1 လၢပဘၣ်တၢ်စိာ်မၢကဲကုၢ်ပှဲၤထီၣ်တဆံတနံၣ်, ... လါထီၣ်အခီၣ်ထံးတသီန့ၣ်, ယွၤကတိၤတ့ၢ်တၢ်ဒီး ယၤလီၤ. 2 အဒ်မ်ဝဲစံးဝဲဒၣ်, “ပှၤကညီလၢအသံသ့ဧၢ, အအံၤမ့ၢ်တၢ်လၢပှၤဂီၢ်မုၢ်လၢဝ့ၢ်ထါယၢၣ်အပူၤကိး ပသူထီၣ်တၢ်သူၣ်ဖှံသးညီအပူၤအဂ့ၢ်န့ၣ်လီၤ. အဝဲသ့ၣ်ကိးသတြီထီၣ်ဝဲ, ဝ့ၢ်ယရူၤၡလ့ၣ်ဟးဂီၤလီၤပြံလီၤပြါ ကွံာ်လံ. အပနံၣ်တၢ်ကၤတၢ်အတၢ်မၤအစိကမီၤန့ၣ်ဟးဂီၤကွံာ်လံ. အဝဲတမ့ၢ်လၢၤပှၤပြၢလိာ်အသးဒီးပှၤနီတစုလၢၤဘၣ်. 3 အန့ၣ်ဝံၤဒီး, ခဲကနံၣ်အံၤ, အအံၤမ့ၢ်တၢ်လၢယၤ, ယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. ဝ့ၢ်ထါယၢၣ်ဧၢ, ယမ့ၢ်နဒုၣ်နဒါလီၤ. ယကဟဲစိာ်ပှၤကလုာ်အါကလုာ် လၢကဟဲဒုးတၢ်, ဒီးအဝဲသ့ၣ်ကဟဲဝဲဒၣ်ဒ်လပီတဖၣ်လၢ ပီၣ်လဲၣ်ပူၤအသိးန့ၣ်လီၤ. 4 အဝဲသ့ၣ်ကမၤဟးဂီၤကွံာ်နဝ့ၢ်အခိၣ်ဒူတဖၣ် ဒီးကမၤလီၤပှီၢ်ကွံာ်နတၢးထီခၢၣ်သနၢၣ်တဖၣ်လီၤ. အန့ၣ်ဝံၤဒီးယကခွဲသိၣ်ခွဲပျီကွံာ်ကယဲၢ်ဖၣ်ဆါ ခဲလၢာ်ဒီးပာ်တ့ၢ်ဒၣ်ထဲလၢၢ်ဖးဒိၣ်အိၣ်လ့ၤကဒိတဖျၢၣ်ဧိၤန့ၣ်လီၤ. 5 ပှၤမၤညၣ်ဖိတဖၣ်ကမၤဃ့ထီအပှာ်တဖၣ်လၢအဖီခိၣ်ဖဲန့ၣ်, ဖဲတၢ်လီၢ်လၢလၢၢ်န့ၣ်အိၣ်ထူၣ်ကလာ်လၢပီၣ်လဲၣ်ပူၤန့ၣ်လီၤ. ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ. ပှၤကလုာ်တဖၣ်ကဂုာ်ဆူၣ်ပျီဆူၣ်ကွံာ်ဝ့ၢ်ထါယၢၣ်, 6 ဒီးလၢအဝဲသ့ၣ်အနးတဖၣ်န့ၣ်, အဝဲသ့ၣ်ကမၤသံကွံာ်ပှၤတဖၣ်လၢ အအိၣ်လၢအဝ့ၢ်တဖၣ်အပူၤလၢကီၢ်မိၢ်ပှၢ်အဖီခိၣ်န့ၣ်လီၤ. အန့ၣ်ဒီးမ့ၢ်ထါယၢၣ်ကသ့ၣ်ညါလၢယမ့ၢ်ယွၤန့ၣ်လီၤ.” 7 ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “ယကမၢလီၤစီၤပၤ အဒိၣ်ကတၢၢ်လၢစီၤပၤခဲလၢာ်အကျါ, လၢအမ့ၢ်ကီၢ်ဘၤဘူၤလိၣ် အစီၤပၤနဘူၤကးန့စၢ်လၢအကဟဲဒုးဝ့ၢ်ထါယၢၣ်အဂီၢ်န့ၣ်လီၤ. အဝဲကဟဲဝဲလၢကလံၤစိးတခီ, အိၣ်ဒီးအသုးမုၢ်ဖးဒိၣ်တဖု, အိၣ်ဒီးကသ့ၣ်တဖၣ်, လ့ၣ်ကဟၣ်တဖၣ်ဒီးပှၤဒိးကသ့ၣ်သုးဖိ တဖၣ်န့ၣ်လီၤ. 8 ပှၤတဖၣ်လၢအအိၣ်လၢဝ့ၢ်တဖၣ်အပူၤလၢကီၢ်မိၢ်ပှၢ်န့ၣ်ကဘၣ် တၢ်မၤသံအီၤလၢတၢ်ဒုးအပူၤန့ၣ်လီၤ. ဒုၣ်ဒါတဖၣ်ကခူၣ်ဝဲ တၢ်ကျိၤတဖၣ်, ကမၤထီထီၣ်ဟီၣ်ခိၣ်တဖၣ်, ဒီးမၤထီၣ်တၢ်ဒူၣ်ခၢၣ်သနၢၣ်တခါဒ်အမ့ၢ်ကတီၤတဖၣ်န့ၣ်လီၤ. 9 အဝဲသ့ၣ်ကဆုလီၤနခိၣ်ဒူတဖၣ်လၢနီၣ်ဘၢၣ်ဖျိတၢ်တဖၣ်ဒီးကမၤ လီၤပှီၢ်ကွံာ်နတိာ်ဧိၤတာ်ဧိၤလၢထးဘိတဖၣ်န့ၣ်လီၤ. 10 ဖၣ်ဆါခုၣ်ထီၣ်ဒ် တၢ်အၢၣ်ခံးသူလၢအဝဲသ့ၣ်အကသ့ၣ်တဖၣ် ဒုးအိၣ်ထီၣ်ဝဲန့ၣ်ကလုၣ်ဘၢနၤလီၤ. အဝဲသ့ၣ်အကသ့ၣ်တဖၣ်တွံၢ်လ့ၣ်ကဟၣ်စိာ်တၢ်ပီးတၢ်လီတဖၣ်ဒီး လ့ၣ်ကဟၣ်ဒုးသုးတဖၣ်အသီၣ်န့ၣ်ကမၤသထြုးနခိၣ်ဒူတဖၣ်ဖဲ အဝဲသ့ၣ်လဲၤခီဂာ်ဝ့ၢ်လၢအဟးဂီၤအတြဲၤတဖၣ်အခါန့ၣ်လီၤ. 11 အဝဲသ့ၣ်အပှၤဒိးကသ့ၣ်သုးဖိတဖၣ် ကလဲၤခီ ဂာ်နကျဲဘိတဖၣ်ဆူၣ်ဆူၣ်ချ့ချ့ဒီး မၤသံကွံာ်နပှၤဂီၢ်မုၢ် တဖၣ်လၢအဝဲသ့ၣ်အနးတဖၣ်န့ၣ်လီၤ. နတၢၣ်ထူၣ်တဖၣ်လၢအဂံၢ်ဆူၣ်ဘါဆူၣ်န့ၣ် ကဘၣ်တၢ်မၤလီၤဃံၤကွံာ်အီၤဆူ ဟီၣ်ခိၣ်လိၤန့ၣ်လီၤ. 12 သုဒုၣ်သုဒါတဖၣ်ကဟံးန့ၢ်ကွံာ်သုတၢ်ထူးတၢ်တီၤတဖၣ်ဒီး သုတၢ်ပနံၣ်တၢ်ကၤတၢ်တဖၣ်လၢ အကစၢ်ဒၣ်ဝဲအဂီၢ်န့ၣ်လီၤ. အဝဲသ့ၣ်ကမၤလီၤပှီၢ်ကွံာ်သု ဝ့ၢ်ခိၣ်ဒူတဖၣ်ဒီးကမၤလီၤ ကလဲကွံာ်သုဟံၣ်ဃံလၤကပြုၢ်ကပြီၤတဖၣ်လၢ သုပာ်အီၤဒ်ဟီၣ်ခိၣ်အတၢ်မုာ်တၢ်ပၢၤအလီၢ်န့ၣ်လီၤ. အဝဲသ့ၣ်ကစိာ်ထီၣ်ကွံာ်လၢၢ်တဖၣ်ဒီးသ့ၣ်ဒီးကယဲၢ်တၢ် အက့အခီအကမူၣ်ခဲလၢာ်, ဒီးကတ့ၢ်လီၤဖှိၣ်ကွံာ်ဝဲဆူ ပီၣ်လဲၣ်ပူၤန့ၣ်လီၤ. 13 ယကမၤကတၢၢ်ကွံာ် ကယဲၢ်သုတၢ်သးဝံၣ်တဖၣ် ဒီးယကမၤဘှ့ၣ်မၤဘှီၣ်ကွံာ်သုသီတူၢ်တဖၣ် အတၢ်သူၣ်ဝံၣ်သးဆၢအသီၣ်န့ၣ်လီၤ. 14 ယကပာ်လီၤတဲာ်ထဲလၢၢ်လ့ၤကဒိတဖျၢၣ် ဧိၤဖဲပှၤမၤညၣ်ဖိတဖၣ် လိဃ့ထီအပှာ်ကသ့ဝဲအဂီၢ်န့ၣ်လီၤ. ဝ့ၢ်န့ၣ်တဘၣ်တၢ်ဘှီထီၣ်က့ၤလၢၤအီၤနီတဘျီလၢၤဘၣ်. ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.’ ” 15 ယွၤ, ပၢဘၣ်တၢ်ခဲလၢာ် ကစၢ်အဲၣ်ဒိးစံးတၢ်အံၤဆူဝ့ၢ်ထါယၢၣ် န့ၣ်လီၤ. “ဖဲနဘၣ်တၢ်မၤနၢၤကွံာ်နၤန့ၣ်, ပှၤဂီၢ်မုၢ်လၢအအိၣ်လၢပီၣ်လဲၣ်နံၤတဖၣ်, ကဘၣ်ပျံၤဘၣ်ဖုးတၢ် လၢပှၤတဖၣ်လၢအဘၣ်တၢ်မၤသံအီၤ အတၢ်ကိးပသူအသီၣ်အဃိန့ၣ်လီၤ. 16 ကယဲၢ်ပှၤကလုာ်တဖၣ်လၢ အအိၣ်လၢပီၣ်လဲၣ်နံၤ အစီၤပၤခဲလၢာ်ကဟဲလီၤလၢ အလီၢ်ပစိာ်တဖၣ်န့ၣ်လီၤ. အဝဲသ့ၣ်ကဘ့ၣ်လီၤကွံာ်အဆ့ဖးထီတဖၣ်, ဒီးအကူအသိးလၢအဘၣ်တၢ်ဆးဒဲးကံၣ်ဒဲးဝ့ၤအီၤတဖၣ်ဒီး ကဆ့ၣ်နီၤကနိးကစုာ်လၢဟီၣ်ခိၣ်လိၤန့ၣ်လီၤ. အဝဲသ့ၣ် ကပျံၤတၢ်နးနးကလဲာ်လၢနတၢ်ဘူၣ်တၢ်တီၤအဃိ တုၤဒၣ်လဲာ် အဝဲသ့ၣ်တဆိကတီၢ် ကနိးကစုာ်ဘၣ်န့ၣ်လီၤ. 17 အဝဲသ့ၣ် ကသးဝံၣ်တၢ်သံအတၢ်သးဝံၣ်လၢနဂီၢ်န့ၣ်လီၤ. ဝ့ၢ်လၢအမံၤဟူသၣ်ဖျါန့ၣ်ဘၣ်တၢ်မၤဟးဂီၤကွံာ်အီၤလံ. ထံစိာ်ကွံာ် အဝဲအကဘီတဖၣ်လၢပီၣ်လဲၣ်တဖၣ်အပူၤလံ. ဝ့ၢ်အံၤအပှၤဂီၢ်မုၢ်, ပၢတ့ၢ်ပီၣ်လဲၣ်တဖၣ်ဒီး မၤပျံၤမၤဖုး ကယဲၢ်ပှၤတဖၣ်လၢအအိၣ်လၢပီၣ်လဲၣ်ကၢၢ်နံၤန့ၣ်လီၤ. 18 ခဲကနံၣ်အံၤဖဲမုၢ်တနံၤလၢ အဝဲလီၤပှီၢ်ကွံာ်ဝဲန့ၣ်, ကီးတဖၣ်ကနိးကစုာ်ဒီးအပှၤဂီၢ်မုၢ်တဖၣ် ပျံၤတၢ်ဖုးတၢ်ဒီးအသးလီၤကတုၤလၢတၢ်လီၤပှီၢ် အံၤအဃိန့ၣ်လီၤ.” 19 ယွၤပၢဘၣ်တၢ်ခဲလၢာ်ကစၢ်စံးတ့ၢ်အီၤ, “ယကဒုးအိၣ်လီၤဃီနၤ ဒ်ဝ့ၢ်တဖၣ်လၢအဟးဂီၤကွံာ်အသိးဖဲ ပှၤတအိၣ်ဆိးနီတဂၤဘၣ်န့ၣ် လီၤ. ယကလုၣ်ဘၢနၤဒီး ထံလၢပီၣ်လဲၣ်အတၢ်ယိာ်ပူၤတဖၣ်န့ၣ်လီၤ. 20 ယကဆှၢလီၤနၤဆူပှၤသံတဖၣ် အကီၢ်ပူၤလၢနကလဲၤအိၣ်ဆိးဃုာ်ဒီးပှၤလၢအအိၣ်တ့ၢ်လၢ ပျၢၤတဖၣ်န့ၣ်လီၤ. ယကဒုးလဲၤအိၣ်နၤလၢ ဟီၣ်ခိၣ်အဖီလာ်လၢတၢ်ဟးဂီၤလီၤထူလီၤယိာ်အကျါ, လဲၤအိၣ်ဆိးဃုာ်ဒီးပှၤသံတဖၣ်န့ၣ်လီၤ. လၢတၢ်န့ၣ်အဃိ နကဲထီၣ်က့ၤကဒါတၢ်အိၣ်တၢ်ဆိးအလီၢ်ဒီးဟံးန့ၢ်နလီၢ်လၢ ပှၤအမူအကီၢ်ပူၤ, တသ့နီတစုလၢၤဘၣ်. 21 ယကဒုးကဲထီၣ်နၤတၢ်လီၤပျံၤလီၤဖုး အတၢ်ဒိတၢ်တဲာ်တမံၤဒီးတၢ်န့ၣ်ကမ့ၢ်တၢ်အကတၢၢ်လၢ နဂီၢ်န့ၣ်လီၤ. ပှၤဂီၢ်မုၢ်ကကွၢ်ဃုနၤဘၣ်ဆၣ်တၢ်တထံၣ်ဘၣ်နၤနီတစုလၢၤဘၣ်.” ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.