11
1 ကစၢ်ယွၤအသးစိာ်ထီၣ်ယၤဒီးဆှၢယၤဆူ ယွၤအတၢ်လုၢ်ဟံၣ်အတြဲၤလီၤ. ဘူးဒီးတြဲၤဖဲန့ၣ်, ယထံၣ်ဘၣ်ပှၤဃုဆံယဲၢ်ဂၤ, အိၣ်ဃုာ်ဒီးစီၤဧၤစူၢ်အဖိခွါစီၤယၤစါနယၤ, ဒီးစီၤဘနါယၤအဖိခွါစီၤပလၤတယၤ, လၢအမ့ၢ်ပှၤကလုာ်အခိၣ် အနၢ်ခံဂၤန့ၣ်လီၤ.
2 ကစၢ်ယွၤစံးဘၣ်ယၤ, “ပှၤကညီလၢအသံသ့ဧၢ, ပှၤတဖၣ်အံၤ ကူၣ်ထီၣ်တၢ်အၢတၢ်သီဒီးလၢဝ့ၢ်အံၤအပူၤန့ၣ်အဝဲသ့ၣ်ဟ့ၣ်ကူၣ် တၢ်လၢအတဂ့ၤတဖၣ်လီၤ.
3 အဝဲသ့ၣ်စံးလၢ, တယံာ်လၢၤဘၣ်န့ၣ်ပကသူၣ်ထီၣ်ဘှီထီၣ်ကဒီးဟံၣ် တဖၣ်လီၤ. ဝ့ၢ်အံၤလီၤဂာ်ဒီးတၢ်ဖီအီၣ်တ့ၤအီၣ်သပၢၤတဖျၢၣ်, ဒီးပလီၤဂာ်ဒီးတၢ်ညၣ်အိၣ်လၢအပူၤ, ဘၣ်ဆၣ်ဒီးအစှၤကတၢၢ်န့ၣ် ပဘၣ်တၢ်ဒီဒၣ်ပှၤလၢမ့ၣ်အူကစီဒီန့ၣ်လီၤ.
4 အဃိဒီးအခဲအံၤ, ပှၤကညီလၢအသံသ့ဧၢ, စံးလၢအဝဲသ့ၣ်ဂ့ၤဘၣ် တၢ်စံၣ်ညီၣ်န့ၣ်တက့ၢ်.”
5 ယွၤအသးလီၤဘၣ်လၢယလိၤ, ဒီးယွၤတဲဘၣ်ယၤလၢယကဟ့ၣ်လီၤ တၢ်ကစီၣ်အံၤဆူပှၤဂီၢ်မုၢ်န့ၣ်လီၤ. “ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, တၢ်လၢသုစံးကတိၤဒီးသုကူၣ်ကျဲၤအီၤန့ၣ်, ယသ့ၣ်ညါယဲလီၤ.
6 သုမၤသံတ့ၢ်ပှၤဂီၢ်မုၢ်အါမးလၢဝ့ၢ်အံၤအပူၤတုၤဒၣ်လဲာ်, ကျဲဘိတဖၣ်ပှဲၤဝဲဒီးတၢ်အစိၣ်တဖၣ်န့ၣ်လီၤ.
7 လၢတၢ်န့ၣ်အဃိဒီး, အအံၤမ့ၢ်တၢ်လၢယၤ, ယွၤပၢတၢ်ခဲလၢာ်ကစၢ်, စံးဘၣ်သုန့ၣ်လီၤ. ဝ့ၢ်အံၤမ့ၢ်တၢ်တ့ၤအီၣ်ဖီအီၣ်အသပၢၤတဖျၢၣ်ကစီဒီ, ဘၣ်ဆၣ်တၢ်ညၣ်မ့ၢ်တၢ်မနုၤလဲၣ်. မ့ၢ်တၢ်အစိၣ်တဖၣ်လၢသုမၤသံ တ့ၢ်န့ၣ်လီၤ. သုတအိၣ်ဘၣ်ဖဲအံၤလၢၤဘၣ်. ယကကွံာ်ထီၣ်သုလၢဝ့ၢ်အံၤအချၢလီၤ.
8 မ့ၢ်သုပျံၤနးတဖၣ်ကစီဒီဧါ. ယကမၢလီၤပှၤလၢအအိၣ်ဒီးနး တဖၣ်လၢအကဟဲထီၣ်ဒုးသုန့ၣ်လီၤ.
9 ယကဟံးထီၣ်သုလၢဝ့ၢ်အပူၤဒီးဟ့ၣ်လီၤသုဆူပှၤတခီဘီမုၢ် ဖိတဖၣ်အစုပူၤလီၤ. ယစံၣ်ညီၣ်လံသုလံ,
10 ဒီးသုကဘၣ်တၢ်မၤသံသုလၢတၢ်ဒုးတၢ်ယၤအပူၤလၢသုထံ သုကီၢ်ဒၣ်ဝဲအပူၤလီၤ. တုၤနုၤတစုပှၤကိးဂၤဒဲးကသ့ၣ်ညါလၢ ယမ့ၢ်ယွၤန့ၣ်လီၤ.
11 ဝ့ၢ်အံၤတဒီဒၣ်အိၣ်ပှိၤသုဒ်သပၢၤတဖျၢၣ်ဒီဒၣ်အိၣ်ပှိၤတၢ်ညၣ်လၢ အိၣ်လၢအပူၤအသိးန့ၣ်ဘၣ်. ယကစံၣ်ညီၣ်သုဖဲသုအိၣ်တပူၤဂ့ၤတပူၤဂ့ၤလၢကီၢ်အံၣ်စရ့လး အပူၤန့ၣ်လီၤ.
12 သုကသ့ၣ်ညါလၢယမ့ၢ်ယွၤ, ဒီးဖဲသုဟံးဃာ်ဒံးပှၤကလုာ်လၢသု ဃၢၤတဖၣ်အတၢ်သိၣ်တၢ်သီတဖၣ်အဖၢမုၢ်န့ၣ်, မ့ၢ်သုထီဒါယတၢ်သိၣ်တၢ်သီတဖၣ်လၢပှၤယူဒၤဖိအဂီၢ်ဒီးတစူၢ် ဘၣ်ယတၢ်မၤလိာ်တဖၣ်ဘၣ်န့ၣ်လီၤ.”
13 ဖဲယကတိၤတၢ်လၢဝံအကျိာ်အဖၢမုၢ်န့ၣ်, စီၤပလၤတယၤလီၤဃံၤသံဝဲလီၤ. ယထိၣ်လီၤဃံၤအီထီလာ်ယသးလၢဟီၣ်ခိၣ်လိၤဒီးကိးသတြီထီၣ်, ယွၤပၢဘၣ်တၢ်ဘၣ်တ့ခဲလၢာ်ကစၢ်ဧၢ, တဘၣ်မၤဒ်န့ၣ်တဂ့ၤ. မ့ၢ်နမၤသံပှၤကိးဂၤဒဲးလၢအအိၣ်လီၤတဲာ်လၢကီၢ်အံၣ်စရ့လး အပူၤအံၤန့ၣ်ဧါ.
14-15 ယွၤကတိၤတၢ်ဒီးယၤလီၤ. အဝဲစံးဝဲဒၣ်, “ပှၤကညီလၢအသံသ့ဧၢ, ပှၤဂီၢ်မုၢ်လၢအအိၣ်လၢ ဝ့ၢ်ယရူၤၡလ့ၣ်အပူၤတဖၣ်စံးကတိၤတၢ်ဘၣ်ဃးဒီးနၤဒီးနပှၤအံၣ် စရ့လးဖိကဒဲကဒဲလၢအအိၣ်လၢတၢ်စိာ်မၢကဲကုၢ်အပူၤအဂ့ၢ်လီၤ. အဝဲသ့ၣ်စံးလၢပှၤဘၣ်တၢ်စိာ်မၢကဲကုၢ်တဖၣ်အိၣ်ယံၤကဲၣ်ဆိးလၢ ကဘူၣ်ထီၣ်ဘါထီၣ်ယွၤအဂီၢ်လီၤ. ယွၤဟ့ၣ်လီၤလံပှၤလၢထံဧိၤကီၢ်ဧိၤလၢအကကဲထီၣ်ပတၢ်န့ၣ်လီၤ.
16 ခဲကနံၣ်အံၤ, တၢ်လၢယစံးယဲန့ၣ်, စံးဘၣ်တဲဘၣ်ပှၤတဖၣ်လၢအဘၣ် တၢ်စိာ်မၢကဲကုၢ်သကိးဒီးနၤတက့ၢ်. ယမ့ၢ်ပှၤတဂၤလၢအဆှၢလီၤအဝဲသ့ၣ်လၢကလဲၤအိၣ်လဲၤဆိးလၢပှၤ ကလုာ်လၢအယံၤတဖၣ်အကျါ, ဒီးမၤလီၤပြံလီၤပြါအဝဲသ့ၣ်လၢထံဂုၤကီၢ်ဂၤတဖၣ်အပူၤန့ၣ်လီၤ. သနာ်က့, လၢတၢ်ဆၢကတီၢ်ဒ်အံၤအပူၤန့ၣ်, ယကအိၣ်လၢအဝဲသ့ၣ် အသိးအကျါလၢထံကီၢ်တဖၣ်လၢအဝဲသ့ၣ်လဲၤတ့ၢ်လံဝဲအပူၤန့ၣ်လီၤ.
17 လၢတၢ်န့ၣ်အဃိ, တဲဘၣ်အဝဲသ့ၣ်တၢ်လၢယၤ, ယွၤပၢဘၣ်တၢ်ခဲလၢာ် ကစၢ်စံးဝဲန့ၣ်တက့ၢ်. ‘ယကထုးထီၣ်က့ၤအဝဲသ့ၣ်လၢထံကီၢ်တဖၣ်လၢယမၤလီၤပြံလီၤပြါ တ့ၢ်အဝဲသ့ၣ်အပူၤ, ဒီးထၢဖှိၣ်ပာ်ဖှိၣ်က့ၤအီၤဒီးယကဟ့ၣ်လီၤက့ၤကီၢ်အံၣ်စရ့လး ဆူအဝဲသ့ၣ်အစုပူၤန့ၣ်လီၤ.
18 ဖဲအဝဲသ့ၣ်ဟဲက့ၤကဒါက့ၤန့ၣ်, အဝဲသ့ၣ်ကဘၣ်မၤဟးဂီၤကွံာ် ကယဲၢ်တၢ်ဂီၤတၢ်ဖီၣ်တဖၣ်လၢအဘၣ်အၢဘၣ်သီဒီး အလီၤသးဘၣ်အၢလၢအထံၣ်ဝဲန့ၣ်လီၤ.
19 ယကဟ့ၣ်လီၤအဝဲသ့ၣ်လၢသးအကံၢ်အလဲအသီဒီးသးလၢ အသ့ၣ်ညါဒၣ်တၢ်အသီလီၤ. ယကဟံးထီၣ်ကွံာ်အဝဲသ့ၣ်အသးလၢအကိၤဒ်လၢၢ်အသိးဒီးဟ့ၣ်လီၤ အဝဲသ့ၣ်လၢသးလၢအစူၢ်တၢ်တဖျၢၣ်န့ၣ်လီၤ.
20 အန့ၣ်ဒီး, အဝဲသ့ၣ်ကတိၢ်န့ၢ်ဖံးဃာ်ယတၢ်သိၣ်တၢ်သီတဖၣ်လၢပှၤ ယူဒၤဖိအဂီၢ်ဒီးစူၢ်ယတၢ်မၤလိာ်ခဲလၢာ်လၢတၢ်သူၣ်တီသးရၤအပူၤ န့ၣ်လီၤ. အဝဲသ့ၣ်ကကဲထီၣ်ယပှၤဂီၢ်မုၣ်ဒီးယကမ့ၢ်အဝဲသ့ၣ် အကစၢ်ယွၤန့ၣ်လီၤ.
21 ဘၣ်ဆၣ်ဒီးယကစံၣ်ညီၣ်ပှၤဂီၢ်မုၢ်လၢအအဲၣ်ဘူၣ်ထီၣ်ဘါထီၣ်တၢ်ဂီၤ တၢ်ဖီၣ်တဖၣ်လၢအဘၣ်အၢဘၣ်သီဒီးအလီၤသးဘၣ်အၢန့ၣ်လီၤ. ယကစံၣ်ညီၣ်အဝဲသ့ၣ်လၢတၢ်လၢအဝဲသ့ၣ်မၤတ့ၢ်ဝဲအဃိလီၤ. ယွၤပၢဘၣ်တၢ်ခဲလၢာ်ကစၢ်, ကတိၤလံတၢ်လံ.’ ”
22 တၢ်ဘၣ်တ့အမူတဖၣ်စးထီၣ်ယူၤဝဲဒီးလ့ၣ်ဖံဘၣ်တဖၣ်လဲၤဃုာ်ဒီး အဝဲသ့ၣ်လီၤ. ကီၢ်အံၣ်စရ့လးအကစၢ်ယွၤအတၢ်အိၣ်ဝဲအတၢ် ကပီၤဆဲးကပြုၢ်အိၣ်လၢအဝဲသ့ၣ်အဖီခိၣ်လီၤ.
23 ဝံၤဒီး, တၢ်ကပီၤဆဲးကပြုၢ်ဟးထီၣ်ကွံာ်လၢဝ့ၢ်အပူၤဒီးသုး အသးဆူကစၢၢ်လၢမုၢ်ထီၣ်တခီန့ၣ်လီၤ.
24 လၢတၢ်ထံၣ်လၢညါခီအံၤအပူၤန့ၣ်, ကစၢ်ယွၤအသးစိာ်ထီၣ်ယၤဒီး ဟဲက့ၤစိာ်က့ၤယၤဆူပှၤဘၣ်တၢ်စိာ်မၢကဲကုၢ်တဖၣ်အအိၣ်လၢကီၢ် ဘၤဘူၤလိၣ်အပူၤန့ၣ်လီၤ. ဝံၤဒီးတၢ်ထံၣ်လၢညါခီအံၤလီၤမၢ်ကွံာ်ဝဲ,
25 ဒီးယစံးဘၣ်တဲဘၣ်ပှၤဘၣ်တၢ်စိာ်မၢကဲကုၢ်တဖၣ်, တၢ်ကိးမံၤဒဲးလၢယွၤဒုးနဲၣ်တ့ၢ်ယၤန့ၣ်လီၤ.