17
1-2 ယွၤကတိၤတၢ်ဒီးယၤလီၤ. အဝဲစံးဝဲ, “ပှၤကညီလၢအသံသ့ဧၢ, တဲဘၣ်ပှၤအံၣ်စရ့လးဖိတဖၣ် လၢတၢ်ကတိၤဒိတခါ,
3 ဒ်သိးအဝဲသ့ၣ်ကသ့ၣ်ညါဘၣ်တၢ်လၢယၤ, ယွၤပၢဘၣ်တၢ်ခဲလၢာ်ကစၢ် စံးဘၣ်အဝဲသ့ၣ်န့ၣ်တက့ၢ်. လံာ်ကြီကြာ်ဖးဒိၣ်အိၣ်ဝဲတဘ့ၣ်လၢအအိၣ်ဒီးအဆူၣ်တဖၣ်လၢအဃံ လၤဒီးအဒံးဆ့ဖးဒိၣ်တဖၣ်လၢအသလၣ်ထီၣ်ဝဲန့ၣ်လီၤ. အဝဲယူၤဝဲဆူလဘၤနိၣ်အကစၢၢ်ကလိတဖၣ်ဒီးမၤကၢ်ကွံာ်သ့ၣ်ဆှိ အ့ရ့းတထူၣ်အစိးနါ,
4 လၢအလဲၤစိာ်ကွံာ်ဝဲဆူကီၢ်ကၤတၢ်တဘ့ၣ်အပူၤ, ဒီးပာ်လီၤအီၤလၢပှၤကူၣ်တၢ်ကၤတၢ်တဖၣ်အဝ့ၢ်တဝ့ၢ်အပူၤန့ၣ်လီၤ.
5 ဝံၤဒီးအဝဲဟံးန့ၢ်တၢ်မုၢ်တၢ်ဘိအစၢ်တမုၢ်လၢကီၢ်အံၣ်စရ့လး အပူၤဒီးသူၣ်လီၤအီၤလၢဟီၣ်ခိၣ်ညၣ်ထ့ၣ်အပျီတဘ့ၣ်အပူၤ, ဖဲထံအိၣ်ဝဲထီဘိလၢကဒုးဒိၣ်ထီၣ်အီၤအဂီၢ်န့ၣ်လီၤ.
6 တၢ်မုၢ်တၢ်ဘိန့ၣ်ဒိးပဒုၣ်ထီၣ်ဒီးကဲထီၣ်စပံးမုၢ်အဖုၣ်တမုၢ် လၢအခိၣ်ကဟုဒီးတယၢ်ထီၣ်အသးန့ၣ်လီၤ. အဒ့တဖၣ်ဒိၣ်ထီၣ်ဆူထးခီဆူလံာ်ကြီကြာ်အအိၣ်, ဒီးအဂံၢ်တဖၣ်စဲၤလီၤအသးယိာ်ဝဲလီၤ. စပံးမုၢ်န့ၣ်ပှဲၤဝဲဒီးအဒ့တဖၣ်ဒီးအလၣ်တဖၣ်န့ၣ်လီၤ.
7 လံာ်ကြီကြာ်ဖးဒိၣ်အဂၤအိၣ်ဝဲတဘ့ၣ်, လၢအအိၣ်ဒီးအဒံး ဆ့ဖးဒိၣ်တဖၣ်ဒီးအဆူၣ်အဒံးလၢအတီၣ်ဝဲန့ၣ်လီၤ. ဒီးခဲကနံၣ်အံၤစပံးမုၢ်န့ၣ်ယူာ်ထီၣ်အဂံၢ်ဆူအအိၣ်ဒီးယူာ် ဃီၤအလၣ်တဖၣ်ဆူအအိၣ်, အိၣ်ဒီးတၢ်မုၢ်လၢ်လၢအဝဲကဟ့ၣ်အီၤထံအါန့ၢ်ဒံးလၢအအိၣ်လၢ တၤသၣ်လီၢ်အပူၤ, တၢ်လီၢ်ဖဲအဝဲမဲထီၣ်ဒိၣ်ထီၣ်န့ၣ်လီၤ.
8 ဘၣ်ဆၣ်ဒီး, စပံးမုၢ်န့ၣ်ဘၣ်တၢ်သူၣ်လီၤတ့ၢ်လံအီၤလၢဟီၣ်ခိၣ် ညၣ်ထ့ၣ်ဂ့ၤအပျီတဘ့ၣ်လၢထံန့ၣ်ဂ့ၤဝဲဒ်သိး, အလၣ်တဖၣ်ကဂ့ၤဝဲ ဒီးကသၣ်ထီၣ်စပံးသၣ်တဖၣ်ဒီးကဲထီၣ်စပံးမုၢ်လၢအလီၤဘီလီၤ မုၢ်တမုၢ်အဂီၢ်န့ၣ်လီၤ.
9 လၢတၢ်န့ၣ်အဃိ, ယၤ, ယွၤပၢဘၣ်တၢ်ခဲလၢာ်ကစၢ်သံကွၢ် တၢ်န့ၣ်လီၤ. မ့ၢ်စပံးမုၢ်အံၤကဒီးဒိၣ်ထီၣ်စ့ၢ်ကီးဧါ. လံာ်ကြီကြာ်အဆိကတၢၢ်တဘ့ၣ်တထဲးထီၣ်ကွံာ်အီၤလၢအဂံၢ်, ဒ့ကွံာ်အစပံးသၣ်တဖၣ်, ဒီးမၤကၢ်ကွံာ်အဒ့တဖၣ်ဒီးပျဲအဃ့ ထီကွံာ်ဘၣ်န့ၣ်ဧါ. လၢတၢ်ကထဲးထီၣ်ကွံာ်အီၤအဂီၢ်န့ၣ်, တလိၣ်တၢ်ဂံၢ်တၢ်ဘါအါအါကဲာ်ဆိးမ့ၢ်ဂ့ၤ, ပှၤတကလုာ်လၢအဂံၢ် ဆူၣ်အဘါဆူၣ်မ့ၢ်ဂ့ၤန့ၣ်ဘၣ်.
10 မ့ၢ်. စပံးမုၢ်အံၤဘၣ်တၢ်သူၣ်လီၤတ့ၢ်အီၤလံ. ဘၣ်ဆၣ်မ့ၢ် ကမူဒီးဒိၣ်ထီၣ်ကစီဒီဧါ. ဖဲမုၢ်ထီၣ်အကလံၤအူဘၣ်အီၤဒီး, မ့ၢ်အတလီၤညွံးလီၤဘဲကွံာ်ဘၣ်ဧါ. ဖဲအဒိၣ်ထီၣ်အဝဲအလီၢ်န့ၣ် မ့ၢ်အတဃ့ထီကွံာ်ဘၣ်ဧါ.”
11-12 ယွၤစံးဘၣ်ယၤ, “သံကွၢ်ပှၤပူထီၣ်တၢ်တဖၣ်အံၤလၢ, မ့ၢ်အဝဲသ့ၣ်သ့ၣ်ညါတၢ်ကတိၤ ဒိအံၤအခီပညီကစီဒီဧါ. တဲဘၣ်အဝဲသ့ၣ်လၢကီၢ်ဘၤဘူၤလိၣ်အစီၤပၤဟဲဝဲဆူဝ့ၢ်ယရူၤ ၡလ့ၣ်ဒီးက့ၤကိးကွံာ်စီၤပၤဒီးအပဒိၣ်ပပှၢ်တဖၣ်ဒီးအီၤဆူကီၢ် ဘၤဘူၤလိၣ်န့ၣ်လီၤ.
13 အဝဲက့ၤကိးစီၤပၤအဒူၣ်ဖိထၢဖိအကျါတဂၤဒီးမၤလံာ်ဃံၤဃာ် တဘ့ၣ်ဒီးအီၤ, ဒီးမၢအဆိၣ်လီၤအသးလၢကတီဒီးအီၤန့ၣ်လီၤ. အဝဲက့ၤကိးပှၤလၢအကါဒိၣ်တဖၣ်ဒ်ပှၤဘၣ်တၢ်ဟ့ၣ်ကီၤလၢတၢ်အုၣ် ခီၣ်အဂီၢ်တဖၣ်အသိး,
14 ဒ်သိးကတြီဃာ်ပှၤကလုာ်လၢအသုတဆၢထၢၣ်ပူထီၣ်ကဒီးတၢ် တဂ့ၤဒီးဒ်သိးကမၤလီၤတံၢ်ဝဲလၢလံာ်ဃံၤဃာ်ကဘၣ်တၢ်ဟံးဃာ်ဂၢၢ် ကျၢၤအီၤအဂီၢ်န့ၣ်လီၤ.
15 ဘၣ်ဆၣ်ဒီးကီၢ်ယူဒၤအစီၤပၤပူထီၣ်တၢ်ဒီးဆှၢလီၤခၢၣ်စးတဖၣ် ဆူကီၢ်အဲၤကူပတူး, လၢကမၤန့ၢ်ကသ့ၣ်တဖၣ်ဒီးသုးမုၢ်ဖးဒိၣ်တဖု အဂီၢ်န့ၣ်လီၤ. မ့ၢ်အဝဲကမၤနၢၤတၢ်ကစီဒီဧါ. မ့ၢ်အဝဲပူၤဖျဲးထီၣ်လၢတၢ်အံၤကသ့ကစီဒီဧါ. အဝဲမ့ၢ်မၤဟးဂီၤကွံာ်အတၢ်ဆိၣ်လီၤအသးလၢလံာ်ဃံၤဃာ်အပူၤ ဒီးတၢ်တစံၣ်ညီၣ်အီၤဘၣ်န့ၣ်ကသ့ဒ်လဲၣ်.
16 ယွၤပၢဘၣ်တၢ်ခဲလၢာ်ကစၢ်စံးဝဲ, ဒ်ယမ့ၢ်ကစၢ်ယွၤလၢအမူဝဲ နီၢ်နီၢ်တဂၤအသိးန့ၣ်, ယစံးယဲလၢစီၤပၤအံၤကသံလၢကီၢ်ဘၤဘူၤလိၣ်အပူၤ မ့ၢ်လၢအဝဲမၤဟးဂီၤကွံာ်အတၢ်ဆိၣ်ဒီးအတၢ်အၢၣ်လီၤလၢအမၤတ့ၢ်ဝဲဒီးကီၢ်ဘၤဘူၤလိၣ်အစီၤပၤ, ပှၤတဂၤလၢအပာ်ထီၣ်အီၤလၢစီၤပၤအလီၢ်ပစိာ်အဃိန့ၣ်လီၤ.
17 ကီၢ်အဲၤကူပတူးအစီၤပၤအသုးမုၢ်လၢအဂံၢ်ဆူၣ်ဘါဆူၣ်ဒၣ်လဲာ် န့ၣ်, ဖဲလၢပှၤဘၤဘူၤလိၣ်ဖိတဖၣ်မၤထီထီၣ်ဟီၣ်ခိၣ်ဝးတရံးဝ့ၢ်ဒီး ခူၣ်လီၤတၢ်ကျိၤတဖၣ်လၢကမၤသံပှၤဂီၢ်မုၢ်အါဂၤအခါန့ၣ်ဒုး စၢၤအီၤတၢ်တသ့ဘၣ်.
18 အဝဲမၤဟးဂီၤကွံာ်အတၢ်အိၣ်ဒီးလံာ်ဃံၤဃာ်လၢအမၤတ့ၢ်ဝဲန့ၣ် လီၤ. အဝဲမၤတၢ်သ့ၣ်တဖၣ်အံၤခဲလၢာ်, အဃိ, ခဲကနံၣ်အံၤအဝဲတပူၤဖျဲးဝဲဘၣ်န့ၣ်လီၤ.”
19 ယွၤပၢဘၣ်တၢ်ခဲလၢာ်ကစၢ်စံးဝဲ, “ဒ်ယမ့ၢ်ကစၢ်ယွၤလၢအမူဝဲ နီၢ်နီၢ်တဂၤအသိး, ယစံးယဲလၢယကစံၣ်ညီၣ်အီၤ, မ့ၢ်လၢအမၤဟးဂီၤလံာ်ဃံၤဃာ်အတၢ်ဆိၣ်လၢအဝဲဆိၣ်လီၤအသးလၢ ယမံၤအပူၤလၢကဟံးဃာ်ဝဲအဃိန့ၣ်လီၤ.
20 ယကဟုးယပှာ်လၢအဖီခိၣ်ဒီးဖီၣ်န့ၢ်အီၤလၢအပူၤလီၤ. ယကလဲၤစိာ်အီၤဆူကီၢ်ဘၤဘူၤလိၣ်ဒီးစံၣ်ညီၣ်အီၤဖဲန့ၣ်, မ့ၢ်လၢအဝဲတတီဒီးယၤအဃိန့ၣ်လီၤ.
21 အဝဲအသုးဖိအဂ့ၤကတၢၢ်တဖၣ်ကဘၣ်တၢ်မၤသံကွံာ်အီၤလၢတၢ်ဒုးတၢ် ယၤအပူၤ, ဒီးပှၤလၢအအိၣ်လီၤတဲာ်တဖၣ်ကဘၣ်တၢ်မၤလီၤ ပြံလီၤပြါအီၤဆူတၢ်လီၢ်ကိးကပၤဒဲးန့ၣ်လီၤ. အန့ၣ်ဒီး, သုကသ့ၣ်ညါလၢယၤ, ယွၤအံၤ, ကတိၤလံတၢ်လံန့ၣ်လီၤ.”
22 အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. “ယကဟံးန့ၢ်သ့ၣ်ဆှိအ့းရ့းဖးထီတထံးအစိးနါဒီးမၤကၢ်ကွံာ် အဒိးစၢ်ဖိအဒ့ဒီးသူၣ်လီၤအီၤလၢကစၢၢ်လၢအထီတဖျၢၣ်အဒီခိၣ်,
23 လၢကီၢ်အံၣ်စရ့လးအကစၢၢ်အထီကတၢၢ်တဖျၢၣ်အလိၤန့ၣ်လီၤ. အဒ့တဖၣ်ကဒိၣ်ထီၣ်ဝဲဒီးကသၣ်ထီၣ်အသၣ်ဒီးကဲထီၣ်သ့ၣ်ဆှိ အ့ရ့းလီၤဘီလီၤမုၢ်တထံးလီၤ. ထိၣ်အကလုာ်ကလုာ်ကအိၣ်ဆိးဝဲ ဖဲန့ၣ်ဒီးထံၣ်န့ၢ်တၢ်အိၣ်တဒၢအလီၢ်လၢအကဒုအဖီလာ်န့ၣ်လီၤ.
24 ကယဲၢ်သ့ၣ်ခဲလၢာ်လၢထံကီၢ်န့ၣ်အပူၤကသ့ၣ်ညါဝဲလၢယမ့ၢ်ယွၤ လီၤ. ကကူာ်လီၤကွံာ်သ့ၣ်လၢအထီတဖၣ်ဒီးယမၤထီထီၣ်သ့ၣ်လၢ အဖုၣ်တဖၣ်လီၤ. ယမၤလီၤညွံးလီၤဘဲကွံာ်သ့ၣ်လၢအသံကစဲာ်တဖၣ်ဒီးဒုးကဲထီၣ် သ့ၣ်အဃ့တဖၣ်ဆူသ့ၣ်အသံကစဲာ်တဖၣ်လီၤ. ယၤယွၤအံၤကတိၤလံတၢ်လံ. ယကမၤတၢ်လၢယစံးတ့ၢ်ယဲ လၢယကမၤအီၤန့ၣ်လီၤ.”