1-2 ယွၤကတိၤတၢ်ဒီးယၤလီၤ. အဝဲစံးဝဲ, “ပှၤကညီလၢအသံသ့ဧၢ, စပံးမုၢ်တမုၢ်ဒီးသ့ၣ်တထူၣ် န့ၣ်တၢ်ထိၣ်သတြီၤအီၤဒ်လဲၣ်. စပံးမုၢ်တမုၢ်အဒ့ဒီးသ့ၣ်တဖၣ်လၢပှၢ်လၢ်ကျါနထိၣ်သတြီၤအီၤ အဘျုးမနုၤကအိၣ်လဲၣ်. 3 နသူအီၤလၢနမၤတၢ်တမံၤမံၤအဂီၢ်ကသ့ဧါ. နမၤကဲထီၣ်နီၣ်စဲ တဘိလၢအီၤလၢနကဘျးလီၤစဲၤတၢ်လၢအလိၤဒၣ်လဲာ်ဘၣ်ကသ့ဧါ. 4 ဂ့ၤဒၣ်ထဲလၢနကမၤကဲၤထီၣ်မ့ၣ်အူအဂီၢ်န့ၣ်လီၤ. ဒီးဖဲအစိးနါတဖၣ်မ့ၣ်အူအီၣ်ကွံာ်အီၤဒီးအခၢၣ်သးကိၢ်ဃၢၣ် ကွံာ်န့ၣ်, နဒုးကဲထီၣ်တၢ်တမံၤမံၤလၢအီၤဘၣ်ကသ့ဧါ. 5 တချုးလၢမ့ၣ်အူအီၣ်ကွံာ်အီၤဒံးဒၣ်လဲာ်, နသူအီၤတသ့ဘၣ်. ဒီးခဲအံၤတုၤမ့ၣ်အူအီၣ်ကွံာ်အီၤဒီးကိၢ်ဃၢၣ်ဝဲန့ၣ်, နသူအီၤတသ့ ဒိၣ်တက့ၢ်ဒၣ်လဲာ်န့ၣ်လီၤ. 6 ဒီးခဲအံၤ, တၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. ဒ်စပံးမုၢ်တမုၢ်ဘၣ်တၢ်ဟံးထီၣ်ကွံာ်အီၤလၢပှၢ်လၢ်ကျါဒီးဘၣ် တၢ်ဒွဲၣ်အူကွံာ်အီၤအသိးန့ၣ်, ယကဟံးန့ၢ်ပှၤဂီၢ်မုၢ်လၢအအိၣ်ဆိးလၢဝ့ၢ်ယရူၤၡလ့ၣ်အပူၤ, 7 ဒီးယကစံၣ်ညီၣ်အဝဲသ့ၣ်န့ၣ်လီၤ. အဝဲသ့ၣ်ထူၣ်ဖျဲးထီၣ်တ့ၢ်လံ လၢမ့ၣ်အူတဘျီ, ဘၣ်ဆၣ်ဒီးခဲအံၤမ့ၣ်အူကအီၣ်ကွံာ်အဝဲသ့ၣ် န့ၣ်လီၤ. ဖဲယစံၣ်ညီၣ်အဝဲသ့ၣ်န့ၣ်, သုကသ့ၣ်ညါလၢယမ့ၢ်ယွၤန့ၣ်လီၤ. 8 အဝဲသ့ၣ်အသးတတီတ့ၢ်ဒီးယၤဘၣ်, ဒီးလၢတၢ်န့ၣ်အဃိ, ယကဒုးကဲထီၣ်ထံကီၢ်လၢပှၢ်မုၢ်ကနၢတတီၤန့ၣ်လီၤ.” ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.