20
1 တၢ်မၤအသးအံၤမ့ၢ်ဖဲပလဲၤကဲကုၢ်နွံနံၣ်တနံၣ်လါယဲၢ်လါ တလါထီၣ်အသီတဆံအနံၤန့ၣ်လီၤ. ပှၤအံၣ်စရ့လးဖိတဖၣ်အတၢ်အိၣ် မူအကရူၢ်အခိၣ်အနၢ်ဟဲဆူယအိၣ်လၢကကတိၤသကိးတၢ်ဒီးယၤ အဂီၢ်ဘၣ်ဃးဒီးယွၤအတၢ်ဘၣ်သးအဂ့ၢ်, ဒီးအဝဲသ့ၣ်ဆ့ၣ်နီၤလၢယမဲာ်ညါန့ၣ်လီၤ.
2 တုၤနုၤတစုယွၤကတိၤတၢ်ဒီးယၤန့ၣ်လီၤ.
3 အဝဲစံးဝဲဒၣ်, “ပှၤကညီလၢအသံသ့ဧၢ, ကတိၤတၢ်ဒီးပှၤတဖၣ် အံၤဒီးတဲဘၣ်အဝဲသ့ၣ်လၢယွၤပၢဘၣ်တၢ်ခဲလၢာ်ကစၢ်စံးဝဲဒၣ်, သုဟဲဒ်သိးသုကသံကွၢ်ယတၢ်ဘၣ်သး, မ့ၢ်စ့ၢ်ဧါ. ဒ်ယမ့ၢ်သပှၢ်ကတၢၢ်ကစၢ်ယွၤလၢအမူဝဲတဂၤအသိး, ယစံးယဲ, ယတမၢသုသံကွၢ်ယၤလၢတၢ်နီတမံၤဘၣ်. ယၤ, ယွၤ, ပၢဘၣ်တၢ်, ကစၢ်ကတိၤလံတၢ်လံ.
4 ပှၤကညီလၢအသံသ့ဧၢ, မ့ၢ်နအိၣ်ကတဲာ်ကတီၤလံနသးလၢနကစံၣ်ညီၣ်အဝဲသ့ၣ်လံဧါ. မ့မ့ၢ်ဒ်န့ၣ်ဒီးမၤတက့ၢ်. ဒုးသ့ၣ်နီၣ်ထီၣ်အဝဲသ့ၣ်လၢတၢ်လီၤ သးဘၣ်အၢတဖၣ်လၢအဝဲသ့ၣ်အပၢ်တဖၣ်မၤတ့ၢ်ဝဲန့ၣ်တက့ၢ်.
5 တဲဘၣ်အဝဲသ့ၣ်လၢ, တၢ်လၢယစံးယဲန့ၣ်တက့ၢ်. ဖဲယဃုထၢထီၣ်အံၣ်စရ့လးန့ၣ်ယမၤတ့ၢ်တၢ်အၢၣ်လီၤအီလီၤတမံၤ ဒီးအဝဲသ့ၣ်န့ၣ်လီၤ. ယလီၣ်ဖျါထီၣ်ယသးဒီးအဝဲသ့ၣ်လၢကီၢ်အဲၤကူပတူးအပူၤဒီးတဲ ဘၣ်အဝဲသ့ၣ်လၢ, ယမ့ၢ်ယွၤသုကစၢ်ယွၤန့ၣ်လီၤ.
6 မ့ၢ်အခါဖဲန့ၣ်လၢယအၢၣ်လီၤတ့ၢ်အဝဲသ့ၣ်လၢယကထုးထီၣ်ကွံာ် အဝဲသ့ၣ်လၢကီၢ်အဲၤကူပတူးအပူၤဒီးဆှၢအဝဲသ့ၣ်ဆူကီၢ်တဘ့ၣ်လၢ ယဃုထၢထီၣ်တ့ၢ်လၢအဝဲသ့ၣ်အဂီၢ်, ကီၢ်တဘ့ၣ်လၢအထူးတီၤဒီးဟီၣ်ခိၣ်ညၣ်ထ့ၣ်ဂ့ၤဝဲ, ကီၢ်အဂ့ၤကတၢၢ်လၢကီၢ်ခဲလၢာ်အကျါန့ၣ်လီၤ.
7 ယတဲဘၣ်တ့ၢ်အဝဲသ့ၣ်လၢကစူးကွံာ်ညိကွံာ်တၢ်ဂီၤတၢ်ဖီၣ်တဖၣ်လၢ အလီၤသးဘၣ်အၢလၢအဝဲသ့ၣ်အဲၣ်ဝဲဒီးသုတမၤဘၣ်အၢအသးဒီးကီၢ် အဲၤကူပတူးအယွၤတဖၣ်လၢအကဘျံးကဘျၣ်န့ၣ်တဂ့ၤ. ယမ့ၢ်ယွၤ, အဝဲသ့ၣ်အကစၢ်ယွၤန့ၣ်လီၤ.
8 ဘၣ်ဆၣ်အဝဲသ့ၣ်ခီၣ်ဆၢယၤဒီးဂ့ၢ်လိာ်ဝဲလၢကဒိကနၣ်တၢ်အဂီၢ် လီၤ. အဝဲသ့ၣ်တစူးကွံာ်ဘၣ်အတၢ်ဂီၤတၢ်ဖီၣ်တဖၣ်လၢအလီၤသးဘၣ် အၢမ့ၢ်ဂ့ၤတပာ်တ့ၢ်ကွံာ်ကီၢ်အဲၤကူပတူးအကစၢ်တဖၣ်မ့ၢ်ဂ့ၤန့ၣ်ဘၣ်. ယအိၣ်ကတဲာ်ကတီၤယသးလၢယကဒုးကလၢၢ်ဘၣ်အဝဲသ့ၣ်လၢ ယတၢ်သးဒိၣ်ထီၣ်အသဟီၣ်လၢအဆူၣ်ဝဲဖဲန့ၣ်, လၢကီၢ်အဲၤကူပတူးအပူၤန့ၣ်လီၤ.
9 ဘၣ်ဆၣ်ယတမၤတ့ၢ်ယဲဘၣ်. အဂ့ၢ်ဒ်အံၤတၢ်န့ၣ်ကဟဲစိာ်တၢ်မၤဘၣ်ဒိယမံၤအလၤကပီၤ, မ့ၢ်လၢ, လၢပှၤဂီၢ်မုၢ်လၢအဝဲသ့ၣ်အိၣ်ဝဲဆိးဝဲအကျါ, အမဲာ်ညါန့ၣ်ယဘိးဘၣ်သ့ၣ်ညါတ့ၢ်အံၣ်စရ့လးလၢ, ယကဒုးဟးထီၣ်အဝဲသ့ၣ်လၢကီၢ်အဲၤကူပတူးအပူၤအဃိန့ၣ်လီၤ.
10 ဒီးလၢတၢ်န့ၣ်အဃိယဒုးဟးထီၣ်ကွံာ်အဝဲသ့ၣ်လၢကီၢ်အဲၤကူ ပတူးအပှၢ်မုၢ်ကနၢအပူၤန့ၣ်လီၤ.
11 ယဟ့ၣ်လီၤအဝဲသ့ၣ်လၢယတၢ်မၤလိာ်တဖၣ်ဒီးယသိၣ်လိ အဝဲသ့ၣ်လၢတၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢ အဟဲစိာ်တၢ်မူဆူပှၤတဂၤလၢ်လၢ်လၢအစူၢ်အီၤအအိၣ်န့ၣ်လီၤ.
12 ယဒုးတိၢ်န့ၢ်ဖံးဃာ်အဝဲသ့ၣ်လၢမုၢ်အိၣ်ဘှံးနံၤဒ်အတၢ်ပနီၣ် တမံၤလၢအပာ်ဖျါတၢ်အၢၣ်လီၤအီလီၤလၢပဘၢၣ်စၢၤ, ဒ်သိးကဒုးသ့ၣ်နီၣ်အဝဲသ့ၣ်လၢယၤ, ယွၤမ့ၢ်ပှၤလၢအမၤ စီဆှံအဝဲသ့ၣ်န့ၣ်လီၤ.
13 ဘၣ်ဆၣ်လၢပှၢ်မုၢ်ကနၢအပူၤဒၣ်လဲာ်န့ၣ်အဝဲသ့ၣ်ခီၣ်ဆၢယၤလီၤ. အဝဲသ့ၣ်လုၣ်သ့ၣ်ခါပတာ်ကွံာ်ယတၢ်ဘူၣ်တၢ်ဘါအတၢ်သိၣ်တၢ် သီတဖၣ်ဒီးစူးကွံာ်ညိကွံာ်ယတၢ်မၤလိာ်တဖၣ်လၢအဟဲစိာ် တၢ်မူဆူပှၤတဂၤလၢ်လၢ်လၢအစူၢ်အီၤအအိၣ်န့ၣ်လီၤ. အဝဲသ့ၣ်မၤဘၣ်အၢဘၣ်သီမုၢ်အိၣ်ဘှံးအနံၤလၢာ်လၢာ်ဆ့ဆ့ န့ၣ်လီၤ. ယအိၣ်ကတဲာ်ကတီၤယသးလၢယကဒုးကလၢၢ်ဘၣ် အဝဲသ့ၣ်လၢယတၢ်သးဒိၣ်ထီၣ်အသဟီၣ်ဆူၣ်ဖဲန့ၣ်, လၢပှၢ်မုၢ်ကနၢအပူၤဒီးမၤဟးဂီၤကွံာ်အဝဲသ့ၣ်န့ၣ်လီၤ.
14 ဘၣ်ဆၣ်ယတမၤတ့ၢ်ယဲဘၣ်. အဂ့ၢ်ဒ်အံၤ, တၢ်န့ၣ်ကဟဲစိာ်ဃီၤတၢ်မၤဘၣ်ဒိယမံၤအလၤကပီၤလၢပှၤကလုာ် တဖၣ်အကျါ, ပှၤတဖၣ်လၢအထံၣ်ဘၣ်တ့ၢ်ယဒုးဟးထီၣ်ကွံာ် အံၣ်စရ့လးန့ၣ်လီၤ.
15 လၢတၢ်န့ၣ်အဃိ, ယမၤတ့ၢ်တၢ်ဆိၣ်တမံၤလၢပှၢ်မုၢ်ကနၢအပူၤ, လၢယတဒုးလဲၤနုာ်ဘၣ်အဝဲသ့ၣ်ဆူကီၢ်တဘ့ၣ်လၢယဟ့ၣ်လီၤတ့ၢ် အဝဲသ့ၣ်, ကီၢ်တဘ့ၣ်လၢအထူးဝဲတီၤဝဲဒီးဟီၣ်ခိၣ်ညၣ်ထ့ၣ်လၢ အဂ့ၤ, ကီၢ်အဂ့ၤကတၢၢ်တဘ့ၣ်လၢကီၢ်တဖၣ်အကျါန့ၣ်ဘၣ်.
16 ယမၤတ့ၢ်တၢ်ဆိၣ်န့ၣ်, မ့ၢ်လၢအဝဲသ့ၣ်စူးကွံာ်ညိကွံာ်ယတၢ်မၤ လိာ်တဖၣ်, လုၢ်သ့ၣ်ခါပတာ်ယတၢ်ဘူၣ်တၢ်ဘါအတၢ်သိၣ်တၢ် သီတဖၣ်ဒီးမၤတရီတပါမုၢ်အိၣ်ဘှံးနံၤ, ဒီးအဝဲသ့ၣ်ဘၣ်သူၣ်ဘၣ် သးလၢကဘူၣ်ထီၣ်ဘါထီၣ်အဝဲသ့ၣ်အတၢ်ဂီၤတၢ်ဖီၣ်တဖၣ်အဃိန့ၣ် လီၤ.
17 အန့ၣ်ဒၣ်လဲာ်ယအိၣ်ဒီးတၢ်သးကညီၤလၢအဝဲသ့ၣ်အဖီခိၣ်လီၤ. ယပာ်လီၤယသးလၢယတမၤသံအဝဲသ့ၣ်ဖဲန့ၣ်လၢပှၢ်မုၢ်ကနၢအပူၤဘၣ်.
18 အခိၣ်တလိာ်ယဟ့ၣ်ပလီၢ်ပှၤသးစၢ်တဖၣ်လၢအဝဲသ့ၣ်အကျါလီၤ. တိၢ်န့ၢ်ဟံးဃာ်တၢ်သိၣ်တၢ်သီတဖၣ်လၢသုမိၢ်ပၢ်ဖံဖုလၢပျၢၤ တဖၣ်ဒုးအိၣ်ထီၣ်အီၤန့ၣ်တဂ့ၤ. ပိာ်ထွဲအဝဲသ့ၣ်အလုၢ်အလၢ်တဖၣ်မ့ၢ်ဂ့ၤ, မၤဘၣ်အၢလီၤသုသးလၢအဝဲသ့ၣ်အတၢ်ဂီၤတၢ်ဖီၣ်မ့ၢ်ဂ့ၤန့ၣ်တဂ့ၤ.
19 ယမ့ၢ်ယွၤသုကစၢ်ယွၤန့ၣ်လီၤ. စူၢ်ယတၢ်ဘူၣ်တၢ်ဘါအတၢ်သိၣ်တၢ် သီတဖၣ်ဒီးယတၢ်မၤလိာ်တဖၣ်န့ၣ်တက့ၢ်.
20 ပာ်မုၢ်အိၣ်ဘှံးနံၤဒ်မုၢ်နံၤစီဆှံတနံၤအသိး, ဒ်သိးတၢ်န့ၣ်ကမ့ၢ်ပတၢ်အၢၣ်လီၤအီလီၤအတၢ်ပနီၣ်တမံၤဒီးကဒုး သ့ၣ်နီၣ်ထီၣ်သုလၢယမ့ၢ်ယွၤသုကစၢ်ယွၤန့ၣ်တက့ၢ်.
21 ဘၣ်ဆၣ်ပှၤတစိၤန့ၣ်ခီၣ်ဆၢစ့ၢ်ကီးယၤန့ၣ်လီၤ. အဝဲသ့ၣ်လုၢ်သ့ၣ်ခါပတာ်ယတၢ်ဘူၣ်တၢ်ဘါတဖၣ်ဒီးတတိၢ်န့ၢ်ဖံးဃာ် ယတၢ်မၤလိာ်တဖၣ်လၢအဟဲစိာ်တၢ်မူဆူပှၤတဂၤလၢ်လၢ်လၢအစူၢ်အီၤ အအိၣ်န့ၣ်ဘၣ်. အဝဲသ့ၣ်မၤတရီတပါမုၢ်အိၣ်ဘှံးနံၤန့ၣ်လီၤ. ယအိၣ်ကတဲာ်ကတီၤယသးလၢယကဒုးကလၢၢ်ဘၣ်အဝဲသ့ၣ်လၢ ယတၢ်သးထီၣ်အသဟီၣ်ဆူၣ်ဖဲန့ၣ်, လၢပှၢ်မုၢ်ကနၢအပူၤဒီးမၤသံကွံာ်အဝဲသ့ၣ်ခဲလၢာ်န့ၣ်လီၤ.
22 ဘၣ်ဆၣ်ယတမၤတ့ၢ်ယဲဘၣ်. အဂ့ၢ်ဒ်အံၤတၢ်န့ၣ်ကဟဲစိာ်တၢ်မၤဘၣ်ဒိ ယမံၤအလၤကပီၤလၢပှၤကလုာ်တဖၣ်အကျါ, ပှၤတဖၣ်လၢအထံၣ်တ့ၢ်ယထုးထီၣ်ကွံာ်အံၣ်စရ့လးလၢကီၢ်အဲၤကူပတူး အပူၤန့ၣ်လီၤ.
23 လၢတၢ်န့ၣ်အဃိ, ယမၤကဒီးတၢ်ဆိၣ်အဂၤတမံၤလၢပှၢ်မုၢ်ကနၢ အပူၤန့ၣ်လီၤ. ယဆိၣ်တၢ်လၢယကမၤလီၤပြံလီၤပြါအဝဲသ့ၣ်လၢဟီၣ်ခိၣ်ဒီ ဘ့ၣ်ညါန့ၣ်လီၤ.
24 ယမၤတ့ၢ်တၢ်အံၤ, မ့ၢ်လၢအဝဲသ့ၣ်စူးကွံာ်ညိကွံာ်ယတၢ်မၤလိာ် တဖၣ်, လုၢ်သ့ၣ်ခါပတာ်ယတၢ်ဘူၣ်တၢ်ဘါတၢ်သိၣ်တၢ်သီတဖၣ်, မၤတရီတပါမုၢ်အိၣ်ဘှံးနံၤဒီးဘူၣ်ထီၣ်ဘါထီၣ်တၢ်ဂီၤတၢ်ဖီၣ် တမံၤဃီတဖၣ်လၢအဝဲသ့ၣ်အမိၢ်ပၢ်ဖံဖုလၢပျၢၤတဖၣ်မၤတ့ၢ် အတၢ်အဃိန့ၣ်လီၤ.
25 အန့ၣ်ဝံၤဒီးယဟ့ၣ်လီၤအဝဲသ့ၣ်လၢတၢ်ဘူၣ်တၢ်ဘါ အတၢ်သိၣ်တၢ်သီတဖၣ်လၢအတဂ့ၤ, ဒီးတၢ်မၤလိာ်တဖၣ်လၢအတဟဲစိာ်ဘၣ်တၢ်မူဘၣ်န့ၣ်လီၤ.
26 ယပျဲအဝဲသ့ၣ်လၢကမၤဘၣ်အၢလီၤက့ၤအဝဲသ့ၣ်အသးဒၣ်ဝဲလၢ အတၢ်လုၢ်တၢ်ပာ်ဒၣ်ဝဲတဖၣ်, ဒီးယပျဲအဝဲသ့ၣ်ကလုၢ်ထီၣ်ပာ်ထီၣ်အဖိဝဲၢ်ကိတဖၣ်န့ၣ်လီၤ. တၢ်အံၤမ့ၢ်ဒ်သိးတၢ်ကစံၣ်ညီၣ်အဝဲသ့ၣ်အဂီၢ်ဒီးဒုးနဲၣ်အဝဲ သ့ၣ်လၢယမ့ၢ်ယွၤန့ၣ်လီၤ.
27 ဒီးခဲကနံၣ်အံၤပှၤကညီလၢအသံသ့ဧၢ, တဲဘၣ်ပှၤအံၣ်စရ့လးဖိ တဖၣ်လၢယၤ, ယွၤပၢဘၣ်တၢ်ခဲလၢာ်ကစၢ်, စံးဘၣ်အဝဲသ့ၣ်ဒ်အံၤတက့ၢ်. အအံၤမ့ၢ်ကျဲအဂၤတဘိလၢအဝဲသ့ၣ်အပၢ်တဖၣ်ဒုၣ်ဒွဲၣ်ယၤခီဖျိ အဝဲသ့ၣ်အတၢ်ကလုၢ်ကတိၤန့ၣ်လီၤ.
28 ယဆှၢဃီၤအဝဲသ့ၣ်ဆူကီၢ်တဘ့ၣ်လၢယအၢၣ်လီၤတ့ၢ်တၢ်လၢ ယကဟ့ၣ်လီၤအဝဲသ့ၣ်န့ၣ်လီၤ. ဖဲအဝဲသ့ၣ်ထံၣ်ဘၣ်တၢ်လူၢ်အထီတဖၣ်ဒီးသ့ၣ်လါဟ့တဖၣ်န့ၣ်, အဝဲသ့ၣ်လုၢ်ထီၣ်တၢ်လုၢ်တၢ်ပာ်တဖၣ် ဖဲတၢ်လီၢ်ခဲလၢာ်န့ၣ်လီၤ. အဝဲသ့ၣ်မၤဒိၣ်ထီၣ်ယသးခီဖျိ တၢ်လုၢ်တၢ်ပာ်တဖၣ်လၢအဆိၣ်ကဲၤထီၣ်ဝဲဒီးစပံးထံတဖၣ်လၢအဟဲ စိာ်ဝဲဒ်တၢ်လုၢ်မၤဘူၣ်အသိးအဃိန့ၣ်လီၤ.
29 ယသံကွၢ်တ့ၢ်အဝဲသ့ၣ်, တၢ်လီၢ်ထီၣ်ထီတဖၣ်အံၤလၢသုလဲၤန့ၣ်မ့ၢ် တၢ်မနုၤလဲၣ်. လၢတၢ်န့ၣ်အဃိစးထီၣ်ဖဲန့ၣ်လံၤလံၤအဝဲသ့ၣ် ကိးတၢ်လီၢ်တဖၣ်န့ၣ်အမံၤလၢ “တၢ်လီၢ်ထီၣ်ထီတဖၣ်” န့ၣ်လီၤ.
30 ဒီးခဲကနံၣ်အံၤ, တဲဘၣ်ပှၤအံၣ်စရ့လးဖိတဖၣ်လၢ, တၢ်လၢယၤ, ယွၤပၢဘၣ်တၢ်ခဲလၢာ်ကစၢ်စံးဝဲတက့ၢ်. ဘၣ်မနုၤလၢသုဘၣ်မၤတၢ်ဒဲးဘးတမံၤဃီလၢသုပၢ်တဖၣ် မၤတ့ၢ်အီၤဒီးလူၤပိာ်ထွဲအဝဲသ့ၣ်အတၢ်ဂီၤတၢ်ဖီၣ်တဖၣ် အခံန့ၣ်လဲၣ်.
31 မုၢ်တနံၤအံၤဒၣ်လဲာ်န့ၣ်သုလုၢ်ထီၣ်, တၢ်ဟ့ၣ်တမံၤဃီတဖၣ်, ဒီးမၤဘၣ်အၢသုသးဒီးတၢ်ဂီၤတၢ်ဖီၣ်တမံၤဃီတဖၣ်, ခီဖျိသုလုၢ်ထီၣ်သုဖိတဖၣ်ဆူအဝဲသ့ၣ်အအိၣ်လၢမ့ၣ်အူပူၤ န့ၣ်လီၤ. အန့ၣ်ဝံၤဒီးသုဝဲ ပှၤအံၣ်စရ့လးဖိတဖၣ်ဟဲဒံးဆူယအိၣ်ဒီးသံကွၢ်လၢယတၢ်ဘၣ်ယသး မ့ၢ်တၢ်ဒ်လဲၣ်န့ၣ်လီၤ. ဒ်ယၤ, ယွၤပၢဘၣ်တၢ်ခဲလၢာ်ကစၢ်, မ့ၢ်နီၢ်နီၢ်ကစၢ်ယွၤလၢအမူဝဲတဂၤအသိးယစံးယဲ, ယတပျဲ သုသံကွၢ်ယၤတၢ်နီတမံၤလၢၤဘၣ်.
32 သုပာ်လီၤတ့ၢ်သုသးလၢသုကအဲၣ်ဒိးလီၤဂာ်ဒ်ပှၤကလုာ်တဖၣ်, ဒ်ပှၤဂီၢ်မုၢ်လၢအိၣ်ဝဲဆိးဝဲလၢထံကီၢ်အဂၤတဖၣ်အပူၤ, ဒီးဘူၣ်ထီၣ်ဘါထီၣ်သ့ၣ်တဖၣ်ဒီးလၢၢ်တဖၣ်န့ၣ်လီၤ. ဘၣ်ဆၣ်တၢ်န့ၣ်တမ့ၢ်ကမၤအသးနီတဘျီဘၣ်.
33 ဒ်ယၤ, ယွၤပၢဘၣ်တၢ်ခဲလၢာ်ကစၢ်မ့ၢ်နီၢ်နီၢ်ကစၢ်ယွၤလၢ အမူဝဲအသိး, ယစံးယဲ, ယဟ့ၣ်ပလီၢ်သုလၢ, လၢယတၢ်သးဒိၣ်အပူၤယကပၢဘၣ်သုလၢယစုဆူၣ်ဒီးလၢယစိ ကမီၤခဲလၢာ်အပူၤန့ၣ်လီၤ.
34 ယကဒုးနဲၣ်သုလၢယစိကမီၤဒီးယတၢ်သးဒိၣ်ထီၣ်ဖဲယပာ်ဖှိၣ်က့ၤ သုတပူၤဃီဒီးဟဲက့ၤစိာ်ကဒါက့ၤသုလၢကယဲၢ်ထံကီၢ်တဖၣ်ဖဲ သုဘၣ်တၢ်မၤလီၤပြံလီၤပြါတ့ၢ်သုန့ၣ်လီၤ.
35 ယကလဲၤဆှၢနုာ်သုဆူပှၤကလုာ်တဖၣ်အပှၢ်မုၢ်ကနၢ, ဒီးဖဲန့ၣ်, ယကစံၣ်ညီၣ်ဃၣ်သုလၢသုမဲာ်သၣ်ပူၤန့ၣ်လီၤ.
36 ခဲကနံၣ်အံၤယကစံၣ်ညီၣ်ဃၣ်သု, ဒ်သိးဒၣ်ယစံၣ်ညီၣ်ဃၣ်တ့ၢ် သုပၢ်တဖၣ်လၢကစၢၢ်စံၤနါအပှၢ်မုၢ်ကနၢပူၤအသိးန့ၣ်လီၤ.” ယွၤ, ပၢဘၣ်တၢ်ခဲလၢာ်ကစၢ်စံးတၢ်န့ၣ်လီၤ.
37 “ယကပၢၤဃာ်သုဂၢၢ်ဂၢၢ်ကျၢၤကျၢၤ, ဒီးဒုးစူၢ်သုလၢယတၢ်အၢၣ်လီၤန့ၣ်လီၤ.
38 ယကဟံးထီၣ်ကွံာ်ပှၤတဖၣ်လၢအပူထီၣ်တၢ်ဒီးမၤတၢ်ဒဲးဘးလၢသု ကျါန့ၣ်လီၤ. ယကထုးထီၣ်ကွံာ်အဝဲသ့ၣ်တဖၣ်လၢကီၢ်တဖၣ်လၢအဝဲသ့ၣ်အိၣ်ဆိးဝဲ လၢအပူၤခဲကနံၣ်အံၤ, ဘၣ်ဆၣ်ယတပျဲအဝဲသ့ၣ်က့ၤကဒါက့ၤဆူကီၢ်အံၣ်စရ့လးလၢၤဘၣ်. အန့ၣ်ဒီးသုကသ့ၣ်ညါလၢယၤ, ယမ့ၢ်ယွၤန့ၣ်လီၤ.”
39 ယွၤပၢဘၣ်တၢ်ခဲလၢာ်ကစၢ်, ကစၢ်စံးဝဲ, “ဒီးခဲကနံၣ်အံၤသုဝဲ ပှၤအံၣ်စရ့လးဖိခဲလၢာ်သ့ၣ်သုဧၢ, မၤဖဲသုသးတက့ၢ်. လဲၤဆၣ်ခီ ဒီးမၤသုတၢ်ဂီၤတၢ်ဖီၣ်တဖၣ်အတၢ်မၤတက့ၢ်. ဘၣ်ဆၣ်ယဟ့ၣ်ပလီၢ်သုလၢ, တၢ်အံၤဝံၤအလီၢ်ခံန့ၣ်သုကဘၣ်စူၢ်ယၤ ဒီးသုတၢ်မၤဘၣ်အၢယမံၤစီဆှံအလၤကပီၤခီဖျိတၢ်လုၢ်ထီၣ်တၢ် ဟ့ၣ်တဖၣ်ဆူသုတၢ်ဂီၤတၢ်ဖီၣ်တဖၣ်အအိၣ်န့ၣ်သုကဘၣ်ဆိ ကတီၢ်အီၤန့ၣ်လီၤ.
40 ဖဲန့ၣ်လၢကီၢ်ပူၤ, လၢယကစၢၢ်စီဆှံအဒီခိၣ်, ကီၢ်အံၣ်စရ့လးအကစၢၢ်ဖးထီအလိၤန့ၣ်ကယဲၢ်သုဝဲကီၢ် အံၣ်စရ့လးအပှၤဂီၢ်မုၢ်ခဲလၢာ်ကဘူၣ်ထီၣ်ဘါထီၣ်ယၤန့ၣ်လီၤ. ယကသူၣ်မံသးမုာ်လၢသုဃိဒီးယကမုၢ်လၢ်လၢသုကဟဲစိာ် န့ၢ်ယၤသုတၢ်လုၢ်တၢ်ပာ်တဖၣ်, သုတၢ်လုၢ်အဂ့ၤကတၢၢ်တဖၣ်ဒီးသုတၢ်ဟ့ၣ်စီဆှံတဖၣ်န့ၣ်လီၤ.
41 ဖဲယစိာ်ထီၣ်ကွံာ်သုလၢထံကီၢ်တဖၣ် လၢသုဘၣ်တၢ်မၤလီၤပြံလီၤပြါသု ဒီးပာ်ဖှိၣ်က့ၤသုတပူၤဃီဝံၤအလီၢ်ခံန့ၣ်, ယကတူၢ်လိာ်တၢ်လုၢ်တၢ်ပာ်တဖၣ်လၢသုဆိၣ်ကဲၤထီၣ်အီၤဒီးပှၤကလုာ် တဖၣ်ကထံၣ်ဝဲလၢယမ့ၢ်တၢ်စီဆှံတဂၤန့ၣ်လီၤ.
42 တုၤယဆှၢကဒါက့ၤသုဆူကီၢ်အံၣ်စရ့လး, ကီၢ်တဘ့ၣ်လၢယအၢၣ်လီၤတ့ၢ်လၢယကဟ့ၣ်လီၤသုမိၢ်ပၢ်ဖံဖု လၢပျၢၤတဖၣ်န့ၣ်ဒီး, အန့ၣ်တစု, သုကသ့ၣ်ညါလၢယမ့ၢ်ယွၤန့ၣ်လီၤ.
43 တုၤနုၤတစု, သုကသ့ၣ်နီၣ်ထီၣ်ကယဲၢ်တၢ်လီၤမဲာ်ဆှးတဖၣ်လၢသု မၤတ့ၢ်အီၤဒီးသုမၤဘၣ်အၢလီၤသုသးဒ်လဲၣ်ဒ်လဲၣ်န့ၣ်လီၤ. သုကသးဘၣ်အၢလီၤက့ၤသုသး, မ့ၢ်လၢတၢ်အၢတၢ် သီခဲလၢာ်လၢသုမၤတ့ၢ်အီၤအဃိန့ၣ်လီၤ.
44 ဖဲယမၤတၢ်လၢ, တၢ်ဒီဒၣ်အိၣ်ပှိၤက့ၤယလၤကပီၤအဂီၢ်န့ၣ် သုဝဲပှၤအံၣ်စရ့လးဖိတဖၣ်သုကသ့ၣ်ညါလၢယမ့ၢ်ယွၤန့ၣ်လီၤ. အဂ့ၢ်ဒ်အံၤ, ယတမၤဘၣ်သုဒ်သုတၢ်အၢတၢ်သီ, တၢ်ဟူးတၢ်ဂဲၤအအၢအသီတဖၣ်ကြၢးတူၢ်ဘၣ်ဝဲအသိးန့ၣ်ဘၣ်.” ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.
45-46 ယွၤကတိၤတၢ်ဒီးယၤလီၤ. အဝဲစံးဝဲဒၣ်, “ပှၤကညီလၢအသံသ့ဧၢ, ကွၢ်ဃီၤတၢ်ဆူကလံၤထံးတက့ၢ်. ကတိၤတၢ်ထီဒါကလံၤထံးဒီးကတိၤတၢ်လၢဝံအကျိာ် ထီဒါကလံၤထံးသ့ၣ်ပှၢ်န့ၣ်တက့ၢ်.
47 တဲဘၣ်သ့ၣ်ပှၢ်လၢကလံၤထံးတခီလၢကနၢ်ဟူယွၤပၢဘၣ်တၢ်ခဲလၢာ် ကစၢ်စံးတၢ်အံၤတက့ၢ်. ကွၢ်တက့ၢ်. ယမၤကဲၤထီၣ်မ့ၣ်အူတခါဒီးတၢ်န့ၣ်ကအီၣ်ကွံာ်ကယဲၢ် သ့ၣ်ကိးထံးဒီးလၢအအိၣ်လၢနပူၤအသံကစဲာ်ဂ့ၤအဃ့ထီဂ့ၤန့ၣ်လီၤ. တၢ်မၤပံာ်ကွံာ်အီၤတန့ၢ်နီတမံၤဘၣ်. ကရၤလီၤအသးလၢကလံၤထံး ဆူကလံၤစိးဒီးပှၤကိးဂၤဒဲးကကလၢၢ်ဘၣ်မ့ၣ်အူလၣ်တဖၣ် အတၢ်ကိၢ်န့ၣ်လီၤ.
48 အဝဲသ့ၣ်ခဲလၢာ်ကထံၣ်ဘၣ်ဝဲလၢယၤ, ယွၤဆိၣ်ကဲၤထီၣ်တၢ်န့ၣ်လၢ မ့ၣ်အူဒီးပှၤမၤပံာ်ကွံာ်အီၤတန့ၢ်နီတဂၤဘၣ်န့ၣ်လီၤ.”
49 ဘၣ်ဆၣ်ယကတိၤဂ့ၢ်လိာ်ဒီးစံး, “ယွၤပၢဘၣ်တၢ်ခဲလၢာ်ကစၢ်ဧၢ, တဘၣ်မၢယမၤတၢ်န့ၣ်တဂ့ၤ. ပှၤကိးဂၤဒဲးကဒူးကဒ့ၣ်လံတၢ်ဒီးစံးလၢထီဘိယကတိၤ တၢ်လၢတၢ်ပှိၤပှီၢ်တဖၣ်အပူၤန့ၣ်လီၤ.”