16
1-2 ယွၤကတိၤတၢ်ဒီးယၤလီၤ. အဝဲစံးဝဲ, “ပှၤကညီလၢအသံသ့ဧၢ, ဒုးနဲၣ်ဝ့ၢ်ယရူၤၡလ့ၣ်လၢ တၢ်လီၤသးဘၣ်အၢတဖၣ်လၢအမၤတ့ၢ်လံဝဲတက့ၢ်.
3 တဲဘၣ်ဝ့ၢ်ယရူၤၡလ့ၣ်တၢ်လၢယွၤပၢဘၣ်တၢ်ခဲလၢာ်ကစၢ်စံးဘၣ်အီၤ န့ၣ်တက့ၢ်. နအိၣ်ဖျဲၣ်ထီၣ်လၢကီၢ်ကနၤဧၣ်အပူၤလီၤ. နပၢ်မ့ၢ်ပှၤအမိၢ်ဖိတဂၤဒီးနမိၢ်မ့ၢ်ပှၤဃ့ၤသးဖိတဂၤလီၤ.
4 ဖဲနအိၣ်ဖျဲၣ်ထီၣ်န့ၣ်, ပှၤတကူးတဲာ်ဘၣ်နဒ့အပျံၤမ့ၢ်ဂ့ၤ, သ့ကဆှီဘၣ်နၤမ့ၢ်ဂ့ၤ, ထူးနၤလၢအံသၣ်မ့ၢ်ဂ့ၤ, ဒီးဘိၣ်ဘံနၤလၢတၢ်ကံးယာ်မ့ၢ်ဂ့ၤနီတဂၤဘၣ်.
5 ပှၤတသးကညီၤဘၣ်နၤတုၤလၢကမၤတၢ်သ့ၣ်တဖၣ်န့ၣ် တမံၤမံၤလၢနဂီၢ်နီတဂၤဘၣ်. ဖဲနအိၣ်ဖျဲၣ်ထီၣ်န့ၣ်, ပှၤတအဲၣ်နၤနီတဂၤဘၣ်. နဘၣ်တၢ်ကွံာ်တ့ၢ်ကွံာ်နၤလၢတၢ်ပျီပူၤန့ၣ်လီၤ.
6 ဒီးယလဲၤတြူာ်တၢ်ဒီးထံၣ်ဘၣ်နဝံာ်ပကံးနသးလၢနသွံၣ်ဒၣ်နဲအပူၤလီၤ. နဘၣ်တၢ်ကးဘၢနၤလၢတၢ်သွံၣ်, ဘၣ်ဆၣ်ယတပျဲနသံဘၣ်.
7 ယဒုးဒိၣ်ထီၣ်နၤဒ်တၢ်မုၢ်တၢ်ဘိလၢအဂံၢ်အဘါထီၣ်တထံးအသိးန့ၣ် လီၤ. နဒိၣ်ထီၣ်ဒီးတၢ်ဂံၢ်တၢ်ဘါဒီးနနီၢ်ထီထီၣ်ဒီးကဲထီၣ်ပိာ်မုၣ် သးစၢ်တဂၤန့ၣ်လီၤ. နနုၢ်တဖၣ်အက့ၢ်အဂီၤဂ့ၤမး, ဒီးနခိၣ်သူထီထီၣ်, ဘၣ်ဆၣ်နအိၣ်ဘ့ၣ်ဆ့န့ၣ်လီၤ.
8 ဖဲယလဲၤတြူာ်ကဒီးတၢ်န့ၣ်, ယထံၣ်ဘၣ်လၢအကတီၢ်ဘၣ်လံ ဝဲလၢနကအဲၣ်တၢ်ကွံတၢ်အဂီၢ်လီၤ. ယမၤဘၢနနီၢ်ခိလၢအအိၣ်ဘ့ၣ် ဆ့န့ၣ်ဒီးယဆ့ကၤဖီခိၣ်ဒီးအၢၣ်လီၤလၢယကအဲၣ်နၤန့ၣ်လီၤ. မ့ၢ်လီၤ, ယမၤတၢ်တ့တၢ်ဖျီအတၢ်အၢၣ်လီၤတမံၤဒီးနၤ, ဒီးနကဲထီၣ်ယတၢ်န့ၣ်လီၤ. အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ.
9 အန့ၣ်ဝံၤဒီးယဟံးန့ၢ်ထံဒီးသ့ကွံာ်တၢ်သွံၣ်လၢနလိၤန့ၣ်လီၤ. ယဖှူသ့ၣ်စၤယံးအသိလၢနဖံးဘ့ၣ်ခိၣ်လီၤ.
10 ယဒုးကူဒုးသိးထီၣ်နၤလၢဆ့ကၤဆးဒဲးကံၣ်ဒဲးဝ့ၤအသးတဘ့ၣ် ဒီးဟ့ၣ်လီၤနၤခီၣ်ဖံးလၢအဘၣ်တၢ်မၤအီၤလၢတၢ်ဖံးအဂ့ၤကတၢၢ်, ခိၣ်ကျီၤဖှီဝါကဆှၣ်တခါ, ဒီးဆ့ကၤဖးဒိၣ်သတိၢ်တဘ့ၣ်န့ၣ်လီၤ.
11 ယကယၢကယဲထီၣ်နၤလၢတၢ်မျၢ်ပလဲလၢအမ့ၢ်ထံဖှံၣ်တဖၣ်ဒီးဖဲ တဖၣ်န့ၣ်လီၤ.
12 ယဟ့ၣ်လီၤနၤလၢနါဒ့ကွီၤတကွီၤဒီးနၢ်ဒံးတဖၣ်, ဒီးခိၣ်သလုးအဃံအလၤတဖျၢၣ်လၢနကကုာ်ထီၣ်အီၤအဂီၢ်န့ၣ်လီၤ.
13 နအိၣ်ဒီးတၢ်ကယၢကယဲတဖၣ်လၢထူဒီးစ့, ဒီးထီဘိနကူသိးဒၣ်တၢ်ကူတၢ်ကၤဖှီဝါကဆှၣ် လၢတၢ်ဆးဒဲးကံၣ်ဒဲးဝ့ၤအီၤဒီးတၢ်ကူတၢ်ကၤသတိၢ်န့ၣ်လီၤ. နအီၣ်ကိၣ်လၢအဘၣ်တၢ်မၤအီၤလၢကိၣ်ကမူၣ်အဂ့ၤကတၢၢ်ဒီးနအိၣ်ဒီး ကနဲစီဒီးသ့ၣ်စၤယံးအသိလၢနကအီၣ်အီၤအဂီၢ်န့ၣ်လီၤ. နတၢ်ဃံတၢ်လၤန့ၣ်မၤကတုၤပှၤအသး ဒီးနကဲထီၣ်နီၢ်ပၤမုၣ်တဂၤန့ၣ်လီၤ.
14 နကဲထီၣ်ပှၤလၢအမံၤဟူသၣ်ဖျါလၢပှၤကိးကလုာ်ဒဲး အကျါလၢနတၢ်ဃံတၢ်လၤအလၢအပှဲၤအဃိန့ၣ်လီၤ. အဂ့ၢ်ဒ်အံၤ, ယမ့ၢ်တ့ၢ်ပှၤတဂၤလၢအဒုးဃံဒုးလၤနၤထဲထဲအံၤညါန့ၣ်လီၤ. တၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ.
15 ဘၣ်ဆၣ်ဒီးနဟံးန့ၢ်နတၢ်ခွဲးတၢ်ယာ်လၢတၢ်နတၢ်ဃံတၢ်လၤဒီး နတၢ်မံၤဟူသၣ်ဖျါအဖီခိၣ်, လၢနကမံဃုာ်ဒီးပှၤကိးဂၤဒဲးလၢအဟဲဆူနအိၣ်အဂီၢ်န့ၣ်လီၤ.
16 နသူနတၢ်ကူတၢ်သိးတနီၤလၢနကကယၢကယဲနတၢ်ဘူၣ်တၢ်ဘါ အလီၢ်တဖၣ်အဂီၢ်, ဒီးဒ်ပှၤဃဲသဲမုၣ်တဂၤအသိး, နဟ့ၣ်လီၤနသးဆူပှၤကိးဂၤဒဲးအအိၣ်လီၤ.
17 နဟံးန့ၢ်စ့ဒီးထူတၢ်မျၢ်ပလဲလၢယဟ့ၣ်တ့ၢ်နၤတဖၣ်ဒီးသူအီၤ လၢနကမၤကဲထီၣ်ပိာ်ခွါအက့ၢ်အဂီၤတဖၣ်, ဒီးမၤကမၣ်မုၣ်ကမၣ်ခွါဒီးအဝဲသ့ၣ်န့ၣ်လီၤ.
18 နဟံးန့ၢ်တၢ်ကူတၢ်သိးတဖၣ်လၢတၢ်ဆးဒဲးကံၣ်ဒဲးဝ့ၤအီၤန့ၣ် လၢယဟ့ၣ်နၤန့ၣ်ဒီးပာ်ထီၣ်အီၤလၢတၢ်ဂီၤတၢ်ဖီၣ်တဖၣ်အလိၤ, ဒီးနလုၢ်ထီၣ်သ့ၣ်စၤယံးအသိဒီးတၢ်နၢမူလၢယဟ့ၣ်တ့ၢ်နၤဆူ တၢ်ဂီၤတၢ်ဖီၣ်တဖၣ်အံၤအအိၣ်န့ၣ်လီၤ.
19 ယဟ့ၣ်နၤလၢတၢ်အီၣ်လၢအမ့ၢ်ကိၣ်ကမူၣ်အဂ့ၤကတၢၢ်, သ့ၣ်စၤယံးအသိ, ဒီးကနဲစီ, ဘၣ်ဆၣ်ဒီးနလုၢ်ထီၣ်အီၤဒ်တၢ်လုၢ် တၢ်ပာ်တမံၤအသိး, ဒ်သိးနကမၤန့ၢ်တၢ်ဂီၤတၢ်ဖီၣ်တဖၣ်အတၢ်ကွၢ်မဲာ်နၤအဂီၢ်န့ၣ် လီၤ. အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ.
20 ဝံၤဒီး, နဟံးန့ၢ်ဖိခွါတဖၣ်ဒီးဖိမုၣ်တဖၣ်လၢနဆံးစၢ်ထီၣ်န့ၢ်ယၤ, ဒီးလုၢ်ထီၣ်အဝဲသ့ၣ်ဒ်တၢ်လုၢ်တၢ်ပာ်တဖၣ်အသိးဆူတၢ်ဂီၤတၢ်ဖီၣ် ဖၣ်န့ၣ်လီၤ. ထဲနတၢ်သးတတီဒီးယၤန့ၣ်, တအၢတ့ၢ်မးလံ.
21 တၢ်န့ၣ်ဒၣ်လဲာ်တအိၣ်ဃုာ်ဒီးနဟံးန့ၢ်ယဖိတဖၣ်ဒီးလုၢ်ထီၣ်အဝဲ သ့ၣ်ဆူတၢ်ဂီၤတၢ်ဖီၣ်တဖၣ်န့ၣ်ဒံးဘၣ်.
22 ဖဲနအိၣ်မူတၢ်အိၣ်မူလီၤသးဘၣ်အၢဒ်ပှၤဃဲသဲမုၣ်တဂၤ အသိးအကတီၢ်န့ၣ်, နတသ့ၣ်နီၣ်ထီၣ်က့ၤနဖိသၣ်အမုၢ်နံၤတဖၣ်နီတဘျီ, ဖဲနအိၣ်ဘ့ၣ်ဆ့ဒီးတလ့ၣ်ကံးကူးနသးလၢနသွံၣ်ဒၣ်နဲအပူၤ အကတီၢ်န့ၣ်ဘၣ်.”
23 ယွၤပၢဘၣ်တၢ်ခဲလၢာ်ကစၢ်စံးဝဲ, “နကဘၣ်တၢ်စံၣ်ညီၣ်ဃါမနၤ, ဃါမနၤလီၤ. နမၤတၢ်အၢတၢ်သီန့ၣ်ခဲလၢာ်, ဝံၤဒီး,
24 လၢကျဲမုၢ်ကိးဘိဒဲးအသရ့ၤန့ၣ်, နသူၣ်ထီၣ်ဘှီထီၣ်တၢ်လီၢ်တဖၣ် လၢတၢ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်အဂီၢ်ဒီးမၤပှၤဃဲသဲ မုၣ်အတၢ်မၤလီၤ.
25 နကွံာ်လီၤနတၢ်ဃံတၢ်လၤလၢကပံာ်ကျါလီၤ. နဟ့ၣ်လီၤနသး ဆူပှၤကိးဂၤဒဲးလၢအဟဲတြူာ်ဝဲန့ၣ်လီၤ. ဒီးတနံၤဘၣ်တနံၤန့ၣ်, နလီၤဂာ်ဒီးပှၤဃဲသဲမုၣ်ဒံးယံာ်ဒံးအါထီၣ်လီၤ.
26 နပျဲပှၤအဲၤကူပတူးဖိတဖၣ်လၢအအိၣ်လၢနဃၢၤလၢအသးကတၢန့ၣ် ကမံဃုာ်ဒီးနၤလၢလီၢ်မံခးအဖီခိၣ်လီၤ. ဒီးနသူနတၢ်မၤပှၤဃဲသဲမုၣ်အတၢ်မၤလၢကမၤသးထီၣ်ယၤအဂီၢ်န့ၣ် လီၤ.
27 ခဲကနံၣ်အံၤယယူာ်ထီၣ်ယစုလၢတၢ်စံၣ်ညီၣ်နၤအဂီၢ်ဒီးလၢ ယကထုးကွံာ်ယတၢ်ဆိၣ်ဂ့ၤအတၢ်နီၤဟ့ၣ်လၢနဂီၢ်န့ၣ်လီၤ. ယဟ့ၣ်လီၤနၤဆူပှၤဖလ့ၡသးဖိတဖၣ်အစုပူၤ, ပှၤလၢအသးဟ့ နၤဒီးသးဘၣ်အၢနလုၢ်လၢ်အၢသီအတၢ်မၤတဖၣ်န့ၣ်လီၤ.
28 မ့ၢ်လၢပှၤဂၤတဖၣ်တမၤသးမံဒံးနၤဘၣ်အဃိ, နဃ့ၢ်လူၤပိာ်ထွဲ ပှၤအၤၡူၢ်ဖိတဖၣ်အခံန့ၣ်လီၤ. နမ့ၢ်တ့ၢ်အဝဲသ့ၣ်အပှၤဃဲသဲ မုၣ်, ဘၣ်ဆၣ်ဒီးအဝဲသ့ၣ်စ့ၢ်ကီးတမၤသးမံဒံးနၤဘၣ်.
29 နမ့ၢ်စ့ၢ်ကီးပှၤဃဲသဲမုၣ်တဂၤလၢပှၤဘၤဘူၤလိၣ်ဖိတဖၣ် အဂီၢ်, ပှၤတကလုာ်န့ၣ်လၢအမ့ၢ်ပှၤကူၣ်တၢ်ကၤတၢ်တဖၣ်, ဘၣ်ဆၣ်ဒီးအဝဲသ့ၣ်စ့ၢ်ကီးတမၤသးမံဒံးနၤဘၣ်.”
30 အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. “နမၤတ့ၢ်တၢ်အံၤခဲလၢာ်ဒ်ပှၤဃဲသဲမုၣ်တဂၤလၢအတၢ်မဲာ်ဆှး တအိၣ်ဘၣ်အသိးန့ၣ်လီၤ.
31 လၢကျဲဘိကိးဘိဒဲးအလိၤန့ၣ်, နသူၣ်ထီၣ်ဘှီထီၣ်တၢ်လီၢ်တဖၣ် လၢတၢ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်အဂီၢ်ဒီးမၤပှၤဃဲသဲ မုၣ်အတၢ်မၤန့ၣ်လီၤ. ဘၣ်ဆၣ်ဒီးတမ့ၢ်နဃုကျိၣ်ဃုစ့ဒ်ပှၤဃဲသဲမုၣ် ပတီၢ်မုၢ်တဂၤအသိးန့ၣ်ဘၣ်.
32 နလီၤဂာ်ဒီးပိာ်မုၣ်တဂၤလၢအမၤကမၣ်မုၣ်ကမၣ်ခွါဒီးပှၤစီစၣ်တဖၣ်, လၢကအဲၣ်အဝၤဒၣ်ဝဲအလီၢ်န့ၣ်လီၤ.
33 ပှၤဃဲသဲမုၣ်တဂၤန့ၣ်ဘၣ်တၢ်ဟ့ၣ်အီၤတၢ်အပှ့ၤလီၤ. မ့မ့ၢ်နဲနဟ့ၣ်တၢ်ဟ့ၣ်တဖၣ်ဆူပှၤလၢနအဲၣ်အီၤခဲလၢာ်ဒီးဟ့ၣ် အဝဲသ့ၣ်ခိၣ်ဖးလာ်ဆှိးလၢကဟဲလၢတၢ်လီၢ်ကိးပူၤဒဲးလၢ ကမံဃုာ်ဒီးနၤအဂီၢ်လီၤ.
34 နမ့ၢ်ပှၤဃဲသဲမုၣ်တဂၤလၢအလီၤဆီတကလုာ်လီၤ. ပှၤတမၤဆူၣ်နၤနီတဂၤလၢနကကဲထီၣ်ပှၤဃဲသဲမုၣ်အဂီၢ်ဘၣ်. ပှၤတဟ့ၣ်နၤတၢ်အပှ့ၤဘၣ်. နဟ့ၣ်ပှၤတၢ်အပှ့ၤတခီလီၤ. မ့ၢ်လီၤ, နလီၤဆီနဲလီၤ.”
35 မ့မ့ၢ်ဒ်န့ၣ်ဒီးခဲကနံၣ်အံၤ, ဝ့ၢ်ယရူၤၡလ့ၣ်, ပှၤဃဲသဲမုၣ်ဧၢ, ကနၣ်တၢ်လၢယွၤစံးဝဲန့ၣ်တက့ၢ်.
36 အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. “နဘ့ၣ်ကွံာ်နကူနသိးခဲလၢာ်ဒီးဒ်ပှၤဃဲသဲမုၣ်အသိးန့ၣ်, နဟ့ၣ်လီၤနသးဆူပှၤလၢနအဲၣ်အီၤတဖၣ်ဒီးဆူနတၢ်ဂီၤတၢ်ဖီၣ်လၢ အလီၤသးဘၣ်အၢတဖၣ်အအိၣ်, ဒီးနမၤသံနဖိတဖၣ်ဒ်တၢ်လုၢ်တၢ်ပာ်တဖၣ်အသိးဒီးလုၢ်ထီၣ်အီၤ ဆူတၢ်ဂီၤတၢ်ဖီၣ်န့ၣ်လီၤ.
37 လၢတၢ်အံၤအဃိ, ယကဟဲပာ်ဖှိၣ်ပှၤလၢနအဲၣ်တ့ၢ်အီၤလၢညါတဖၣ်တပူၤဃီခဲလၢာ်, ပှၤတဖၣ်လၢနအဲၣ်အီၤဒီးပှၤတဖၣ်လၢနသးဟ့အီၤန့ၣ်လီၤ. ယကဟဲပာ်ဖှိၣ်အဝဲသ့ၣ်ဝးတရံးနၤဒီးကကဝီၤဃာ်နၤလီၤ. အန့ၣ်ဝံၤဒီး, ယကဘ့ၣ်လီၤကွံာ်နကူသိးတဖၣ်ဒီးပျဲအဝဲသ့ၣ်ထံၣ်ဘၣ် နတၢ်အိၣ်ဘ့ၣ်ဆ့န့ၣ်လီၤ.
38 ယကစံၣ်ညီၣ်ဃၣ်နၤလၢတၢ်မၤကမၣ်မုၣ်ကမၣ်ခွါဒီးတၢ်မၤသံတၢ် အဃိ, ဒီးလၢယတၢ်သးဒိၣ်ဒီးသးကဲၤထီၣ်အပူၤန့ၣ်, ယကစံၣ်ညီၣ်နၤလၢတၢ်သံန့ၣ်လီၤ.
39 ယကပာ်နၤလၢအဝဲသ့ၣ်အတၢ်စိတၢ်ကမီၤအဖီလာ်, ဒီးအဝဲသ့ၣ်ကမၤလီၤပှီၢ်ကွံာ်တၢ်လီၢ်တဖၣ်ဖဲနမၤပှၤဃဲသဲမုၣ် အတၢ်မၤဒီးဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်န့ၣ်လီၤ. အဝဲသ့ၣ်ကစိာ်ကွံာ်နကူနသိးတဖၣ်ဒီးတၢ်မျၢ်ပလဲတဖၣ်ဒီးကပာ် လီၤတဲာ်နၤအိၣ်ဘ့ၣ်ဆ့လၢာ်လၢာ်ဆ့ဆ့န့ၣ်လီၤ.
40 အဝဲသ့ၣ်ကထိၣ်ဂဲၤထီၣ်ပှၤဂီၢ်မုၢ်တဖုလၢကကွံာ်နၤလၢလၢၢ်, ဒီးအဝဲသ့ၣ်ကကျီကွံာ်နၤအကူာ်အကူာ်လၢအနးတဖၣ်န့ၣ်လီၤ.
41 အဝဲသ့ၣ်ကဒွဲၣ်အူထီၣ်ကွံာ်နဟံၣ်တဖၣ်ဒီးပျဲပှၤပိာ်မုၣ်ဂီၢ် မုၢ်တဖုထံၣ်ဘၣ်တၢ်စံၣ်ညီၣ်နၤန့ၣ်လီၤ. ယကဒုးဆိကတီၢ်နၤလၢနတၢ်မ့ၢ်ပှၤဃဲသဲမုၣ်တဂၤ, ဒီးဆိကတီၢ်နၤလၢနတၢ်ဟ့ၣ်တဖၣ်ဆူပှၤလၢနအဲၣ်အီၤတဖၣ်န့ၣ်လီၤ.
42 အန့ၣ်ဒီး, ယတၢ်သးထီၣ်ကပူၤကွံာ်, ဒီးယကအိၣ်ဃိကလာ်န့ၣ်လီၤ. ယတသးထီၣ်လၢၤမ့ၢ်ဂ့ၤသူၣ်က့ၣ်သးကါလၢၤမ့ၢ်ဂ့ၤနီတစုဘၣ်.
43 ဖဲနသးစၢ်အခါယမၤဘၣ်နၤဒ်လဲၣ်န့ၣ်, နသးပ့ၤနီၣ်ကွံာ်အီၤလံ. ဒီးနမၤသးဒိၣ်ထီၣ်ယၤခီဖျိတၢ်ခဲလၢာ်လၢနမၤတ့ၢ်အီၤန့ၣ်လီၤ. လၢတၢ်န့ၣ်အဃိဒီး, ယမၢနဟ့ၣ်တၢ်အပှ့ၤလၢတၢ်သ့ၣ်တဖၣ်အံၤခဲလၢာ် အဂီၢ်လီၤ. ဘၣ်မနုၤအဃိနမၤအါထီၣ်တၢ်ကလုာ်ကလိၤလၢတၢ်အဂၤခဲလၢာ်လၢ နမၤတ့ၢ်လၢအလီၤသးဘၣ်အၢတဖၣ်အဖီခိၣ်န့ၣ်လဲၣ်.” ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.
44 ယွၤစံးဝဲဒၣ်, “ဝ့ၢ်ယရူၤၡလ့ၣ်ဧၢ, ပှၤဂီၢ်မုၢ်ကသူတၢ်ကတိၤ ဒိအံၤလၢအဘၣ်ဃးဒီးနၤဒီးစံးဝဲ, ဒ်မိၢ်အသိးန့ၣ်, ဖိမုၣ်မ့ၢ်ဒ်န့ၣ်အသိးလီၤ.
45 နမ့ၢ်နီၢ်နီၢ်နမိၢ်အဖိမုၣ်န့ၣ်လီၤ. အဝဲသးဟ့အဝၤဒီးအဖိ တဖၣ်လီၤ. နလီၤဂာ်ဒီးနဒီပုၢ်ဝဲၢ်မုၣ်တဖၣ်လၢအသးဟ့ အဝၤတဖၣ်ဒီးအဖိတဖၣ်န့ၣ်လီၤ. နၤဒီးနဒီပုၢ်ဝဲၢ်မုၣ်ဝ့ၢ်တဖၣ်အိၣ်ဒီးမိၢ်တဂၤလၢအမ့ၢ်ပှၤ ဃ့ၤသးဖိဒီးသုပၢ်မ့ၢ်ပှၤအမိၢ်ဖိတဂၤန့ၣ်လီၤ.
46 နဝဲၢ်မုၣ်မ့ၢ်ၡၤမရံဒီးအဒူအသဝီတဖၣ်လၢကလံၤစိးတခီန့ၣ် လီၤ. နပုၢ်မုၣ်ဃုာ်ဒီးအဒူသဝီတဖၣ်မ့ၢ်ဝဲဝ့ၢ်စဒိၣ်လၢကလံၤထံး န့ၣ်လီၤ.
47 မ့ၢ်နသးမံတ့ၢ်လၢနကပိာ်အဝဲသ့ၣ်အခီၣ်လီၢ်တဖၣ်ဒီးမၤဒီး အဝဲသ့ၣ်အတၢ်မၤတဖၣ်လၢအလီၤသးဘၣ်အၢန့ၣ်ဧါ. တမ့ၢ်ဘၣ်လၢတစိၢ်ဖိအတီၢ်ပူၤဒၣ်လဲာ်န့ၣ်, နအိၣ်မူအၢန့ၢ်ဒံးအဝဲသ့ၣ်လၢတၢ်ခဲလၢာ်လၢနမၤတ့ၢ်အီၤ အပူၤန့ၣ်လီၤ.
48 ယွၤပၢဘၣ်တၢ်ခဲလၢာ်ကစၢ်စံးဝဲ, ဒ်ယမ့ၢ်ကစၢ်ယွၤလၢ အမူဝဲသပှၢ်ကတၢၢ်အသိး, ယစံးလၢနဒီပုၢ်ဝဲၢ်မုၣ်ဝ့ၢ်စဒိၣ်ဒီး အဒူသဝီတဖၣ်ကမၤတ့ၢ်တၢ်အၢတၢ်သီလၢနၤဒီးနဒူသဝီ တဖၣ်မၤတ့ၢ်ဝဲန့ၣ်ဘၣ်.
49 အဝဲဒီးအဖိမုၣ်တဖၣ်ပာ်ထီၣ်ထီအသးမ့ၢ်လၢအဝဲသ့ၣ်အိၣ်ဒီး တၢ်လၢကအီၣ်ဝဲအါအါဂီၢ်ဂီၢ်, ဒီးအိၣ်ဆိးဝဲလၢတၢ်ဃူတၢ်ဖိးဒီးတၢ်ဘှ့ၣ်တၢ်ဘှီၣ်အပူၤအဃိ, ဘၣ်ဆၣ်ဒီးအဝဲသ့ၣ်တကဟု ကယာ်ပှၤဖှီၣ်ဖိယာ်ဖိပှၤအစုတတုၤလီၤအခီၣ်တတုၤလီၤတဖၣ်န့ၣ်ဘၣ်.
50 အဝဲသ့ၣ်ပာ်ထီၣ်ထီအသးဒီးအခိၣ်ကိၤ, ဒီးမၤတၢ်တဖၣ်လၢယသးဟ့ အီၤ, သတးဒီးယမၤဟးဂီၤတ့ၢ်အဝဲသ့ၣ်ဒ်နသ့ၣ်ညါနဲဂ့ၤမးအသိးန့ၣ် လီၤ.
51 ဝ့ၢ်ၡၤမရံတမၤတၢ်ဒဲးဘးထဲသိးဒီးနမၤတ့ၢ်အီၤတဝာ်ဒၣ်လဲာ်ဘၣ်. နမၤတၢ်လီၤသးဘၣ်အၢအါန့ၢ်အဝဲမၤတ့ၢ်ဝဲတက့ၢ်လီၤ. ဖဲတၢ်ထိၣ်သတြီၤကွၢ်အီၤဒီး, နတၢ်မၤတတီတတြၢ်တၢ်န့ၣ်ဒုးကဲ ထီၣ်နပုၢ်မုၣ်တဖၣ်လၢပှၤလၢအဖျါလၢအတၢ်သရူးကမၣ်တအိၣ်န့ၣ်လီၤ.
52 ဒီးခဲကနံၣ်အံၤ, နကဘၣ်တူၢ်နတၢ်မဲာ်ဆှးန့ၣ်လီၤ. နတၢ်ဒဲးဘးတဖၣ်အၢဒိၣ်န့ၢ်ဒံးနဒီပုၢ်ဝဲၢ်မုၣ်တဖၣ်, တုၤဒၣ်လဲာ်ဖဲတၢ်ထိၣ်သတြီၤအီၤဒီးနၤန့ၣ်, ဖျါလၢအဝဲသ့ၣ်အတၢ်ကမၣ်တအိၣ်ဘၣ်လီၤ. ခဲကနံၣ်အံၤမဲာ်ဆှး, ဒီးဝံယိးနတၢ်မဲာ်ဆှးမ့ၢ်လၢနဒုးကဲထီၣ်နဒီပုၢ်ဝဲၢ်မုၣ်တဖၣ်အိၣ်ဖျါ ကဆှီအဃိတက့ၢ်.”
53 ယွၤစံးဘၣ်ဝ့ၢ်ယရူၤၡလ့ၣ်, “ယကဒုးဘီၣ်ထီၣ်ညီထီၣ်က့ၤကဒီး ဝ့ၢ်စဒိၣ်ဒီးအဒူသဝီတဖၣ်, ဒီးဝ့ၢ်ၡၤမရံဒီးအဒူသဝီတဖၣ်လီၤ. မ့ၢ်လီၤ. ယကဒုးဘီၣ်ထီၣ်ညီထီၣ်နၤစ့ၢ်ကီးလီၤ.
54 နကမဲာ်ဆှးလီၤက့ၤနသးဒၣ်နဲဒီးနတၢ်မဲာ်ဆှးန့ၣ်ကဒုးနဲၣ်ဝဲ လၢနဒီပုၢ်ဝဲၢ်မုၣ်တဖၣ်ဘီၣ်ဝဲညီဝဲဆံးအါလဲၣ်န့ၣ်လီၤ.
55 အဝဲသ့ၣ်ကဘီၣ်ထီၣ်ညီထီၣ်က့ၤကဒီးတဘျီ, ဒီးနၤဒီးနဒူသဝီ တဖၣ်စ့ၢ်ကီးကဘၣ်တၢ်ပာ်ကဒါက့ၤအီၤလၢအလီၢ်န့ၣ်လီၤ.
56 မ့ၢ်နတကတိၤလီၤနံၤဘၣ်ဖၣ်လဲတၢ်ဘၣ်ဃးဒီးဝ့ၢ်စဒိၣ် အဂ့ၢ်, ဖဲမုၢ်နံၤတဖၣ်လၢနပာ်ထီၣ်ထီနသး,
57 ဒီးတချုးဒံးလၢတၢ်အၢတၢ်သီလၢနမၤတ့ၢ်အီၤဘၣ်တၢ်လီၣ်ဖျါ အီၤန့ၣ်ဧါ. အခဲအံၤနလီၤဂာ်ဒၣ်ဒီးအီၤန့ၣ်လီၤ. နကဲထီၣ်တၢ်လီၤနံၤဘၣ်ဖၣ်လဲတမံၤလၢပှၤအဒိၣ်ဖိတဖၣ်, ပှၤဖလ့ၡသးဖိတဖၣ်, ဒီးပှၤလၢနဃၢၤအဂၤတဖၣ်လၢအသးဟ့နၤအဂီၢ်န့ၣ်လီၤ.
58 နကဘၣ်တူၢ်တၢ်လၢတၢ်ကလုာ်ကလိၤဒီးတၢ်လီၤသးဘၣ်အၢ တဖၣ်လၢနမၤတ့ၢ်အီၤအဃိန့ၣ်လီၤ.” ယွၤကတိၤလံတၢ်လံ.
59 ယွၤပၢဘၣ်တၢ်ခဲလၢာ်ကစၢ်စံးဝဲ, “ယကမၤနၤဒ်နကြၢးဘၣ်တၢ်မၤ နၤအသိး, မ့ၢ်လၢနတပာ်ကဲနတၢ်အၢၣ်လီၤတဖၣ်ဒီးမၤဟးဂီၤ တၢ်အၢၣ်လီၤအီလီၤအဃိန့ၣ်လီၤ.
60 ဘၣ်ဆၣ်ဒီးယကပာ်ကဲဒီးဟံးဃာ်တၢ်အၢၣ်လီၤအီလီၤလၢယမၤဒီးနၤ ဖဲနသးစၢ်အခါန့ၣ်ဒီးယကမၤတၢ်အၢၣ်လီၤအီလီၤတမံၤဒီးနၤလၢ ကအိၣ်ဂၢၢ်ဆိးကျၢၤဝဲလီၤထူလီၤယိာ်လီၤ.
61 နကသ့ၣ်နီၣ်ထီၣ်က့ၤလၢနမၤတ့ၢ်တၢ်ဒ်လဲၣ်ဒီးမဲာ်ဆှးလၢတၢ်န့ၣ် အဃိဖဲနမၤန့ၢ်က့ၤနဝဲၢ်မုၣ်ဒီးနပုၢ်မုၣ်အဆၢကတီၢ်န့ၣ်လီၤ. ယကပျဲအဝဲသ့ၣ်ကဲထီၣ်ဒ်ဖိမုၣ်တဖၣ်အသိးလၢနဂီၢ်, ဖဲတၢ်အံၤမ့တမ့ၢ်တၢ်လၢအအိၣ်လၢယတၢ်အၢၣ်လီၤအီၤလီၤဒီးနၤ အပူၤဒၣ်လဲာ်န့ၣ်လီၤ.
62 ယကမၤသီထီၣ်က့ၤယတၢ်အၢၣ်လီၤအီလီၤဒီးနၤ, ဒီးနကသ့ၣ်ညါလၢယမ့ၢ်ယွၤန့ၣ်လီၤ.
63 ယကပျၢ်တၢ်ကမၣ်တၢ်တဖၣ်လၢနမၤတ့ၢ်အီၤခဲလၢာ်, ဘၣ်ဆၣ်ဒီးနကသ့ၣ်နီၣ်တၢ်တဖၣ်န့ၣ်, ဒီးနကမဲာ်ဆှးကဲၣ်ဆိးလၢနကအဲးထီၣ်နထးခိၣ်အဂီၢ်န့ၣ်လီၤ.” ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.