10
1 ယကွၢ်တၢ်ခိၣ်ဒုးဖျၢၣ်သလၢၣ်လၢအအိၣ်လၢတၢ်ဘၣ်တ့ အမူတဖၣ်အဖီခိၣ်ဒီးလၢအဝဲသ့ၣ်အဖီခိၣ်န့ၣ်,
တၢ်မၤအသးလီၤဂာ်ဒီးလီၢ်ပစိာ်တခါလၢအဘၣ်
တၢ်မၤအီၤလၢတၢ်မျၢ်နံၤလါ, အိၣ်ဝဲလီၤ.
2 ကစၢ်ယွၤစံးဘၣ်ပှၤတဂၤလၢအကူကၤဖှီဝါကဆှၣ်န့ၣ်ဒီးစံးဝဲ, “လဲၤတၢ်လၢလ့ၣ်ဖံဘၣ်အကဆူးလၢတၢ်ဘၣ်တ့တဖၣ်အံၤအဖီလာ်ဒီးမၤ ပှဲၤနစုညါသးဒီးမ့ၣ်အူကဖးတဖၣ်တက့ၢ်. ဝံၤဒီး, မၤလီၤပြံလီၤပြါမ့ၣ်အူကဖးတဖၣ်လၢဝ့ၢ်အဖီခိၣ်န့ၣ်တက့ၢ်. ယကွၢ်အဝဲလဲၤတၢ်န့ၣ်လီၤ.”
3 တၢ်ဘၣ်တ့တဖၣ်ဆၢထၢၣ်ဝဲလၢယွၤအတၢ်လုၢ်ဟံၣ်ကလံၤထံး တကပၤဖဲအဝဲလဲၤနုာ်ဝဲအဆၢကတီၢ်, ဒီးတၢ်အၢၣ်တလိၣ်မၤပှဲၤယွၤအတၢ်လုၢ်ဟံၣ်အဂၢၤလၢအအိပူၤ
တခီန့ၣ်လီၤ.
4 ယွၤအိၣ်ဝဲဆိးဝဲအတၢ်ကပီၤဆဲးကပြုၢ်ကပြီၤဟဲထီၣ်ဝဲလၢတၢ် ဘၣ်တ့တဖၣ်အအိၣ်, ဒီးသုးဘူးအသးဆူယွၤအတၢ်လုၢ်ဟံၣ်
အကျဲစၢၤန့ၣ်လီၤ. ဝံၤဒီး, တၢ်အၢၣ်မၤပှဲၤယွၤအတၢ်လုၢ်ဟံၣ်, ဒီးဂၢၤန့ၣ်ဆဲးကပြုၢ်ဝဲဒီးတၢ်ကပီၤန့ၣ်လီၤ.
5 တၢ်အသီၣ်လၢအဟဲထီၣ်လၢတၢ်ဘၣ်တ့တဖၣ်အံၤအဒံးဆ့တဖၣ်န့ၣ်, ဘၣ်တၢ်နၢ်ဟူအီၤလၢယွၤအတၢ်လုၢ်ဟံၣ်အဂၢၤအချၢဒၣ်လဲာ်သ့ဝဲ လီၤ. အတၢ်သီၣ်လီၤဂာ်ဒီးကစၢ်ယွၤသ့တၢ်လၢာ်အကလုၢ်န့ၣ်လီၤ.
6 ဖဲယွၤမၤလိာ်ပှၤတဂၤလၢအကူကၤဖှီဝါကဆှၣ်ဒ်သိးကဟံးန့ၢ် မ့ၣ်အူတနီၤလၢလ့ၣ်ဖံဘၣ်တဖၣ်အကဆူးလၢအအိၣ်လၢတၢ်ဘၣ်တ့
တဖၣ်အံၤအဖီလာ်န့ၣ်, အဝဲလဲၤနုာ်ဝဲဒီးဆၢထၢၣ်လၢလ့ၣ်ဖံဘၣ်တဖၣ်အကျါတခါအကပၤ
န့ၣ်လီၤ.
7 တၢ်ဘၣ်တ့တဖၣ်အကျါတဂၤယူာ်ဃီၤအစုဆူ, မ့ၣ်အူလၢအအိၣ်လၢအဝဲသ့ၣ်အကျါအပူၤ,
ထၢထီၣ်မ့ၣ်အူကဖးတနီၤ, ဒီးဒၢနုာ်အီၤဆူပှၤတဂၤလၢအကူကၤတၢ်ဖှီဝါကဆှၣ်အစုပူၤ
န့ၣ်လီၤ. ပှၤတဂၤန့ၣ်ဟံးန့ၢ်မ့ၣ်အူကဖးတဖၣ်ဒီးဟးထီၣ်ဝဲလီၤ.
8 ယထံၣ်ဘၣ်လၢတၢ်ဘၣ်တ့တဂၤစုာ်စုာ်အိၣ်ဒီးတၢ်လၢအလီၤဂာ်ဒီးပှၤ ကညီအစုတခီလၢအဒံးဆ့တခီစုာ်စုာ်အဖီလာ်န့ၣ်လီၤ.
9 ယထံၣ်စ့ၢ်ကီးလၢလ့ၣ်ဖံဘၣ်အိၣ်ဝဲလွံၢ်ခါလၢအလီၤဂာ်လိာ်အသး ဒီးတခါအိၣ်ဝဲလၢတၢ်ဘၣ်တ့တဂၤစုာ်စုာ်အကပၤန့ၣ်လီၤ.
10 လ့ၣ်ဖံဘၣ်တဖၣ်အံၤကပီၤထီၣ်ဝဲဒ်လၢၢ်လုၢ်ဒိၣ်ပှ့ၤဒိၣ်တဖၣ်အ သိး, ဒီးတခါစုာ်စုာ်န့ၣ်လဲၤခီတူာ်လိာ်အသးမၤအသးဒ်လ့ၣ်ဖံဘၣ်
တခါအိၣ်ဝဲလၢလ့ၣ်ဖံဘၣ်အဂၤတခါအပူၤအသိးန့ၣ်လီၤ.
11 ဖဲတၢ်ဘၣ်တ့တဖၣ်အံၤသုးအသးန့ၣ်အဝဲသ့ၣ်လဲၤဝဲဖဲအမဲာ်ကွၢ် တၢ်တကျိၤဂ့ၤတကျိၤဂ့ၤသ့, ဒီးဃၣ်အသးအလီၢ်တအိၣ်ဘၣ်. အဝဲသ့ၣ်သုးအသးတပူၤဃီဆူအမဲာ်ကွၢ်တၢ်အကျိၤလၢအဝဲသ့ၣ်သး
အိၣ်လဲၤဝဲ, ဒီးအဝဲသ့ၣ်ဃၣ်တရံးအသးအလီၢ်တအိၣ်ဘၣ်.
12 အဝဲသ့ၣ်အနီၢ်ခိတဖၣ်, အချၢဃံတဖၣ်, အစုတဖၣ်, အဒံးဆ့တဖၣ်, ဒီးလ့ၣ်ဖံဘၣ်တဖၣ်ပှဲၤဝဲဒီးမဲာ်ချံတဖၣ်န့ၣ်လီၤ.
13 လ့ၣ်ဖံဘၣ်တဖၣ်အံၤဒ်သိးသိးဒၣ်ဒီးတၢ်လၢယထံၣ်ဘၣ်တ့ၢ်ယဲလၢ ယတၢ်ထံၣ်လၢညါခီအဆိကတၢၢ်တဘျီအပူၤန့ၣ်လီၤ.
14 တၢ်ဘၣ်တ့တဖၣ်စုာ်စုာ်အမဲာ်သၣ်အိၣ်လွံၢ်ဘ့ၣ်လီၤ. အခီၣ်ထံးကတၢၢ်တခါမ့ၢ်ကျီၢ်ဖါအမဲာ်သၣ်, ခံခါတခါမ့ၢ်ခ့ယုၢ် အမဲာ်သၣ်, သၢခါတခါမ့ၢ်ပှၤကညီအမဲာ်သၣ်, ဒီးလွံၢ်ခါတခါမ့ၢ်လံာ်ကြီ
ကြာ်အမဲာ်သၣ်န့ၣ်လီၤ.
15 (အဝဲသ့ၣ်မ့ၢ်တၢ်ဒ်သိးသိးဒၣ်ဒီးတၢ်ဘၣ်တ့တဖၣ်လၢယထံၣ်န့ၢ်ယဲ ဖဲထံကျိကဘၢ်အကပၤန့ၣ်လီၤ.)
ဖဲတၢ်ဘၣ်တ့တဖၣ်အံၤဂဲၤထၢၣ်လၢကလံၤကျါ,
16 ဒီးသုးအသးန့ၣ်လ့ၣ်ဖံဘၣ်တဖၣ်သုးဃုာ်အသးဒီးအဝဲသ့ၣ်န့ၣ် လီၤ.တဘျီလၢ်လၢ်ဖဲအဝဲသ့ၣ်သလၣ်ထီၣ်အဒံးဆ့တဖၣ်လၢကယူၤဝဲ
အဂီၢ်န့ၣ်, လ့ၣ်ဖံဘၣ်တဖၣ်သုးဒံးဒၣ်အသးဒီးအဝဲသ့ၣ်န့ၣ်လီၤ.
17 ဖဲတၢ်ဘၣ်တ့တဖၣ်အိၣ်ကတီၢ်ဝဲန့ၣ်, လ့ၣ်ဖံဘၣ်တဖၣ်အိၣ်ကတီၢ်ဝဲလီၤ. ဒီးဖဲတၢ်ဘၣ်တ့တဖၣ်ယူၤဝဲဒီး, လ့ၣ်ဖဲဘၣ်တဖၣ်သုးဃုာ်ဒီးအဝဲသ့ၣ်, မ့ၢ်လၢတၢ်ဘၣ်တ့တဖၣ်ပၢဆှၢတ့ၢ်အဝဲသ့ၣ်အဃိန့ၣ်လီၤ.
18 ဝံၤဒီးယွၤအိၣ်ဝဲဆိးဝဲအတၢ်ကပီၤကပြုၢ်ကပြီၤဟးထီၣ်ဝဲ လၢယွၤအတၢ်လုၢ်ဟံၣ်အကျဲစၢၤဒီးသုးအသးဆူတၢ်လီၢ်တတီၤလၢ
အအိၣ်လၢတၢ်ဘၣ်တ့တဖၣ်အဖီခိၣ်န့ၣ်လီၤ.
19 အဝဲသ့ၣ်သလၣ်ထီၣ်အဒံးဆ့တဖၣ်ဒီးယူၤထီၣ်ဝဲလၢဟီၣ်ခိၣ်အဖီ ခိၣ်ဖဲယကွၢ်တၢ်အဖၢမုၢ်,
ဒီးလ့ၣ်ဖံဘၣ်တဖၣ်သုးဃုာ်ဒီးအဝဲသ့ၣ်န့ၣ်လီၤ. အဝဲသ့ၣ်အိၣ်ကတီၢ်တစိၢ်ဖိဖဲယွၤအတၢ်လုၢ်ဟံၣ်မုၢ်ထီၣ်အတြဲၤ, ဒီးတၢ်ကပီၤဆဲးကပြုၢ်ကပြီၤထီၣ်လၢအဝဲသ့ၣ်အဖီခိၣ်လီၤ.
20 ယသ့ၣ်ညါနီၣ်အဝဲသ့ၣ်ဒ်အမ့ၢ်တၢ်ဒ်သိးသိးဒီးတၢ်ဘၣ်တ့တဖၣ်လၢ ယထံၣ်ဘၣ်တ့ၢ်အီၤလၢကီၢ်အံၣ်စရ့လးအကစၢ်ယွၤအဂီၤထံးဖဲထံ
ကျိကဘၢ်အကပၤန့ၣ်လီၤ.
21 အဝဲသ့ၣ်တဂၤစုာ်စုာ်အိၣ်ဒီးအမဲာ်သၣ်လွံၢ်ဘ့ၣ်, အဒံးဆ့လွံၢ်ခီ, ဒီးတၢ်လၢပကွၢ်ဖျါလီၤဂာ်ဒီးပှၤကညီအစုတခီလၢအဒံးဆ့တခီ
စုာ်စုာ်အဖီလာ်န့ၣ်လီၤ.
22 အဝဲသ့ၣ်အမဲာ်သၣ်တဖၣ်လီၤဂာ်တမံၤဃီဒ်သိးသိးဒၣ်မဲာ်သၣ်တဖၣ်လၢ ယထံၣ်တ့ၢ်အီၤဖဲထံကျိကဘၢ်အကပၤန့ၣ်လီၤ. တၢ်ဘၣ်တ့တဂၤ
စုာ်စုာ်သုးအသးလိၤလိၤဘျၢဘျၢဆူတၢ်မဲာ်ညါန့ၣ်လီၤ.