23
1 ယွၤကတိၤတၢ်ဒီးယၤလီၤ.
2-3 အဝဲစံးဝဲဒၣ်, “ပှၤကညီလၢအသံသ့ဧၢ, တဘျီန့ၣ်ပှၤဒီပုၢ်ဝဲၢ် မုၣ်အိၣ်ဝဲဒၣ်ခံဂၤလီၤ. ဖဲအဝဲသ့ၣ်အသးစၢ်ဒံးဒီးအိၣ်ဆိးဝဲလၢကီၢ်အဲၤကူပတူးအပူၤ အခါန့ၣ်, အဝဲသ့ၣ်အတၢ်မ့ၢ်ပှၤမုၣ်ကနီၤန့ၣ်, လီၤမၢ်ကွံာ်ဝဲ, ဒီးကဲထီၣ်ပှၤဃဲသဲမုၣ်တဖၣ်န့ၣ်လီၤ.
4 အဒိၣ်တဂၤအမံၤမ့ၢ်ဝဲနီၢ်အိၤဟိလၤ (အဝဲမ့ၢ်ဝ့ၢ်ၡၤမရံအခၢၣ် စး) ဒီးအဆံးတဂၤအမံၤမ့ၢ်ဝဲနီၢ်အိၤဟိလံဘၤ (အဝဲမ့ၢ်ဝ့ၢ်ယရူၤ ၡလ့ၣ်အခၢၣ်စး)န့ၣ်လီၤ. ယဖျီတ့ၢ်ယသးဒီးအဝဲသ့ၣ်ခံဂၤလၢာ်ဒီးအဝဲသ့ၣ်ဆံးစၢ်န့ၢ်ယၤ ဖိတဖၣ်န့ၣ်လီၤ.
5 အဝဲမ့ၢ်ယတၢ်, နာ်သက့, နီၢ်အိၤဟိလၤမၤဒံးဒၣ်ပှၤဃဲသဲမုၣ် အတၢ်မၤဒီးပှဲၤဝဲဒီးတၢ်သးကတၢလၢအတၢ်အဲၣ်တဖၣ်အဂီၢ်, လၢကီၢ်အၤၡူၢ်န့ၣ်လီၤ.
6 အဝဲသ့ၣ်မ့ၢ်ပှၤသုးဖိတဖၣ်လၢအအိၣ်ဒီးတၢ်ကူတၢ်သိးဒ်သိးသိး လၢအလွဲၢ်လုးတကုာ်, ပှၤတူၢ်ဒိၣ်ကီၤဒိၣ်တဖၣ်ဒီးပဒိၣ်ပပှၢ်လၢအအိၣ်ဒီးအလီၢ်ဒိၣ်အလၤ ထီတဖၣ်န့ၣ်လီၤ. အဝဲသ့ၣ်ခဲလၢာ်မ့ၢ်ပှၤက့ၢ်ဘၣ်ဂီၤဂ့ၤ, သးစၢ်တဖၣ်လၢအမ့ၢ်ပှၤဒိးကသ့ၣ်ဒုးသုးဖိအခိၣ်တဖၣ်န့ၣ်လီၤ.
7 အဝဲမ့ၢ်ပှၤဃဲသဲမုၣ်တဂၤလၢကယဲၢ်ကီၢ်အၤၡူၢ်အသုးခိၣ်သုးနၢ် ခဲလၢာ်အဂီၢ်, ဒီးအဝဲအတၢ်သးကတၢဆှၢအီၤဆူတၢ်မၤဘၣ်အၢလီၤက့ၤ အသးခီဖျိတၢ်ဘူၣ်ထီၣ်ဘါထီၣ်ကီၢ်အၤၡူၣ်အတၢ်ဂီၤတၢ်ဖီၣ် တဖၣ်န့ၣ်လီၤ.
8 အဝဲမၤထွဲဒံးတၢ်လၢအစးထီၣ်မၤတ့ၢ်ဝဲဒ်ပှၤဃဲသဲမုၣ်တဂၤ အသိးလၢကီၢ်အဲၤကူပတူးအပူၤ, ဖဲအဝဲအတၢ်မ့ၢ်ပှၤမုၣ်ကနီၤလီၤမၢ်ကွံာ်ဝဲဒၣ်န့ၣ်လီၤ. စးထီၣ်လၢအဝဲမ့ၢ်ပိာ်မုၣ်ဖိသၣ်တဂၤလံၤလံၤန့ၣ်, ပိာ်ခွါတဖၣ်မံဃုာ်ဒီးအီၤဒီးပာ်အီၤဒ်ပှၤဃဲသဲမုၣ်တဂၤ အသိးန့ၣ်လီၤ.
9 လၢတၢ်န့ၣ်အဃိယဟ့ၣ်လီၤကွံာ်အီၤဆူ, ပှၤတဖၣ်လၢအဝဲအဲၣ်ဝဲ, ပှၤအၤၡူၢ်ဖိတဖၣ်လၢအဝဲသးလီတ့ၢ်ဝဲဒိၣ်မးအစုပူၤန့ၣ်လီၤ.
10 အဝဲသ့ၣ်ဘ့ၣ်လီၤကွံာ်အဝဲအကူအသိး, ဒီးဒုးအိၣ်ဘ့ၣ်ဆ့အီၤ, ဖီၣ်န့ၢ်အဖိခွါတဖၣ်ဒီးအဖိမုၣ်တဖၣ်, အန့ၣ်ဝံၤဒီးမၤသံကွံာ်အီၤလၢနးန့ၣ်လီၤ. ပိာ်မုၣ်တဖၣ်လၢတၢ်လီၢ်ကိးပူၤဒဲးသီၣ် ဝံသဲကလၤအဝဲအတၢ်ဟဲဝံအဂ့ၢ်န့ၣ်လီၤ.
11 အဒီပုၢ်ဝဲၢ်မုၢ်နီၢ်အိၤဟိလံဘၤထံၣ်ဘၣ်တၢ်အံၤနာ်သက့, အဝဲအတၢ်သးကတၢဒီးအတၢ်မ့ၢ်ပှၤဃဲသဲမုၣ်န့ၣ်, အါဒိၣ်န့ၢ်ဒံးနီၢ်အိၤဟိလၤမ့ၢ်တ့ၢ်ဝဲတက့ၢ်န့ၣ်လီၤ.
12 အဝဲစ့ၢ်ကီးလၢပှဲၤဝဲဒီးတၢ်သးကတၢလၢကီၢ်အၤၡူၢ်အပှၤတူၢ် ဒိၣ်ကီၤဒိၣ်တဖၣ်, သုးခိၣ်သုးနၢ်တဖၣ်, သုးဖိတဖၣ်လၢအိၣ်ဒီးတၢ်ကူ တၢ်သိးဒ်သိးသိးလၢအလွဲၢ်ဖျါဆှံဒီးပှၤဒိးကသ့ၣ်သုးဖိအခိၣ်အနၢ်တဖၣ်, လၢအမ့ၢ်ကယဲၢ်ပှၤဒိၣ်တၢ်ဂ့ၤဖိၣ်သၣ်ခွါသးစၢ်ကိးဂၤဒဲးအဂီၢ်န့ၣ်လီၤ.
13 ယထံၣ်ဘၣ်လၢအဝဲမ့ၢ်ပှၤတဂၤလၢအလုၢ်အလၢ်တဂ့ၤဝဲလ့ၤ တက့ၤဘၣ်, ဒီးလၢဒီပုၢ်ဝဲၢ်မုၣ်ခံဂၤတဂၤအံၤအၢဝဲဒ်သိးဒၣ်အခီၣ်ထံး တဂၤန့ၣ်လီၤ.
14 အဝဲလီၤဘျၢယိာ်ထီၣ်လၢအတၢ်လုၢ်အၢလၢ်သီအပူၤန့ၣ်လီၤ. အဝဲဘၣ်တၢ်ထုးသူၣ်ထုးသးအီၤလၢ, ကီၢ်ဘၤဘူၤလိၣ်အပဒိၣ်ပပှၢ်လၢ အအိၣ်ဒီးလီၢ်ဒိၣ်လၤထီတဖၣ်, အက့ၢ်အဂီၤတဖၣ်လၢအဘၣ်တၢ်စိာ်ပျၤဃာ်အီၤလၢတၢ်ဒူၣ်အလိၤဒီးဖှူ အီၤလၢကသံၣ်အလွဲၢ်ဂီၤဆှုၣ် ,
15 ဒီးအိၣ်ဒီးယီၢ်တကိးတဖၣ်လၢအယီၢ်ဒ့လိၤဒီးခိၣ်ဖၢၣ်တဖၣ်လၢ အအိၣ်ဒီးတၢ်ကယၢကယဲလၢအဝဲသ့ၣ်အခိၣ်တဖၣ်အလိၤန့ၣ်လီၤ.
16 တစုဃီ, ဖဲအဝဲထံၣ်ဘၣ်တၢ်ဂီၤတၢ်ဖီၣ်တဖၣ်န့ၣ်ဒီး, အဝဲပှဲၤဒီးတၢ်သးကတၢဒီးဆှၢလီၤပှၤစိာ်တၢ်ကစီၣ်တဖၣ်ဆူပဒိၣ် ပပှၢ်တဖၣ်န့ၣ်အအိၣ်, လၢကီၢ်ဘၤဘူၤလိၣ်အပူၤန့ၣ်လီၤ.
17 ပှၤဘၤဘူၤလိၣ်ဖိတဖၣ်န့ၣ်ဟဲဝဲဆူအဝဲအအိၣ်ဒ်သိးကမံဃုာ်ဂဲၤ ဃုာ်ဒီးအီၤအဂီၢ်န့ၣ်လီၤ. အဝဲသ့ၣ်သူအီၤဒီးမၤဘၣ်အၢဘၣ်သီအီၤအါမး တုၤဒၣ်လဲာ်လၢခံကတၢၢ်, အဝဲအသးလၢာ်ဒီးသးဘၣ်အၢပှၤသ့ၣ်တဖၣ်န့ၣ်လီၤ.
18 အဝဲပာ်ဖျါထီၣ်အသးလၢပှၤကမျၢၢ်အမဲာ်ညါဒီးပျဲပှၤကိးဂၤဒဲး သ့ၣ်ညါလၢအဝဲမ့ၢ်ပှၤဃဲသဲမုၣ်တဂၤန့ၣ်လီၤ. ယသးလၢာ်သးဘၣ်အၢအီၤဒ်သိးဒၣ် ယသးလၢာ်သးဘၣ်အၢတ့ၢ်အဒီပုၢ်ဝဲၢ်မုၣ်အသိးန့ၣ်လီၤ.
19 အဝဲကဲထီၣ်ပှၤဃဲသဲမုၣ်တဂၤနးန့ၢ်ဒံးအလီၢ်, မၤဒံးဒၣ်တၢ်ဒ်အမၤတ့ၢ်ဝဲအသိးဖဲအမ့ၢ်ဒံးဖိသၣ်မုၣ်တဂၤအခါ, ဖဲအဝဲမ့ၢ်တ့ၢ်ပှၤဃဲသဲမုၣ်တဂၤလၢကီၢ်အဲၤကူပတူးအပူၤန့ၣ်လီၤ.
20 အဝဲပှဲၤဝဲဒီးတၢ်သူၣ်ကတၢသးကတၢလၢကယဲၢ်ပိာ်ခွါတဖၣ်လၢ အအိၣ်ဒီးတၢ်မုာ်ဖံးမုာ်ညၣ်အသးလုာ်ကိလုာ်ကပာ်, ပှၤတဖၣ်လၢအအိၣ်ဒီးကသ့ၣ်ယီၤတဖၣ်ဒီးကသ့ၣ်ဒုးသုးတဖၣ် အတၢ်သူၣ်ကတၢသးကတၢခဲလၢာ်အဂီၢ်န့ၣ်လီၤ.”
21 (နီၢ်အိၤဟိလံဘၤဧၢနအဲၣ်ဒိးမၤကဒီးတၢ်လုၢ်အၢလၢ် သီတလီၢ်လီၢ်, တၢ်လၢနမၤကမၣ်တ့ၢ်လံနဲဒ်ပိာ်မုၣ်ဖိသၣ်တဂၤ အသိးလၢကီၢ်အဲၤကူပတူးအပူၤ, ဖဲပိာ်ခွါတဖၣ်ဂဲၤလိာ်ကွဲ ဒီးနနုၢ်တဖၣ်ဒီးနတၢ်မ့ၢ်ပှၤမုၣ်ကနီၤန့ၣ်လီၤမၢ်ကွံာ်ဝဲဒၣ်, အခါန့ၣ်လီၤ.)
22 အန့ၣ်ဒီး, ခဲကနံၣ်အံၤနီၢ်အိၤဟိလံဘၤဧၢ, တၢ်အံၤမ့ၢ်တၢ်လၢယၤ, ယွၤ, ပၢဘၣ်တၢ်ခဲလၢာ်အကစၢ်စံးဘၣ်နၤန့ၣ်လီၤ. “နလီၤဘှံးလီၤတီၤလၢပှၤတဖၣ်လၢနအဲၣ်အီၤအဃိ, ဘၣ်ဆၣ်ဒီးယကမၢအဝဲသ့ၣ်သးထီၣ်ဘၣ်နၤဒီးဟဲကိးအဝဲသ့ၣ်လၢ ကအိၣ်ဝးတရံးနၤအဂီၢ်န့ၣ်လီၤ.
23 ယကဟဲကိးကယဲၢ်ပှၤဘၤဘူၤလိၣ်ဖိတဖၣ်ဒီးပှၤက့ၤစ့းဖိတဖၣ်, ပှၤပိာ်ခွါတဖၣ်လၢပကိး, ၡိအၤဒီးကိအၤဒီးကယဲၢ်ပှၤအၤၡူၢ် ဖိခဲလၢာ်န့ၣ်လီၤ. ယကပာ်ဖှိၣ်ထီၣ်ကယဲၢ်တူၢ်ဒိၣ်ကီၤဒိၣ်သးစၢ်ခွါလၢအက့ၢ်ဘၣ်ဂီၤ ဂ့ၤခဲလၢာ်ဒီးပဒိၣ်ပပှၢ်တဖၣ်, ကယဲၢ်ပှၤကိးဂၤဒဲးလၢအမ့ၢ်ပှၤခိၣ်ပှၤနၢ်အကါဒိၣ်တဖၣ်ဒီးပှၤ ဒိးကသ့ၣ်ဒုးသုးအခိၣ်တဖၣ်လၢအအိၣ်ဒီးလီၢ်ဒိၣ်လၤထီန့ၣ်လီၤ.
24 အဝဲသ့ၣ်ကဟဲထီၣ်ဒုးနၤလၢကလံၤစိးတခီ, ဟဲစိာ်ဃုာ်ဒီးသုး မုၢ်ဖးဒိၣ်တဖုအိၣ်ဒီးလ့ၣ်ကဟၣ်ဒုးတၢ်တဖၣ်ဒီးလ့ၣ်ကဟၣ်လၢ အစိာ်တၢ်အီၣ်တၢ်အီဒီးတၢ်အပီးအလီန့ၣ်လီၤ. အဝဲသ့ၣ်ကကဝီၤဃာ် နၤအိၣ်ဒီးကတီၤတဖၣ်, ဒီးခိၣ်သလုးထးတဖၣ်လၢအဒီသဒၢအီၤန့ၣ် လီၤ. ယကဟ့ၣ်လီၤကွံာ်နၤဆူအဝဲသ့ၣ်အစုပူၤဒီးအဝဲသ့ၣ်ကစံၣ် ညီၣ်နၤလၢအဝဲသ့ၣ်အတၢ်သိၣ်တၢ်သီဒၣ်ဝဲတဖၣ်န့ၣ်လီၤ.
25 မ့ၢ်လၢ, ယသးဒိၣ်ထီၣ်နၤအဃိ, ယကပျဲအဝဲသ့ၣ်မၤဘၣ်နၤလၢအတၢ် သးထီၣ်အပူၤန့ၣ်လီၤ. အဝဲသ့ၣ်ကကူးတဲာ်ကွံာ်နနါဒ့တဖၣ်ဒီးနနၢ်တဖၣ်ဒီးကမၤသံကွံာ် နဖိတဖၣ်န့ၣ်လီၤ. မ့ၢ်လီၤ. အဝဲသ့ၣ်ကဟံးန့ၢ်ကွံာ်နဖိခွါတဖၣ်ဒီးနဖိမုၣ်တဖၣ်လၢနအိၣ် ဒီးဒွဲၣ်ကွံာ်မူဒံးအဝဲသ့ၣ်န့ၣ်လီၤ.
26 အဝဲသ့ၣ်ကဖှီယာ်ကွံာ်နကူနသိးတဖၣ်ဒီးဟံးန့ၢ်ကွံာ်နတၢ်မျၢ် ပလဲတဖၣ်န့ၣ်လီၤ.
27 ယကမၤကတၢၢ်ကွံာ်နတၢ်သူၣ်ကတၢသးကတၢ, နတၢ်ကလုာ်ကလိၤအတၢ်မၤလၢအလီၤသးဘၣ်အၢတဖၣ်လၢနမၤတ့ၢ်နဲ စးထီၣ်လၢနအိၣ်ဆိးတ့ၢ်လၢကီၢ်အဲၤကူပတူးအပူၤလံၤလံၤန့ၣ် လီၤ. နတကွၢ်ကဒီးလၢၤတၢ်ဂီၤတၢ်ဖီၣ်တဖၣ်မ့ၢ်ဂ့ၤ, ဆိကမိၣ်ထီၣ်က့ၤကဒီးကီၢ်အဲၤကူပတူးအဂ့ၢ်မ့ၢ်ဂ့ၤနီတဘျီ လၢၤဘၣ်.”
28 တၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. “ယကဟ့ၣ်လီၤကွံာ်နၤဆူပှၤဂီၢ်မုၢ်လၢနသးဟ့အီၤဒီးနသးဘၣ် အၢအီၤတဖၣ်အစုပူၤန့ၣ်လီၤ.
29 ဒီးမ့ၢ်လၢအဝဲသ့ၣ်သးဟ့နၤအဃိ, ဒီးဘ့ၣ်ကွံာ်နကူနသိးဒီး ပာ်တ့ၢ်နၤအိၣ်ဘ့ၣ်ဆ့, အိၣ်ဖျါဒ်ပှၤဃဲသဲမုၣ်တဂၤအသိးန့ၣ်လီၤ. နတၢ်သးကတၢဒီးနတၢ်မၤပှၤဃဲသဲမုၣ်အတၢ်မၤ, ဒုးလီၤဘၣ်တၢ်အံၤလၢနလိၤန့ၣ်လီၤ.
30 နမ့ၢ်ပှၤဃဲသဲမုၣ်တဂၤလၢပှၤကလုာ်တဖၣ်အဂီၢ်ဒီးမၤဘၣ်အၢနသး ဒီးအဝဲသ့ၣ်အတၢ်ဂီၤတၢ်ဖီၣ်တဖၣ်န့ၣ်လီၤ.
31 နပိာ်တ့ၢ်နဒီပုၢ်ဝဲၢ်မုၣ်အခီၣ်လီၢ်တဖၣ်, ဒီးလၢတၢ်န့ၣ်အဃိ, ယကဟ့ၣ်လီၤနၤတၢ်စံၣ်ညီၣ်အလီခီတမံၤဃီလၢနကအီအီၤအဂီၢ်န့ၣ်လီၤ.”
32 ယွၤပၢဘၣ်တၢ်ခဲလၢာ်ကစၢ်စံးဝဲ, “နကအီၣ်တၢ်လၢနဒီပုၢ်ဝဲၢ်မုၣ်အလီခီပူၤလီၤ. လီခီန့ၣ်ဒိၣ်ဝဲဒီးယိာ်ဝဲလီၤ. ပှၤကိးဂၤဒဲးကသးဘၣ်အၢဒီးကနံၤဘၣ်ဖၣ်လဲနၤလီၤ. လီခီန့ၣ်ပှဲၤဝဲလီၤ.
33 တၢ်န့ၣ်ကမၤကိၢ်မၤဂီၤနၤဒီးမၤမူၤနၤလီၤ. တၢ်ပျံၤတၢ်ဖုးဒီးတၢ်ဟးဂီၤအလီခီ, လၢအမ့ၢ်နဒီပုၢ်ဝဲၢ်မုၣ်ၡၤမရံအလီခီန့ၣ်လီၤ.
34 နကအီအီၤဒီးမၤစူၢ်သံးကွံာ်အီၤဒီးအတၢ်သ့ၣ်ဖးအက့အခီတဖၣ် န့ၣ်ကမၤယာ်ကွံာ်နသးနါပှၢ်န့ၣ်လီၤ.” ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.
35 “ခဲကနံၣ်အံၤ, တၢ်အံၤမ့ၢ်တၢ်လၢ, ယၤ, ယွၤပၢဘၣ်တၢ်ခဲလၢာ်ကစၢ် စံးဝဲဒၣ်န့ၣ်လီၤ.” လၢနသးပ့ၤနီၣ်ကွံာ်ယၤဒီးဃၣ်ဒူချၢနသးလၢယၤအဃိဒီးနကတူၢ် ဘၣ်တၢ်လၢနတၢ်သးကတၢဒီးနတၢ်မၤပှၤဃဲသဲမုၣ်အတၢ်မၤအဃိန့ၣ် လီၤ.
36 ယွၤစံးဘၣ်ယၤ, “ပှၤကညီလၢအသံသ့ဧၢ, မ့ၢ်နအိၣ်ကတဲာ်ကတီၤလံ နသးလၢနကစံၣ်ညီၣ်နီၢ်အိၤဟိလၤဒီးနီၢ်အိၤဟိလံဘၤလံဧါ. လိာ်ဘၢလိာ်ကွီၢ်အဝဲသ့ၣ်လၢတၢ်လီၤသးဘၣ်အၢတဖၣ်လၢအဝဲသ့ၣ်မၤ တ့ၢ်အီၤအဃိန့ၣ်တက့ၢ်.
37 အဝဲသ့ၣ်မၤတ့ၢ်တၢ်မၤကမၣ်မုၣ်ကမၣ်ခွါအတၢ်မၤဒီးတၢ်မၤသံလၢ အမ့ၢ်တၢ်မၤကမၣ်မုၣ်ကမၣ်ခွါဒီးတၢ်ဂီၤတၢ်ဖီၣ်တဖၣ်ဒီးတၢ်မၤ သံကွံာ်ဖိခွါတဖၣ်လၢအအိၣ်ဖျဲၣ်ထီၣ်န့ၢ်ယၤန့ၣ်လီၤ. အဝဲသ့ၣ်လုၢ်ထီၣ်ယဖိခွါတဖၣ်ဆူတၢ်ဂီၤတၢ်ဖီၣ်တဖၣ်အအိၣ်န့ၣ် လီၤ.
38 ဒီးတၢ်န့ၣ်တမ့ၢ်ဒံးတၢ်ခဲလၢာ်လၢအဝဲသ့ၣ်တဖၣ်မၤတ့ၢ်ဝဲဘၣ်. အဝဲသ့ၣ်မၤတရီတပါယတၢ်လုၢ်ဟံၣ်အတၢ်စီတၢ်ဆှံဒီးတတိၢ်န့ၢ်ဘၣ် မုၢ်အိၣ်ဘှံးနံၤလၢယဒုးအိၣ်ထီၣ်တ့ၢ်အီၤန့ၣ်ဘၣ်.
39 ဖဲမုၢ်တနံၤဃီလၢအဝဲသ့ၣ်မၤသံယဖိတဖၣ်ဒ်တၢ်လုၢ်တၢ်ပာ်တဖၣ် ဆူတၢ်ဂီၤတၢ်ဖီၣ်တဖၣ်အဂီၢ်အသိးန့ၣ်, အဝဲသ့ၣ်ဟဲဆူယတၢ်လုၢ်ဟံၣ်ဒီးမၤတရီတပါအတၢ်စီတၢ်ဆှံန့ၣ်လီၤ.
40 တဘျီဘၣ်တဘျီအဝဲသ့ၣ်ဆှၢလီၤပှၤစိာ်တၢ်ကစီၣ်တဖၣ်ဒ်သိးကကွဲ မုာ်ပိာ်ခွါတဖၣ်လၢအကဟဲဝဲလၢတၢ်ဒ့ၣ်စၢၤဖးယံၤဒီးပှၤပိာ်ခွါတဖၣ် ဟဲဝဲလီၤ. ပှၤဒီပုၢ်ဝဲၢ်မုၣ်ခံဂၤအံၤကလုၣ်ထံဒီးတိၤထီၣ်အမဲာ်ဖံးဒီး ကယၢကယဲထီၣ်အသးလၢတၢ်မျၢ်ပလဲတဖၣ်န့ၣ်လီၤ.
41 အဝဲသ့ၣ်ကဆ့ၣ်နီၤလၢလီၢ်ဆ့ၣ်နီၤဃံလၤတဖျၢၣ်အလိၤဒီးလၢအဝဲ သ့ၣ်အမဲာ်ညါန့ၣ်, ကအိၣ်ဒီးစီၤနီၤခိၣ်တဖျၢၣ်လၢအပှဲၤဝဲဒီးတၢ်အဂ့ၤ တဖၣ်လၢအအိၣ်ဃုာ်ဒီးတၢ်နၢမူဒီးသ့ၣ်စၤယံးအသိလၢယဟ့ၣ်တ့ၢ် အဝဲသ့ၣ်န့ၣ်လီၤ.
42 တၢ်ကနၢ်ဟူဘၣ်ပှၤကမျၢၢ်တဖုလၢအတၢ်ကိၢ်တၢ်ဂီၤတအိၣ်ဘၣ် အကလုၢ်, ပှၤပိာ်ခွါတဖုလၢအဘၣ်တၢ်ဟဲကိးအီၤလၢပှၢ်မုၢ်ကနၢ အပူၤန့ၣ်လီၤ. အဝဲသ့ၣ်ကဒုးသိးထီၣ်ပိာ်မုၣ်တဖၣ်လၢထံဖှံၣ် တဖၣ်လၢအစုဒုၣ်လိၤ, ဒီးပာ်ထီၣ်ခိၣ်သလုးဃံလၤတဖၣ်လၢအဝဲသ့ၣ်အခိၣ်တဖၣ်အဖီခိၣ် န့ၣ်လီၤ.
43 ဒီးယစံးဘၣ်လီၤက့ၤယသး, လၢအဝဲသ့ၣ်သူပိာ်မုၣ်တဂၤလၢအလီၤ ထွံဒိၣ်မးလၢတၢ်မၤကမၣ်မုၣ်ကမၣ်ခွါအဃိ, ဒ်ပှၤဃဲသဲမုၣ်တဂၤအသိးန့ၣ်လီၤ.
44 အဝဲသ့ၣ်က့ၤကဒါက့ၤဆူပှၤဃဲသဲမုၣ်တဖၣ်အံၤအအိၣ်တဘျီဘၣ် တဘျီန့ၣ်လီၤ. အဝဲသ့ၣ်က့ၤကဒါက့ၤဆူနီၢ်အိၤဟိလၤဒီးနီၢ်အိၤဟိလံဘၤ, ပိာ်မုၣ်တဖၣ်အံၤလၢအလုၢ်တဂ့ၤလၢ်တဝါအအိၣ်န့ၣ်လီၤ.
45 ပှၤပိာ်ခွါအတီအလိၤတဖၣ်ကစံၣ်ညီၣ်ဃၣ်အဝဲသ့ၣ်မ့ၢ်လၢပှၤပာ်တၢ် ကမၣ်လၢအဝဲသ့ၣ်အလိၤလၢအမၤကမၣ်မုၣ်ကမၣ်ခွါဒီးမၤသံတၢ်အ ဃိ, မ့ၢ်လၢအဝဲသ့ၣ်မၤတၢ်မၤကမၣ်မုၣ်ကမၣ်ခွါအတၢ်မၤဒီးအစုတဖၣ် ဘၣ်အၢဝဲဒီးတၢ်သွံၣ်အဃိန့ၣ်လီၤ.”
46 တၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. “ဟဲစိာ်ပှၤဂီၢ်မုၢ်တဖုလၢအတၢထီၣ်တၢလီၤဒ်သိးကမၤပျံၤမၤ ဖုးအဝဲသ့ၣ်ဒီးဂုာ်န့ၢ်ဆူၣ်အဝဲသ့ၣ်န့ၣ်တက့ၢ်.
47 ပျဲပှၤဂီၢ်မုၢ်တဖုလၢအတၢထီၣ်တၢလီၤန့ၣ်ကွံာ်သံအဝဲသ့ၣ်လၢ လၢၢ်ဒီးဒုးအဝဲသ့ၣ်လၢနးတဖၣ်, မၤသံကွံာ်အဖိတဖၣ်ဒီးဒွဲၣ် အူကွံာ်အဝဲသ့ၣ်အဟံၣ်တဖၣ်န့ၣ်တက့ၢ်.
48 လၢကီၢ်ဒီတဘ့ၣ်ညါအပူၤန့ၣ်, ယကဆိကတီၢ်ကွံာ်တၢ်လုၢ်အၢလၢ်သီ, ဒ်အမ့ၢ်တၢ်ဟ့ၣ်ပလီၢ်တမံၤလၢပိာ်မုၣ်ကိးဂၤဒဲးသုတမၤတၢ်မၤကမၣ် မုၣ်ကမၣ်ခွါဒ်အဝဲသ့ၣ်မၤတ့ၢ်ဝဲအသိးတဂ့ၤန့ၣ်လီၤ.
49 ဒီးသုဝဲပှၤဒီပုၢ်ဝဲၢ်မုၣ်ခံဂၤဧၢ, ယကစံၣ်ညီၣ်သုလၢသုလုၢ် အၢလၢ်သီဒီးသုတၢ်ဒဲးဘးလၢအမ့ၢ်တၢ်ဘါထီၣ်တၢ်ဂီၤတၢ်ဖီၣ် တဖၣ်အဃိလီၤ. အန့ၣ်ဒီးသုကသ့ၣ်ညါလၢယမ့ၢ်ယွၤပၢဘၣ်တၢ်ခဲလၢာ်ကစၢ်န့ၣ်လီၤ.”