖၣ်အဃိဒိၣ်မးလဲၣ်.
6 လၢတၢ်န့ၣ်အဃိခဲကနံၣ်အံၤ အအံၤမ့ၢ်တၢ်လၢယၤ, ယွၤပၢဘၣ်တၢ်ခဲလၢကစၢ်စံးဝဲဒၣ်န့ၣ်လီၤ. မ့ၢ်လၢနဆိကမိၣ်နဲလၢ နကူၣ်ဘၣ်ကူၣ်သ့ထဲသိးဒီးယွၤတဂၤအဃိ,
7 ယကဟဲစိာ်ဃီၤဒုၣ်ဒါတဖၣ်လၢအတအိၣ်ဒီးတၢ်သးကညီၤဘၣ်လၢ ကဟဲထီၣ်ဒုးနၤအဂီၢ်န့ၣ်လီၤ. အဝဲသ့ၣ်ကမၤဟးဂီၤကွံာ်တၢ်ဃံတၢ်လၤခဲလၢာ်လၢ နမၤန့ၢ်တ့ၢ်အီၤလၢနတၢ်သ့တၢ်ဘၣ်ဒီး တၢ်ကူၣ်သ့အပူၤန့ၣ်လီၤ.
8 အဝဲသ့ၣ် ကမၤသံနၤဒီး ဆှၢနၤဆူတၢ်သွၣ်ခိၣ်တပူၤလၢအဘၣ်စီၣ်ဘၣ်သ့န့ၣ်လီၤ.
9 ဖဲအဝဲသ့ၣ်ဟဲလၢ ကမၤသံနၤန့ၣ်မ့ၢ်နကစံးဒံး ဒၣ်လၢနမ့ၢ်ယွၤတဂၤန့ၣ်ဧါ. ဖဲနကွၢ်ဆၢၣ်မဲာ်ဘၣ်ဒီး ပှၤလၢကမၤသံနၤတဖၣ်န့ၣ်, နကမ့ၢ်ပှၤတဂၤလၢ အသံသ့ဒီးတမ့ၢ်ဘၣ် တၢ်စီတၢ်ဆှံလ့ၤတက့ၤဘၣ်န့ၣ်လီၤ.
10 နကသံဒ်ထွံၣ်တဒုအသိးလၢပှၤတခီဘီမုၢ်ဖိတဖၣ်လၢ အယွၤတအိၣ်ဘၣ်အစုပူၤန့ၣ်လီၤ. ယၤ, ယွၤပၢဘၣ်တၢ်ခဲလၢာ် ကစၢ်ဟ့ၣ်လီၤအကလုၢ်န့ၣ်လီၤ.”
11-12 ယွၤကတိၤကဒီးတၢ်ဒီးယၤန့ၣ်လီၤ. အဝဲစံးဝဲဒၣ်, “ပှၤကညီလၢအသံသ့ဧၢ, သူၣ်အုးသးအုးလၢ တၢ်ဟဲဝံဟဲစိာ်လၢ အအိၣ်ခိးလီၤပာ်စၢၤဝ့ၢ်ထါယၢၣ်အစီၤပၤအခိၣ်, အဃိန့ၣ်တက့ၢ်. တဲဘၣ်အီၤတၢ်လၢယၤ, ယွၤပၢဘၣ်တၢ်ခဲလၢာ် ကစၢ်စံးဝဲန့ၣ်တက့ၢ်. တဘျီန့ၣ်နမ့ၢ်တ့ၢ်တၢ်လၢတၢ်ပှဲၤအတၢ် ဒိတၢ်တဲာ်တမံၤန့ၣ်လီၤ. နကူၣ်သ့ဒီးဃံလၤတ့ၢ်ဒိၣ်မးလဲၣ်.
13 နအိၣ်ဆိးတ့ၢ်လၢ ဧ့ၤဒ့ၣ်, ကစၢ်ယွၤအတၤသၣ်လီၢ်အပူၤဒီး နသိးထီၣ်တ့ၢ်လၢၢ်တၢ်မျၢ်ကိးကလုာ်ဒဲး လၢအမ့ၢ်တၢ်မျၢ်ဆီသွံၣ် တဖၣ်, တၢ်မျၢ်မဟူယၤတိၤအသး, တၢ်မျၢ်ဘီအူး သဖးယၤ, တၢ်မျၢ်လါဟ့, တၢ်မျၢ်မဟူယၤဂီၤ, တၢ်မျၢ်နကၤသွဲး, တၢ်မျၢ်နံၤလါအဲးတဖၣ်, လၢၢ်လါဟ့တဖၣ်ဒီးလၢၢ်ဂီၤတဖၣ်န့ၣ်လီၤ. နအိၣ်စ့ၢ်ကီးဒီးတၢ်ကယၢကယဲတဖၣ်လၢထူန့ၣ်လီၤ. တၢ်တဖၣ်န့ၣ်ဘၣ်တၢ်မၤတ့ၢ်အီၤလၢနဂီၢ်ဖဲမုၢ်တနံၤလၢ နဘၣ်တၢ်တ့လီၤပာ်လီၤနၤန့ၣ်လီၤ.
14 ယပာ်လီၤတ့ၢ် မူခိၣ်ကလူးတဂၤလၢအလီၤပျံၤလီၤဖုးဖဲန့ၣ်လၢ ကခိးဒီဒၣ်နၤန့ၣ်လီၤ. နအိၣ်လၢယကစၢၢ်စီဆှံအလိၤ, နလဲၤ တၢ်လၢလၢၢ်တၢ်မျၢ်ကပြုၢ်ကပြီၤတဖၣ် အကျါန့ၣ်လီၤ.
15 နတၢ်သကဲးပဝးမ့ၢ် တၢ်လၢတၢ်ပှဲၤစးထီၣ်မုၢ်တနံၤလၢနဘၣ် တၢ်တ့လီၤပာ်လီၤနၤတုၤဃီၤလၢနစးထီၣ်မၤတၢ်အၢတၢ်သီတစုန့ၣ်လီၤ.
16 နတၢ်ဖံးတၢ်မၤအါလၢ တၢ်ဆါတၢ်ပှ့ၤဒီး တၢ်အံၤန့ၣ်ဆှၢဃီၤနၤဆူတၢ်မၤဆူၣ်မၤစိးတၢ်ဒီးတၢ်မၤဒဲးဘးန့ၣ်လီၤ. လၢတၢ်န့ၣ်အဃိ, ယမၤဆူၣ်ဒ်သိး နကဟးထီၣ်ကွံာ်လၢယကစၢၢ်စီဆှံဒီးမူခိၣ်ကလူး တဂၤလၢအခိးဒီဒၣ်နၤန့ၣ်နီၣ်ဟးထီၣ်ကွံာ်နၤယံၤဒီး လၢၢ်တၢ်မျၢ်ကပြုၢ်ကပြီၤတဖၣ်န့ၣ်လီၤ.
17 နပာ်ထီၣ်ထီတ့ၢ်နသးလၢနက့ၢ်ဘၣ်ဂီၤဂ့ၤအဃိဒီး နတၢ်မံၤဟူသၣ်ဖျါဒုးကဲထီၣ်နၤလီၤဂာ်ဒ်ပှၤဟးဂီၤဖိ တဂၤအသိးန့ၣ်လီၤ. မ့ၢ်လၢတၢ်အံၤအဃိယတ့ၢ်လီၤကွံာ် နၤလၢဟီၣ်ခိၣ်လိၤ, ပာ်တ့ၢ်နၤဒ်တၢ်ဟ့ၣ်ပလီၢ်တမံၤအသိးလၢ စီၤပၤအဂၤတဖၣ်အဂီၢ်လီၤ.
18 နမၤတၢ်အၢတၢ်သီဒ်သိးအံၤတမံၤလၢတၢ်ဆါတၢ်ပှ့ၤအပူၤ တုၤနတၢ်လီၢ်တဖၣ်လၢတၢ်ဘူၣ်ထီၣ်ဘါထီၣ်အဂီၢ်န့ၣ်ဟးဂူာ် ဟးဂီၤကွံာ်ဝဲဒၣ်န့ၣ်လီၤ. လၢတၢ်န့ၣ်အဃိယဒွဲၣ်ကွံာ်ဝ့ၢ်န့ၣ်လၢမ့ၣ် အူဒီး မ့ၣ်အူအီၣ်ကွံာ်အီၤခဲလၢာ်န့ၣ်လီၤ. ပှၤလၢအကွၢ်ဃီၤနၤ ခဲလၢာ်န့ၣ်ခဲအံၤထံၣ်ဝဲလၢနကဲထီၣ်ဖၣ်ဆါလံန့ၣ်လီၤ.
19 နတအိၣ်လၢၤဘၣ်. နဟါမၢ်ကွံာ်လံလီၤစိၤလီၤထီလံ, ဒီးကယဲၢ်ပှၤကလုာ်လၢအသ့ၣ်ညါတ့ၢ်နၤတဖၣ် ပျံၤတၢ်ဖုးတၢ်, ဒီးဘၣ်ယိာ်ဝဲလၢနတၢ်ဟဲဝံဟဲစိာ်အံၤကဘၣ်ဘၣ်ဖုးအဝဲသ့ၣ်န့ၣ်လီၤ.”
20 ယွၤစံးဘၣ်ယၤ,
21-22 “ပှၤကညီလၢသံသ့ဧၢ, စံးလၢဝ့ၢ်စံဒိၣ်ကြၢးဘၣ်တၢ်စံၣ်ညီၣ်တက့ၢ်. တဲဘၣ်ပှၤဂီၢ်မုၢ်ဖဲန့ၣ်တဖၣ်လၢ, တၢ်လၢယၤ, ယွၤပၢဘၣ်တၢ် ခဲလၢာ်ကစၢ်တဲဝဲဘၣ်ဃးဒီးအဝဲသ့ၣ်အဂ့ၢ်န့ၣ်တက့ၢ်. ဝ့ၢ်စံဒိၣ်ဧၢ, ယမ့ၢ်နဒုၣ်နဒါလီၤ. ပှၤဂီၢ်မုၢ်ကစံးထီၣ်ပတြၢၤယၤလၢတၢ်လၢယမၤနၤသ့ၣ်တဖၣ်အဃိလီၤ. အဝဲသ့ၣ်ကသ့ၣ်ညါဝဲလၢယမ့ၢ်ယွၤ, ဖဲယပာ်ဖျါထီၣ်ယသးလၢ, ယစီဝဲဆှံဝဲထဲလဲၣ်ခီဖျိယစံၣ်ညီၣ်ပှၤလၢအအိၣ်ဆိးလၢ နပူၤတဖၣ်အဃိန့ၣ်လီၤ.
23 ယကဆှၢလီၤတၢ်ဆူးတၢ်ဆါတဖၣ်လၢနလိၤဒီး ယကဒုးယွၤလီၤ တၢ်သွံၣ်လၢနကျဲမုၢ်တဖၣ်အပူၤန့ၣ်လီၤ. နကဘၣ်တၢ်ဟဲထီၣ်ဒုးနၤလၢအကပၤကပၤဒီး နပှၤဂီၢ်မုၢ်ကဘၣ်တၢ်မၤသံကွံာ်အီၤန့ၣ်လီၤ. အန့ၣ်တစု, နကသ့ၣ်ညါလၢယမ့ၢ်ယွၤန့ၣ်လီၤ.”
24 ယွၤစံးဝဲဒၣ်, “ပှၤကလုာ်တဖၣ်လၢအအိၣ်ဝးတရံးကီၢ်အံၣ်စရ့လး, လၢအမၤတရီတပါအီၤန့ၣ်, တကဲထီၣ်လၢၤတၤဆှုၣ်တၤမဲတဖၣ် လၢကမၤဆါကဒီးအီၤနီတဖုလၢၤဘၣ်. ဒီးအဝဲသ့ၣ်ကသ့ၣ်ညါဝဲ လၢယမ့ၢ်ယွၤပၢဘၣ်တၢ်ခဲလၢာ်အကစၢ်န့ၣ်လီၤ.”
25 ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “ယကဟဲက့ၤစိာ်ကဒါက့ၤ ကီၢ်အံၣ်စရ့လးအပှၤဂီၢ်မုၢ်လၢထံကီၢ်တဖၣ်လၢယမၤလီၤပြံလီၤပြါ တ့ၢ်အဝဲသ့ၣ်ဒီးပှၤကလုာ်ခဲလၢာ်ကသ့ၣ်ညါဝဲလၢယမ့ၢ်တၢ်စီဆှံ န့ၣ်လီၤ. ကီၢ်အံၣ်စရ့လးအပှၤဂီၢ်မုၢ် ကအိၣ်ဆိးလၢ အထံကီၢ်ဒၣ်ဝဲအပူၤ, ထံကီၢ်တဘ့ၣ်လၢယဟ့ၣ်လီၤ တ့ၢ်ယခ့ယပှၤစီၤယၤကိာ်န့ၣ်လီၤ.
26 အဝဲသ့ၣ်ကအိၣ်ဆိးဝဲဖဲန့ၣ်လၢတၢ်ဘံၣ်တၢ်ဘၢအပူၤန့ၣ်လီၤ. အဝဲသ့ၣ်ကဘှီထီၣ်ဟံၣ်တဖၣ်ဒီး ကသူၣ်လီၤစပံးမုၢ်လီၢ်တဖၣ်လီၤ. ယကစံၣ်ညီၣ်ကယဲၢ်ပှၤအိၣ်ခိၣ် အိၣ်ဃၢၤအဝဲသ့ၣ်တဖၣ်လၢအဒုၣ်ဒွဲၣ်တ့ၢ်အဝဲသ့ၣ်, ဒီးကီၢ်အံၣ်စရ့လး ကအိၣ်ဂၢၢ်ဆိးကျၢၤဝဲလီၤ. အန့ၣ်တစု, အဝဲသ့ၣ်ကသ့ၣ်ညါဝဲလၢယမ့ၢ်ယွၤအဝဲသ့ၣ်အကစၢ်ယွၤန့ၣ်လီၤ.”