24
1 လၢပဘၣ်တၢ်စိာ်မၢကဲကုၢ်ခွံနံၣ်တနံၣ်, လါဆံဆဲၣ်လါတလါထီၣ် ဆံဆဲၣ်နံၤတနံၤန့ၣ်ယွၤကတိၤတၢ်ဒီးယၤလီၤ.
2 အဝဲစံးဝဲဒၣ်, “ပှၤကညီလၢအသံသ့ဧၢ, ကွဲးလီၤမုၢ်တနံၤအံၤ အနံၤအသီတက့ၢ်. အဂ့ၢ်ဒ်အံၤမုၢ်တနံၤအံၤမ့ၢ်ဝဲကီၢ်ဘၤဘူၤလိၣ်
အစီၤပၤစးထီၣ်ကဝီၤဃာ်ဝ့ၢ်ယရူၤၡလ့ၣ်အနံၤန့ၣ်လီၤ.
3 တဲဘၣ်ယပှၤဂီၢ်မုၢ်လၢအပူထီၣ်တၢ်လၢတၢ်ကတိၤဒိအံၤ, လၢယၤ, ယွၤပၢဘၣ်တၢ်ခဲလၢာ်ကစၢ်စံးလၢအဝဲသ့ၣ်အဂီၢ်န့ၣ်တက့ၢ်. ပာ်ထီၣ်သပၢၤတဖျၢၣ်လၢမ့ၣ်အူအဖီခိၣ်ဒီးမၤပှဲၤအီၤလၢထံတက့ၢ်.
4 ဒၢနုာ်တၢ်ညၣ်အဂ့ၤကတၢၢ်အကူာ်တဖၣ်လၢအပူၤလၢအမ့ၢ်, ဖံဘၣ်ခိၣ်တဖၣ်ဒီးခီၣ်တဖၣ်ဒီးမၤပှဲၤစ့ၢ်ကီးအီၤဒီးတၢ်အဃံ အကူာ်လၢအဂ့ၤကတၢၢ်တဖၣ်န့ၣ်တက့ၢ်.
5 သူသိအဂ့ၤကတၢၢ်အညၣ်တက့ၢ်. ဖှိၣ်ထီၣ်သ့ၣ်မုၣ်လၢသပၢၤအဖီလာ်တက့ၢ်.
ပျဲထံချီကလာ်ထီၣ်တက့ၢ်. ချီတၢ်အဃံတဖၣ်ဒီးတၢ်ညၣ်တက့ၢ်.”
6 တၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲဒၣ်န့ၣ်လီၤ. “ပှၤမၤသံတၢ်ဖိတဖၣ်အဝ့ၢ်န့ၣ်ဘၣ်တၢ်စံၣ်ညီၣ်ဃါမနၤလီၤ. ဝ့ၢ်န့ၣ်လီၤဂာ်ဒ်သပၢၤတဖျၢၣ်လၢအထီၣ်အ့ၣ်လၢတၢ်တမၤကဆှဲ
ကဆှီထီၣ်အီၤနီတဘျီဘၣ်န့ၣ်လီၤ.
တၢ်ညၣ်တကူာ်ဘၣ်တကူာ်ဘၣ်တၢ်ထုးထီၣ်ကွံာ်အီၤဒီးတအိၣ်လီၤ
တဲာ်တ့ၢ်နီတကူာ်ဘၣ်.
7 တၢ်မၤသံအိၣ်ဝဲလၢဝ့ၢ်ပူၤ, ဘၣ်ဆၣ်တၢ်သွံၣ်တလီၤဂၢ်ဘၣ်လၢဟီၣ် ခိၣ်လိၤ, တၢ်လီၢ်ဖဲဖၣ်ကမူၣ်မၤဘၢအီၤသ့ဝဲန့ၣ်ဘၣ်. တၢ်သွံၣ်န့ၣ်လီၤဂၢ်လၢလၢၢ်လ့ၤကဒိတဖျၢၣ်အလိၤန့ၣ်လီၤ.
8 ယပာ်တ့ၢ်တၢ်သွံၣ်ဖဲန့ၣ်, လၢတၢ်လီၢ်ဖဲတၢ်ပာ်ခူသူၣ်အီၤတန့ၢ် ဘၣ်, တၢ်လီၢ်ဖဲအဃ့ဆူၣ်တၢ်သးထီၣ်အတၢ်မၤကၣ်န့ၣ်လီၤ.”
9 တၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲဒၣ်န့ၣ်လီၤ. “ပှၤမၤသံတၢ်ဖိတဖၣ်အဝ့ၢ်န့ၣ်ဘၣ်တၢ်စံၣ်ညီၣ်ဃါမနၤလီၤ. ယနီၢ်ကစၢ်ဒၣ်ယဲယကပူၣ်ထီၣ်သ့ၣ်မုၣ်တဖၣ်န့ၣ်လီၤ.
10 ဟဲစိာ်အါထီၣ်သ့ၣ်မုၣ်တက့ၢ်. ဝံၢ်ကဲၤထီၣ်မ့ၣ်အူတက့ၢ်. ဖီထီၣ်တၢ်ညၣ်တက့ၢ်. မၤကလာ်ထီၣ်တၢ်ညၣ်အကသူထံတက့ၢ်. ဆိၣ်ကဲၤထီၣ်တၢ်ဃံတဖၣ်တက့ၢ်.
11 ခဲကနံၣ်အံၤပာ်ထီၣ်သပၢၤတိၢ်ဘီအအိၣ်ကလီတဖျၢၣ်န့ၣ်လၢမ့ၣ်အူ အ့ၣ်တဖၣ်အဖီခိၣ်ဒီးပျဲအကိၢ်တုၤအဂီၤထီၣ်တက့ၢ်. အန့ၣ်ဝံၤဒီးသပၢၤန့ၣ်ကကဆှီထီၣ်က့ၤကဒီးဒ်တၢ်ဘူၣ်တၢ်ဘါ
အလုၢ်အလၢ်အိၣ်ဝဲအသိး, ဖဲမ့ၣ်အူအီၣ်ကွံာ်တၢ်ထီၣ်အ့ၣ်ဝံၤအလီၢ်ခံ,
12 ဖဲကယဲၢ်တၢ်ထီၣ်အ့ၣ်တဟါမၢ်ကွံာ်လၢမ့ၣ်အူလၣ်အကျါခဲလၢာ်, သနာ်က့န့ၣ်လီၤ.
13 ဝ့ၢ်ယရူၤၡလ့ၣ်ဧၢ, နလုၢ်အၢလၢ်သီအတၢ်မၤတဖၣ်မၤဘၣ်အၢတ့ၢ်နၤ န့ၣ်လီၤ. ယမ့ၢ်ဂုာ်ကျဲးစၢးမၤကဆှီထီၣ်နၤဘၣ်ဆၣ်, နအိၣ်ဒံးဒၣ်လၢတၢ်ဘၣ်အၢဘၣ်သီအပူၤန့ၣ်လီၤ. တချုးလၢနကလၢၢ်ဘၣ်ယတၢ်သးထီၣ်ဆူၣ်အသဟီၣ်ဒံးဘၣ်န့ၣ်,
နတကဆှီထီၣ်က့ၤကဒီးတဘျီဘၣ်န့ၣ်လီၤ.
14 ယၤ, ယွၤကတိၤတ့ၢ်တၢ်လီၤ. တၢ်ဆၢကတီၢ်ဘၣ်လၢယဂီၢ်လၢယကမၤတၢ်အဂီၢ်လံ. ယတကွၢ်ကပာ်ကွံာ်နတၢ်ဒဲးဘးတဖၣ်မ့ၢ်ဂ့ၤ,
ဒုးနဲၣ်တၢ်သူၣ်အိၣ်သးအိၣ်မ့ၢ်ဂ့ၤအိၣ်ဒီးတၢ်သးကညီ
နၤမ့ၢ်ဂ့ၤန့ၣ်ဘၣ်. နကဘၣ်တၢ်စံၣ်ညီၣ်နၤလၢတၢ်လၢ
နမၤတ့ၢ်အီၤအဃိန့ၣ်လီၤ.”
ယွၤ, ပၢဘၣ်တၢ်ခဲလၢာ်ကစၢ်ကတိၤလံတၢ်လံ.
15-16 ယွၤကတိၤတၢ်ဒီးယၤလီၤ. အဝဲစံးဝဲဒၣ်, “ပှၤကညီလၢအသံသ့ဧၢ, ယကဟံးထီၣ်ကွံာ်ပှၤလၢ
နအဲၣ်အဒိၣ်ကတၢၢ်တဂၤလၢတၢ်တီၢ်တဘီန့ၣ်လီၤ. နတဘၣ်
ကဒူးကဒ့ၣ်တၢ်မ့ၢ်ဂ့ၤ, ဟီၣ်တၢ်ယၢၤတၢ်မ့ၢ်ဂ့ၤ,
ဆံးလီၤနမဲာ်ထံမ့ၢ်ဂ့ၤန့ၣ်ဘၣ်.
17 ပျဲနတၢ်ဟီၣ်သါသကူးဘၣ်တၢ်နၢ်ဟူအီၤတဂ့ၤ. လဲၤတၢ်လၢတၢ်တဖၢၣ်ဘၣ်နခိၣ်မ့ၢ်ဂ့ၤ, တၢ်တဒိးဘၣ်ခီၣ်ဖံးမ့ၢ် ဂ့ၤဒ်အမ့ၢ်တၢ်သးအုးအပနီၣ်တမံၤအသိးတဂ့ၤ. ကျၢၢ်ဘၢနမဲာ်မ့ၢ်ဂ့ၤ, အီၣ်တၢ်အီၣ်လၢပှၤဘၣ်မိၣ်ဘၣ်မးတဖၣ်အီၣ်ဝဲမ့ၢ်ဂ့ၤန့ၣ်တဂ့ၤ.”
18 လၢမုၢ်တနံၤ, ဂီၤဂီၤအကတီၢ်န့ၣ်, ယကတိၤတၢ်ဒီးပှၤဂီၢ်မုၢ်လီၤ. မုၢ်ခီဟါလီၤအဝဲန့ၣ်, ယမါသံဝဲလီၤ, ဒီးလၢခံတနံၤန့ၣ်, ယမၤဒ်တၢ်စံးဘၣ်တ့ၢ်ယၤအသိးန့ၣ်လီၤ.
19 ပှၤဂီၢ်မုၢ်သံကွၢ်ယၤ, “ဘၣ်မနုၤလၢနမၤတၢ်ဒ်အံၤအသိးန့ၣ်လဲၣ်.”
20 လၢတၢ်န့ၣ်အဃိယစံးဘၣ်အဝဲသ့ၣ်, “ယွၤကတိၤတ့ၢ်တၢ်ဒီးယၤဒီး တဲဘၣ်ယၤလၢ,
21 ယကဟ့ၣ်လီၤတၢ်ကစီၣ်အံၤဆူသုဝဲပှၤအံၣ်စရ့လးဖိတဖၣ် အအိၣ်န့ၣ်လီၤ. သုပာ်ထီၣ်ထီသုသးလၢယွၤအတၢ်လုၢ်ဟံၣ်အတၢ်ဂံၢ်တၢ်ဘါ
အဃိလီၤ. သုအဲၣ်ဒိးကွၢ်ဃီၤအီၤဒီးလဲၤဆူအအိၣ်, ဘၣ်ဆၣ်ယွၤကမၤဘၣ်အၢကွံာ်အီၤန့ၣ်လီၤ. ဒီးသုပှၤဟံၣ်ဖိလၢ
အသးစၢ်တဖၣ်လၢအအိၣ်လီၤတဲာ်လၢဝ့ၢ်ယရူၤၡလ့ၣ်အပူၤန့ၣ်
ကဘၣ်တၢ်မၤသံကွံာ်အီၤလၢတၢ်ဒုးအပူၤန့ၣ်လီၤ.
22 အန့ၣ်တစု, သုကမၤတၢ်လၢယမၤတ့ၢ်အီၤန့ၣ်လီၤ. သုတဘၣ်ကျၢၢ်ဘၢသုမဲာ်တဖၣ်မ့ၢ်ဂ့ၤ, အီၣ်တၢ်အီၣ်လၢပှၤဘၣ်မိၣ် ဘၣ်မးတဖၣ်အီၣ်ဝဲမ့ၢ်ဂ့ၤန့ၣ်တဂ့ၤ.
23 သုတလဲၤဘၣ်တၢ်လၢတၢ်ဖၢၣ်သုခိၣ်မ့ၢ်ဂ့ၤ, တၢ်ဒိးခီၣ်ဖံးမ့ၢ်ဂ့ၤ, တၢ်ဘၣ်မိၣ်ဘၣ်မးမ့ၢ်ဂ့ၤ, တၢ်ဟီၣ်တၢ်ယၢၤတၢ်မ့ၢ်ဂ့ၤအပူၤန့ၣ် ဘၣ်. သုဂံၢ်သုဘါကလီၤစၢ်ကွံာ်, မ့ၢ်လၢသုတၢ်ဒဲးဘးတဖၣ်
အဃိဒီးသုကကအုကစွါလၢတဂၤဒီးတဂၤအဖီခိၣ်န့ၣ်လီၤ.
24 အန့ၣ်ဒီဲး, ယကကဲထီၣ်တၢ်ပနီၣ်တမံၤလၢသုဂီၢ်န့ၣ်လီၤ. သုကမၤတၢ်ခဲလၢာ်လၢယမၤတ့ၢ်အီၤန့ၣ်လီၤ. ယွၤစံးဝဲဒၣ်လၢ, ဖဲတၢ်တဖၣ်အံၤမၤအသးန့ၣ်,
သုကသ့ၣ်ညါလၢအဝဲမ့ၢ်ယွၤ, ပၢဘၣ်တၢ်ခဲလၢာ်ကစၢ်န့ၣ်လီၤ.”
25 ယွၤစံးဝဲဒၣ်, ခဲကနံၣ်အံၤ, “ပှၤကညီလၢအသံသ့ဧၢ, ယွၤအတၢ်လုၢ်ဟံၣ်လၢအဂံၢ်ဆူၣ်ဘါဆူၣ်လၢအမ့ၢ်အဝဲသ့ၣ်အတၢ်ပာ် ကဖၢလၢသးဒီးတၢ်သးခု, လၢအဝဲသ့ၣ်အဲၣ်ဒိးကွၢ်ဃီၤဝဲဒီးလဲၤဝဲဆူ
အအိၣ်န့ၣ်, ယကဟံးထီၣ်ကွံာ်လၢအဝဲသ့ၣ်အအိၣ်လီၤ. ယကစိာ်ထီၣ်ကွံာ်အဝဲသ့ၣ်အဖိခွါတဖၣ်ဒီးအဖိမုၣ်တဖၣ်န့ၣ်လီၤ.
26 မုၢ်တနံၤလၢယမၤတၢ်အံၤန့ၣ်, ပှၤတဂၤဂၤလၢအဃ့ၢ်ပူၤဖျဲး အသးလၢတၢ်မၤဟးဂီၤအံၤန့ၣ်ကဟဲဒီးတဲဘၣ်နၤတၢ်ဂ့ၢ်အံၤန့ၣ်လီၤ.
27 လၢမုၢ်တနံၤဃီန့ၣ်, နကမၤန့ၢ်ကဒါက့ၤတၢ်သ့ကတိၤတၢ်လၢ အလီၤမၢ်တ့ၢ်လၢနအိၣ်, ဒီးနကကတိၤတၢ်ဒီးအီၤန့ၣ်လီၤ.
လၢကျဲဒ်အံၤန့ၣ်နကကဲထီၣ်တၢ်ပနီၣ်တမံၤလၢပှၤဂီၢ်မုၢ်အဂီၢ်,
ဒီးအဝဲသ့ၣ်ကသ့ၣ်ညါဝဲလၢယမ့ၢ်ယွၤန့ၣ်လီၤ.”