21
1-2 ယွၤကတိၤတၢ်ဒီးယၤလီၤ. အဝဲစံးဝဲဒၣ်, “ပှၤကညီလၢအသံသ့ဧၢ, စံးလၢဝ့ၢ်ယရူၤၡလ့ၣ်
ဂ့ၤဘၣ်တၢ်စံၣ်ညီၣ်တက့ၢ်. စံးလၢတၢ်လီၢ်တဖၣ်လၢပှၤဂီၢ်မုၢ်ဘူၣ်ထီၣ်ဘါထီၣ်တၢ်ဂ့ၤဘၣ်တၢ်
စံၣ်ညီၣ်တက့ၢ်. ဟ့ၣ်ပလီၢ်ကီၢ်အံၣ်စရ့လး,
3 လၢတၢ်လၢယၤ, ယွၤစံးဝဲန့ၣ်တက့ၢ်, ယမ့ၢ်နဒုၣ်နဒါလီၤ. ယကထုးထီၣ်ယနးဒီးမၤသံကွံာ်ပှၤလၢအအိၣ်နပူၤခဲလၢာ်, ပှၤအဂ့ၤမ့ၢ်ဂ့ၤပှၤအအၢမ့ၢ်ဂ့ၤဒ်သိးသိးန့ၣ်လီၤ.
4 ယကသူယနးထီဒါပှၤကိးဂၤဒဲးစးထီၣ်လၢကလံၤစိးတုၤလၢ ကလံၤထံးန့ၣ်လီၤ.
5 ပှၤကိးဂၤကသ့ၣ်ညါဝဲလၢယၤ, ယွၤအံၤထုးထီၣ်တ့ၢ်အနးလၢ အတြိးပူၤဒီးတပာ်နုာ်ကဒါက့ၤဝဲဘၣ်န့ၣ်လီၤ.
6 ပှၤကညီလၢအသံသ့ဧၢ, ကအုကစွါဒ်နသးသ့ၣ်ဖးလၢ တၢ်သူၣ်လီၤဘှံးသးလီၤဘှါအဃိအသိးန့ၣ်တက့ၢ်. ကအုကစွါလၢတၢ်သူၣ်အုးသးအုးအပူၤ, တၢ်လီၢ်ဖဲပှၤကိးဂၤကွၢ်
နၤသ့ဝဲန့ၣ်တက့ၢ်.
7 တုၤအဝဲသ့ၣ်သံကွၢ်နၤ, ဘၣ်မနုၤအဃိလၢနကအုကစွါလဲၣ်န့ၣ်, တဲဘၣ်အဝဲသ့ၣ်လၢတၢ်န့ၣ်မ့ၢ်လၢတၢ်ကစီၣ်လၢအကဟဲဝဲ အဃိန့ၣ်လီၤ. ဖဲအဟဲတုၤန့ၣ်အဝဲသ့ၣ်အသးတဖၣ်ကပှဲၤဝဲဒီး
တၢ်ပျံၤတၢ်ဖုး, အဝဲသ့ၣ်အစုတဖၣ်ကလီၤဘျ့ကွံာ်, အဝဲသ့ၣ်အတၢ်သူၣ်ဒူသးဒူကလီၤမၢ်ကွံာ်ဒီးအဝဲသ့ၣ်အခီၣ်လ့ၢ်ခိၣ်
တဖၣ်ကကနိးကစုာ်ဝဲန့ၣ်လီၤ. တၢ်ဆၢကတီၢ်တုၤဃီၤလံ.
မ့ၢ်ခဲကနံၣ်အံၤလီၤ. ယွၤ, ပၢဘၣ်တၢ်ခဲလၢာ်ကစၢ်ကတိၤလံတၢ်လံ.
8 ယွၤစံးဘၣ်ယၤ,
9 ပှၤကညီလၢအသံသ့ဧၢ, ကတိၤတၢ်လၢဝံအကျိာ်တက့ၢ်. တဲဘၣ်ပှၤဂီၢ်မုၢ်တၢ်လၢယၤ, ယွၤကစံးဝဲန့ၣ်တက့ၢ်. နးတဘ့ၣ်, နးတဘ့ၣ်, ဘၣ်တၢ်ကျ့အ့ၣ်အီၤဒီးဘၣ်တၢ်ထူး
ကတြ့ၣ်အီၤန့ၣ်လီၤ.
10 ဘၣ်တၢ်ကျ့အ့ၣ်အီၤလၢကမၤဝံၤတၢ်အဂီၢ်, ဘၣ်တၢ်ထူးကတြ့ၣ်အီၤလၢကကပြုၢ်ထီၣ်ဒ်လီဝၢ်ဒံး အသိးအဂီၢ်န့ၣ်လီၤ. တၢ်သူၣ်ဖှံသးညီအိၣ်ဖဲန့ၣ်တသ့ဘၣ်, မ့ၢ်လၢယပှၤဂီၢ်မုၢ်တဖၣ်တပးကဲကယဲၢ်တၢ်ဟ့ၣ်
ပလီၢ်ဒီးတၢ်စံၣ်ညီၣ်အဃိန့ၣ်လီၤ.
11 နးန့ၣ်ဘၣ်တၢ်ထူးတတြ့ၣ်အီၤဒ်သိးကအိၣ်ကတဲာ် ကတီၤအသးလၢတၢ်ကသူအီၤအဂီၢ်န့ၣ်လီၤ. နးန့ၣ်ဘၣ်တၢ်ကျ့အ့ၣ်အီၤဒီးထူးကတြ့ၣ်အီၤဒ်သိး
ကဘၣ်တၢ်ဟ့ၣ်လီၤအီၤဆူပှၤမၤသံတၢ်အစုပူၤအဂီၢ်န့ၣ်လီၤ.
12 ဟီၣ်တၢ်ယၢၤတၢ်လၢတၢ်သူၣ်အုးသးအုးအပူၤပှၤကညီလၢ အသံသ့ဧၢ, နးအံၤမ့ၢ်လၢယပှၤဂီၢ်မုၢ်ဒီးပှၤအံၣ်စရ့လးဖိအခိၣ်
အနၢ်ခဲလၢာ်အဂီၢ်န့ၣ်လီၤ. အဝဲသ့ၣ်ကဘၣ်တၢ်မၤသံအီၤဃုာ်ဒီးယပှၤဂီၢ်မုၢ်လၢအအိၣ်လီၤတဲာ်
တ့ၢ်ခဲလၢာ်န့ၣ်လီၤ. ဒဲလီၤနသးနါပှၢ်လၢတၢ်သူၣ်ဟးဂီၤသးဟးဂီၤအပူၤန့ၣ်တက့ၢ်.
13 ယမၤကွၢ်ယပှၤဂီၢ်မုၢ်ဒီးအဝဲသ့ၣ်မ့ၢ်ဂ့ၢ်လိာ်လၢကသ့ၣ်နီၣ်ပီၢ် ယၢ်လီၤက့ၤအသးဒီးတၢ်သ့ၣ်တဖၣ်အံၤခဲလၢာ်ကမၤအသးဒီး
အဝဲသ့ၣ်န့ၣ်လီၤ.
14 ခဲကနံၣ်အံၤ, ပှၤကညီလၢအသံသ့ဧၢ, ကတိၤတၢ်လၢဝံအကျိာ်တက့ၢ်. ဒဲနစုတဖၣ်တက့ၢ်. ဒီးနးန့ၣ်ကဆဲးတၢ်တဘျီဝံၤတဘျီန့ၣ်လီၤ.
တၢ်အံၤမ့ၢ်နးလၢအမၤသံတၢ်, မ့ၢ်နးလၢအမၤပျံၤမၤဖုးတၢ်,
ဒီးမၤသံမၤဝီတၢ်အါအါဂီၢ်ဂီၢ်န့ၣ်လီၤ.
15 နးန့ၣ်ဒုးလီၤမၢ်ကွံာ်ယပှၤဂီၢ်မုၢ်အတၢ်သူၣ်ဒူသးဒူဒီးမၤ ဘၣ်တိၢ်အခီၣ်န့ၣ်လီၤ. ယမၤပျံၤမၤဖုးအဝဲသ့ၣ်အဝ့ၢ်တဖၣ်လၢနးတဘ့ၣ်လၢအကပြုၢ်
ထီၣ်ဝဲဒ်လီဝၢ်ဒံးအသိး, ဒီးအိၣ်ကတဲာ်ကတီၤအသးလၢကမၤသံတၢ်
အဂီၢ်န့ၣ်လီၤ.
16 နဲဒၣ်, နးလၢအအ့ၣ်တဘ့ၣ်ဧၢ, ကျီတၢ်လၢစုထွဲဒီးလၢစုစ့ၣ် တက့ၢ်. ကျီတၢ်ဖဲနဃၣ်နသးတပူၤလၢ်လၢ်န့ၣ်တက့ၢ်.
17 ယဲစ့ၢ်ကီးယကဒဲယစုတဖၣ်ဒီးယတၢ်သးဒိၣ် ကကတၢၢ်ကွံာ်ဝဲဒၣ်န့ၣ်လီၤ.” ယၤ, ယွၤအံၤကတိၤလံတၢ်လံ.
18-19 ယွၤကတိၤတၢ်ဒီးယၤန့ၣ်လီၤ. အဝဲစံးဝဲဒၣ်, “ပှၤကညီလၢအသံသ့ဧၢ, မၤနီၣ်ကျဲခံဘိလၢကီၢ်
ဘၤဘူၤလိၣ်အစီၤပၤဟဲဝဲဃုာ်ဒီးအနးသ့န့ၣ်တက့ၢ်. ကျဲခံဘိလၢာ်အံၤကဘၣ်စးထီၣ်အသးလၢထံကီၢ်တဘ့ၣ်
ဃီအပူၤန့ၣ်လီၤ. မၤထီၣ်တၢ်ပနီၣ်အထူၣ်တထူၣ်ဖဲကျဲဖးဒ့တဖၣ်န့ၣ်
တက့ၢ်.
20 တၢ်ပနီၣ်တမံၤန့ၣ်ကဒုးနဲၣ်စီၤပၤအကျဲဆူပှၤဧၤမိၣ်ဖိအဝ့ၢ် ရးဘးအပူၤ, ဒီးအဂၤတမံၤန့ၣ်မ့ၢ်ဆူကီၢ်ယူဒၤ,
ဆူဝ့ၢ်အိၣ်ဒီးအတိာ်ခၢၣ်သနၢၣ်ယရူၤၡလ့ၣ်န့ၣ်လီၤ.
21 ကီၢ်ဘၤဘူၤလိၣ်အစီၤပၤဆၢထၢၣ်ဝဲလၢတၢ်ပနီၣ်အထူၣ်ကပၤလၢကျဲ ဖးဒ့န့ၣ်လီၤ. ဒ်သိးကသ့ၣ်ညါကျဲလၢကဘၣ်ပိာ်ဝဲအဂီၢ်န့ၣ်, အဝဲတရူၤထီၣ်အပျၢ်တဖၣ်န့ၣ်လီၤ.
အဝဲဃ့တၢ်ဟ့ၣ်ကူၣ်လၢတၢ်ဂီၤတၢ်ဖီၣ်တဖၣ်အအိၣ်န့ၣ်လီၤ. အဝဲသမံသမိးကွၢ်ဆၣ်ဖိကီၢ်ဖိတဒုလၢအဘၣ်တၢ်လုၢ်ထီၣ်အီၤ
အသူၣ်န့ၣ်လီၤ.
22 ခဲကနံၣ်အံၤ, အဝဲအစုထွဲဖီၣ်ဃာ်ပျၢ်တဘိလၢတၢ်မၤနီၣ်အီၤ, ‘ဝ့ၢ်ယရူၤၡလ့ၣ်’ အဂီၢ်န့ၣ်လီၤ. တၢ်န့ၣ်တဲအီၤလၢအဝဲကလဲၤ
ဒီးပာ်လီၤနီၣ်ဘၢၣ်ဖျိတၢ်တဖၣ်, ကကိးသတြီထီၣ်တၢ်ဒုးတၢ်ယၤအတၢ်ကိးပသူ, ကပာ်လီၤနီၣ်ဘၢၣ်ဖျိတၢ်တဖၣ်ထီဒါတြဲၤတဖၣ်ဒီးကမၤကစီၤထီၣ်
ဟီၣ်ခိၣ်ပူၣ်တဖၣ်ဒီးကခူၣ်လီၤတၢ်ကျိၤတဖၣ်န့ၣ်လီၤ.
23 ဝ့ၢ်ယရူၤၡလ့ၣ်အပှၤဂီၢ်မုၢ်တမ့ၢ်ကနာ်တၢ်ဂ့ၢ်အံၤဘၣ်, မ့ၢ်လၢလံာ်ဃံၤဃာ်တဖၣ်လၢအဝဲသ့ၣ်မၤတ့ၢ်အီၤအဃိန့ၣ်လီၤ. ဘၣ်ဆၣ်ဝံအတၢ်ကတိၤဆိပာ်အံၤမ့ၢ်တၢ်လၢကဒုးသ့ၣ်နီၣ်ထီၣ် အဝဲသ့ၣ်လၢအဝဲသ့ၣ်အတၢ်ဒဲးဘးတဖၣ်ဒီးဟ့ၣ်ပလီၢ်
အဝဲသ့ၣ်လၢအဝဲသ့ၣ်ကဘၣ်တၢ်ဖီၣ်န့ၢ်အီၤန့ၣ်လီၤ.
24 အန့ၣ်တစု, တၢ်အံၤမ့ၢ်တၢ်လၢယၤ, ယွၤပၢဘၣ်တၢ်ခဲလၢာ်ကစၢ်စံး ဝဲန့ၣ်လီၤ. သုတၢ်ဒဲးဘးတဖၣ်ဘၣ်တၢ်လီၣ်ဖျါထီၣ်အီၤလံ. ပှၤကိးဂၤဒဲးသ့ၣ်ညါဝဲလၢသုတၢ်ဒဲးဘးအိၣ်ဝဲဆံးအါလဲၣ်န့ၣ်လီၤ. သုပာ်ဖျါထီၣ်သုတၢ်ဒဲးဘးတဖၣ်လၢသုတၢ်ဟူးတၢ်ဂဲၤခဲလၢာ်
အပူၤန့ၣ်လီၤ. သုဘၣ်ဆၢထၢၣ်လၢတၢ်စံၣ်ညီၣ်ဃၣ်အဂီၢ်ဒီးယကဟ့ၣ်
လီၤသုဆူသုဒုၣ်သုဒါတဖၣ်အစုပူၤန့ၣ်လီၤ.
25 နဲဒၣ်ကီၢ်အံၣ်စရ့လးအပှၤပၢတၢ်လၢအအၢအသီဒီးတစီတဆှံ တဂၤဧၢ, နမုၢ်တနံၤ, မုၢ်တနံၤလၢနတၢ်စံၣ်ညီၣ်လၢခံကတၢၢ်အဂီၢ်
န့ၣ်ဟဲတုၤဃီၤဝဲလံ.
26 ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ. ဘ့ၣ်လီၤကွံာ်နခိၣ်သလုးဒီးနခိၣ်ဖၢၣ်တက့ၢ်. တၢ်ဒ်သိးအံၤတမံၤဃီတမၤကဒီးအသးလၢၤဘၣ်. ပာ်ထီၣ်ထီပှၤအဖှီၣ်ဖိဆူတၢ်စိတၢ်ကမီၤအလီၢ်တက့ၢ်. ပာ်လီၤကွံာ်ပှၤတဖၣ်လၢအပၢတၢ်န့ၣ်တက့ၢ်.
27 တၢ်ဟးဂူာ်ဟးဂီၤ, တၢ်ဟးဂူာ်ဟးဂီၤ, မ့ၢ်လီၤ. ယကဒုးကဲထီၣ်ဝ့ၢ်ဆူတၢ်ဟးဂီၤတမံၤန့ၣ်လီၤ. ဘၣ်ဆၣ်တၢ်အံၤတချုးဒံးလၢပှၤတဂၤလၢယဃု ထၢအီၤလၢကမၤဟးဂီၤဝ့ၢ်အံၤဟဲတုၤဒံးဘၣ်န့ၣ်တမၤ
ဘၣ်အသးဘၣ်. အန့ၣ်ဝံၤဒီးယကဟ့ၣ်လီၤအီၤဆူအဝဲ
အစုပူၤန့ၣ်လီၤ.
28 ပှၤကညီလၢအသံသ့ဧၢ, ကတိၤတၢ်လၢဝံအကျိာ်တက့ၢ်. ဘိးဘၣ်သ့ၣ်ညါတၢ်လၢယၤ, ယွၤပၢဘၣ်တၢ်ခဲလၢာ်ကစၢ်ယွၤကစံးဘၣ် ပှၤဧၤမိၣ်ဖိတဖၣ်, ပှၤတဖၣ်လၢအကတိၤဒုၣ်ဒွဲၣ်ပှၤအံၣ်စရ့လးဖိန့ၣ်
တက့ၢ်. စံးဘၣ်အဝဲသ့ၣ်ဒ်အံၤတက့ၢ်. နးတဘ့ၣ်အိၣ်ကတဲာ်ကတီၤလံအသးလၢကမၤဟးဂီၤကွံာ်တၢ်
အဂီၢ်လံ. ဘၣ်တၢ်ထူးကတြ့ၣ်ထီၣ်အီၤလၢမၤသံတၢ်အဂီၢ်, လၢကကပြုၢ်ထီၣ်ဒ်လီဝၢ်ဒံးအသိးအဂီၢ်န့ၣ်လီၤ.
29 တၢ်ထံၣ်လၢညါတဖၣ်လၢသုထံၣ်ဘၣ်န့ၣ်မ့ၢ်တၢ်ကဘျံး ကဘျၣ်ဒီးတၢ်ကတိၤဆိပာ်စၢၤတဖၣ်လၢသုမၤအီၤန့ၣ်မ့ၢ်တၢ်လီ
တၢ်ဝ့ၤတဖၣ်လီၤ. သုမ့ၢ်ပှၤတတီတလိၤဒီးပှၤအၢပှၤသီ,
ဒီးသုမုၢ်နံၤမုၢ်သီန့ၣ်ဟဲဝဲ, မုၢ်တနံၤလၢသုတၢ်စံၣ်ညီၣ်လၢခံ
ကတၢၢ်အဂီၢ်န့ၣ်လီၤ. နးတဘ့ၣ်ကလီၤလၢသုကိာ်တဖၣ်အလိၤန့ၣ်လီၤ.
30 ဖျီၣ်နုာ်က့ၤနးန့ၣ်တက့ၢ်. ယကစံၣ်ညီၣ်သုလၢတၢ်လီၢ်ဖဲသုဘၣ်တၢ်တ့လီၤပာ်လီၤသု, ကီၢ်ဖဲသုအိၣ်ဖျဲၣ်ထီၣ်အပူၤန့ၣ်လီၤ.
31 သုကကလၢၢ်ဘၣ်ယတၢ်သးထီၣ်, ဖဲယလူလီၤအီၤလၢသုလိၤဒ်မ့ၣ်အူကဲၤတခါအသိးန့ၣ်လီၤ. ဒီးယကဟ့ၣ်လီၤကွံာ်သုဆူပှၤအၢပှၤသီအရၢၢ်အစၢၢ်တဖၣ်လၢ
အမ့ၢ်ပှၤလၢအသ့လီၤတံၢ်လီၤဆဲးလၢတၢ်မၤဟးဂီၤအပူၤ
အစုပူၤန့ၣ်လီၤ.
32 သုကဘၣ်တၢ်မၤဟးဂီၤကွံာ်သုလၢမ့ၣ်အူန့ၣ်လီၤ. သုသွံၣ်ကဂၢ်လီၤအသးလၢသုထံသုကီၢ်ဒၣ်နဲအပူၤဒီးပှၤ တသ့ၣ်နီၣ်ထီၣ်လၢၤသုနီတဘျီလၢၤဘၣ်.” ယွၤကတိၤတ့ၢ်တၢ်လံ.